Møte i Kommunestyret den 13.02.2020

Vedtak

Innkalling og sakliste er godkjent

Behandling

Atle Utkilen (Bygdelista) hadde ein merknad om vedtaket i sak 079/19. Dette er ført under sak 002/20 - godkjenning av møteprotokoll.

Handsaming i kommunestyret:
Rådmannen sitt framlegg vart samrøystes vedteke

Vedtak

Møteprotokoll frå forrige møte er godkjent.

Behandling

Atle Utkilen (Bygdelista) hadde ein merknad om vedtaket i sak 079/19 (sjå også skriv som ligg ved møteprotokollen).

Dette er frå protokollen for møtet 12.12.19, diskusjon og vedtak:

Kommunestyret - 079/19 - 12.12.2019

KS - behandling:

Avdelingsleiar plan, byggesak, oppmåling og miljø Asbjørn Toft orienterte om saka.

- Det er viktig at det kjem innspel på kva planar som skal lagast. Gode planar viktig, til dømes med tanke på å søka midlar, der idrettsplanen kan sikra tippemidlar til idrett, klimaplanen midlar til enøk-tiltak. Nokre planar er kommunen pålagt å laga, andre er viktige for at ein skal få tilskot. Reidar Øksnes (Sp) etterlyste planar i lista:

- Eg saknar ein strategiplan for korleis Austrheim kommune skal jobba vidare aleine, etter at me har sagt nei til å gå saman med andre kommunar. Vidare saknar eg ein plan som seier noko om korleis dette med Nordhordland biosfæreområde påverkar oss i det vidare arbeidet. Og så må ein sjå på at Austrheim ligg midt i eit nytt storfylke, det bør synleggjerast korleis dette påverkar oss.

Reidar Ulvøy (Ap) ba om at det vart laga ein ny klima- og miljøplan.

- Målet må vera at Austrheim kommune berre skal nytta fornybar energi til oppvarming av bygg innan utgangen av 2025. Alle personbilar og små varebilar som kommunen kjøper i perioden etter 2021, skal vera nullutsleppskøyrety. Nye ladepunkt må etablerast. Klima og miljøplanen skal også innehalda tiltak som sikrar at alle avdelingar i kommunen skal vera sertifiserte «Miljøfyrtårn» innan 2023.

Atle Utkilen (Bygdelista) hadde framlegg til endring av samansettinga av styringsgruppa for arbeidet med planstrategien, slik at alle parti i kommunestyret vert representert i styringsgruppa: «Formannskapet vedtek at Austrheim kommune sitt arbeid med planstrategi vert starta opp. Formannskapet og 1 representant frå parti som ikkje er del av formannskapet vert styringsgruppe for arbeidet.»

Avdelingsleiar Toft kommenterte innspela, og sa at politikarane er suverene i å føreslå kva planar administrasjonen skal laga. Toft sa vidare at det er viktig med god forankring, og at det er OK å ta inn dei partia som ikkje er representerte i formannskapet.

Helge Dyrkolbotn sa at KrF støttar Utkilen sitt framlegg til vedtak om å utvida styringsgruppa, Inger Lise Brekke (H) ba om gruppemøte. Møtet heva 15.27, møtet sett igjen 15.33

Inger Lise Brekke (H) fremja framlegg om at saka vart utsett til det neste møtet i kommunestyret. Per Lerøy (Ap) presiserte at det ein ville ha utsett var val av styringsgruppe for planstrategien.

Helge Dyrkolbotn (KrF) sa at han ikkje var samd i å utsetja denne delen av saka.

Avdelingsleiar Toft sa at planstrategien skal på høyring, og at val av styringsgruppe ikkje stoppar administrasjonen sitt arbeid med å senda planen ut på høyring.

Per Lerøy (Ap) sa at ein kan vedta å starta arbeidet, men utsetta samansettinga av gruppa. Sa at rådmannen må førebu sak om dette til formannskapet og kommunestyret i 2020, og at det må komma som sak i februar 2020. Rådmann Liv Løvvik sa at så lenge noko anna ikkje er vedteke, så er det formannskapet som er styringsgruppe, slik som sist. Handsaming i kommunestyret:

Atle Utkilen sitt framlegg om at alle parti i kommunestyret bør vera med i styringsgruppa, vart utsett med 10 mot 7 røyster (Høgre og Ap for utsetting, Bygdelista, KrF og Sp mot).

