Møte i Kommunestyret den 30.04.2020

Vedtak

Innkalling og sakliste vart godkjent

Behandling

Handsaming i kommunestyret:
Rådmannen sitt framlegg vart samrøystes vedteke

Vedtak

Møteprotokoll frå førre møte kjem opp til godkjenning i neste møte.

Behandling

Møteprotokollen frå sist møte var ikkje med i utsendinga.
Det kjem to protokollar til neste møte.

Vedtak

Meldingane vart tekne til orientering

Behandling

Ordførar Per Lerøy (Ap) orienterte om prosjekt som Austrheim kommune hadde meldt inn som moglege tiltak i samband med å auka aktiviteten under Korona-pandemien, jamfør meldinga "Pressemelding - Gryteklare motkonjukturtiltak - KS Vestland". Her var Austrheim tidleg inne med å melda på tiltak. Dette er tiltak som er ferdig planlagde, og som raskt kan leggast ut på anbod.

Reidar Øksnes (Sp) etterlyste kvifor strekket forbi Kuneset ikkje var med, dette er fylkesveg 568 frå rundkjøring fylkesveg 565 og nordover forbi Heiane-feltet.
Avdelingsleiar Asbjørn Toft svara at i Heiane-planen (reguleringsplan) er det strekket som Reidar Øksnes peikar på med, i Heiane-planen er det regulert ny veg frå rundkjøringa og til krysset i Finnsvågen.

Reidar Øksnes (Sp) sa at Austrheim bør ta diskusjonen på om planlegging av sjøareal skal delegerast til interkommunalt planmiljø. Øksnes sa at han registrerer at kommunen framleis skal gjera eige vedtak, men etterlyste kva strategi kommunen har på kva ein vil gjera med sjøarealet.

Per Lerøy (Ap) svara at det er viktig at kommunen får ein plan på dette arealet, og ikkje er så langsame at ein får ein plan som ingen er tente med. Ein kan få tredd ein plan frå fylket ned over hovudet, det har skjedd andre stader der kommunane som var sterkast berørt seinare protesterte og saka enda hjå departementet til endeleg avgjerd.

Reidar Øksnes (Sp) presiserte at han ikkje vil stoppa opp planarbeidet, men ba om at kommunen brukar tid til å tenka seg om. Saka er spesiell for Austrheim, som har ei kystlinje som ein ikkje finn elles i Nordhordland.

Avdelingsleiar Asbjørn Toft sa at det framleis er opp til kommunestyra i den enkelte kommunen om dei vil godkjenna planen for sitt område. Toft er elles medlem i gruppa, og dei er i gang med arbeidet.

Per Lerøy (Ap) sa at ein uansett deler sjøområde med nabokommunar og må samhandla med dei. Hensikten er å få ein felles plan for å sikra at det ikkje er enkelte som får føremoner medan andre berre får ulemper. Det er viktig med ein felles plan, men dette er eit forprosjekt til arbeidet.

---

Rådmann Liv Løvvik orienterte om Korona-situasjonen. Over helga kjem det informasjon ut til dei tilsette i kommunen om korleis det vert framover med ferie, der arbeidsgjevar har styringsrett. Har godt samarbeid med dei tillitsvalde.

Løvvik sa vidare at det var eit godt møte med næringslivet på Mongstad torsdag 30. april. Det er etablert kontaktlinjer, og planlagt for testing av utanlandsk personell som vert henta inn der for å jobba. Dette med auka aktivitet på Mongstad er også tatt opp i møte med Fylkesmannen, med tanke på få tilstrekkeleg materiell til testing og smittevern, og Fylkesmannen har lova å ordna dette.

Per Lerøy (Ap) viste til at det i har vore møteaktivitet mellom kommunane Alver og Austrheim, som munna ut i nemnde møte med dei største bedriftene på Mongstad. Elles har det komme spørsmål frå innbyggjarar om bruk av smittevernutstyr til dømes når heimehjelpa er heime hjå folk, her er svaret at ein ikkje har tilstrekkeleg med smittevernutstyr som munnbind til å bruka det over alt, men vurderer individuelt, og elles brukar handvask/handsprit. Det har komme nye retningslinjer om testing, men kommunen ventar på testmateriell til dette.

Kommunalsjef oppvekst og kultur, Bjørnar Fjellhaug, orienterte om oppstart for skule og barnehage etter stenging under Korona. Dette har gått veldig fint i Austrheim. Fjellhaug orienterte om kva som er gjort, som orienteringar av tilsette i skule og barnehage, tilrettelegging av lokala og etter kvart oppstart. Ser at i barnehage møtte det fleire i veke to no som skulane også har opna. Tilbakemeldinga frå skulane er at alle har møtt til denne veka. SFO er det ikkje så mange som har brukt, varierer litt frå dag til dag. Smittevernomsyn gjer at ein har redusert opningstid så langt. Har vore heldige med bra ver så langt, slik at borna kan vera ute, men det kan komma utfordringar om det er ikkje mogleg å vera ute så mykje som no. For Austrheim har oppstarten vore god, med all honnør til dei tilsette som har lagt ned god innsats.

