Møte i Kommunestyret den 18.06.2020

Vedtak

Innkalling og sakliste vart godkjent

Behandling

(Marita Bru, Bygdelista, deltok i møtet via Teams)

Handsaming i kommunestyret:
Rådmannen sitt framlegg vart samrøystes vedteke

Behandling

Handsaming i kommunestyret:
Rådmannen sitt framlegg vert samrøystes vedteke

Behandling

Skatteoppkrevjar Bjarne Ve Sæbø tok ein gjennomgang av reglane for startlån, som er for dei som ikkje får lån i vanleg bank, med prioritering av barnefamiliar/ dei med helseutfordringar. Når det gjeld tap, så er kommunen til sist ansvarleg for dei siste 25 prosent av tapet. Resten er ordna via tapsfondet til Husbanken.

Marita Bru (Bygdelista) spurte om kan få startlån for å unngå å mista huset. Bjarne svara at ein kan refinansiera banklån med startlån, og gje lang nedbetalingstid og periodar utan avdrag.

Ordførar Per Lerøy viste til at Husbanken reknar med 0,008 tap på sine startlån.

Monika Thorpe (Ap) spurte om kven som handsamar og evt. gjev avslag på startlån, er det kommunen eller Husbanken? Bjarne Sæbø svara at det er kommunen som sakshandsamar på Husbanken sine reglar.

Aslak Bakke (H) spurte om ordninga er mykje brukt. Sæbø svara at det er den, men sidan Austrheim er på Robek-lista er det avgrensa kor mykje ein kan låna av Husbanken.

Inger Lise Brekke (H) om det er mange som får nei på grunn av at det no er tomt for pengar. Sæbø svara at det er ulike grunnar for avslag, ikkje berre at det no er tomt for pengar.

---

Skatteoppkrevjar Bjarne Sæbø viste presentasjon over moglege skatteinntekter ved nytilflyttingar (ligg ved).

Aslak Bakke (H) spurte om kommunen er flink nok til å legga til rette for nyetableringar av bedrifter. Er betre tilrettelagt i Alver-sida på Mongstad, med vatn med meir. Oppfordra til å satsa meir på næringsutvikling i kommunen.

Rådmann Liv Løvvik sa at det ikkje berre er det at innbyggjarar skal komma, men må skapa eit miljø for at dei skal bli også.

Marita Bru (Bygdelista) sa at ein må tenkja på å vidareutvikla det ein har, kva profil skal kommunen ha. Tenkja heilskapleg med miljøprofil og korleis ein skal framstå.

Aslak Bakke (H) sa at han er samd i miljøprofil, men må dra med seg lokale leverandørar og selja inn dette.

Rådmann Løvvik viste til at Os kommune lukkast med å stilla med nøkkelferdige kontor. Utfordringa for Austrheim er at ein må selja for 20 millionar for å bygga opp disposisjonsfond, før ein brukar midlar. Ligg til rette for å bruka naturen, men bruka med fornuft.

Per Lerøy viste til at ein i Sløvåg har lukkast med å sitja fleire bedrifter saman, og har utvikla gode næringsidear.

---

Aslak Bakke (H) spurte om sjukemeldingstal.

Kommunalsjef Odd Harald Dommersnes svara at ein skal rapportera på dette til kommunestyret framover. Ser så langt at skulane har veldig lågt sjukefråvær.

---

Kommunalsjef Bjørnar Fjellhaug svara Marita Bru (Bygdelista) på spørsmål om barnehage (spørsmål og svar ligg ved møteboka).

---
Rådmann Liv Løvvik svara Marita Bru (Bygdelista) på spørsmål om utvalsmodell, og sa at administrasjonen ikkje har sett på dette enno. Kan eventuelt vera mest aktuelt for planfeltet.(Spørsmål ligg ved møteboka).

---

Ordførar Per Lerøy (Ap) viste til Opprop om vindkraft, eit innspel som kom denne veka kommunestyret var. Lerøy sa at det er viktig at kommunane må bli høyrt i desse sakene, ein ser at mellom anna Gulen og Tysvær er opprørt over korleis dei vert handsama. Fleire kommunar seier at dei ikkje vil ha dette tredd nedover hovudet. Folk reagerer på at ein seier nei lokalt, men så kjem det vindkraft likevel. Riktig å gje denne støtta til nabokommunane våre Alver og Gulen.

Marita Bru (Bygdelista) sa at Alver har ikkje vedtak på dette med vindkraft, men dei tre tidlegare kommunane i Alver har vedtak på dette frå før samanslåinga. Synest at Austrheim godt kan støtta naboane tydelegare på dette.

Semje i kommunestyret om å støtta oppropet.

