Møte i Formannskapet den 20.08.2020

Behandling

Handsaming i formannskapet: Samrøystes for rådmannens framlegg til vedtak.

Behandling

Handsaming i formannskapet:
Samrøystes for rådmannens framlegg til vedtak.

Behandling

Om vedtaket frå eldrerådet 4. august, oversendt til formannskapet, vedrørande nett-tilkopling på Nordliheimen:

Ordførar Per Lerøy (Ap) ba om at rådmannen får førebudd ei sak på oppgradering av internett-tilbodet både til Nordliheimen og til dei som bur i området. Lerøy sa vidare at det er ei TV-løysing på Nordliheimen som ikkje er god nok. Det må bli slik at både brukarane og dei besøkande har tilgang, slik det normalt er elles.

Helge Dyrkolbotn (KrF) viste til at det eksisterande nett-tilbodet ikkje tilfredsstiller kravet til universell utforming. Ein må bruka passord og tilsendt kode, og vert kasta ut av nettet stadig vekk. Dyrkolbotn var samd med Lerøy i at det måtte komma opp ei sak på dette.

Monika Kvamme, kommunalsjef helse og omsorg, sa at ein har jobba med dette lenge utan å lukkast. Er nok ein større jobb som må gjerast for å få dette til.

Per Lerøy (Ap) svara til dette at det er nettopp difor ein må få opp ei sak, og så skal ein løyva dei pengane som skal til.

Helge Dyrkolbotn (KrF) viste til at dersom dette kjem i orden, så vil det gje mindre arbeid for dei tilsette som i dag må hjelpa til.

Rolf Henning Myrmel, einingsleiar teknisk drift, sa at ein har jobba med dette tidlegare, og erfaringa er at leverandørane ikkje vil jobba meir med dette. Kommunen må evt. kosta det sjølv.

Varaordførar Inger-Lise Brekke (H) viste til at når det offentlege legg opp til meir digital bruk, så må nett vera på plass.

Bjørn Inge Dyrkolbotn (Sp) spurte om kva om er problemet, og viste til at skulen har løyst dette med fleire aksesspunkt. Monika Kvamme svara at det er problem med dekning i bygget (betongvegger).

Per Lerøy (Ap) konkluderte at ein må sjå på ein heilskapleg plan, og så er politikarane klare over at det er ein kostnad knytt til dette.

Handsaming i formannskapet:
Samrøystes for å ta meldingane til orientering.

Behandling

Asbjørn Toft, avdelingsleiar for plan-, bygg-, oppmåling- og miljøavdelinga, gjekk gjennom dei delegerte sakene.

Handsaming i formannskapet:
Samrøystes for å ta delegerte saker til orientering.

Behandling

Kommunalsjef økonomi og personal, Odd Harald Dommersnes, orienterte om det ekstraordinære statlege tilskotet til næringsfondet, som kommunen skal dela ut vidare. Staten har gitt 75,3 millionar kroner til Vestland fylkeskommune, av dette har Austrheim kommune fått 900.000 kroner til vidare fordeling til næringslivet.

Midlane skal nyttast til bedriftsretta støtte og til andre næringsretta tiltak som kommunen meiner er viktig for å motverka negative verknadar av koronavirusutbrotet. Tilskotet er informert om via nettside, annonser, og organisasjonar som Nordhordland Næringslag og Industriutvikling Vest (IUV).

Asbjørn Toft viste til at Næringshagen er "på" saka, og at dei har kontakt med ein del mindre bedrifter om dette.

---

Asbjørn Toft, avdelingsleiar for plan-, bygg-, oppmåling- og miljøavdelinga, orienterte om innspelet om mindre planendring for næringsområde og småbåthamn på Langøyna, og ba om formannskapet si meining om dette.

Helge Dyrkolbotn (KrF) sa at med utleige så vil det skapa arbeidsplassar i kommunen, og fekk støtte frå Bjørn Inge Dyrkolbotn (Sp).

Per Lerøy (Ap) sa at problemet er at ein ikkje har lukkast å få investorar til å satsa på prosjektet.

Rådmann Liv Løvvik sa at det kan vera ein idé å etablera dette som eit anlegg der ein sel hyttene og leiger dei tilbake til anlegget, noko som har lukkast andre stader.

Per Lerøy (Ap) sa at det hadde vore bra å få dette til som eit utleigeanlegg på eine eller andre måten. Men om ein ikkje får det til, så kan alternativet vera at ein ikkje får gjort noko med området, og det vert liggande som eit sår i landskapet. Skal noko skje, er ein avhengig av at nokon vil satsa midlar på prosjektet, og det er det ikkje er i dag.

