Møte i Kommunestyret den 14.02.2019

Vedtak

Innkalling og sakliste vart godkjent.

Behandling

Reidar Øksnes (Sp) fekk ordet og ba om at det vert vurdert å endra politisk styringsmodell for Austrheim kommune, frå dagens ordning med formannskap og kommmunestyre og tilbake til utvalsmodellen som var nytta tidlegare. Øksnes viste til at dette var tilrådd av KS i samband med politikaropplæringa som kommunestyret hadde fått.

Øksnes la til at han ville ha den nye modellen gjeldande frå hausten 2019, og at han oppfatta det slik at det er politisk fleirtal for ei slik endring. Representanten sa også at han ikkje venta ei realitetshandsaming over bordet i dette møtet, men at han ønskte å dela ut framlegget og diskutera vidare kva ein kan gjera vidare med dette framlegget.

Ordførar Per Lerøy (Ap) sa at ein burde legga framlegget frå Øksnes ved protokollen og be rådmannen førebu ei eiga sak på dette. Lerøy la til at dette ikkje kan verta til kommunestyremøtet i april, der det allereie er mange saker, og at rådmannen får komma tilbake til kommunestyret med ei sak når denne er klar.

---

Ordførar Per Lerøy sa at det var komme inn ein interpellasjon frå Liv Ulvøy (Uavh), som skulle vore sendt ut med innkallinga. Lerøy spurte kommunestyret om det var greitt at interpellasjonen vart teken opp etter orienteringane, og fekk tilslutnad til det.

Rådmannen sitt framlegg vart samrøystes vedteke.

Vedtak

Møteprotokoll frå forrige møte vart godkjent

Vedtak

Meldingane vart tekne til orientering

Behandling

Meldingane var til dette møtet ikkje med i det samanlegne dokumentet med innkalling og sakliste, slik at ein måtte sjå meldingane gjennom politikarportalen. Dette vart etterlyst, og meldingane kjem neste gong med det samanslegne dokumentet, dog kanskje i to ulike dokument på grunn av filstorleik.

For nokre av meldingane var det kommentarar/spørsmål.

Til meldinga om NGIR gjorde fungerande rådmann Olav Mongstad greier for dagens praksis i tilfelle der renovasjonsavgifta ikkje vert betalt. NGIR sender purring, om denne ikkje vert betalt går saka til Lindorff for inkasso. Om dette ikkje fører fram tek Lindorff kontakt med Austrheim kommune som så ordnar med utlegg i løn/trygd for dei aktuelle abonnentane. Kommunen overfører så pengane til Lindorff som igjen gjer opp med NGIR.

Dette betyr at saker for abonnentar i Austrheim ikkje går til tvangsinndriving med tvangssal av bustad, noko som politiet har uttalt er særs tidkrevjande for dei i tillegg til at det er omfattande tiltak å setja i verk for ein relativt sett mindre sum.

Ordførar Per Lerøy (Ap) viste til at politiet har mykje arbeid med denne typen namnssaker i andre kommunar, men ikkje i Austrheim.

Tore Austrheim (Ap) spurte rådmannen om det kunne vera aktuelt å overta det arbeidet som Lindorff gjer i slike saker, fungerande rådmann Olav Mongstad svara at det ikkje var rom for å ta inn meir arbeid i administrasjonen.

---

Til meldinga om akuttberedskap for barnevernet viste fungerande rådmann Olav Mongstad til at fylkeslege Helga Arianson har engasjert seg, og at fylkeslegen meiner at for få kommunar har ordning med barnevernsvakt. I heile 2018 har det pågått eit arbeid i fylket for å få på plass dette, der Bergen i starten var aktuell som vert men no har trekt seg ut.

No har ein komme fram til ein regional modell der kommunane i Nordhordland finn ei ordning saman, for det som vert ein region med kring 30.000 innbyggarar. Den største kommunen, Alver, har tatt på seg å vera vertskommune. Den endelege modellen for dette er no ute på høyring, og det vert jobba vidare med å komma fram til ei ordning som kan fungera for alle kommunane.

--

Til meldingane om at Austrheim vidaregåande seier opp avtalen om skulebibliotek, og vil reforhandla denne med verknad frå 1. september 2019, sa ordførar Per Lerøy at også AVS er i ein situasjon der dei må spara pengar, sjølv om det betyr redusert tilbod til elevane. Kommunen har i dag ein avtale med skulen tilsvarande ei 35 prosent stilling.