Ventar på revidering av statleg rettleiar for smittevern, det vert utfordrande om alle skal tilbake på skulen dersom avstanden skal vera like stor so no. Ikkje berre å ha elevane på skulen annakvar dag, for då må ein vaska heilt ned mellom kvar gruppe.

Rådmann Liv Løvvik sa at kommunen har ei varsam opning etter stenginga, og har sagt nei til korps og andre brukarar. I samband med Korona er det også lyst ut ei tredje legestilling i kommunen.

Kommunalsjef helse og omsorg Monika Kvamme sa at det er rigga fem Koronasenger på seniorsenteret, og så har ein fem senger på sjukeheimen i tillegg. Det er seks rom på sjukeheimen, men det sjette må brukast til personalet som skal jobba på avdelinga. For sengene på Seniorsenteret står det enno mykje att å gjera med oppsett av bemanning og rigging av toalett/pauserom. Bygget var det beste alternativet ein kunne rigga når Korona-situasjonen oppstod. Det er laga rutinar som dei tilsette skal bruka på heimebesøk i tilfelle smitte, og det daglege forbruket av hanskar og handsprit er høgt. Erfaringa så langt er at det er mykje tyngre å jobba med smittevernutstyr på seg. For smittevernutstyr skal kommunen klara seg nokre dagar på det ein har, og er lova meir frå Helse Bergen om smitten skulle komma. Skal også ha fleire testkit for Korona, når ein etter kvart skal kunna testa fem prosent av befolkninga kvar veke.

For brukarane av tilpassa arbeidsplassar aukar kommunen opp tilbodet litt, to på Aufera denne veka og tre neste veke, og skal ha nokre i sving på Austrheim arbeidssenter.

---

Reidar Øksnes (Sp) tok opp at politikarane gjerne kan vera meir tydelege på korleis ein vil at ulike prosessar skal gå, med tanke på saker som til dømes Dagsturhytte i Austrheim. Naturvernforbundet Nordhordland har fått kritikk, men fortener også honnør mellom anna for å ha skaffa midlar til Øksnesmarka og tidlegare på Lerøy. Ordførar Per Lerøy (Ap) presiserte at han ikkje kritiserte Naturvernforbundet, men det han ville ha fram var at det berre var dei som hadde engasjert seg.

Øksnes held fram og sa at som ei vidareføring av dette skulle ein gjerne etablert eit råd der ein kunne møta dei frivillige organisasjonane, for å sikra at ein nådde fram til alle desse i eit eige fellesskap, med leiar som kommunen kunne kommunisera med. Dette kunne bli ein interesseorganisasjon som kan komma med kommentarar til ulike ting, som planstrategi med meir.

Ordførar Per Lerøy (Ap) ba om at dette vart innført som ei fast ordning, med møte ein gong i kvartalet med fast leiar og sekretær. Få det inn i ein struktur, og få med alle aldrar i gruppa.

Varaordførar Inger Lise Brekke (H) sa at ein gjerne kan samla idrettslag og frivillige på denne måten som Lerøy skisserer.

Hardy Pedersen (Ap) viste til at Kari Utkilen tidlegare har invitert til denne typen møte i enkelte saker, også ungdomsklubben/Anita Soltveit har vore engasjert.

---

Helge Dyrkolbotn (KrF) sa om arbeidsløysesituasjonen, at 81 prosent av elevane ved Austrheim vidaregåande skule som skulle ha læreplass frå hausten, har fått det. Skulen er i gang igjen no med ein del elevar, etter god hjelp frå helsesjukepleiarar.

---

Helge Dyrkolbotn (KrF) sa om Vardetangen, her må det skiltast betre frå hovudvegen. Her ligg det ein del arbeid i dei kommunale arkiva som er gjort, med nokre løyve som det må jobbast vidare med. Rådmann Løvvik svara at dette bør gjennomførast, og gjerne få eit folkehelsekart med merking etter kor vanskeleg det er gå dei ulike turane i kommune.

---

Handsaming i kommunestyret:
Rådmannen sitt framlegg vart samrøystes vedteke.

Vedtak

Kommunestyret tek orienteringa til vitande.

Behandling

Einingsleiar teknisk drift, Rolf Henning Myrmel, gjekk gjennom saka. Myrmel lista opp kva kjøretøy kommunen har i dag, fordelt på elektriske, hybrid og diesel. Heimetenesta sine kjøretøy er modne for utskifting, men ser ikkje at det er tilstrekkeleg rekkeviddekapasitet på det som er tilgjengeleg av elbilar på marknaden i dag. Må også ha noko kjøretøy med fossilt drivstoff i beredskap, med tanke på lengre straumstopp.