Asbjørn Toft sa at bør vera gode moglegheiter for å få til sjøbaserte aktivitetar i Austrheim. Når ein ser på at reguleringsplanen er halvanna år gamal, så kan det vera rett å venta litt. Kan vera at det kjem andre som vil investera i området.

Per Lerøy (Ap) viste til at kommunen leiger dette arealet i dag, og at ein har jobba med bubilparkering utan å lukkast.

Rådmann Liv Løvvik viste til at ein har lukkast andre stader, som til dømes ved Malangen Resort, med sal og tilbakeleige. Kanskje kan ein prøva med ei hytte i starten, og om det ikkje går kan ein omregulera det i etterkant.

Asbjørn Toft viste til at målet med å orientera om dette i formannskapet er å få tilbakemeldingar frå politikarane, anten ein seier hytter, bustadhus eller anna.

Per Lerøy (Ap) sa at det viktigaste er at det skjer noko, anten det vert slik eller slik. Det er teikna inn ni hytter i området. Rorbuer har Fylkesmannen sagt nei til tidlegare, då to naboar ba om å få etablera dette, så det kan verta vanskeleg.

Helge Dyrkolbotn (KrF) sa at det kan vera mogleg å få til ei bubilparkering med enkle grep, og viste til bubilparkeringa på Sletta (Radøy).

Inger Lise Brekke (H) oppmoda til å jobba for ein variasjon mellom bubil og hytter, og sikra tilgang til kaiområdet for alle.

Asbjørn Toft sa at han vil formidla vidare dei signala som er gitt frå formannskapet, samstundes som det er slik at ei planendring her kan møta kvist andre stader.

---

Kommunalsjef oppvekst og kultur, Bjørnar Fjellhaug, orienterte om dialogen med Austrheim IL om Austrheim idrettspark. Har hatt eit møte med idrettslaget, og jobbar med å få på plass ein drifts- og bruksavtale for Austrheim idrettspark. Møtet var konstruktivt, og ein skal jobba vidare til det beste for både det frivillige arbeidet og for kommunen. Viktig å ha idrettslaget med seg. I dette møtet med idrettslaget møtte frå administrasjonen Fjellhaug og økonomi- og personalsjef Odd Harald Dommersnes, dessutan ordførar Per Lerøy , medan idrettslaget møtte med leiar Asbjørn Brandtun, Sjur Brandtun og Terje Håland. Ordførar Per Lerøy sa at dette var eit godt møte, og det er viktig å ha eit godt tilhøve til idrettslaget som er den største frivillige organisasjonen i kommunen med 400 medlemmer.

Helge Dyrkolbotn (KrF) sa at det er bra at ein finn løysingar i denne saka. Må sjå framover og finna løysingar i dette samarbeidet, idrettslaget er viktig og gjer ein kjempejobb med dugnadsinnsatsen sin.

---

Kommunalsjef helse og omsorg, Monika Kvamme, orienterte om samarbeid med Fedje kommune om legestilling. Skal saman med Fedje sjå korleis legetilbodet er organisert i Solund. Fedje skal sjå på fleire løysingar for lege og legevakt, i samband med at kommunelegen på Fedje skal gå av med alderspensjon.

Kvamme la til at ein kan sjå på nye løysingar for legevakt, der dagens løysing i Knarvik er kostbar for Austrheim kommune, og det er uklart kva det vil kosta i det kommande Helsehuset i Knarvik. Til dette sa Per Lerøy (Ap) i ein replikk at Helsehuset er under budsjett så langt, men at Legevakten er kostbar for Austrheim med tanke på at innbyggjarar som bur lengre vekke frå Knarvik brukar den mindre. Har også vore diskutert ei legevaktløysing nord i regionen, med tanke på industrien på Mongstad og avstand til legevakt i Knarvik. Når det er ambulanse nord i regionen kan det vera aktuelt med legevakt i nord.

Rådmann Liv Løvvik sa at ein må sjå på ulike alternativ, i samband med at ein utvidar med ein tredje lege.

Varaordførar Inger-Lise Brekke (H) sa at organiseringa av legetenesta også må sjåast i samanheng med rekrutteringa, der fleire kommunar i området er i ein situasjon der dei skal rekruttera nye legar. Må gjerne organisera dette slik at Austrheim kan vera sentrum for eit samarbeid på helse.

---

Kommunalsjef oppvekst og kultur, Bjørnar Fjellhaug, orienterte om ulike tilsettingar, som PPT-leiar og rektor Kaland. Det er utlyst stillingar som kommunepsykolog og psykolog i PP-tenesta, ei legestilling, samt internt utlyst ei stilling som undervisningsinspektør på Kaland, sistnemnde mellombels for eitt år framover.