Reidar Øksnes (Sp) spurte om andre kommnar burde vore med på å dela rekninga til skulebibliotek ved AVS, som til dømes Gulen og Masfjorden. Per Lerøy (Ap) svara at det kunne vera ei naturleg løysing, medan fungerande rådmann Olav Mongstad sa at det også er andre til bod ved skulen som er under press, som helsesøster.

---
Rådmannen sitt framlegg vert samrøystes vedteke.

Behandling

Det vart orientert om desse sakene:

- Statusrapport for arbeid utført ved Kaland Skule (Rolf Henning Myrmel)
- Randkommune-samarbeid (Olav Mongstad)
- Friluftsområde Klungeneset (Asbjørn Toft)
- Statusrapport gangbru over FV365 ved Fonnes (Rolf-Henning Myrmel)

I tillegg la Liv Ulvøy (Uavh) fram sin interpellasjon, som ordførar Per Lerøy (Ap) svara på.

---

- Statusrapport for arbeid utført ved Kaland Skule
Leiar teknisk drift, Rolf Henning Myrmel, orienterte om det arbeidet som er utført ved Kaland skule, med ein Powerpoint-presentasjon (ligg ved).

Myrmel oppsummerte med at ein er kommen eit langt stykke på veg med det som er gjort, men at det framleis står mykje att før heile skulebygget har dagens standard. Skulebygget må oppgraderast vidare, og det vil kosta pengar.

Tore Austrheim (Ap) tok opp at det no er utfordringar med vannfall, der vatn samlar seg ved døra frå garderoben og inn til svømmehallen, i både gute- og jentegarderoben. Austrheim viste også til at der er enkelte andre svake punkt, som at lister går heilt ned til golvet, og ba vidare om at det vert laga eit oppsett som viser kva står att før ein er heilt i mål med lang- og kortsiktige tiltak som må til før ein har skulen etter dagens standard.

Asbjørn Brandtun (Ap) spurte kva Austrheim kommune kan læra av dei ulike byggeprosjekt i kommunen, og viste til at at det etter hans syn var brukt rimelege men dårlege løysingar fleire stader. - Kva lærer ein av dette for kommande bygg, vert det meir på kvalitet og er oppfølginga betre med jamleg vedlikehald?

Reidar Øksnes (Sp) sa at kommunen ei stund hadde større lyst på investeringar enn vedlikehald, og etterlyste at det vart sett av nok midlar til løpande vedlikehald for å unngå etterslep. Øksnes spurte administrasjonen kva av det arbeidet som er gjort på Kaland som vert rekna som investeringar, og kva som vert rekna som drift.

Per Lerøy (Ap) sa at dette med lister som går ned til golvet i våtrom, og manglande drenering av vatn i garderobe, må kunna takast opp med dei som har utført arbeidet. Lerøy etterlyste vidare ein plan for kva som skal skje med uteområdet på skulen, som med manglande lys kring Sportcourt-arealet, og nytt toppdekke på fotballbana der kommunestyret har løyvd noko midlar. Som Brandtun etterlyste også Lerøy svar på kva kommunen lærer av dei prosjekta som er gjennomførte, og spurte om når ein skal setja strek for oppgraderingane av Kaland barne- og ungdomsskule.

Randi Dyrøy (KrF) viste til at Miljøretta Helsevern har hatt tilsyn med skulen og levert rapport i januar 2019, og etterlyste kva stoda er etter denne tilstandsrapporten?
Rolf Henning Myrmel svara på spørsmål:
- Vatnoppsamlingi garderobane mot dørene til svømmehallen, dette skal no vera ordna gjennom betre drenering. Lister som går heilt ned til golvet og dreg fukt, dette er noko ein skal følgja opp i samband med eittårsbefaring.

- Kvalitet på arbeid, her sa Myrmel at det valt varer med betre kvalitet enn det som ei tid var vanleg, som ved å bruka Steni-plater heller enn trepanel. Men samstundes er dette også styrt av anbodsreglane, så lenge vara er godkjent på leveransetidspunktet så kan ein ikkje krevja å få noko anna.

- Det arbeidet som er utført på Kaland barne- og ungdomsskule er å rekna som investering, sidan det som er skifta ut er over levetida, til dømes over 50 år gamle vindauge som har hatt ei nedskrivingstid på 30 år.