Kommunen har kartlagt behovet for transport i ulike einingar. Har behov for fleire bilar av ulik kapasitet, og det er ikkje heldig å bruka private bilar. Mange av dagens kjøretøy er slitte, og ein ser at mange av dagens kjøretøy bør skiftast innanfor ein syklus på 5-7 år.

Rådmann Liv Løvvik sa at ein må følgja tett med på kva som er tilgjengeleg av batterikapasitet og laste/drakapasitet.

Helge Dyrkolbotn (KrF) viste til at for heimetenesta vert batteria lada ut og rekk ikkje lada opp, slik at kjøremønsteret er eit hinder for å ha elbilar. Bør heller ha hybrid slik at ein er sikker på å komma seg fram. Då kan ein komma ned i utslepp, men ha rekkevidde. Kanskje bør kommunen også få hurtigladar?

Rolf Henning Myrmel svara at det er OK å skifta til elbil når teknologien er klar. For til dømes varebilar er dei ikkje dekkande per i dag med batterikapasitet på ein kald dag.

På spørsmål frå Atle Utkilen sa Myrmel at ein er i kontakt med forhandlar for sal av minibussen kommunen eig. Om dette sa ordførar Per Lerøy (Ap) at minibussen ikkje har vore klar for sal så lenge, den måtte EU-godkjennast først, og vart klar akkurat i det Korona-situasjonen slo inn over landet.

Reidar Ulvøy (Ap) ba om at ein også vurderte ny dieselbil og dieselhybrid ved kjøp av nye bilar.

Reidar Øksnes (Sp) ba om at ein tar med seg ei vurdering for avhending av kjøretøy som ein skal fasa ut. Når det kjem ei sak om dette, bør vera ein plan med ein bil inn - ein bil ut. Elles, kva med å frakta minigravar og slikt med kommunen sin traktor?

Handsaming i kommunestyret.
Samrøystes vedtak om rådmannens framlegg til vedtak.

Behandling

Avdelingsleiar Asbjørn Toft orienterte om saka om masseuttak ved Leirvågkrysset. Entreprenør Odd Haugen har teke ut massar frå eit areal som er friluftsområde, og som er eigd av kommunen. I alt er det teke ut massar frå om lag ein dekar av friluftsområdet ved Ekornsåta.

Det er avklara at entreprenør Odd Haugen no kjem inn med ein oppdatert søknad for heile masseuttaket, ved hjelp av Arne Haugen, med ein plan for korleis ein kan tilbakeføra friluftsområdet ved Ekornsåta.

Kommunen skil mellom korleis ein ser på dette som grunneigar, og som forvaltingsmynde.

Ordførar Per Lerøy (Ap) sa at han har tillit til at rådmannen og staben tar denne saka på ein god måte. Dette er ei administrativ og ikkje politisk sak så langt.

Reidar Øksnes (Sp) sa at det vart orientert om denne saka sommaren 2019 i formannskapet. Synest det har tatt lang tid å komma dit ein er no. Kommunen er kunde hjå denne entreprenøren. Her er det kanskje brukt massar i mellomtida som både kommunen og andre har betalt for. Dette er ikkje bra, og ser ikkje bra ut. Må synleggjera at dette ikkje er ein måte å gå fram på.

Avdelingsleiar Asbjørn Toft sa at straks kommunen vart orientert om saka, så vart formannskapet orientert, i august 2019. Saka vart drøfta i administrasjonen, hadde møte med Odd Haugen, og hadde oppmålingsingeniør ute for å måla opp. Administrasjonen sende ut skriv i november 2019, men fekk eit litt tynt svar. Ute med nytt skriv i april 2020, med frist til 1. mai med krav om betre svar på kva kontroll entreprenøren har på kva han tek ut. Jobbar så langt forvaltingsmessig for å løysa dette, i neste omgang skal ein sjå på det økonomiske opp mot massar som er teke ut.

Per Lerøy (Ap) ba om at politikarane vart løpande orientert om det som skjer i saka.

Rådmann Liv Løvvik stadfesta at politikarane skal bli orienterte undervegs. Og la til at saka skal handsamast etter forvaltingsmessige reglar.

Reidar Ulvøy (Ap) sa at det må ryddast opp på ein profesjonell måte. Er det gjort feil så er det gjort feil, men det må ryddast opp på ein god måte.