Handsaming i kommunestyret:
Rådmannen sitt framlegg vert samrøystes vedteke

Behandling

1. Koronapandemien, status. (ved Peter Kubon og Liv Løvvik)

Kommunelege Peter Kubon orienterte om status for Koronapandemien. – Det har ikkje vore smitte i regionen sidan 29. april 2020, det var i Alver kommune. Austrheim har beredskap klar i helse- og legeteneste for å møta eit behov for testing som kan komma i sommar. Om det skjer noko i ferien er det gitt fullmakter til å kalla inn personell. Det er også eit samarbeid interkommunalt.

Kommunelegen jobbar med tilsyn/rettleiing for ulike bedrifter/bransjar, i tillegg til for gravferder, konfirmasjonar med meir.

Håpet er at det samla sett for butikk, reiser, servering med meir vert teke gode val, så kan denne situasjonen halda seg.

Ordførar Per Lerøy (Ap) sa at han er imponert over det arbeidet som vert gjort.

2. Sal av kommunale leilegheiter og kjøp av nye og meir robuste bueiningar. (ved Rolf-Henning Myrmel)

Leiar teknisk drift, Rolf Henning Myrmel, sa at kommunen er i ferd med å selja ei kjellarleilegheit, som del i arbeidet med å finansiera bustad for hard bruk. Har ei kommunal tomt på Årås ein ser på for plassering av ny bustad, men ingenting er bestemt. Skal sjå på kva som er tenleg, bustaden skal ikkje ligga avsides, med tanke på at hjelpeapparatet må kunna komma til.

Skal sjå på finansiering opp mot Husbanken sine ordningar.

3. Sal av kommunal buss og andre kommunale eigedommar. (ved Odd-Harald Dommersnes (buss), eigedommar Thomas Lindås)

Kommunalsjef økonomi og personal Odd Harald Dommersnes orienterte om sal av minibuss. ATS Norway tar seg av salet, det er største marknadsportalen for dette. Bussen er prisa til 489.000, den har tapt seg stort i verdi, den vart kjøpt for nesten 900.000 for tre år sidan.

Kommunalsjef service og forvalting, Thomas Lindås, orienterte om sal av eigedommar. (Sjå liste som var presentert). Om summen på rundt 8 millionar i samla sal sa Lindås at det ikkje er alt som lar seg realisera i dag, men ser på om det er andre prosjekt som kan realiserast inn som del av i dette.

Aslak Bakke (H) spurte om rekkefølgja er sett for sal av eigedommar.

Lindås svara at det er bustadareal Fonnes som vert selt først (er annonsert) deretter kan dette endra seg etter kvart som det går.

Ordførar Per Lerøy (Ap) viste til at ein også har næringsarealet på Mongstad på nesten 400 mål, som er under regulering. Når reguleringsarbeidet er gjort kan det gå på nokre veker å starta utbygging, om prosjektet er i henhold til reguleringsføremåla. Har også eit næringsområde Mongstad med lite rekkefølgjekrav, det det er lett å få til ting. Her står ein evt. kjøpar ganske fritt for kva ein vil etablera.

Reidar Øksnes (Sp) spurte om det går inflasjon i firemannsbustader.

Om dette sa Liv Løvvik at det er opp til utbyggar å velja, og det kanskje fleire som klarer å kjøpa seg bustad med mindre einingar av denne typen.

4. Kjøp av leilegheiter i Sætremarka burettslag. (ved Thomas Lindås/Monika Kvamme)

Kommunalsjef service og forvalting, Thomas Lindås, sa at kommunen etter statuttane ikkje kan kjøpa fleire leilegheiter i Sætremarka burettslag.

Rådmann Liv Løvvik sa at kommune evt. kan skaffa seg fleire leilegheiter og sikra bustad kanskje til dømes for unge uføre.

Marita Bru (Bygdelista) spurte om kva krav det er for å få kjøpa leilegheit i Sætremarka. Kommunalsjef helse og omsorg Monika Kvamme svara at det er same reglar som tidlegare. Må mellom anna bu i kommunen. Om statuttane vert endra og kommunen kan kjøpa fleire leilegheiter, så kunne det opna for yngre bebuarar, og kanskje kunne nokon som bur i Vestlia flytta dit.

Per Lerøy (Ap) sa at om kommunen er tyngre inne på eigarsida er det mogleg å endra statuttane.

5. Status kaiar og båthamner på Mastrevik, Hopland, Solend og Baløy. (ved Rolf-Henning Myrmel/Thomas Lindås)

Kommunalsjef service og forvalting, Thomas Lindås, sa at det ikkje er gjort noko nytt med kaien i Mastrevik no.