Rådmannen sitt framlegg vart samrøystes vedteke.

KS - vedtak:

Formannskapet vedtek at Austrheim kommune sitt arbeid med planstrategi vert starta opp.

Debatt 13. februar 2020:

Atle Utkilen (Bygdelista) argumenterte for at denne saka om planstrategien skulle vore utsett til ein tok stilling til kva samansetting det skal vera i utvalet.

Ordførar Per Lerøy (Ap) sa at ein var tydeleg i KS 12.12.19 om at det at ein ikkje var samde i samansettinga av utvalet, ikkje skulle påverka om arbeidet med planstrategien skulle startast opp.

Utkilen sa seg samd i at det ikkje er usemje om starta arbeidet med planstrategien, men at det gjeld samansettinga av utvalet.

Ordførar Lerøy ba om at merknaden frå Utkilen vart notert i protokollen.

Generelt om utsettingsvedtak så sa rådmann Liv Løvvik at det bør presiserast i dei enkelte vedtaka kven som har ansvar for å følgja opp slike utsette saker vidare.

Handsaming i kommunestyret:
Rådmannen sitt framlegg vert samrøystes vedteke.

Vedtak

Meldingane vart tekne til orientering

Behandling

Handsaming i kommunestyret:
Rådmannen sitt framlegg vert samrøystes vedteke

Vedtak

Orienteringane vart teke til vitande.

Behandling

Det var fleire orienteringssaker:

Økonomisjef Olav Birger Andersen orienterte om status økonomi, herunder årsresultat 2019: - Det skal vera møte med revisjonen fredag 14. februar, der ein skal sjå på tilhøvet mellom drift og investering, og kva utgifter som skal førast som drift og ikkje investering. Det ser per no ut for at kommunen får eit positivt resultat på kring 3,8 millionar kroner for 2019, men dette er med atterhald sidan rekneskapen ikkje er endeleg revidert. I løpet av 14 dagar er tala heilt sikre. Eit overskot på 3,8 millionar er under det som var budsjettert i 2019, men dersom kommunen hadde fått overføringa som var budsjettert med 2,5 millionar frå Mongstad Vekst, så hadde ein klart eit overskot på 6.060.000 kroner slik som opphavleg budsjettert. Personalutgiftene er redusert med 11,5 millionar frå 2018 til 2019, samstundes vert noko av dette no fakturert (Nav), slik at reduksjonen ikkje er fullt så stor.

Rådmann Liv Løvvik sa at resultatet viser at dei tilsette har gjort det dei skal, og la til at dersom kommunen hadde fått 2,5 millionar frå Mongstad vekst i 2019, så ville resultatet passert 6,3 millionar. Kommunen har klart å halda fast ved ein del vanskelege og kompliserte val, og gjennomført dei kutta som var bestemte. Løvvik takka alle som har bidratt til å gjennomføra kutt.

Ordførar Per Lerøy sa at Austrheim har kring 3-5 millionar att i verdiar i selskapet Mongstad Vekst AS, og at dette vil komma Austrheim kommune til gode om ikkje så lang tid. Det kom ikkje midlar derifrå i 2019, mellom anna på grunn av at selskapet prioriterte å jobba med utbygging av Storemyra på Mongstad. Det var også vurdert å la AS Austrheim Næringsselskap gå ut av Mongstad Vekst AS ved å overta eigedommen ved Kjeilekrysset, men dette er ikkje lengre aktuelt. Eigarskapet i Mongstad vekst er elles slik: AS Austrheim Næringsselskap 25 prosent, Lindås Tomteselskap 25 prosent, BKK 50 prosent.

AS Austrheim Næringsselskap har nok att i dette selskapet 3-5 millionar, totalt 15-20 millionar, håpar å få det ut til eigarane i løpet av inneverande år.