----

Kommunalsjef service og forvalting, Thomas Lindås, og fleire, svara ut spørsmål frå Bygdelista:

Utleige av kommunale bustadar, reglar og rutinar. Thomas Lindås sa at det er ei gruppe som jobbar med dette, med tilsette frå helse, nav og teknisk. Det er personar som ein pliktar å skaffa bustad. Om kommunen ikkje har, så går ein ut på bustadmarknaden. Brukar alltid husleigekontrakt. Jobbar med tydelegare og betre rutinar, og ser på eit meir tenleg butilbod for dei som måtte ha ulike utfordringar. Kjem tilbake til politisk med vidare orienteringar i denne saka.

Atle Utkilen (Bygdelista) spurte om korleis ein føl opp klager på kommunale bustader.

Thomas Lindås svara at det ikkje er skriftlege rutinar, men tek tak og prøver å løysa dette i dei sakene der det er utfordringar.

Ordførar Per Lerøy (Ap) følgde opp med å seia at han som ordførar har avtale med naboar til ein del utfordrande leigetakarar, der han formidlar melding vidare til politiet for å få ei tett oppfølging. Det er ei utfordring når kommunen skal sikra tak over hovudet for alle, også om det skulle vera rus eller psykiatri. Austrheim treng bustader som er meir tilpassa brukarar av denne typen, med ei plassering som ikkje øydelegg nabolaget. Har fått gode tilbakemeldingar på at ein er tett på.

Leiar teknisk drift Rolf Henning Myrmel orienterte om arbeidet med vassutbygging Vardetangen – Utkilen. Kommunen skal snart ha ut anbod på dette arbeidet, så snart ein får ei avklaring frå hamnevesenet. Prosjektering har ikkje vore ute på Doffin-basen, men er sendt ut til utvalde selskap. Dette prosjektet vert gjennomført er etter forsyningsforskrifta, og då kan ein gjennomføra prosjekt inntil 65 millionar utan å legga ut på Doffin.

Jobbar også med digitale vassmålarar, Caverion er i gang med dette, men fekk ein stopp under Korona.

Atle Utkilen (Bygdelista) spurte om kvifor det er sagt tidlegare at det skulle ut på Doffin, når det ikkje har skjedd. Myrmel beklaga at dette har vore feil formidla, og sa at ein også i utlysinga av sjølve arbeidet heller vil gå til tre utvalde entreprenørar heller enn Doffin. Ser for seg at Nordhordland er nedslagsfeltet for denne utlysinga.

Ordførar Per Lerøy (Ap) sa at med 8,8 prosent arbeidsløyse i Alver og 8,6 i Austrheim så er det rett å gå ut lokalt med dette. Er sterkt oppfordra frå Staten og KS om at ein må setta i gang arbeid for å få oppsysselsettinga.

Rådmann Liv Løvvik viste til at for kvar prosent arbeidsløyse så kostar det kommunen rundt ein million kroner på årsbasis.

Leiar teknisk drift Rolf Henning Myrmel orienterte om tips om mogleg utsleppet i Blodvika. Det var tidlegare påstått at det var lekkasje på kloakkleidningen i Blodvika, og kommunen leigde inn ROV for å sjekka leidningen frå Åråsvågen og utover. Dette vart gjort medan ein kjørte pumpene. Myrmel kan ikkje sjå at det som er fotografert av krusningar på sjøen kan vera utslepp. Kommunen hadde for nokre år sidan ein lekkasje, men det var på land like nedanfor reinsestasjonen. Sjøleidningen er ein så sikker som ein kan vera, på at er tett. Om det skulle lekka i leidningen frå reinsestasjonen, så ville ein også sett dette i massane ein tar ut i reinsestasjonen.

Ordførar Per Lerøy (Ap) viste til at Åråsvågen er eit viktig innsigsplass for mellom anna sild og makrell, det kan gje krusningar på sjøen.

Reidar Ulvøy (Ap) spurte om kva djupn leidningen ligg på. Myrmel svara at leidningen slepper ut på 35 meter, kravet er 30. Utover Åråsvågen ligg leidningen på ulikt djupne. Der det er snakk om utslepp så er det 5-7 meter djupne. Kommunen har ROV-bilde og er trygge på at det ikkje er utslepp. Eit utslepp ville ha skjedd kvar gong pumpene startar.

----
Avdelingsleiar Asbjørn Toft sa om reguleringsplanen Austrheim kommunesenter 2005/004, at denne er godkjent av kommunestyret 29. juni 2005. Administrasjonen har leita i arkivet og kan ikkje finna prov på at den vart kunngjort, men det er ikkje noko som tilseier at det ikkje skjedde. Dette var midt i perioden med flyttinga til nytt kommunehus, og dokumentasjonen kan ha komme vekk. Etter 2005 er det godkjent fleire planar innanfor dette området, som den rundt Årås skule og idrettsparken i 2015. Seinast var reguleringsplanen for Breidvik/Åråsvågen/Sætremarka godkjent i mai 2018, og stadfesta 20. februar 2019 av Fylkesmannen i Rogaland. Frå det opphavlege planområdet frå 2005 er det berre eit mindre område som står att av dette arealet, og administrasjonen vil ta opp planlegging av dette arealet i 2021 om politikarane ønskjer det.