- Administrasjonen kjem tilbake til kva som står att av arbeid og korleis dette skal løysast, men har tatt med seg erfaringa om å ta seg betre tid, slik at ein til dømes ikkje startar prosjekteringa av elektro før ein er ferdig med prosjekteringa av ventilasjon, og såleis ikkje veit kor stort straumforbruk det skal prosjekterast for.

- Om den siste rapporten frå Miljøretta helsevern sa Myrmel at den har urovekkande mange merknader. Mange er greie å kryssa ut, og der er ein godt i gang, på ting som til dømes internkontrollsystem. Andre mindre tiltak er nytt toalett som er i bestilling, samt deler til det gamle ventilasjonsanlegget som ei stund har vore ute av funksjon. Andre tiltak er meir omfattande, til dømes ser ein no på å montera trappeheis for å sikra universell tilkomst for Kaland 2 og 3, og for kontroll av leikeplassar skal dette arbeidet ut på anbod. Kommunen har frist til 1. april 2019 med å lukka avvika, eller levera plan for korleis ting skal ordnast.

- Samstundes er det slik at for Kaland 1 så vil den aldri kunne verta oppgradert til eit skulebygg som oppfyller krav til universell tilkomst med meir. Her må kommunestyret seia kva ein vil med denne delen av skulen.

---

Fungerande rådmann Olav Mongstad orienterte om status for randkommune-samarbeidet, der det no er aktuelt med eit tettare samarbeid for rekneskap og løn. (Sjå også dokumentet «Felles sak til kommunestyra i «Randkommunane» i Nordhordland – kommunalt oppgåvefellesskap for rekneskap og løn

Mongstad sa at Austrheim har sagt seg villig til å ta på seg ei vertsrolle i dette samarbeidet, som så kan oppretta leveranseavtaler med dei andre kommunane. Det er ikkje var tale om å flytta arbeidsplassar, men for å få det til å fungera desentralisert må alt standardiserast og digitaliserast, og dei teknologiske løysingane må takast i bruk.

Det er ein del utfordringar, som korleis ein skal klara å få til ei felles leiing av denne sektoren, og det må vera ein eigen fagleg leiar som kan leia og koordinera dette arbeidet.

Kvar kommune skal no vurdera dette og etter kvart seia ja eller nei til å gå vidare i eit samarbeid, og i Austrheim skal ein ha møte med dei tilsette og deira tillitsvalde. På rådmannsnivå er ein så langt positiv til å sjå på dette, og så vil ein etter kvart utarbeida ei sak som kommunestyret skal gjera vedtak i.

Mongstad viste til at «randkommunane» alt er i gang med samarbeid om Nav gjennom Nav Fensfjorden, og sa at dersom randkommunane skal klara å halda fram med å yta gode tenester så trur han dette er noko av det Austrheim må gå inn i.

Jorund Stellberg (Uavh), spurte kvifor det ikkje var vurdert å ha dette samarbeidet som eit eige rettssubjekt.

Fungerande rådmann Olav Mongstad svara at det etter lova kan vera eit slikt oppgåvesamarbei utan å ha det som eit eige rettssubjekt.
---

Avdelingsleiar for Plan, byggesak, oppmåling og miljø, Asbjørn Toft, orienterte om arbeidet med friluftsområdet i Klungreneset. Dette arealet, på kring 4,5 mål, vart regulert som friområde ved siste rullering av kommuneplanen, godkjent av kommunestyret i 2017.Eigaren av arealet ber no om at kommune løyser det inn, det kan vedkommande krevja sidan dette no er friområde, og det vil komma ei politisk sak på dette. Dette skal verta ein fint friområde saman med området som kommunen alt eig ved småbåthamna.

---

Leiar teknisk drift, Rolf Henning Myrmel, orienterte om det framdrifta for gangbru over FV565 ved Fonnes. Myrmel har sjekka dette med Håvard Dyrkolbotn, som er Statens vegvesen sin prosjektleiar for Nordhordlandspakken, og fått svar om at det tidlegaste brua kan vera klar er i desember 2019. Tida går med til å først lysa ut anbod for å velja produsent, deretter bestilla prosjektering og senda til Vegdirektoratet for endeleg teknisk godkjenning, før brua kan setjast i produksjon.

Ordførar Per Lerøy viste til at i planen for Nordhordlandspakken ligg det ferdigstilling på denne brua i april 2019, men at tilbakemeldingane ein har fått no er at det realistiske kanskje er april 2020.