Kommunalsjef helse og omsorg, Monika Kvamme, supplerte med at legestillinga hadde tre søkarar, der berre ein var ferdig utdanna lege, og at denne stillinga er lyst ut igjen. Er mykje arbeid for legane, spesielt med Covid-19.

---

Kommunalsjef helse og omsorg Monika Kvamme orienterte om arbeidet med årsturnus og deltid. Det er ein del både ufrivillig deltid og frivillig deltid, og ein ser frå tidlegare kartleggingar at det er mange som vil jobba 80 prosent. Må motivera for at fleire skal jobba full stilling, både sjuke- og hjelpepleiarar.

Rådmann Liv Løvvik viste til at i ein situasjon med Korona-smitte er det viktig å ha færrast mogleg tilsette, som ikkje jobbar i fleire kommunar.

---

Kommunalsjef helse og omsorg, Monika Kvamme, orienterte om Korona-situasjonen. Er glad for at ein har fått avvikla 8 veker ferietid i helse/omsorg utan smitte. Ser at smitten aukar i samfunnet rundt oss, og det vil gje utfordringar for bemanninga om det kjem inn på sjukeheimen. Har fått testa beredskapen, og ser at det er for tynn bemanning på korona-organisasjonen, dette må på plass slik at ein kan svara telefonen og starta arbeidet med smittesporing om det skjer.

Har testa 290 så langt (sidan mars 2020), har ikkje hatt positive smittesvar så langt. Ser på om ein skal auka opningstider for testing, for å få betre kapasitet, men må ha nok ressursar på dette slik at det vert gjort nøyaktig.

Rådmann Liv Løvvik sa at det vil krevja mykje om ein skal testa 5 prosent av innbyggjarane kvar veke.

Løvvik viste til at det vert jobba opp mot bedrifter på Mongstad for å sikra at ein har sams forståing av kva det inneber å vera i karantene, noko som vart støtta av Per Lerøy (Ap) og Helge Dyrkolbotn (KrF).

Kommunalsjef oppvekst og kultur, Bjørnar Fjellhaug, sa at ein heldt tilbake på utlån av skulane til andre enn undervisningsbruk. Etter dagens reglar kan ein bruka garderobar og dusjar, men heldt seg framleis til utegym. Symjebassenget på Kaland vert tidlegast opna for sesongen den 1. oktober, medan skulebygg er ikkje opna for bruk til anna enn undervisning, og kan tidlegast lånast ut til anna bruk frå den 15. september.

Rådmann Løvvik sa at dette med kommunale bygg vert vurdert vidare i KKL.

---

Kommunalsjef oppvekst og kultur, Bjørnar Fjellhaug, svara på spørsmål frå KrF om skulesaka. Det skal hentast inn ekstern konsulent for å sjå på tilstanden av skulebygga, og kostnad med å få dette oppdatert til nye krav. Arbeidet skal sikra at politikarane får eit best mogleg grunnlag for sine vedtak, og kan gjera vurderingar av kva som er til det beste for elevane, i deira opplæring.

Utgangspunktet er at denne saka skal vera klar til formannskapet 24. september. Fjellhaug spurte om det er mogleg å evt. be formannskapet om ekstra møte når denne saka er klar.

Per Lerøy (Ap) svara at det er viktig med god tid for politikarane, så saka må vera klar i god tid før politisk handsaming. Dette støtta Bjørn Inge Dyrkolbotn (Sp) og Morten Sognnes (H).

Helge Dyrkolbotn (KrF) ba om at det evt. vert orientert om saka i møtet 24. september, dersom saka ikkje kjem opp der, slik at administrasjonen kan få signal undervegs.

Fjellhaug sa at det skal gjerast ei grundig sakshandsaming, der administrasjonen kjem med eit framlegg til høyring. Formannskapet legg saka ut på høyring når den er klar.

----

Einingsleiar teknisk drift, Rolf Henning Myrmel, svara om vassutbygging. Følgjer V/A-planen der ein no ventar på godkjenningar for å starta med sjøleidningar, og skal starta prosjektering vidare til Mastrevik. Det som har seinka arbeidet litt no er at det har vore uklarheiter mellom Bergen Hamn og Kystverket, om kven som har mynde til å gje løyve til kryssing ulike stader.

