Møte i Kommunestyret den 16.02.2023

Vedtak

Innkalling og sakliste vart godkjent

Behandling

Handsaming i kommunestyret:
Kommunedirektøren sitt framlegg vart samrøystes vedteke

Vedtak

Møteprotokoll frå forrige møte vart godkjent

Behandling

Handsaming i kommunestyret:
Kommunedirektøren sitt framlegg vart samrøystes vedteke

Vedtak

Meldingane vart tekne til orientering

Behandling

Ordførar Per Lerøy (Ap) viste til møtet med Statsforvaltar Liv Signe Navarsete, om Statsforvaltar si innstilling i strandsonesaker. Det var sagt frå embetet at dei ønskjer å avgjera saker utan setjestatsforvaltar eller oversending til departementet, og Lerøy sa at kommunen i tida framover må vera flinkare til å be om drøftingsmøte for å finna fram til semje i slike saker. Departementet har sagt at sone 3 og deler av sone 2 skal handsamast annleis for stransonesaker, enn det som er gjort tidlegare, det taler for at det skal vera mogleg med fleire tiltak i Austrheim.

Kommunedirektør Bjørnar Fjellhaug orienterte om meldinga om forlenginga om interkommunalt legevaktsamarbeid. Denne kjem tidlegast opp i kommunestyret i Austrheim i april 2023, og kan tidlegast tre i kraft frå mai. Inntil det, så gjeld dagens avtale for legevaktsamarbeid.

Handsaming i kommunestyret:Kommunedirektøren sitt framlegg vart samrøystes vedteke.

Behandling

Kommunedirektør Bjørnar Fjellhaug orienterte:

• Skifte av kommunalsjef, der Service og Forvalting har endra namn til Samfunn og tenesteyting. Reknar med å ha nytilsett på plass frå hausten, fram til det vil kommunedirektøren dekka dette ansvarsområdet saman med avdelingsleiarane.

• Medan Thomas Lindås sluttar som kommunalsjef, er Atle Vaage inne som ny einingsleiar teknisk drift, og tidlegare einingsleiar teknisk drift Rolf Henning Myrmel har gått over til ei stilling som prosjektleiar.

Prosjektleiar Rolf Henning Myrmel orienterte om status for ulike investeringsprosjekt, jamfør liste som ligg ved møteboka.

Einingsleiar teknisk drift Atle Vaage orienterte om pågåande prosjekt. Oversikta ligg ved møteboka.

• Må gjera ein informasjonsjobb på dette med delt fakturering ut over året. Er ikkje så mange innbyggjarar som har meldt interesse for delt fakturering av kommunale tenester.

• Skal laga vedlikehaldsplan for bygg og anlegg, dette vert laga som ein fireårsplan der ein deler alle kommunale bygg i fire grupper. Bygga får eit større vedlikehald kvart fjerde år, og så mindre vedlikehald i tre år. Denne planen må vera klar til budsjetthandsaminga for 2024.

• For dei punkta som manglar finansiering (verbalpunkt frå kommunestyret sitt budsjettvedtak) skal det jobbast fram ei oversikt over kostnader, og skal ein sjå på dette i samband budsjettjustering etter 1. tertial.

Reidar Øksnes (Sp) kommenterte om sperring av kaiar og kjøreforbod: Om kaien ikkje toler vekta som vegen er klassifisert for, må det vera skilta med innkjøring forbode eller avgrensa vekt.
Det er få kaiar i dag som har anna avgrensing enn vegen fram til kaien.

Atle Vaage svara at kommunen har firma som sjekkar kaiane, om det er manglande sikkerheit så må desse kaiane stengast.

Anne Hildegunn Færøy, kommunalsjef helse og velferd:

• Presenterte seg for kommunestyret, dette var første møte i KS etter at ho starta i kommunen 1. januar.

• Orienterte om Kommunalt tilbod om øyeblikkeleg hjelp døgnopphald (ØHD) i Austrheim kommune, presentasjonen ligg ved møteboka.

Kommunedirektør Bjørnar Fjellhaug orienterte om flyktningar:

• Har busett 30 flyktningar frå Ukraina så langt, 18 registrert i 2022, av desse har ein reist tilbake til Ukraina på ubestemt tid.