---

Arbeidet med ny ambulansestasjon, Rolf Henning Myrmel frå administrasjonen orienterte:
Tilbake i 2016 hadde kommunen og Helse Bergen ein dialog om ny ambulansestasjon, der ein såg på ny plassering. Ei ledig tomt i Sætremarka burettslag vart sett på som gunstig for ein ny ambulansestasjon.
Burettslaget er samd med at dei kan bytta dette med areal på nedsida av vegen.

Helse Bergen såg den gongen behov for ein stasjon som hadde plass til lærling. I februar 2017 vart Link Arkitektur engasjerte for å teikna ein ny stasjon, dei hadde laga andre framlegg for Helse Bergen. Seinare kom ein inn i ein fase der Helse Bergen hadde mindre interesse for dette prosjektet, men så kom den siste planen ved årsskiftet 2018/19 som seier at det skal vera ambulansestasjon i Mastrevik. Etter nok ein runde med utskiftingar i Helse Bergen har dette arbeidet stoppa, men kommunen har sendt oppmoding til Tonny Nybakk i Helse Bergen si ambulanseteneste for å komma i dialog igjen om dette. Dei tillitsvalde mellom ambulansepersonellet er også på saka.

Ordførar Per Lerøy spurte om eit slikt makebytte som nemnt er gjennomført.

Rolf Henning Myrmel svara at makebytte ikkje er gjennomført, men det er ein muntleg avtale om at dette skal gjerast. Det vert bytta mot eit areal på nedsida av vegen, som er avsett til omsorgsbustader.

Sist var det bygd ein stasjon heilt etter Helse Bergen sine spesifikasjonar (ligg bak kommunehuset). No vil ein bygga ein stasjon som kan brukast også til andre føremål, dersom Helse Bergen skulle trekka seg ut. Stasjonen treng større plass for å gjennomføra vaktskifte, og ha plass til lærling.

Atle Utkilen (Bygdelista) spurte kvifor stasjonen er plassert i eit bustadfelt, med tanke på støy og liknande.

Rolf Henning Myrmel svara at ambulansen uansett ikkje brukar lys eller sirene før ein kjem i hovudvegen, i tillegg til at dette er eit bygg som kommunen kan bruka seinare.

Ordførar Per Lerøy (Ap) peika på at bygget kjem tett på legekontor, Nordliheimen, Vestlia og i eit felt med omsorgsbustader, og at det er gode grunnar for ei slik plassering. Stasjonen får plass til to tilsette og lærling, og dei tilsette vil ikkje vera «på utstilling» slik som i dag. Det har til tider vore krevjande å få folk til å ta vakter her i Mastrevik. I tillegg vil den nye stasjonen ha plass i garasjen til reinhald av ambulansen utan å ta den ut.

Rolf Henning Myrmel sa at tanken er å få eit bygg der dei ambulansetilsette vil trivast.

Gro Kaland (Sp) spurte om det vil vera slik at kommunen bygger og Helse Bergen leiger, og kva kostnad det er tale om.

Rolf Henning Myrmel stadfesta at Helse Bergen vil leiga av kommunen, til sjølvkostpris.

Ordførar Per Lerøy (Ap) viste til at så lenge ein får leigd ut bygget så er det ok å låna til finansieringa, jamfør at Austrheim er Robek-kommune og må ha Fylkesmannen si godkjenning for investeringar.

Rådmann Liv Løvvik sa at dette er tenkt som eit fleirbruksbygg som kan brukast av fleire.
Reidar Ulvøy (Ap) spurte kva som er krav til responstid for ambulansen.

Rolf Henning Myrmel svara at det berre er brannvesenet som har slike krav, medan det for ambulanse er krav om å nå ein viss del av folket innan ei viss tid.

Helge Dyrkolbotn (KrF) rosa administrasjonen for at dei har halde denne saka varm, og sa at det er viktig å få ambulansestasjonen på plass i nye og betre lokale.

Per Lerøy (Ap) sa at kommunen har saka på agendaen, men om leigetakar Helse Bergen ikkje vil ha ny ambulansestasjon så kan ikkje kommunen dytta det på dei.

---

Kommunalsjef helse og omsorg, Monika Kvamme, orienterte om busstransport til Aufera.