Ordførar Per Lerøy spurte og fekk stadfesta frå administrasjonen at planen var samrøystes godkjent i kommunestyret i 2005, og at Fylkesmannen har styrt etter denne planen for seinare dispensasjonar.

Avdelingsleiar Asbjørn Toft sa at det er uomtvista at planen var på høyring og er vedteken, det er berre spørsmålet om evt. kunngjering i lokalavisene som ikkje kan dokumenterast.

Helge Dyrkolbotn (KrF) sa at det er bra at ein tar for seg det som er att av dette arealet.

Atle Utkilen (Bygdelista) viste til eit referat frå Strilen i 2007, og sa at om planen ikkje er kunngjort kan ein ikkje bruka det lovverket som eksisterer. Synest ein skal prioritera å få gjort noko med denne planen.

Avdelingsleiar Asbjørn Toft svara at ein må prioritera å få på plass ein ny plan som også omfattar det området som kanskje ikkje vart kunngjort. Kommunen har uansett styrt etter denne planen sidan 2005, der partar og naboar har hatt høve til å klaga. Ser ut for at folk har kunna bruka planen på ein høveleg måte.

Atle Utkilen spurte om utbygginga av Vestlia. Avdelingsleiar Asbjørn Toft svara at det var før hans tid i kommunen, men sidan har dette arealet komme inn i Breivika-planen.

Rådmann Liv Løvvik sa denne typen spørsmål er det vanskeleg å ta på sparket, særleg når ein ikkje har jobba med dette sjølv.

Ordførar Per Lerøy (Ap) spurte om det var andre som kjente til at det var utfordringar under utbygginga av Vestlia. Til dette svara Helge Dyrkolbotn (KrF) at han ikkje kan hugsa at det var noko, men at ein no uansett må ein sjå framover. Dyrkolbotn sa vidare at det kan vera at det vart gjort noko feil i 2005, men no må ein jobba for å få ein god plan for kommunesenteret, som kan fungera i mange år framover.

---

Avdelingsleiar Asbjørn Toft svara om sikring av bru som er lagra i Åråsvågen. Dette er «kunstbrua» som var sett opp inne ved Zachariasbryggen i Bergen, og som vart kjøpt og frakta til Austrheim. Det var gitt eit byggeløyve til plassering ved Åråsvågen, det løyvet har gått ut. Kommunen har gitt pålegg om sikring av brua, og avstenging rundt, det er gjort. Forfallet i gang for konstruksjonen, kommunen vil følgja med vidare på kva som skjer her.

Ordførar Per Lerøy (Ap) stadfesta at brua er innestengt med anleggsgjerde/sperreband. Lerøy viste til at det like ved er arbeid i gang med ein kai, som ikkje er sikra i det heile, og spurte om det ikkje bør sikrast der også.

Atle Utkilen (Bygdelista) sa at det var raskt handtert av kommunen med krav om sikring med gjerde rundt brua.

Handsaming i kommunestyret:
Samrøystes for å ta orienteringane til vitande.

Behandling

Økonomisjef Olav Andersen gjekk gjennom saka. Han sa at Austrheim kommune fekk ein flying start på året, med blant anna gode skatteinntekter. Etter ein god start er ein i mars-rekneskapen om lag på budsjett. Men kommunen er no råka hardt av Korona-situasjonen, og ein reknar med ein svikt i skatteinntekter på 8,5 millionar kroner for resten av 2020. Andersen viste til at det kjem ei meir omfattande økonomi-oppdatering til formannskapet torsdag 7. mai.

Ordførar Per Lerøy (Ap) viste til at Regionrådet har gitt ei oversikt over arbeidsløyse. Austrheim har no 7,5 prosent arbeidsløyse, for resten av landet er det 9,6 prosent arbeidsløyse. Kan håpa at det ein ser no, er at trenden snur. Ser frå aktiviteten på Mongstad at den tek seg opp, kan håpa at dette slår bra ut for Austrheim.

Rådmann Liv Løvvik viste til at med 8 million i skattetap så når ein ikkje langt med 2,2 millionar i Korona-støtte. Rådmannen reknar med at det kjem fleire statlege støttepakkar etter kvart. Austrheim har hatt rundt 2 millionar i Korona-relaterte utgifter til no, og det er sjølv utan at kommunen har fått inn smitte.

Ordførar Per Lerøy (Ap) viste til tal frå KS om at samla skattetap og andre kostnader for kommunane i år er estimert til 22 milliardar kroner. Ut i frå folketal vil det vera 11,5 millionar for Austrheim kommune.