Ordførar Per Lerøy (Ap) viste til at dette med båthamn/kai i Mastrevik er ei sak som har gått lenge, der kommunen på 90-talet selde dampskipskaien til Mastrevik Mek, medan det var oppsitjarane som eigde denne. Lerøy sa at han håpar kommunen landar denne saka på ein god måte. Dampskipskaien vert elles brukt i dag til skuleruta.

Aslak Bakke (H) ba om ei oppdatering på kva som har skjedd i denne saka. Målet må vera å ordna opp, og at kommunen må sitja igjen med noko. Vil gjerne ha kort informasjon til alle om dette.

Leiar teknisk drift, Rolf Henning Myrmel, sa at det vart laga eit skriv den gongen frå teknisk, der ein rådde frå sal av kaien, då ein meinte kommunen ikkje hadde rettar der. Det er brukt ganske mykje ressursar på å få ordning på dette. Kaien er regulert til offentleg føremål, og kan ikkje brukast til så mykje anna.

Thomas Lindås sa at ein jobbar for å komma til ei minneleg og god løysing.

For Hopland kai sa Thomas Lindås at ein må sjå på grensene. Arealet til bygdekaien finn ein ikkje dokumentasjonen på. Det offentlege arealet er dokumentert, det er om lag halvparten av arealet.

For Solend kai sa ordførar Lerøy at Einar Synnevåg skal ha sendt søknad om støtte til opparbeiding og vedlikehald. Hardy Pedersen (Ap) la til at det er velforeining og båtlag som er saman om dette initiativet. Rolf Henning Myrmel svara at kommunen skal sjå på dette og ta kontakt.

Rådmann Liv Løvvik sa om dette at det er krevjande å finna midlar, for det er ikkje sett av store midlar framover til vedlikehald.

Ordførar Lerøy sa at det er OK å ikkje ha midlar, men ein må svara. Er heller ikkje store summar det er tale om, for at kaien er tilgjengeleg for folk flest.

Om Baløy kai sa Rolf Henning Myrmel sa at slippen/båtoppdraget skulle hatt støypt dekke. Dette er eit tiltak for båtar/ kajakk med meir. Har ikkje midlar på teknisk til å dekka dette arbeidet. Må sjå på desse tilfella der båtforeiningar brukar areal der kommunen er grunneigar, er det rett at ei gruppe skal bruka kommunal eigedom utan vederlag.

Ordførar Lerøy viste til at Rongevær Båtforeining ønskjer å forskottera dette arbeidet og få det gjort no. Var sagt tidlegare at ein skulle ta av inntektene frå sal av naust der ute til å rusta opp kaiområdet, men det skjedde ikkje.

Rådmann Liv Løvvik sa at ein må ha gode planar for kva som det er viktigast å ta fatt på av ulike prosjekt.

Rikke Heldal Hope (H) sa at ein må oppfordra til å søka midlar andre stader, til dette sa Liv Løvvik at organisasjonar ofte må registrera seg i Brønnøysund for å kunna komma i posisjon for å søka om midlar.

Reidar Øksnes (Sp) sa at kommunale kaiar må vera trygge, og oppmoda til ein sjekk av rekkverket på den kommunale kaien på Øksnes. Oppfordra elles til god oppfølging av dei prosjekt ein startar opp.

6. Bruk av ekstraordinære vedlikehaldsmidlar (1,1 MNOK). (ved Rolf Henning Myrmel)

Leiar teknisk drift, Rolf Henning Myrmel, sa at dette er arbeid som skal gjerast med eksterne tilsette. Midlane skal styrka tilsettinga, og det skal vera prosjekt som kan setjast i gang ganske raskt.

Kommunen har fått inn pris på maling av to bustader ein tok over frå AS Austrheim næringsselskap, og har sett av 100.000 til dette arbeidet.

Det er sett av inntil 50.000 til toalettanlegg på Vardetangen.

Ser på vidareføring av arbeidet på Kaland skule, for å sikra universell utforming. Dette var på lista då ein stoppa arbeidet på Kaland skule.

Ser på eit evt. ekstra borehol på ventilasjon/varmeanlegg på Kaland for å kunna utvida dette anlegget og vidareføra ned i underetasjen.

Om dette spurte Britt Skålevik Lerøy (Ap) om vedlikehaldet Kaland er ekstraordinært. Rolf Henning Myrmel svara at dette er arbeid som det ikkje er sett av pengar til, i 2020 eller lengre framme.

Ordførar Per Lerøy (Ap) sa at dette er arbeid som ikkje var planlagt, men som kan styrka sysselsettinga i regionen.

Britt Skålevik Lerøy (Ap) spurte om det var mogleg å bruka midlar til oppgradering av turløyper.
Rolf Henning Myrmel svara at administrasjonen skal oppdatera kommunestyret vidare om dette når ein får inn fleire prisar, skal sjå på dette med turstiar også.