• 12 busette i 2023, det varierer frå sambuarpar til familiar, den siste er på plass tysdag. Kjem ein familie på 4 i mars, har då 4 att på kvoten for 2023.

• Har lite bustader, leiger tre på det private eigedomsmarknaden. Skal senda over ei sak til Austrheim kommunale eigedomsselskap og bestilla 12-15 bustader i ulik storleik, innanfor ein gitt tidshorisont. Kommunen har personar med behov for bustad, og manglar gjennomgangsbustader. Ønskjer at AKE skal skaffa bustader, og at kommunen leiger av dei etter behov. Ser ikkje risiko ved dette, generelt er det mangel på bustad i Austrheim og spesielt på leigemarknaden.

Kommunedirektør Bjørnar Fjellhaug orienterte om oppfølging av interpellasjon frå Bygdelista frå desember:

• Her skulle kommunedirektøren etter vedtaket komma tilbake til KS med informasjon. Det er sendt skriftleg pålegg til entreprenør om å ikkje kjøra masser frå Heiane, og skriftleg pålegg til entreprenør om å fjerna ureine massar og svartelista artar i Dyrneset.

Kommunedirektør Bjørnar Fjellhaug orienterte om planarbeid:

• Det er vedteke i planstrategien at det skal vera kommunedelplan for oppvekst, og for helse og velferd. Kommunedirektøren ber om at dette heller vert gjort om til temaplanar, så kan det legga føringar for arbeidet med samfunnsdelen i kommuneplanen. Vil starta opp rullering av samfunnsplanen, dagens gjeld til 2027, men det vil gjerne ta tre år å rullera den. Temaplanar for oppvekst, og for helse og velferd, tar ein då med seg inn i samfunnsplanen.

Kommunaldirektør Bjørnar orienterte om avvikssystemet, sjå presentasjon som ligg ved møteboka.

Jan Erik Espelid (Bygdelista) spurte om kommunedelplan for klima og energi. Då saka vart handsama hausten 2022 vart det sagt at det skulle arrangerast ein Klima- og energikonferanse for kommunestyret. Her svara kommunedirektør og ordførar at planen er vedteken, medan det er sagt at det skal vera ein konferanse for kommunestyret på klima. Dette er ikkje ferdig planlagt enno.

Odd Harald Dommersnes orienterte om økonomien (jamfør presentasjonen som ligg ved møteboka).

• Skal levera rekneskapen den 22/2.

• Viste til at det er risiko ved institusjonsplassar i barnevern, dette påverkar kostnadsbildet i 2022 og 2023. Kjem rekningar på millionbeløp som ein ikkje har budsjettert inn.

• Kom ikkje noko skjønstilskot frå Statsforvaltar, slik som ein hadde venta. Skatteinngangen viste seg å vera lågare på tampen av 2022.

• Ser at gjennomsnittsalderen i kommunen går opp. Ser på tala for premiefondet for pensjon at kommunen vil få ein auke i pensjonsutgifter framover, har forplikta seg til 408 millionar i pensjon, medan det er sett av 400 millionar på fond til å dekka dette. Her kjem det ein kostnad i 2023, viktig å vera merksam på dette.

• På andre enden av aldersskalaen er det lyst ut jobbar for dei i 10. klasse til 23 år, jobbar for å få unge til å jobba i kommunen.

Ordførar Per Lerøy (Ap) sa at det er surt med barnevernskostnad. Det er gjort ein bra jobb med å halda kontroll på kostnader. 2023 vert eit krevjande år, men har heldigvis pengar på bok til å halda prosjekta gåande

Inger Lise Brekke (H) spurte om uføresette kostnader frå Barnevernet, og viste til at kommunestyret vart orienterte om at ein ikkje hadde barn på institusjon, under presentasjonen i desember 2022.

Her svara kommunedirektør Fjellhaug at det er noko usemje om kor godt det er informert frå Alver barnevern til kommunen. Men fekk beskjed rundt jul på at det er eit barn på institusjon, og utan at dette er kommunisert med tilbakemelding. For fakturaen har dette berre framgått av fakturagrunnlaget og har ikkje vore like tydeleg som tidlegare då det vart fakturert direkte frå institusjon og til kommunen.