Handsaming i kommunestyret:
Samrøystes for rådmannens framlegg til vedtak.

Vedtak

Austrheim kommune etablerer på gbnr. 131/277 og på kommunal grunn ei Dagsturhytte på opparbeidd plass ved Vardetangen. Avtale om tilsyn av hytta vert gjort med Fonnes Bygdelag etter at byggjeløyvet her er formelt på plass. Signering av kontrakt om leveranse og bygging av Dagsturhytte i 2020 vert gjort med leverandøren som får anbodet av Vestland fylkeskommune. Kostnaden totalt med ei ramme på inntil kr 500 000 vert finansiert frå investeringsbudsjettet 2020 og reduserer investering i vann og avløp tilsvarande. Spelemidlar vert då mellomfinansierte med 333 000 kr. Spelemidlar er ikkje søkt enno, med kan tidlegast reknast inn frå 2022.

Behandling

Avdelingsleiar Asbjørn Toft orienterte om arbeidet som er gjort i denne saka, etter vedtak i kommunestyret tidlegare. Det er ei ferdig planert tomt på Vardetangen, 40 meter frå sjølve varden. Det var tidlegare aktuelt med hytte gitt av Utestuas AS, men det er ikkje aktuelt no. Kommunen eig grunnen, og slepp bruka pengar på det. Det er ein fordel også at det er tilgang på parkering. Elles er det tilgang på toalett ved Årvikane, men må jobba vidare med ei sak om toalett i nærleiken av kaien på Vardetangen. Maksimal kostnad for kommunen skal vera 167.000 kroner, men Toft trur det skal vera rimelegare sidan kommunen har ferdig tomt.

Atle Utkilen (Bygdelista) spurte korleis ein hadde inkludert lag og organisasjonar i plasseringa av hytta. Utkilen sa at slik han såg det er det jobba i to år med ei hytte på Vardetangen, og når det no kjem dagsturhytter så hoppar ein på med ei hytte der. Utkilen spurte om ein er låst til plassering no, eller kan ein spørja innbyggjarane om kvar hytta skal stå. Skulle gjerne hatt arkitektkonkurranse og fått eit signalbygg. Utkilen etterlyste om kommunen har spurt idrettslaget om å delta i arbeidet, og spurte om det er krav frå fylkeskommunen om involvering i prosjektet. Sa at kommunen burde skilt oppgradering av Vardetangen og dagsturhytte i to prosjekt.

Varaordførar Inger Lise Brekke (H) sa at ho har fått innspel på dette med involvering, og spurte om det er etterlyst innspel frå fleire om plassering og vedlikehald av hytta. Sa at det vera uheldig for saka om ikkje fleire er involverte.

Avdelingsleiar Toft sa at plasseringar har vore diskutert tidlegare i formannskap og kommunestyre. Fylket ønskjer at enkelte hytter er universelt tilgjengelege, og ein av dei få plassane dette er mogleg i heile Vestland er nettopp på Vardetangen, mange andre hytter vert meir utilgjengeleg plasserte. Har sett på Bergen omland friluftsråd sitt areal på Øksneset, men det er ikkje så mange som bur i gangavstand derifrå. Kommunen vil satsa på Vardetangen, som er eit viktig mål for Nordhordland og vidare omegn. Med eit bygdelag som har engasjert seg på ein flott måte, så var det naturleg å spørja dei. Det har ikkje komme noko initiativ frå andre lag eller grunneigarar. Når det gjeld Seteneset manglar det grunneigaravtalar og det er dårleg veg ut, arealet har vore lite tilgjengeleg i mange år. Fosnstraumen er også veldig flott, men her har ein ikkje areal sjølve. På Vardetangen har ein god kontroll både på ferdsel, og økonomisk med eiga tomt.

Anne Dahle Austrheim (KrF) sa at ein gjerne skulle hatt større engasjement og meir involvering, men trur at med den tilrettelegginga som er på Vardetangen og med økonomien, så ville det ha enda med Vardetangen uansett. Dagsturhytta vil løfta Vardetangen.

Ordførar Per Lerøy (Ap) sa at Vardetangen oppfyller mange kriteria, som parkering, det er nær skule og barnehage og nær kollektivtrafikk. I tillegg er det starta dialog med Vestland Fylkeskommune om venterom på Vardetangen med tilhøyrande toalett. Som fleire har sagt er denne hytta ei komplettering av Vardetangen som friluftsområde. Det er ingen andre lag og organisasjonar enn Naturvernforbundet som har vore på bana i denne saka.

Avdelingsleiar Asbjørn Toft svara på spørsmål frå Atle Utkilen (Bygdelista) om fristen for å avgjera lokalisering. Vestland fylkeskommune signerer no snart kontrakt med firma som skal levera hyttene, deretter skal kommunane signera. Skal me ha hytte no så må me handla no, og her er det også eit lag på plass som vil ta ansvaret for vedlikehald (Fonnes bygdelag).