Gro Kaland (Sp) sa at det er bra at ein held fram med arbeidet på Kaland skule, arbeidet trengst.

7. Status VA-prosjekt. (ved Rolf Henning Myrmel)

Leiar teknisk drift, Rolf Henning Myrmel, sa at anbodspapira for Vardetangen-Utkilen er ute, med frist 6. juli. Arbeidet skal ut på anbod i løpet av sommaren, og ein ser for seg at å inngå kontrakt tidleg i august, og komma i gang ganske raskt. Skal også ha vassleidning vidare til Mastrevik.

Jobbar med etablering av elektroniske målarar rundt om, det er eit godt hjelpemiddel for å ha oversikt over forbruket.

Prosjektet med vassleidning Mongstadkrysset- Leirvågkrysset, dette skal prosjekterast slik at ein har V/A med når ein kjem i gang med rundkjøring i Leirvågkrysset.

Er i dialog med Alver kommune om kva som skjer i åra framover, med tanke på at ein ringvassleidning mellom Radøy og nordre Lindås som også kan gje ei reservevassløysing i Austrheim. Reservevatn lokalt er av dårleg kvalitet, og må sjå på pris for reinsing av vatn henta lokalt eller henta frå Alver. Myrmel sa at administrasjonen skal orientera kommunestyret vidare på dette.

Anne Dahle Austrheim (KrF) spurte om meldinga som har gått ut om å spara på vatnet.

Rolf Henning Myrmel svara at dette er eit problem i helgene. Har ikkje stor nok kapasitet i helgene når det er mange på hyttene og det er fylling av basseng og spyling. Austrheim har rett til å ta ut mykje vatn frå Alver, men har ikkje overføringskapasitet til å få det ut til abonnentane.

Marita Bru (Bygdelista) spurte om kva som er av lokale kjelder for reservevatn.

Myrmel svara at dette er Rasmusvatnet og Langevatnet, men det vart stengt pga. oppblomstring av algar. Ser ikkje at dette er gode løysingar lokalt sjølv med reinsing. Det vert utfordrande og kostnadskrevjande, Austrheim har eigentleg ikkje gode løysingar lokalt.

Ordførar Per Lerøy (Ap) spurte om framdrift på arbeidet med avlaup.

Myrmel svara at ein etter ferien skal skifta ut pumpestasjonen i Åråsvågen, dette arbeidet skal ut på anbod. Har mange prosjekt som går på ein gong no.

Rådmann Liv Løvvik viste til at for vassavtalen ønskjer Alver å seia opp denne. Om dette vert sett som vilkår for å komma med på reservevassløysinga, så må Austrheim sjå på alle moglegheiter. Kan ikkje betala forbrukarpris for vatnet inn, når ein har sitt eige distribusjonsnett i tillegg.

Per sa at med eit godt nok tilbod så kan ein vurdera vassavtalen, men den er i utgangspunktet evigvarande.

8. Status tilsetjingar i kommunen (lege, psykolog, rektor, ppt-leiar, studieinspektør osv.). (ved Bjørnar Fjellhaug/Monika Kvamme, evt. fleire)

Kommunalsjef kultur og oppvekst, Bjørnar Fjellhaug, sa at for rektor Kaland og leiar PPT er ein i gang med tilsetting, og ventar tilsetting før sommaren. Studieinspektør på Kaland ventar ein med, til ein har landa skulestruktur framover.

Kommunalsjef helse og omsorg, Monika Kvamme, sa at kommunen er i gang med å tilsetta lege, og skal i gang med å tilsetta psykolog. Fekk tre søkarar som lege, to til psykolog. Skal i gang med arbeidet med heiltidskultur i helse og omsorg. Jobbar med ergoterapeut saman med Fedje kommune.

Tar inn fire TAF-lærlingar, har gjennomført intervju på desse no. Har vore med på TAF-ordninga i 10-11 år, og har gode resultat for dei som tar fagprøven.

Kokk er tilsett i den stillinga som var utlyst.

Inger Lise Brekke (H) spurte om det vert jobba med å få tilsett ein kvinneleg lege, slik det var diskutert under handsaminga av denne saka i formannskapet. Spurte også om samarbeid med Fedje.

Monika Kvamme svara at Austrheim skal i gang med legesamarbeid med Fedje. For tilsetting av lege tilsetter ein den best kvalifiserte.

Ordførar Per Lerøy spurte om søkarliste for legestillinga. Rådmann Liv Løvvik viste til at tilsettinga ikkje er avslutta, men ein har kvalifiserte søkarar til stillinga.

9. Status organisasjonsprosjektet i kommunen. (ved Ole Georg Hoaas)

Ole Georg Hoaas heldt ein presentasjon om prosjektet (denne ligg ved møteboka). - Prosjektet er i ein tidleg fase, der ein skiljer mellom roller/prinsipp og personar.