---

Asbjørn Brandtun (Ap) etterlyste at det for ein del av orienteringane som er tekne opp, ligg føre eit notat på førehand slik at kommunestyrerepresentantane kan setja seg inn i sakene på førehand.

---

Interpellasjon frå Liv Ulvøy (Uavh)

Representanten Ulvøy la fram interpellasjonen (sjå vedlegg).

Ordførar Lerøy svara på interpellasjonen (sjå vedlegg). Lerøy oppsummerte med at Austrheim kommune er usamd med Helfo, noko som er støtta av både fylkeslege og tidlegare assisterande fylkeslege.

Liv Ulvøy fekk ordet til interpellasjonen, og spurte om kommunen ventar og ser om kravet kjem, eller gjer noko anna i mellomtida. Ulvøy etterlyste også at kommunestyret vert orientert når det er tale om så store tal som dette.

Fungerande rådmann Olav Mongstad svara på dette, og sa at ein avventar denne saka til det eventuelt kjem noko krav frå Helfo. Mongstad la til at etter administrasjonen sitt syn er denne saka handsama ope, all den til økonomisjef Olav B. Andersen tok dette opp i samband med budsjetthandsaminga.

Vedtak

Nytt kontrollutval i Austrheim:
Faste medlemmer: Tore Austrheim (Ap), Solveig Hopen (H), Bente Øksnes (Sp), Arne Kästel (V) og Edvard Bjerkestrand (KrF). Varamedlemmer: Mariell Sundfjord Storebø (Ap), Dag Arne Solberg (H), Jacob Sæthre (Sp), Torunn Helland Karlsen (V) og Ivar Bergsvik (Ap).

Behandling

Siri Kaland, leiar i valnemnda, la fram framlegg til nytt kontrollutval. Med unntak av Rolf Sandstad som har flytta frå kommunen, er det attval på dei resterande faste medlemmene, med den endring at Edvard Bjerkestrand (KrF) går opp frå vara til fast møtande. Og ny varamedlem er Ivar Bergsvik (Ap).

Framlegg til nytt kontrollutval:

Faste medlemmer: Tore Austrheim (Ap), Solveig Hopen (H), Bente Øksnes (Sp), Arne Kästel (V) og Edvard Bjerkestrand (KrF). Varamedlemmer: Mariell Sundfjord Storebø (Ap), Dag Arne Solberg (H), Jacob Sæthre (Sp), Torunn Helland Karlsen (V) og Ivar Bergsvik (Ap).

Samrøystes vedteke.

Behandling

Avdelingsleiar for Plan, byggesak, oppmåling og miljø, Asbjørn Toft, orienterte på vegner av administrasjonen om det arbeidet som er gjort med den nye forskrifta, der ein har jobba saman med dei andre kommunane i regionen.

Vedtak: Sams vedtak.

Vedtak

1. Austrheim kommunestyre slår saman valkrins nr 2 Årås og valkrins nr 3 Austrheim. Den nye felles valkrinsen får nemninga nr 2 Austrheim.

2. Austrheim kommunestyre vil nytte ungdomsklubben sine lokale/Austrheimhallen til vallokale

3. Endringa gjeld frå og med kommunestyrevalet 2019.

Behandling

Fungerande rådmann Olav Mongstad orienterte om saka.

Bakgrunnen for saka er at det er er fleire som førehandsstemmer no enn tidlegare, slik at det er mogleg å samla to krinsar på valdagen. I tillegg er det litt å spara økonomisk med å gå frå tre til to stemmestyre.

Viktigast er det likevel å ha god kontroll på datanetta som vert brukt i samband med valet, og dette har ein best kontroll på i kommunale bygg. Næringshagen sine lokale på Mastrevik Torg har vore vurderte som stemmelokale, men der er det eit anna nettverk og dette må ein vera forsiktig med. Idrettshallen har elles god tilgjenge, der ein kan kjøra nesten til døra ved behov.

Rådmannen vil endra framlegget noko og seia ungdomsklubben/idrettshallen, og ikkje berre ungdomsklubben

Varaordførar Anne Dahle Austrheim (KrF) støtta rådmannen i at det er viktig med eit godt nett som er sikkert, og la til at nett og elektronisk manntal gjer det enklare å vera valmedarbeidar både under avstemminga og oppteljinga. Austrheim sa vidare at det er betre å bruka idrettshallen og ungdommens hus enn Årås skule.

Sams vedtak med endringa til ungdomsklubben/idrettshallen i punkt 2.