Ordførar Per Lerøy (Ap) spurte om korleis dialogen er med Alver barnevern, kommunedirektøren svara at det ikkje er faste møtepunkt på dette, men Austrheim ønskjer å ha faste møtepunkt for å få kontroll på sine barn og tenester gjennom barnevernet.

Handsaming i kommunestyret:Kommunedirektøren sitt framlegg vart samrøystes vedteke

Vedtak

Austrheim kommune sluttar seg i hovudsak til innhaldet i Regional plan for fornybar energi 2023-2035, men meviser ogtil saksutgreiinga og til våre 9 pkt. under.

1.Austrheim kommune ber om at solenergiproduksjon både på eksisterande og nye bygningar og infrastruktur vert prioritert framover.

2.Austrheim kommune vonar Vestland fylke vil prioritera flytande havvindsatsing framover, og i havområde der ein kjem minst mogeleg i konflikt med fuglelivet/miljø og fiskeri.

3.

Me er positive til mindre vindturbinar på og ved eksisterande bygg, næringsanlegg og annan infrastruktur, men desse må byggjast i tråd med avsnittet over.
4.Austrheim kommuneer positiv til storsatsing på mindre vindturbinar på og ved eksisterande bygg.
5.Vestland fylkeskommune må vera med å vidareutvikla Greenspot Mongstad for å utvikla området ved Norges største forsyningsbase og største raffineri til ein allsidig grøn industripark.
6. Anlegg for produksjon av elektrisk kraft og overføringsnett for elektrisk kraft skal i hovudsak vera i offentleg eige.
7. Straumprisane skal vera fornuftig og berekraftig for økonomien til våre hushaldingar og næringsliv. Konkurransefortrinnet til industrien vår med rimeleg straum må oppretthaldast.
8. Satsing på eit godt nett for el-ladestasjonar for skips- og båtrafikken er viktig framover, men og ei storsatsing på produksjon og lagring av hydrogen og ammoniakk til transportsektoren må på plass.
9.Kraftnettet må byggjast ut for å sikre ein robust kraftforsyning i fylket vårt.

Behandling

Avdelingsleiar Plan, Asbjørn Nagell Toft, orienterte om saka jamfør saksutgreiinga.

Jan Erik Espelid (Bygdelista) la fram deira framlegg til vedtak, og grunngav det.

Ordførar Per Lerøy (Ap) la fram Høgre/Arbeidarpartiet sitt framlegg til vedtak, og argumenterte for at det ikkje er mogleg å dekka det framtidige behovet for ny energi, utan at ein satsar på ei utbygging av vindkraft. Lerøy viste til prognosar som viser at behovet for ny kraft er betydeleg i åra framover.

Lerøy føreslo at det vart gruppemøte i saka.

Reidar Øksnes (Sp) sa at at han ikkje er mot eit gruppemøte i saka, men spurte om framlegga som er oppe er moglege å gjennomføra innanfor dagens Plan og bygningslov, eller om denne må justerast for å gjennomføra solkraft og anna.

Om dette sa Asbjørn Toft at vanlige solcellepanel ikkje er søknadspliktig i utgangspunktet, med mindre det er freda bygg eller spesiell arkitektur. For større anlegg på industribygg er det vanlegvis ei vanleg byggesak, og det trengs også ein dialog med BKK om trafokapasitet og liknande. Hus- og hytteigarar vil ikkje få ein omfattande søknadsprosess.

Ordførar Per Lerøy (Ap) viste til korleis det er delt på ulike instansar kven som har mynde for ulike typar kraft, der dette er fordelt på kommune, NVE, departement og anna, alt etter type kraftproduksjon.

Gruppemøte 1805-1840.

Jan Erik Espelid (Bygdelista) la fram endringsframlegg, der delen med North Connect er vekke i punkt 11.

Asbjørn Toft orienterte om dei søknadene som er inne på vindkraft i Austrheim, der eitt anlegg snart er under produksjon, og eit anna prosjekt nærmar seg produksjon. Det er både anlegg med tradisjonelle blad, og ei vertikal mølle, der den siste har mindre konsekvensar for fugleliv.