Dette vart frå nyttår ikkje gjort med minibuss som tidlegare, men med ein bil som er kjøpt inn til dagavdelinga. I tillegg til denne må ein fleire dagar i veka kjøra ein ekstra bil fredag. Transporten vert på morgonen kjørt av vaktmeisterpersonale som startar tidlegare enn vanleg, og på ettermiddag tilsette ved Vestlia. Ein tek i dag ressursar frå andre oppgåver for å løysa denne transporten.

Monika Kvamme og ordførar Per Lerøy har vore i dialog med Aufera, og ser på om ein gjera tilpassingar for å få til transporten med berre ein bil. Aufera er i ferd med å flytta til Manger Sentrum, det gjer det lettare å bruka buss.

Rolf Henning Myrmel sa at ein ikkje har komme i mål med å klara seg med berre ein bil til denne transporten. Per i dag er kostnaden med denne løysinga rundt 38.000 i månaden, i tillegg til at ein har mindre ressursar i Vestlia og uteetaten når desse er ute for å kjøra folk. I løpet av eit år kostar denne transporten kring 430.000 kroner. I tillegg må ein ha med seg at den bilen som går som nummer to er å rekna som utrangert, og det er berre eit spørsmål om tid før den må erstattast av eit anna kjøretøy. Elles fungerer transporten greitt for brukarane, ein får greie tilbakemeldingar frå dei.

Reidar Ulvøy (Ap) sa at transporten no vel er rimelegare enn tidlegare.

Rolf Henning Myrmel svara at det både er ei innsparing etter at ein kutta minibussen, og større fleksibilitet sidan ein på slutten berre hadde ein som kjørte denne minibussen.

Rådmann Liv Løvvik sa at kommunestyret må vera merksam på ei handfull brukarar her har eit tilbod som ikkje er lovpålagt, til nesten ein halv million kroner, noko som ein ikkje ser i andre kommunar. Skulle gjerne hatt større fleksibilitet frå brukarane for å spara dobbel transport enkelte dagar. Det er ei veldig generøs ordning, og ikkje eit rettighetskrav, så denne diskusjonen må gå vidare.

Atle Utkilen (Bygdelista) sa at slik han hadde oppfatta brukarane så har dei ikkje vore i dialog på forkant av endringa av transporten. - Dei er på ein arbeidsplass, men treng denne transporten for å fungera.

Rådmann Løvvik svara at dersom ein kunne reist med buss på morgonen når det går buss direkte, og kommunen hadde henta, så ville det frigjort midlar som ein kunne brukt på andre. Om brukarane klarer å ta buss elles, må dei også klara det i det daglege. Det å kunna reisa aleine er også ein fridom.

Kommunalsjef Monika Kvamme sa at ein har finansiert bilen med bruk av fond og midlar sett av til bil til heimetenesta. Det er lovpålagt no med dagavdeling, og bilen er kjøpt til det formålet. Vidare sa Kvamme at kommunen har vore i dialog med dei pårørande om transporten (svar til Utkilen).

Reidar Ulvøy (Ap) sa at ein var samde sist om å finna ei løysing, det har me gjort, og så må ein jobba vidare med optimalisera løysinga.

Ordførar Lerøy (AP) sa at ein også må jobba vidare med Skyss for å få betre bussruter på dette strekket.

---

Sakshandsamar Asbjørn Toft orienterte om arbeidet med planstrategi, og gjekk gjennom status på planar som er gjeldande, som det vert jobba med, og som det skal jobbast med i framtida (presentasjonen ligg ved møteboka). Toft sa at det er viktig at planane er på plass for å kunna få midlar til ulike prosjekt, og for det nye kommunestyret er det slik at det skal vera ein planstrategi klar innan det første året av perioden.

Ordførar Per Lerøy sa at fristen for å komma med innspel til planstrategien vert sett til JONSOK 2020. Som Toft viste Lerøy til at med planar klare har Austrheim fått midlar, mellom anna trafikksikringsmidlar. – Austrheim har fått midlar som andre kommunar ikkje har klart å bruka opp, på grunn av at dei ikkje har hatt planar klare. Elles ser ein interesse for etablering av bustader i areal som kommunen regulerer og klargjer. Det er lurt å jobba med planar, også i periodar der kommunen har lite midlar.