Rådmann Liv Løvvik sa at det er viktig å sjå organisasjonen samla, for å bruka midlane til det beste for brukarane. Det må vera samhandling på tvers i organisasjonen.

Britt Skålevik Lerøy (Ap) spurte kven somerstyringsgruppe for arbeidet.

Ole Georg Hoaas svara Britt Skålevik Lerøy (Ap): Det er rådmannens leiargruppe, med tillitsvalde, som er styringsgruppe for arbeidet. Når det gjeld organisering, er det rådmannen som har det siste ordet.

Inger Lise Brekke (H) spurte om det vert auka lønsutgifter om tilsette skal ha nye stillingskodar i ny organisasjon.

Liv Løvvik svara at dette må ein løysa innanfor rammene. Det som er klart er at ingen får jobba berre med leiing, også leiarar skal driva med sakshandsaming. Det er ikkje mål om å utvida staben, men prøva å bruka ressursane på ein smartare måte. Jobbar også med dei tiltaka ein må gjera for å sikra finansieringa.

Inger Lise Brekke (H) spurte om nye stillingar først vert lyste ut internt, før det vert lyst ut eksternt.

Om dette sa Ole G at det kan vera enkelte stillingar der ein treng ekstern kompetanse. Må jobba for å få handlingsrom til å lysa ut desse.

Liv Løvvik sa at det må gjerast vurderingar av kompetansebehov for å sjå kva ein treng i organisasjonen. Først må ein teikna kart over kva organisasjonen treng, og noko kan ein løysa internt. Austrheim kommune har mykje kompetanse internt, men når ein skal bygga framtidas organisasjon ser ikkje Hoaas vekk frå at det trengst ny kompetanse.

10. Status forlenging av gang og sykkelveg på Fonnes (ved Varde-brua). (ved Rolf Henning Myrmel)

Leiar teknisk drift, Rolf Henning Myrmel, sa at kommunen ser på ei løysing der ein bygger gang/sykkelveg som landbruksveg, for å gje veg fram for fleire bustader. Grunneigar stiller stein til disposisjon, og det er låge kostnader, men kommunen har ikkje midlar til dette i dag. Sidan arbeidet ikkje er i samsvar med reguleringsplan og trafikksikringsplan er det vanskeleg å få midlar frå fylket, men kommunen vil jobba vidare med dette for å sjå om ein kan finna finansiering. Dette kan få fem bustader til inn på gangsvegsystemet på Fonnes.

Ordførar Per Lerøy (Ap) viste til at Vestland fylke forlenga søknadsfristen for trafikksikringsmidlar til 15.07.20 på grunn av at det er få som har søkt. Kommunen må søka, og gjerne ta kontakt med sakshandsamar.

11. Miljøfyrtårn, status på prosjektet. (ved Odd-Harald Dommersnes)

Kommunalsjef økonomi og personal, Odd-Harald Dommersnes, orienterte om kva det inneber å sertifisera kommunen som miljøfyrtårn (sjå presentasjonen som ligg ved).

Dommersnes viste til at det er ein omfattande jobb som må gjerast med dette. Om Austrheim startar arbeidet i år, er det 100.000 kroner i utgift i 2020. Men det er mogleg å spara ein del på å vera sertifisert som Miljøfyrtårn, mellom anna med lågare rente på grøne lån. Har elles søkt om 100.000 kroner frå Vestland fylkeskommune.

Ordførar Per Lerøy (Ap) sa at dette er ein del av tilpassinga til Nordhordland biosfæreområde.

Anne Dahle Austrheim, (KrF) sa at det er ei investering i framdrifta, men at det ikkje kan førast i investeringsrekneskapen.

Rådmann Løvvik sa at dette også handlar om at kommunen ønskjer å vera attraktiv.

Odd Harald Dommersnes sa at erfaringa frå Skyss er elektriske bussar gjer at fleire ønskjer å reisa kollektivt. Det må jobbast på mange frontar samstundes, mellom anna med å byrja å stilla krav til leverandørane.

Reidar Øksnes (Sp) ba om kommunen er tidleg ute og informerer dagens leverandørar om dette. Dommersnes svara at det er mykje av kjøp som må gjerast betre, er ikkje i tråd med lovar og reglar slik det er i dag.

Andre orienteringar:

Inger Lise Brekke (H) etterlyste om det er eit avvikssystem på plass i organisasjonen, og om dette er i bruk. Dommersnes svara at systemet er godt, men det er lite i bruk.

Rådmann Løvvik svara at det er enkelte som er flinke til å bruka avvikssystemet, andre brukar det lite og vil heller levera på papir. Dette må løftast slik at alle er digitale.