Avrøysting:
Høgre og Arbeidarpartiet sitt framlegg, nummerert punkt 3, vart sett opp mot Bygdelista sitt framlegg, nummerert punkt 4. Høgre og Arbeidarpartiet sitt framlegg vart vedteke med 11 mot 5. Dei som røysta for var dei samla gruppene til Høgre og Arbeidarpartiet, pluss Stein Kåre Løvslett frå KrF. Dei som støtta framlegget som fall var Reidar Øksnes og Pål Andreas Dyrkolbotn frå Senterpartiet, Helge Dyrkolbotn og Anne Dahle Austrheim frå Kristeleg Folkeparti, og Jan Erik Espelid frå Bygdelista.

Deretter vart det røysta vidare der kvart punkt vart sett opp mot kvarandre.
1. Ingen alternativ til formannskapet si tilråding, sams vedteke.
2. Ingen alternativ til formannskapet si tilråding, sams vedteke.
3. Avgjort i punktet over.
4. Først var det semje om å ta vekk ordet "vertikal" frå Bygdelista sitt framlegg. Deretter var det avrøysting om ordet "storsatsing", der eit fleirtal på 10 røysta for å behalda ordet (Ap og Høgre, samla grupper), mot 6 (Bygdelista, KrF og Sp, samla grupper).
5. Formannskapet si tilråding vedteke med 15 mot 1 røyst (Jan Erik Espelid frå Bygdelista)
6. Høgre/Arbeidarpartiet sitt framlegg vart sett opp mot framlegget frå Bygdelista. Høgre/Arbeidarpartiet sitt framlegg vann med 13 mot 3 røyster, desse tre var Jan Erik Espelid frå Bygdelista og Reidar Øksnes og Pål Andreas Dyrkolbotn, begge Senterpartiet. Deretter vart dette framlegget (Høgre/Arbeidarpartiet) sett opp mot formannskapet si tilråding, der H/Ap sitt framlegg vart vedteke med 14 mot 2 røyster (Reidar Øksnes og Pål Andreas Dyrkolbotn, begge Senterpartiet).
7. Formannskapet si tilråding vedteke med 12 mot 4 (dei som røysta mot var Jan Erik Espelid frå Bygdelista, Reidar Øksnes og Pål Andreas Dyrkolbotn, begge Senterpartiet, og Helge Dyrkolbotn, KrF).
8. Ingen alternativ til formannskapet si tilråding, sams vedteke.
9. Formannskapet si tilråding vedteke med 13 mot 3 (dei som røysta mot var Jan Erik Espelid frå Bygdelista, og

Bygdelista hadde to tilleggspunkt.
10. Framlegget fall med 13 mot 3 røyster (desse tre var Jan Erik Espelid frå Bygdelista, Reidar Øksnes og Pål Andreas Dyrkolbotn, begge Senterpartiet)
11. Framlegget fall med 11 mot 5 røyster (desse fem var Jan Erik Espelid frå Bygdelista, Reidar Øksnes og Pål Andreas Dyrkolbotn, begge Senterpartiet, og Helge Dyrkolbotn og Anne Dahle Austrheim, begge KrF).

Handsaming i kommunestyret:
Kommunedirektøren sitt framlegg vart samrøystes vedteke

Vedtak

• Kommunestyret avviklar ordninga med at personar som har innvilga varig tilrettelagt arbeid ved Aufera får tilrettelagt transport til og frå arbeid på eit generelt grunnlag, slik det har vore tradisjon for dei siste åra. Ordninga skal opphøyre når anna løysing er godkjent av kommunestyret

• Kommunestyret ber kommunedirektøren utarbeida forslag til ei løysing som sikrar at brukarar med behov for tilrettelagt transport til og frå Aufera vert vurderte ut i frå individuelle behov. Transport er ei teneste som kan søkjast om på lik line med andre kommunale tenester.

Behandling

Kommunalsjef helse og velferd, Anne Hildegunn Færøy orienterte om saka, jamfør saksutgreiinga.