Rådmann Liv Løvvik sa at det er ryddige planar som gjer at Austrheim kan fullføra det arbeidet ein er i gang med Kaland, med gangveg og hjartesone.

Gro Kaland (Sp) sa om arbeidet på Kaland at det er sørgjeleg at gangvegen stoppar der den gjer, burde gått heilt opp til hovudvegen på Mongstad-sida. Det vil gå nokre år før det kjem ny barnehage og veg til denne, og enn så lenge må ein gå i grøfta langs vegen. (Det er planlagt ny veg direkte frå kryss fylkesveg 57/fylkesveg 565, men dette er ikkje tidfesta)

Ordførar Per Lerøy (Ap) svara at for strekket frå Kaland skule mot fylkesveg 57-krysset på Mongstad sida så er kostnadsestimat i trafikksikringsplanen ganske formidabelt. Og den langsiktige planen er uansett å bygga ein ny veg med g/s – fortau attmed. Lerøy sa at han håpar og tru at ein kan starta med ny veg Kaland kryss - Leirvågkrysset ganske snart, også før det skal byggast ny barnehage på Kaland. - Denne vegen står høgt oppe på prioriteringslista.

---

Kommunalsjef service og forvalting, Thomas Lindås, orienterte om prosjektet «Strategisk eigedomsforvalting», herunder mogleg sal av kommunale eigedommar. Rapporten vart delt ut (den ligg ved møteboka).

Rådmann Liv Løvvik presiserte at Fylkesmannen har sett krav om å selja eigedommar for å investera, pga. at Austrheim ligg 30 millionar i overkant av gjeldsgraden (snitt) for andre kommunar i kommunegruppe 2. Løvvik viste til at formannskapet er orientert om at det er næringsinteresser som ser på Austrheim med tanke på lokalisering, og at det då er viktig å ha areal klare for sal, som er ferdig regulert.

Ordførar Per Lerøy (Ap) viste til at kommunane Alver og Austrheim, og næringslaget, har hatt besøk av Invest in Norway. Dei vart overraska over kva areal som er tilgjengeleg kring Mongstad, og kva breidde i miljøet og kompetanse det er der.

---

Handsaming i kommunestyret:

Samrøystes for å ta orienteringane til vitande.

Behandling

Sakshandsamar Rolf Henning Myrmel orienterte om framdrift for investeringar innan V/A. (presentasjonen ligg ved møteboka)

- Kommunen jobbar ut frå hovudplan vatn og den ROS-en som ein har, og VA-norm som er styrande.

- Det er utstyr for overvaking av vatnet på plass på Litlås og Årås, skal ha fleire på strekket mellom desse. Dette er digitale målarar slik at ein får varsel på telefonen om det skjer noko.

- Har ei Ros-analyse frå 2018, den er ikkje gammal men skal oppdaterast no, dette er høgaktuelt etter det som skjedde på Askøy. Oppdateringa skal vera ein skikkeleg gjennomgang.

- Det er engasjert firma for anbod på konsulenttenester, det skal komma på Doffin-basen no 14. februar, med avklaring til påske.

- For investeringane er det best økonomi i å ta sjøleidningane parallelt. Vidare må ein gjera tiltak for å få avløp ut av indre basseng, ligg i korta at det kjem noko miljøkrav her for å få dette ut av indre basseng.

- Etter at desse prosjekta er ferdige, når ein har fått ringvassleidning og dobla tilføringa til vasstårnet på Årås, så er det vatn til Førland som står for tur.

- Ringvassleidning til vasstårnet vil gje betre løysing for reservevatn. Kommunen har Rasmusvatnet som krisevatn, men det heldt ikkje drikkevasskvalitet og det vil vera store ulemper å ta det inn på drikkevassnettet.

- Ein håpar at ein kan komma i mål med ringleidning i Nordhordland, ved ei påkopling frå Radøy-sida mot Austrheim.

- Kommunen skal laga ny prøvetakingsplan som er godkjent av Mattilsynet. Det som det er litt usikkert er korleis ein skal lesa avtalen med Alver om reservevassforsyning (Austrheim får vatnet frå Alver sitt anlegg på Litlås).