Myrmel ba om at ein ventar med prosjektering av utbyggingsprosjektet Solend-Førland, til ein ser at ein er nærare å komma i gang. Føresetnadene kan endra seg i løpet av eit år eller to. Kommunalsjef service og forvalting, Thomas Lindås, støtta Myrmel i denne vurderinga, og sa at det er tidleg å starta arbeidet med prosjekteringa no. Myrmel sa vidare at det er heilt klart i V/A-planen at Førland er det neste prosjektet, men at det ikkje vil gje noko forseinking å venta med prosjekteringa. Vil ta det innanfor den avtalen ein har med ekstern konsulent.

---

Asbjørn Toft, avdelingsleiar for plan-, bygg-, oppmåling- og miljøavdelinga, sa om arbeidet med Heiane-planen at denne er sendt til NVE for uttale. Planen er å ha dette klart til formannskapets møte i oktober.

Per Lerøy etterlyste når det skal vera folkemøte, Toft svara at møtet måtte utsetjast på grunn av Korona, men at møtet skal haldast. Per ba om at det vart sett ein dato for folkemøte, og at denne vart annonsert. Toft svara stadfestande på dette.

---

Kommunalsjef for økonomi og personal, Odd Harald Dommersnes, orienterte om situasjonen for økonomien (sjå vedlegg). Målet må vera å komma ut av Robek-lista no dette året.

For eigedomsskatten på verk og bruk kan ein venta at Equinor vil gå til sak for å redusera eigedomsskatten, det har dei gjort i andre kommunar, og det vil gje kommunen kostnader. Ordførar Per

Lerøy (Ap) viste til at dette har pågått ei tid, der selskapet starta med sak mot Karmøy.

Dommersnes sa vidare at når ein ser på inntektene så er det svikt i integreringstilskotet for flyktningar, der ein hadde budsjettert med nesten fem millionar, men får rundt 2,5 millionar. Skatteinntektene er positive, jobbar elles med å få meir i skjønstilskot frå den ekstra tildelingsrunden som har søknadsfrist 1. september.

Ser ut for at det er svikt på ein del særtilskot, som barnevern og liknande, der ein ser at kommunen får mindre enn budsjettert. Samla sett bra på inntekter likevel. Kostnader er på budsjett for personalutgifter, men har ei ekstra utgift på 800.000 kroner til konsulent innan barnevern. Må gå nærare inn i dette med barnevern for å sjå på kostnadene. Om dette svara kommunalsjef oppvekst og kultur, Bjørnar Fjellhaug, at det vart brukt konsulent i overgangen til Alver barnevern, der ein venta med å tilsetta til det vart flytta over. Ventar at det etter kvart kjem innsparingar når ein får full verknad av barneverns-samarbeidet med Alver kommune.

Dommersnes sa at Covid-19 har kosta kommunen rundt 4,2 millionar, etter seks månader.

Dommersnes sa vidare at kommunen må ha på plass eit nytt finansreglement som grunnlag for å forhandla på nye lånerenter. Det er ei politisk vurdering av kva risiko ein skal ta, alt flytande eller noko bunde, og kor lange periodar skal det bindast for. Kommunalsjefen sa at det også vert jobba med nytt økonomireglement, og reglement for innkjøp. Har starta opplæring for avdelingsleiarane, for å sikra kunnskap om rekneskap og korleis ein må ha budsjett for å kunna bruka pengar.

For innkjøp er administrasjonen i gang med rundt 100 anbod, på alt frå matvarer til anna. Dei store innkjøpa er frå leverandørar som ikkje finnest lokalt.

Sjukefråværet må ein også sjå på, det er for høgt og det kostar kommunen for mykje.

Vidare ser ein at investeringar har drege ut, det er viktig at dei investeringane som er vedtekne, vert gjennomførte.

Om økonomi sa ordførar Per Lerøy at BKK har varsla at resultatet deira er dårlegare i 2020 enn tidlegare, og at dei har bedt om at ein lågare del av resultatet vert betalt ut som utbytte.

---

Ordførar Per Lerøy orienterte frå møte om U864, sjå møtereferat som ligg ved møteboka. Lerøy sa at ein vart møtt av samferdselsdepartementet på ein veldig positiv måte, og at det ser ut for at samferdselsminister Knut Arild Hareide ser annleis på dette enn tidlegare ministrar.

Handsaming i formannskapet:
Samrøystes for rådmannens framlegg til vedtak.

Behandling

Avdelingsleiar for plan-, bygg-, oppmåling- og miljø, Asbjørn Toft, orienterte om saka, jamfør saksutgreiinga.

Toft sa at ein del planar må ein ha på plass for å kunna søka om støtte, som planen for fysisk aktivitet.
Andre planar vert det gjeve støtte til å laga. Toft viste kva planar som skal greiast ut i den kommande fireårsperioden.