Anne Dahle Austrheim (KrF) sa at det er mange moment i denne saka. Austrheim viste til at dei som bur ved Mastrevik Torg som skal reisa med buss til Manger må starta klokka 06.50 frå Mastrevik, er på Nordanger 07.05, på Marås 07.30 for skifte av buss, der det er 24 minuttar å venta utan busskur i all slags ver, og er så framme på Manger 08.00. Arbeidsdag til 14.30, men bussen går ti på halv. På returen er det 42 minutt å venta på Marås, og etter ein runde på Nordanger er ein framme på Mastrevik 15.55. (Ordførar Per Lerøy (Ap) skaut inn at det var busskur på Marås, men det er på feil side av vegen).

Helge Dyrkolbotn (KrF) sa at saka bør utsetjast og sendast til RMNF for handsaming der, og viste til at saker som angår denne gruppa skal handsamast i dette rådet.

Kommunedirektør Bjørnar Fjellhaug sa at ein er klar over status for busstilbodet. Om vedtaksframlegget viste Fjellhaug til at tilbodet ikkje skal opphøyra før ein har eit anna tilbod på plass. Ba om at kommunestyret gjer vedtak slik at kommunedirektøren kan starta arbeidet med å sjå på andre løysingar. Vil ta runden med saka via råda før ein gjer endeleg vedtak om ei ny løysing.

Ordførar Per Lerøy (Ap) sa at det er sagt i vedtaksframlegget at ordninga skal vara til ny løysing er på plass. Om busstilbodet viste Lerøy at det er spelt inn til Skyss at ein ønskjer seg endringar i det eksisterande tilbodet.

Helge Dyrkolbotn (KrF) ba om at det vart stemt over utsetjingsframlegget, og at om det fell så har KrF eit anna framlegg til vedtak.

Avrøysting om utsetjingsframlegget:
KRF (3), SP (2) og Bygdelista (1) røysta for utsetting, dette framlegget fall med 6 mot 10 røyster (Høgre og Ap røysta samla for). (16 representantar møtte i kommunestyret, mot normalt 17, Sp mangla ein av sine 3 representantar)

Helge Dyrkolbotn (KrF) la fram framlegg til vedtak som alternativ til kommunedirektøren:

Austrheim kommune opprettheld skysstilbod for personar med varig tilrettelagt arbeid ved Aufera.
Kommunedirektøren får i oppdrag å utarbeide organiseringa av transporten.
Inntil offentleg kollektivtilbod vert tilfredsstillande for våre ansatte ved Aufera må kommunen ta ansvar for transporten.

Handsaming i kommunestyret:
Dei to framlegga vart sette opp mot kvarandre. Framlegget frå Helge Dyrkolbotn fekk støtte frå KrF (3), SP (2) og Bygdelista (1). Det fall dermed med 6 mot 10 røyster, der Høgre og Ap støtta kommunedirektøren. (16 representantar møtte i kommunestyret, mot normalt 17, Sp mangla ein av sine 3 representantar)

Vedtak

Kommunedirektøren legg fram følgjande framlegg til svar:

Kva er dei mest relevante utfordringane framover?

1. Er utfordringsbiletet som skildra i heftet gjenkjennbart for din kommune?

Svar:

Utfordringsbiletet som er skildra i debattheftet er gjenkjennbart for Austrheim. Alle utfordringane merkar ein i større og mindre grad allereie, og dei andre er ein førebudd på å møta. Ein merkar at trongare økonomi krev tøffare prioriteringar, samstundes som ein skal levere gode tenester.

1. Er det andre langsiktige utfordringar enn det som er skildra, som de vil peike på?

Svar:

Ei anna utfordring er for kommunane å ivareta alle rollene som samfunnutviklar, samfunnsbyggar og tilretteleggjar. Med stadig trongare økonomi, aukande krav til tenesteleveranse, vil det å levere gode tenester bli ei utfordring. Kommunane kan ikkje klare å levere alt, og er avhengig av samarbeid med næringsliv, frivillig sektor og andre aktørar. Det å byggja framtidas velferdstenester, kan by på utfordringar med å få nok og rett kompetanse. I høvesvis små kommunar kan ein oppleve noko gjennomtrekk av kompetanse og særs på utsette tenesteområder som psykolog, der ein ikkje har større fagmiljø. Det å skapa gode fagmiljø og utvikling vil vere ei utfordring og ein treng også å samarbeida på tvers av kommunar. Oppretthalding av generalistkommunen kan vere ei langsiktig utfordring.