Inger Lise Brekke (H) sa at avvikssystem, kontinuerleg forbetring og vernerunde heng saman. Må få fram kva som fungerer og ikkje fungerer.

Dommersnes sa at leverandøren Compilo skal visa avdelingsleiarane korleis det skal brukast, og så skal det informerast nedover i rekkene.

Behandling

Økonomi- og personalsjef Odd Harald Dommersnes orienterte om saka. (presentasjonenligg ved møteboka).

Ordførar Per Lerøy (Ap) spurte om det kom skatt på etterskot i samband med at det vart gitt utsettingar på skatteinnbetalinga. Skatteoppkrevjar Bjarne Sæbø svara at dette er bedriftsskatt som går til Staten.

Kommunalsjef økonomi og personal, Odd Harald Dommersnes, sa om skatt at det vert utfordrande å få inn den skatteinngangen som er sett opp i budsjettet. Dette gjeld også eigedomsskatten, der er Equinor ute med skritt mot dei kommunane dei er etablerte i.

Ordførar Per Lerøy sa om utbytte frå Mongstad Vekst at prosessen med å avvikla selskapet har stoppa opp. Er i gang med regulering av eit areal sør for Kjeilen-krysset. Ser for seg at netto i selskapet er det 16 millionar, der 4,2 millionar er knytt til eigedommar i Kjeilen-krysset. Har hatt inne to taksatorar på denne eigedommen som har sett verdien til 11-13 millionar, men det er usannsynleg at ein skal få desse summane. Ved ei oppløysing av Mongstad Vekst vil 16 millionar vera tilgjengeleg over nyttår, anten i form av eigedom eller i reine midlar. Skal delast mellom BKK 50 prosent, Lindås tomteselskap og AS Austrheim Næringsselskap 25 prosent kvar. Kring fire millionar vil gå til AS Austrheim Næringsselskap (som Austrheim eig), men det er litt usikkert.

Ligg også an til avvikling av AS Austrheim næringsselskap, som også har verdiar på 1,8 millionar. Kommunen kan henta desse midlane tidlegare om ein avsluttar AS Austrheim næringsselskap no, og overfører eigarskapet i Mongstad vekst direkte til kommunen.

Kommunalsjef Odd Harald Dommersnes sa at dette med midlane frå Mongstad Vekst påverkar økonomien i 2020, sidan dette var midlar som var rekna med i inneverande. For økonomien tel det på
på plussida at det nok vert lågare lønsvekst i 2020 enn det som er lagt inn i budsjettet med 4 prosent.

Per i dag kan nok Austrheim klara å komma ut av Robek med dei naudsynte 850.000 kronene, men det er på håret. Må vera veldig forsiktige med å pådra seg nye kostnader. Må sjå på straumavtalen, som er 30 øre meir per kilowatt enn marknadspris. Og om ein endrar lånerenta er det mogleg å henta mykje der.

Rådmann Løvvik sa at ein driv og ryddar i krokar og krikar for å finna ting. Ser at kommunen har bunde seg til avtalar for å sikra rentar og utgifter, men er no dyrt for kommunen.

Aslak Bakke, H, sa at det er bra å få denne informasjonen.

Kommunalsjef Dommersnes sa at kommunen må gå gjennom absolutt alt for å driva det betre. Binding gjev sikring, men her har ein låst 80 prosent av lånekapitalen.

Ordførar Per Lerøy (Ap) sa at ein ikkje skal vera etterpåklok, ingen hadde venta denne rentenedgangen som kom av Korona. Elles er dette informasjon som bør komma som naturleg del av informasjonen frå administrasjonen.

Rådmann Løvvik sa at ein kan sikra lånerenta for 50 prosent av lånekapitalen, men treng ikkje sikra så mykje som 80 prosent. Når ein no går gjennom alt, så er det for å ta absolutt alt før ein tar for seg stillingar. Folk kan kjenna seg kikka i korta, men slik er det.

Monika Thorpe (Ap) takka for økonomigjennomgangen, og sa at dette var ein konkret og god gjennomgang. Dei grep som er tatt tidlegare er gjort i beste meining.

Dommersnes lova fleire slike gjennomgangar framover, og sa at det skal vera enkle tal, ikkje mange sider.

Rådmann Liv Løvvik ba om at utgiftene til å starta arbeidet med miljøfyrtårn-sertifisering, 100.000 kroner i 2020, vert lagt inn i justeringa. Dette vil redusera resultatet tilsvarande.

Dette sa kommunestyret OK til.

Aslak Bakke (H) spurte om utgifter til Korona vert kontoført slik at ein kan sjå kva Korona kostar kommunen. Rådmann Liv Løvvik stadfesta at dette vart ført slik.