Atle Utkilen (Bygdelista) spurte kvar tala i V/A-planen er henta frå.

Myrmel svara at tala i hovudplanen er gamle. Noko av endringane skuldast ein annan trasé enn det som låg inne før, prøver å ta vatn og avløp i same grøfta for ein del av dette.

Rådmann Liv Løvvik sa at det er ein del usikre tal, men kommunestyret ønskte ei slik førebels løypemelding. Får anten gjort meir eller mindre i den kommande perioden.

Ordførar Per Lerøy (Ap) sa at kommunestyret 12.12.19 ønskte ein slik gjennomgang for å sjå om ein kunne komma i gang med investeringar. Lerøy la til at så snart ein tidsplan for investeringane er klar, så må ein komma tilbake til kommunestyret med dette.

Gro Kaland (Sp) spurte om prosjektet med vatn Kaland, der dette hang saman med utbygging av omsorgsbustader.

Rolf Henning Myrmel svara at prosjektet med omsorgsbustader er utsett til 2022, så dette er ikkje med i planen no.

Gro Kaland (Sp) spurte om det er mogleg å komma i gang tidlegare?

Ordførar Per Lerøy svara at dersom ein privat utbyggar i nærleiken har overskot av stein, kan ein få ei ordning med å få steinmassar til å masseutskifta der omsorgsbustader på Kaland er planlagt (det er mykje jord på det aktuelle arealet).

Handsaming i kommunestyret:
Samrøystes for rådmannens framlegg til vedtak med presisering frå Per Lerøy:
Austrheim kommunestyre tek orienteringa til vitande.
Så snart ein tidsplan er investeringane innan V/A er klar, så må ein komma tilbake til kommunestyret med dette.

Behandling

Asbjørn Toft orienterte om saka (sjå orientering til formannskapet 13.02.20, og vedlegg til møteboka).

Toft sa at det er no spørsmål om å søka eller ikkje, lokaliseringa tar ein stilling til seinare.

Atle Utkilen (Bygdelista) spurte om det er sagt noko om lokalisering, har Vardetangen prioritet nummer ein?
Helge Dyrkolbotn (KrF) sa at han les framlegget slik at ein kjem tilbake til dette med lokalisering. Dyrkolbotn la til at folkehelseperspektivet er viktig, ein bør gjerne gå eit stykke for å komma fram til hytta, og det bør vera mogleg å kombinera det med skule/barnehage. Vidare oppfordra han til å jobba grundig med korleis ein skal drifta ei hytte som dette, men først må administrasjonen jobba med få inn søknad.

Bjørn Inge Dyrkolbotn (Sp) sa det er veldig bra at det kjem ei slik dagsturhytte i Austrheim.

Asbjørn Toft sa at kommunen har purra Markhus om dette med ei gåve av dagsturhytte/utestove til Vardetangen, og det er sett frist for å svara. Vardetangen er eit veldig fint turområde, og er den staden som har desidert flest besøk i dag av gåande. Svarer Markhus positivt, så kan kommunen få to hytter, både på Vardetangen og ein annan stad.

Handsaming i kommunestyret:
Samrøystes for rådmannens framlegg til vedtak.

Behandling

Rektor ved Årås skule/skulefagleg ansvarleg Bodil Boie Brekkan gjekk gjennom ein presentasjon om saka (ligg ved møteboka).

Varaordførar Inger Lise Brekke (H) sa at det kommunestyret skal ta stilling til er å samla 8. klasse ved Kaland barne- og ungdomsskule med 9. klasse same stad, eller med 8. klasse på Årås. Brekke viste til at Austrheim Høgre har programfesta at ein skal slå saman ungdomsskulane, men no er det berre dette årstrinnet det er tale om. – Det er bra at me fekk høyringsuttalane med oss i denne saka. Det er utruleg viktig at elevane får den kompetansen dei må ha for å komma vidare til vidaregåande skule. Ein må hugsa på at elevane frå Åsheim-krinsen vert teke i vare på same måte som våre, skal vera ønskte på same måte. Støttar rådmannens framlegg.