Reidar Øksnes sa at ved Øksnes er det alt eit hytte, og er ein ikkje så usamde på Øksnes at ein ikkje kan dela hytte. Er glad for at Fonnes bygdelag er med. Elles må ein følgja opp at avtalar med Utestua AS vert terminerte. For å følgja opp satsinga på Austrheim som ein plass å reisa til, må vel ei hytte i Krossøygavelen vera det neste? Kanskje kan Vardetangen-dagsturhytte gje rom for hotell.

Varaordførar Inger Lise Brekke (H) sa at ho er samd i at plasseringa er bra. Men det er viktig at det er openheit i desse prosessane slik at alle kjenner seg godt noko informert, slik at alle kan uttala seg og seia sitt.

Morten Sognnes (H) sa at noko kritikk vert det uansett. Dette er ei gladsak med dagsturhytte på landets vestlegaste fastlandspunkt, der er det parkering, universell tilgjenge, og kort veg for både skule og barnehage. Det er stor dugnadsvilje i Fonnes bygdelag. Ein må gjerne ha fleire slike hytter, andre må gjerne legga seg i selen og legga til rette med turveg og anna. Skal ein nyta så må ein yta!

Reidar Ulvøy (Ap) sa at han er nøgd med prosessen som har vore, og at hytta har fått ei god plassering.

Atle Utkilen (Bygdelista) sa at han synest prosessen med kvar hytta skal plasserast har vore for dårleg. Det er mange i kommunen som er aktive i å få ting til. Er samd med Lerøy i at stiane på Austrheim er for dårlege, og synest Vardetangen skulle hatt eit anna bygg, eit signalbygg. Utkilen vil utsetta plassering av hytta.

Anne Dahle Austrheim (KrF) sa at ho støttar Morten Sognnes og Reidar Ulvøy i at dette kan skapa engasjement for at ein kan få på plass fleire dagsturhytter andre plassar i Austrheim.

Helge Dyrkolbotn (KrF) spurte Utkilen/Bygdelista om kommunestyret ikkje skulle gjera dette vedtaket i dag, og kven som skal finansiera eit signalbygg på Vardetangen. Dyrkolbotn vil gå for framlegget til vedtak, og gjera Vardetangen til eit utfartsområde for heile regionen. Har ikkje sett at andre lag har sagt at dei vil ta på seg vedlikehald av denne hytta.

Atle Utkilen (Bygdelista) svara med replikk, og sa at han meiner at ein kan teikna utradisjonelt bygg på Vardetangen, og la til at han ikkje synest prosessen har vore god nok.

Inger Lise Brekke (H) sa at ho ikkje støtta ei utsetting, men ba om at administrasjonen sikrar god informasjon til alle.

Rådmann Liv Løvvik sa at ein i dette tilfellet får ei hytte til ein million til 167.000 kroner. Fylkesmannen har godtatt at ein kan bruka forserte VA-midlar til finansiering/forskottering av MVA og spelemidlar.

Avdelingsleiar Asbjørn Toft sa at hytta vert ein attraksjon som den vestlegaste hytta i fastlands-Norge. Den skal glir godt inn i landskapet, byggesakshandsaminga skal sikra ei god plassering. Har diskutert andre lokalitetar, som Krossøygavlen, men der er det ikkje sti og parkering som kan ta unna for 10-15.000 ekstra gjester i året. Må ha eit område som toler denne typen trafikk og belasting, utan konflikt med bygdefolk og naboar.

Per Lerøy (Ap) viste til at kommunen eig eit bygg ved Hoplandskvernene, eit sagbruk som kan verta ei dagsturhytte slik nothuset er det i Øksneset. Kommunen kan dekka opp fleire området med desse hyttene.

Aslak Bakke (H) spurte om kva avtalar som ligg med Utestua AS om dagsturhytte på Vardetangen og brua som er lagra i Åråsvågen. Kva er gjort, og korleis er dette følgd opp?
Avdelingsleiar Asbjørn Toft svara om dette at byggeløyvet til brua var gitt i 2015 og har gått ut. Markhus må tenka gjennom kva som skal gjerast med denne. Avtalen om å gje ei hytte er kvittert ut, det prosjektet er skrinlagt. Ordførar Lerøy følgde opp med at det ikkje har vore ein skriftleg avtale om dette med hytte på Vardetangen, men at Bjørn Rune Markhus kom med framlegg om at dei kunne donera ei hytte til området, frå selskapet Utestua AS. Dette er ikkje aktuelt i dag.
Ordførar Lerøy sa vidare at ein ikkje har tapt noko økonomisk på at avtalen med Utestuas AS vart kansellert. I neste tur må det gjerne komma hytte i Krossøygavelen, det hadde vore unikt. For turstiar elles i kommunen er det ei utfordring med dårlege stiar rundt om. Er mange turstiar som har blitt til elvar og er nær sagt uframkommelege.