Handsaming i kommunestyret:
Samrøystes for formannskapet si tilråding, med justering om 100.000 til miljøfyrtårn-sertifisering.

Behandling

Økonomi- og personalsjef Odd Harald Dommersnes orienterte om saka.

Handsaming i kommunestyret:
Samrøystes for formannskapet si tilråding.

Vedtak

Kommunestyret tar tertialrapport I 2020 til vitande.

Behandling

Økonomi- og personalsjef Odd Harald Dommersnes orienterte om saka.

Handsaming i kommunestyret:
Samrøystes for formannskapet si tilråding.

Behandling

Varaordførar Inger Lise Brekke (H) orienterte om at Per Lerøy vert sett inn som leiar i kommunekomiteen.

Gro Kaland (SP) spurte om ikkje ungdomsrådet burde vore involvert her. Anne Dahle Austrheim (KrF) ba om at det vart ført inn i vedtaket at ein tek med eit medlem frå ungdomsrådet.

Det var semje om å føra dette til i vedtaket.

Handsaming i kommunestyret:
Samrøystes for framlegg med Per Lerøy som leiar, og med medlem frå ungdomsrådet.

Behandling

Aslak Bakke (H) og Marita Bru (Bygdelista) presenterte på vegner av valkomiteen.
Kandidatane er vandelssjekka og har vore ute på høyring.

Handsaming i kommunestyret:
Samrøystes for valnemnda sitt framlegg til vedtak.

Behandling

Sakshandsamar Ketil Tjore orienterte om saka.

Handsaming i kommunestyret:
Samrøystes for rådmannens framlegg til vedtak.

Vedtak

Kommunestyret vedtek rådmannen sin tiltaksplan for oppfølging av forvaltningsrapport om spesialundervisning og PPT som omtala i saka.

Kommunestyret ber om rapport innan april 2021 på tiltaksplanen.

Behandling

Kommunalsjef oppvekst og kultur Bjørnar Fjellhaug presenterte kommunen sin tiltaksplan for oppfølging av forvaltningsrapport om spesialundervisning og PPT (sjå vedlegg).

Marita Bru (Bygdelista) sa at med ein god struktur er det lettare for foreldra å vita kva rettar dei har. La til at det var litt få som svara på undersøkinga. Bru sa vidare at det er viktig å følgja opp at det vert gitt tilbod som tilsvarer det som er gitt i vedtak. Synest at rapporten understrekar at ungdomsskulen bør samlast på ein plass, for å styrka og samla den spesialpedagogiske kompetansen.

Liv Løvvik sa at dette handlar om at det spesialpedagogiske korpset må vera på plass med rettleiing, her er det eit forbetringspotensiale på systemnivå, der ein må følgja opp arbeidet i skulane. Kommunen leverer på vedtaka, men må syta for at barna vert ivareteke betre enn i dag, og fanga opp ting tidleg.

Kommunalsjef Bjørnar Fjellhaug lova at ein skal følgja opp arbeidet med jamleg rapportering til kommunestyret

Monika Thorpe (Ap) spurte om korleis ein skal jobba med dette frå no av.

Kommunalsjef Bjørnar Fjellhaug svara at kommunen skal ta i bruk kvalitetssystem og følgja opp fagpersonale. Gjennom månadlege avdelingsmøte i oppvekst og kultur skal ein jobba med å gjennomføra det som ligg i kriteria. Skal ha PP-tenesta inn for å sjå på korleis ein jobbar no, og korleis ein skal jobba framover.

Inger Lise Brekke (H) sa at det er foreldre som ikkje vil at informasjonen skal flyta over ved overgang barnehage/skule og barneskule/ungdomsskule, og som vil at barna skal starta med blanke ark og ikkje vera «førehandsdømte».

Kommunalsjef Bjørnar Fjellhaug svara at det skal gis samtykke frå foreldre for å gi informasjonen over ved overgangar. Men det er generelt til det beste for barnet at informasjonen går over, må trygga foreldra i det at dette skal gjerast til barnets beste.

Inger Lise Brekke (H) sa at ho var samd med at informasjonen bør gå vidare ved slike overgangar. Brekke spurte om arbeidsgruppa skal ha med tillitsvalde?

Kommunalsjef Fjellhaug svara at det ikkje skal vera tillitsvalde i arbeidsgruppa, det er faggrupper det er tale om her.

Handsaming i kommunestyret:
Samrøystes for rådmannen sitt framlegg til vedtak.

Behandling

Kommunalsjef Thomas Lindås orienterte om saka, der retningslinjene er endra sidan saka var oppe i kommunestyret sist.

Ordførar Per Lerøy (Ap) sa at dette er OK, med den fleksibiliteten ein må ha.