1. Kva utfordringar meinar de blir spesielt viktig å vere merksam på framover?

Svar:

Ein må vere særs merksam på demografiutfordringane. Ein skal ha eit godt tenestetilbod til ei aldrande gruppe og ein merkar at å få rett og nok kompetanse er krevjande og vil berre bli meir utfordrande. Når ein samstundes får nye lovpålagte oppgåver som ein skal løyse, utan at det fører midlar med, vil det medføre knappare ressursar og på sikt eit dårlegare tilbod. Kommunane treng å få fridom til å prioritere og handtere oppgåvene innanfor lokal sjølvstyre. Med stadig aukande grad av å forvalta sterkt statleg styrte velferdstenester, kan det på sikt bli krevjande for ein høvesvis liten kommune å handtere sjølv. Endringar også i inntektssystem som medfører lågare frie inntekter, vil det vere endå meir krevjande å levere gode velferdstenester i tida frametter.

Korleis styrke lokaldemokratiet si evne og kraft til bærekraftig arealbruk?

1. Kva mogelegheiter og utfordringar opplever kommunane sjølv i arbeidet med bærekraftig arealbruk?

Svar:

Kommunane som i størst grad kjenner sitt eige areal, må få høve til å regulere eigen arealbruk. Statlege styresmakter må i mindre grad overstyre lokalt skjønn, om ikkje det er i strid med nasjonale føringar, lover og føresegner. Ein må ha rom for utnytting av arealet til ålmenta, samstundes som ei fleksibel strandlinje må vere mogleg. Ein må kunne ha høve til å ta vare på verdifult areal, men samstundes leggje opp til eit berekraftig arealbruk. Moglegheitene er der gjennom arealplanleggjing, men utfordringar er sterke nasjonale føringar som vert handert likt, utan å sjå til faktisk bruk. Det er utfordrande med det grøne skiftet, men samstundes gjev det ei moglegheit. Ein må utnytte ressursane ein har lokalt og arbeida målretta med å nå klimamåla.

1. Kva nye verktøy og verkemidlar vil vere nyttige og naudsynte i kommunen sitt arbeid med bærekraftig arealbruk?

Svar:

Kommunane treng system og verktøy for god kartlegging og vurdering av berekraftig arealbruk. Det kan vere når det gjeld utarbeiding av areal- og naturrekneskap, så vel som klimarekneskap. Alle kommunar har ikkje same tilgang til ressursar og treng difor hjelpeverktøy som lettare kan nyttast og gjer at ein kan gjere gode analysar og planleggjing. Nokre felles gode system blir viktig. Samstundes vil ein ha behov for kompetanse og at fylkeskommune og statsforvaltar kan arbeida saman med kommunane for ei berekraftig arealbruk. Det at ein arbeidar med og ikkje mot, og samskapar vil vere nyttig og nadsynt for kommunane. Ein treng at ein samskapar og hjelper til å finne gode og konstruktive løysingar som er framtidsretta og reduserer klimakonsekvensane og naturutfordringane. Vidare treng ein også økonomiske verkemidlar. Kommunar som stiller sitt areal til disposisjon for fellesskapet, må også få att for å ha nytta sitt areal til samfunnsnyttige føremål. Ei foreinkling av plan- og bygningslova bør gjerast slik at planprosessane går raskare og meir effektivt.

Korleis få til ei raskere omstilling og mobilisering av ressursar?

1. Kva er dei største barrierane for å få til ei raskere omstilling i din kommune?

Svar:

Dei største barrierane er ressursar, kompetanse og økonomi. Det er stor vilje til omstilling innad i organisasjonen, men tid, ressursar og kompetanse, samstundes som å ha moglegheit til å gjennomføre gode omstillingsprosessar kan vere nokre av barrierane. Det å sjå gevinsten av omstillingsarbeidet, kan også vere ein barriere som gjer til at omstilling kan ta litt lengre tid.