Handsaming i kommunestyret:

Framlegg om å seia ja til dagsturhytta, men utsetja å ta stilling til plasseringa.
(Nedstemt mot ei røyst, Atle Utkilen, Bygdelista)

Formannskapet si tilråding:

Austrheim kommune etablerer på gbnr. 131/277 og på kommunal grunn ei Dagsturhytte på opparbeidd plass ved Vardetangen. Avtale om tilsyn av hytta vert gjort med Fonnes Bygdelag etter at byggjeløyvet her er formelt på plass. Signering av kontrakt om leveranse og bygging av Dagsturhytte i 2020 vert gjort med leverandøren som får anbodet av Vestland fylkeskommune. Kostnaden totalt med ei ramme på inntil kr 500 000 vert finansiert frå investeringsbudsjettet 2020 og reduserer investering i vann og avløp tilsvarande. Spelemidlar vert då mellomfinansierte med 333 000 kr. Spelemidlar er ikkje søkt enno, med kan tidlegast reknast inn frå 2022.
(Vedteke mot ei røyst, Atle Utkilen, Bygdelista)

Behandling

I denne saka var det det to ugilde representantar. Helge Dyrkolbotn (KrF) er involvert i selskapet Kilstraumen Brygge AS og er ugild. Representanten Bjørn Inge H. Dyrkolbotn (Sp) er son av Helge, og er ugild gjennom dette slektskapet. Ordførar Per Lerøy (Ap) sa at det var vurdert å henta inn vara, men at ein konkluderte med at denne saka heller vart handsama av 15 representantar.

Sakshandsamar Ketil Tjore orienterte om saka. Kilstraumen Brygge AS vert tildelt i alt 6 prikkar for dei brota som skjenkekontrollen avdekka i kontrollen 25. desember 2019.

Reidar Øksnes (Sp) spurte om kva handlingsrom det var for å vurdera tal prikkar.

Sakshandsamar Ketil Tjore svara at dette er regulert i alkoholforskrifta, og at det berre er i heilt spesielle tilfelle at ein kan fråvika talet prikkar som skal tildelast.

Handsaming i kommunestyret:
Formannskapets framlegg til vedtak vedteke med 15 av 15 røyster.

Behandling

Einingsleiar teknisk drift Rolf Henning Myrmel orienterte om saka. Det er praktisert einvegskjøring på det aktuelle strekket, no vil ein skilta tilsvarande det som er praksis med einvegskjøring frå 0800 til 1500. Det har vore litt innkjøringsproblem etter omlegginga, men opplever at det går betre no. Dette arbeidet med hjartesone på Kaland er finansiert med å ta litt frå investeringsramma på VA, det er litt overskriding etter at ein reiv Vardehuset som del av prosjektet.

Ordførar Per Lerøy (Ap) spurte om det var avtala at kommunen skulle hjelpa med riving av Vardehuset. Myrmel svara at det var slik det var oppfatta frå starten, at kommunen skulle fjerna huset ved behov, og i denne saka er det uansett ingen å krevja uansett. Vardehuset stod på kommunal grunn, forfallet hadde starta, og det var ikkje eit bygg kommunen kunne gjera seg nytte av. Arbeidet er gjort med veldig bra resultat, kommunen får gode tilbakemeldingar på det som er gjort.

Rådmann Liv Løvvik sa at Vardehuset måtte rivast for å gjera det tryggare for barna som skulle ferdast der.

Reidar Øksnes (Sp) spurte om finansieringa av meirarbeidet bør inn i vedtaket, sidan det er ei overskriding av ramma. Etter innspel frå ordførar Lerøy var det semje om at overskridinga vert teke opp som del av budsjettjusteringa seinare i vår.

Handsaming i kommunestyret:
Samrøystes for rådmannens framlegg til vedtak.

Vedtak

Etter framlegg frå valnemnda: Siri Kaland (Ap) går ut som varamedlem, og vert erstatta av Magnus Kvingedal (H).

Behandling

Ann Kristin Leirvåg (Ap) frå valnemnda orienterte om at dei har diskutert kven som skal skiftast ut for å få ein mann inn på varaplass. Konklusjonen er at Siri Kaland (Ap) går ut, og vart erstatta av Magnus Kvingedal (H).

Helge Dyrkolbotn (KrF) ba om at heile valnemnda vert teke med i eventuelle seinare diskusjonar. Dette støtta Ann Kristin Leirvåg (Ap) og tok sjølvkritikk på det.

Handsaming i kommunestyret:
Samrøystes for valnemnda sitt framlegg