Marita Bru (Bygdelista) spurte om det er nok med eit skjul på ein næringseigedom, så er det OK.

Om dette svara Thomas Lindås at det er noko ein må ta med i salsprosessen. Må gjerne skilja mellom ei tomt som skal seljast til bustad, eller næringseigedom det det kan vera vanskelegare å stilla slike krav, om den som kjøper tomta skal utvikla denne og bygga opp før ein får sjekka interessa med marknaden. Administrasjonen er elles samd i at ein må sikra gode kontraktar for å unngå dette med næringseigedommar med «eit vedskjul» på.

Reidar Øksnes (Sp) spurte om ordførar skal kunna nekta for eit sal av ein eigedom? Til dømes om ein er involvert i ein kjøpsprosess sjølv. Meiner at det er det innhaldet som ligg i dette punktet slik det står no.

Ordførar Per Lerøy (Ap) sa at dersom ein ugild så er ein ikkje involvert, og då kjem ein ikkje i slike situasjonar.

Rådmann Løvvik sat at habilitetsregelverket vil tre inn i slike situasjonar.

Thomas Lindås sa at ein kan skifta «endeleg godkjenning» med «signering», då går noko av kontrollfunksjonen vekk.

Reidar Øksnes (Sp) sa at slik framlegget er så kan ordførar stoppa eit sal. Vil heller ha at endeleg avtale vert signert av ordførar.

Marita Bru (Bygdelista) sa at det kunne stått at ordførar signerer på vegner av kommunestyret, som i «Ved sal av eigedom signerer ordførar på vegner av kommunestyret».

Rådmann Liv Løvvik sa at dette med signering følgjer av kommunelova paragraf 6.1, og kommunalsjef Thomas Lindås sa at det er krav om signering frå Kartverket når det skal inn til godkjenning av skøyte.

Marita Bru (Bygdelista) sa til punktet om høgaste pris, er det slik at kommunen skal diskutera med enkelte kjøparar?

Kommunalsjef Thomas Lindås svara at det i første omgang er eit spørsmål om å få informasjonen ut til flest mogleg ved sal. Men det kjem også inn folk som spør om det er mogleg å kjøpa og utvikla eit område. For arealet som er til sals på Kaland/Fonnes, der vert det invitert inn til eit informasjonsmøte der ein deler den informasjonen som er aktuell for det enkelte område.

Ordførar Per Lerøy sa at det også kan vera slik at ein går inn i eit samarbeid med konkrete tilbydarar for å få til ei utvikling, som til dømes det er gjort i Bergen for spørsmålet om ein byarena. Men då er det eit politisk fleirtal i ein open politisk prosess som gjer dette.

Aslak Bakke (H) sa at det må telja noko også kva ein får til på eit næringsareal, om det er nye arbeidsplassar eller ikkje. Er diverre også tomter ein skal få slita med å få selja.

Rådmann Liv Løvvik sa at administrasjonen pliktar likebehandling , medan det politiske nivået står mykje friare på dette. Adm legg ikkje opp til skeivfordeling av gode.

Per Lerøy (Ap) sa at dersom det til dømes kjem ein aktør og seier at dei vil etablera ein hydrogenfabrikk, så vil ein ikkje lysa dette ut på den opne marknaden.

Kommunalsjef Thomas Lindås sa at i dei aller fleste tilfelle vil ein jobba for høgast mogleg pris, men er ikkje låst på dette med dette reglementet. Reglementet seier korleis administrasjonen skal jobba i alle småsakene der ein orienterer i etterkant om at «dette er selt».

Handsaming i kommunestyret:
Samrøystes for rådmannen sitt framlegg til vedtak.

Behandling

Handsaming i kommunestyret:
Samrøystes for rådmannen sitt framlegg til vedtak.

Behandling

Rådmann Liv Løvvik orienterte om saka. Dette skal sikra at det er tydeleg at det ikkje er skjulte interesser eller føremål som kan påverka avgjerder.

Anne Dahle Austrheim (KrF) spurte om dette med tilsette, om dette burde vore meir presisert enn slik det står no.

Kommunalsjef Odd Harald Dommersnes svara at det skal leggast inn at dette gjeld for dei som tar avgjerder i tilsettingssaker og liknande. Tilsette må legga inn verva sine på ein annan måte enn politisk valde.

Handsaming i kommunestyret:
Samrøystes for rådmannen sitt framlegg til vedtak

Behandling

Handsaming i kommunestyret:
Samrøystes for rådmannen sitt framlegg til vedtak, som er basert på arbeidet gjirt av gruppeleiarane.

Behandling

Rådmann Liv Løvvik orienterte om saka.

Handsaming i kommunestyret:
Samrøystes for rådmannen sitt framlegg til vedtak