1. Kor ser de dei største mogelegheitane for å mobilisere ressursar internt i eigen organisasjon og med eksterne utanfor organisasjonen?

Svar:

Vi har moglegheiter innanfor alle sektorane til omstilling. Størst potensiale ligg innan helse og velferd og utvikling av velferdsteknologi. Samhandling innad og ekstern med næringsliv, vgs og høgare utdanning, ligg potensiale til å få til gode omstillingsprosessar.

Behandling

007/23

Kommunedirektør Bjørnar Fjellhaug orienterte om saka, jamfør saksutgreiinga.

Reidar Øksnes (Sp) sa at dette temaheftet burde vore meir inngåande diskutert i kommunestyret, gjerne som eit temamøte. Det er mykje her som ein kunne brukt som eit styringsdokument i kommunestyret. Det kan vera kort svarfrist i dette tilfellet, men generelt kunne eit hatt temakveldar på slike saker der kommunestyret kunne brukt tid til å diskutera. For slike tema som er så inngripande for korleis me skal jobba i Austrheim kommune, burde det vore emne for diskusjon om korleis ein kan komma fram til gode løysingar.

Ordførar Per Lerøy sa at saka har vore tilgjengeleg for politisk i fire veker, men sa seg samd i fire vekers frist er kort tid.

Kommunedirektør Fjellhaug sa at det er aktuelle ting her å ta med seg vidare i arbeidet i kommunestyret, mellom anna på temasamlinga ein skal ha i Kilstraumen i mai 2022.

Handsaming i kommunestyret:
Kommunedirektørens framlegg til vedtak vart samrøystes vedteke. (16 representantar møtte i kommunestyret, mot normalt 17, Sp mangla ein av sine 3 representantar)

Vedtak

Kommunedirektøren legg fram fylgjande framlegg til svar:

1. Bør den økonomiske ramma i mellomoppgjeret fordelast sentralt, eller bør delar av den forhandlast lokalt, ut i frå lokale behov og prioriteringar?

Svar: Austrheim kommune ønskjer primært at dei økonomiske rammene vert fordelt sentralt, men at kommunane får ein lokal pott som kan fordelast etter lokale behov. Behova i kommunane er ulike. Vi ønskjer å prioritera dei stillingar kor vi har størst utfordringar med å rekruttere og behalde. Vi ser også nokre utfordringar ved lokale prioriteringar. I konkurranse om viktig arbeidskraft ser vi at kommunar driv å overbyr kvarandre for å skaffa arbeidskrafta og kompetansen. Dette vil på sikt vere lite tenleg. Det bør sjåast på andre «gulrøter» i rekruttering og vi ser også at det må gjevast «pakkar» for å rekruttere framtidig arbeidskraft. Viktige prioriteringar vert å leggja til rette for heiltidskultur, samt leggje til rette for ein attraktiv lønspolitikk for dei som vidare- og etterutdannar seg.

2. Om det vert sett av midlar til lokale forhandlingar, kor stor bør potten i så fall vere?

Svar: Det bør setjast av ein så stor pott at det vert høve for reelle lokale tingingar.

3. Om ramma fordelast sentralt:

• Er det ynskjeleg at alle tilsette får omlag like store tillegg eller er det ynskjeleg med ei tydelegare prioritering av enkelte grupper framfor andre?

• Om enkelte grupper skal prioriterast, kva stillingsgrupper og/eller ansiennitetstrinn bør i så fall få størst tillegg?

Svar:Det er ønskjeleg med tydeleg prioritering av stillingar/grupper kor ein ser det er størst utfordringar med å rekruttera og behalde tilsette. Stillingar med krav til utdanning (bachelor grad eller høgare), innan alle sektorar bør prioriterast. Det bør løne seg med høgare utdanning og det må vise seg att også i prioriteringane. Vi meiner vidare at det bør vere merkbar ulikskap i løn mellom tilsette med fagbrev/ fagskule og dei tilsette utan utdanning. Tilsette utan utdanning bør ikkje prioriterast, men stimulerast og oppmodast til å ta etter- og vidareutdanning. Ein ser at startløna for høgskulegruppa (3 års u/hutdanning) ikkje har så stor skilnad når ein samanliknar med ufaglærte og ufaglærte med lang ansiennietet (pr 1.1.2023 kr 431 400 og kr 460 300,-). Det vart gjort eit løft i oppgjeret i 2022 for høgskulegruppa (3 u/h-utdanning) noko som er bra! Framleis treng ein å løfta desse gruppene då kommunar framleis overbyr kvarandre for å rekruttera frå desse gruppene.