Rådmann Liv Løvvik viste til drøftingar med Alver kommune, som også skal sjå på skulestrukturen. Austrheim har presisert at ein gjerne vil ha Åsheim-elevane på Kaland. Har sagt at me kan gå ned til 50.000 i året per elev i kostnad, heller enn 100.000 som var sagt tidlegare. Det siste frå Alver er at dei vil ha ein eittårig avtale fram til dei ser strukturen for sine eigne skular.

Helge Dyrkolbotn (KrF) sa at det er bra at ein har komme så langt. Skulle gjerne ha samla heile ungdomstrinnet, ei sak som har vore debattert opp, ned, fram og tilbake. No gjer me dette som eit uavhengig tiltak, her gjer me vedtak for eitt år, men legg til grunn at intensjonen er at ein slår saman ungdomstrinna frå 2021. Det var bra at ein venta med saka til høyringsuttalane var klare, positivt med ungdomsrådet som vil rista desse ungdommane godt saman. No må ein ivareta elevar og foreldre på ein god måte, det har vore mykje usemje og styr, og det er viktig med ei god mottaking. Trur det kan bli veldig bra for ungdommane våre.

Morten Sognnes (H) etterlyste valet om å flytta elevane frå Årås til Kaland, ein ville lettare klart å halda på ungdommane frå Åsheim-krinsen med eit slikt alternativ. No risikerer ein å missa Åsheim-elevane også seinare, som elevar ved Austrheim vidaregåande. Håpar at det ikkje vert for store ringverknader av dette vedtaket.

Rådmann Liv Løvvik sa at Austrheim skal ta vare på alle elevane. Dette vert oppgåve nummer ein for den nye oppvekst- og kulturleiaren: Å sjå på felles ungdomsskule i Austrheim. Han kan gå inn uhilda i denne oppgåva, med eit kunnskapsrikt blikk. Løvvik viste elles til rettleiar Asbjørn Skår i Utdanningsdirektoratet, som er tydeleg på at det rette er å gå i si eiga årsgruppe. Når det gjeld Åsheim må ein avventa Alver kommune, men hugs at departementet har sagt at nærskuleprinsippet ligg fast, desse elevane vil ha rett til å gå på sin nærskule.

Gro Kaland (Sp) sa at partiet vil støtta rådmannen, men sjølv vil ho gå mot. Er redd for at ein øydelegg grunnlaget for barneskulen også, at Åsheim-elevane vil venda seg mot Lindås. Det kan øydelegga det gode miljøet ein har med Kaland, Kjeilen og nordre del av Lindås.

Handsaming i kommunestyret:
Rådmannens framlegg vedteke med 15 mot 2 røyster (mot Randi Keilegavlen Dyrøy, KrF, og Gro Kaland, Sp)

Vedtak

Austrheim kommune søkjer Bufdir om tilskot for å ta del i forsøk med fritidskort for haust 2020 og vår 2021.

Behandling

Gro Kaland (Sp) spurte om Austrheim har 418 barn i målgruppa låginntektsfamiliar.

Rådmann Liv Løvvik svara at det her vert laga ei løysing med fritidskort for alle born. Om det så viser seg at det ikkje kjem vidare støtte i år to, så må ordninga verta behovsprøvd. I dnene omgang gjeld det at administrasjonen må ha kommunestyrets godkjenning til å søka.

Handsaming i kommunestyret:
Samrøystes for rådmannens framlegg til vedtak.

Behandling

Ordførar Per Lerøy presenterte saka.

- Det har komme oppmoding frå Husbanken om at kommunane skal bli meir aktive på startlån. Det er rimelegare å eiga enn leiga, særleg i Austrheim her som det er firma som konkurrerer om dei leigebustadene som finnest. Startlån kan gje betre levekår for barnefamiliar, ved at dei kan bu rimelegare. Økonomisjef Olav Andersen har vore i kontakt med Fylkesmannen, som er positive til at kommunen skal utvida denne låneramma. Startlånsordninga har elles låge tap, 0,008 prosent på landsbasis.

Handsaming i kommunestyret:
Samrøystes for rådmannens framlegg til vedtak.