Ordførar Per Lerøy (Ap) ba om at det vart jobba med plan for rus og psykiatri, og fekk støtte av Inger Lise Brekke H) i at dette må prioriterast.

Kommunalsjef helse og omsorg, Monika Kvamme, sa at rus og psykiatri ligg litt mellom pleie og omsorg og folkehelse.

Ordførar Lerøy sa vidare at Ap og Høgre er samde om at rus og psykiatri må prioriterast, særleg på grunn av at det angår mange unge. Meiner det er for seint å starta dette planarbeidet i 2022.

Asbjørn Toft svara at det er OK å ha intensjon om å starta i 2021 på både kommunedelplan for pleie og omsorg, og kommunedelplan for folkehelse med folkehelseoversikt. Monika Kvamme, kommunalsjef pleie og omsorg, sa at det er OK å ha intensjon om å starta dette arbeidet tidlegare.

Per Lerøy (Ap) etterlyste at det for landbruk/skogbruk vart gjort oppfølging av tidlegare planar, slik at ein sikra at det som er planta av skog også vert henta ut.

Om trafikksikring sa Per Lerøy at Ap og H heller vil prioritera sykkelveg på strekket Kilstraumen til Fonnes framfor den frå Litlelindås til Austrheim. Etter innspel frå Helge Dyrkolbotn (KrF) sa Lerøy at ein kan ha på lista å laga plan for begge strekka, men med prioritet for Kilstraumen - Fonnes.

Toft svara at det er lettare å planlegga Litlelindås til Austrheim, sidan ligg arbeid frå Johan Sverdrup-røyrleidningen til grunn, der denne sykkelvegen var med.

Morten Sognnes (H) viste til at det er mellom Kilstraumen og Fonnes det har skjedd flest ulukker, og at dette også vil knyta kommunen tettare saman i tillegg til å gjera det lettare for elevar å sykla til skulen.

Ordførar Per Lerøy (Ap) oppsummerte med at ein legg planen ut på høyring slik den er, og kjem med innspel i høyringsperioden.

Handsaming i formannskapet:
Samrøystes for rådmannens framlegg til vedtak.

Behandling

Samarbeidsavtalen var ettersendt til formannskapet (ligg ved).

Ordførar Per Lerøy (Ap) sa at dette er ein god avtale for kommunen.

Asbjørn Toft, avdelingsleiar for plan-, bygg-, oppmåling- og miljøavdelinga, sa at dagsturhytta vert levert torsdag 17. september, med toalettbygget. Vil i første omgang ha eit muld-do, med moglegheit til å montera tett tank i underkant dersom det skulle visa seg naudsynt.

Handsaming i formannskapet:
Samrøystes for å ta rådmannens framlegg til vedtak.

Behandling

Handsaming i formannskapet:
Samrøystes for rådmannens framlegg til vedtak.

Behandling

Her har det komme eit innspel frå Ruth Fredheim og Kjell Atle Fredheim, som vart delt ut i møtet (det ligg ved møteboka).

Avdelingsleiar Asbjørn Toft og sakshandsamar Christopher Straumøy orienterte om saka.

Handsaming i formannskapet: Samrøystes for rådmannens framlegg til vedtak.

Behandling

Denne saka var oppe i administrasjonsutvalet tidlegare same dag. Sjå referatet frå adminisatrasjonsutvalet for debatten der.

Handsaming i formannskapet:
Samrøystes for rådmannens framlegg til vedtak.

Behandling

Ordførar Per Lerøy (Ap) sa at dette nettverket kan gje kommunen betre kunnskap om kva som skjer med til dømes auksjonsrundane for fiskeoppdrett, ved at ein får betre informasjon gjennom nettverket enn kva som kjem direkte til kommunen. Austrheim kan i tillegg vera med i lobby-arbeidet for å unngå at staten tar større og større deler av inntektene frå auksjonering av oppdrettskonsesjonar, slik det er tale om å gjera. Vil gjerne vera med frå årsskiftet, slik at ein ikkje brukar midlar i 2020.

Varaordførar Inger-Lise Brekke (H) sa at ein i utgangspunktet ikkje vil påføra kommunen auka utgifter, men her er det eit medlemsskap som kan vera viktig for å auka inntektene til kommunen.

Handsaming i formannskapet: Samrøystes for rådmannens framlegg til vedtak.

Behandling

Sakshandsamar Ketil Tjore orienterte om saka.

Handsaming i formannskapet: Samrøystes for rådmannens framlegg til vedtak.