Behandling

Varaordførar Inger Lise Brekke (H) viste til at ein ønskjer å ta ei stegvis endring på dette, for å vera a jour i 2023. Kan ikkje gjera dette raskare, pga. den økonomiske situasjonen kommunen er i.

Helge Dyrkolbotn (KrF) sa at ein gjer det slik at godtgjeringane justerer seg automatisk ved andre endringar. Rådmannen må ta jobben med å gjera dette reglementet oppdatert, og jobben med å passa på at det vert utbetalt godgjering for dei som møter i ulike råd og utval. Men regelverket skal ikkje ha tilbakeverkande kraft, det skal gjelda frå 1.1.2020. Endringane må innarbeidast i budsjettet.

Rådmann Liv Løvvik sa at ein tar med seg det viktigaste frå Bergen kommune sine reglement for godtgjering, for å sikra at dette vert tydelege reglar som er lette å etterfølgja.

Helge Dyrkolbotn (KrF) presiserte at ordførar/varaordførar og formannskapet har fast godtgjering, så dette gjeld resten av kommunestyret.

Ordførar Per Lerøy sa at det skulle berre mangla at ikkje det var ei godtgjering for møte. Det er bra med ei oppjustering, for å komma a jour etter ei viss tid. Summane er heller ikkje fyrstelege samanlikna med dei andre kommunane i regionen.

Handsaming i kommunestyret:
Samrøystes for rådmannen/gruppeleiarane sitt framlegg til vedtak.

Behandling

Handsaming i kommunestyret:
Samrøystes for rådmannens framlegg til vedtak.

Behandling

Valnemnda hadde sett opp Oskar Nordgard som vara i plassen for Kari Lerøy Brekke.
I kommunestyret vart framlegget endra pga kjønnsbalanse mellom dei tre faste medlemmene.
Nordgard vart sett som fast medlem og leiar, Siri Kaland på varaplass.

Handsaming i kommunestyret:
Samrøystes for valnemndas framlegg til vedtak.

Behandling

Valnemnda presenterte sitt framlegg frå møtet 12. februar, dagen før kommunestyret.

Handsaming i kommunestyret:
Samrøystes for valnemndas framlegg til vedtak.

Behandling

Valnemnda presenterte sitt framlegg frå møtet 12. februar, dagen før kommunestyret.

Handsaming i kommunestyret:
Samrøystes for valnemndas framlegg til vedtak.

Behandling

Valnemnda presenterte sitt korrigerte framlegg.

Handsaming i kommunestyret:
Samrøystes for valnemndas framlegg til vedtak.

Behandling

Valnemnda presenterte sitt korrigerte framlegg.

Handsaming i kommunestyret:
Samrøystes for valnemndas framlegg til vedtak.

Behandling

Valnemnda presenterte sitt korrigerte framlegg, der nestleiar er på plass.

Handsaming i kommunestyret:
Samrøystes for valnemndas framlegg til vedtak.

Behandling

Valnemnda presenterte sitt korrigerte framlegg, der nestleiar og siste varamedlem er på plass.

Handsaming i kommunestyret:
Samrøystes for valnemndas framlegg til vedtak.

Behandling

Handsaming i kommunestyret:
Valnemnda sitt framlegg vedteke med 16 mot 1 (Atle Utkilen, Bygdelista)

Behandling

Valnemnda presenterte sitt korrigerte framlegg, der varamedlem er på plass.

Handsaming i kommunestyret:
Samrøystes for valnemndas framlegg til vedtak.

Behandling

Valnemnda presenterte sitt framlegg, der varamedlem er på plass.

Handsaming i kommunestyret:
Samrøystes for valnemndas framlegg til vedtak.

Behandling

Valnemnda presenterte sitt framlegg.

Handsaming i kommunestyret:
Samrøystes for valnemndas framlegg til vedtak.

Behandling

Økonomisjef Olav B. Andersen viste til saka som var oppe i administrasjonsutvalet og formannskapet i januar.

Endringane i 202-budsjettet som kommunestyret gjorde i sitt vedtak 12.12.2019, første til at overskotet er redusert.

Kommunen har elles redusert låneramma, og skal selja meir eigedom for å dekka inn for dette.

Handsaming i kommunestyret:
Samrøystes for rådmannens framlegg til vedtak.