Behandling

Kommunedirektør Bjørnar Fjellhaug orienterte om saka, jamfør saksutgreiinga.

Jan Erik Espelid (Bygdelista) presenterte eige framlegg til vedtak, for punkt 3.

Handsaming i kommunestyret:
Det vart røysta over punkt for punkt i vedtaket:
1. Sams
2. Sams
3. Kommunedirektøren sitt framlegg vart vedteke mot tre røyster. Desse støtta Bygdelista sitt framlegg: Jan Erik Espelid (Bygdelista), Helge Dyrkolbotn (KrF) og Pål Andreas Dyrkolbotn (Sp).

Vedtak

Kommunestyret godkjenner framlegget til prosjektreglement.

Behandling

Økonomi- og personalsjef Odd Harald Dommersnes orienterte om saka, jamfør saksutgreiinga.

Britt Skålevik Lerøy (Ap) sa at det var bra framlegg til prosjektreglement. Mykje som er kjent frå andre stader. Det som er viktig er utarbeidinga av konkurransegrunnlag, det er der ein legg rammene for kva som skal leverast og til kva pris. Utruleg viktig at det med.

Dommersnes sa at ein brukar rådgivar på anbod, og sa seg samd i at konkurransegrunnlag er viktig for å få det ein ber om. Sa vidare at dette er eit førsteutkast til reglement, må nok jobba vidare med dette.

Handsaming i kommunestyret:
Kommunedirektøren sitt framlegg vart samrøystes vedteke

Vedtak

Austrheim kommune betalar tilbake kr. 6.100 kvar til dei 6 søkjarane som i år 2022 fekk eit sakshandsamingsgebyr på kr. 8.000 for sine søknadspliktige tiltak til oppføring/bygging av eldstad/pipe. Austrheim kommune betalar ut totalt kr. 36.600. Midlane vert teke frå disposisjonsfondet.

Kommunedirektøren må undersøke om det er fleire som har rett på tilbakebetaling av gebyr, dette gjeld for åra før 2022.

Tilbakebetaling av gebyr skal avgrensast til tre år tilbake (2022-2021-2020).

Behandling

Avdelingsleiar Plan, Asbjørn Nagell Toft, orienterte om saka jamfør saksutgreiinga.

Helge Dyrkolbotn (KrF) la fram eit tilleggspunkt om å gå lengre tilbake enn 2022: "Kommunedirektøren må undersøke om det er fleire som har rett på tilbakebetaling av gebyr, dette gjeld for åra før 2022."

Avdelingsleiar Plan, Asbjørn Nagell Toft, sa at det er ein del arbeid med å gå tilbake lengre enn 2022, og sa at det kan verta mykje ekstraarbeid for lite. Viste til at det ikkje har komme klager, og at ein no brukar ein lågare sats på 1.900 kroner.

Kommunedirektør Bjørnar Fjellhaug ba om at det eventuelt vart avgrensa til tre år tilbake, som er det vanlege for slike saker.

Helge Dyrkolbotn (KrF) sa at det er OK å gå tre år tilbake for tilbakebetaling. Dyrkolbotn sa vidare at det handlar om rettferd for dei som har betalt for mykje, sjølv om det er noko arbeid.

Handsaming i kommunestyret:
Kommunedirektøren sitt framlegg vart samrøystes vedteke, med tillegg frå Dyrkolbotn, og avgrensing på 3 år som kommunedirekøren ba om.

Vedtak

Austrheim Arbeidarparti har ikkje fått behandla denne saka i partiet og ber derfor om at saka vert utsett. Me ber om at saka vert lagt fram for formannskapet 23. mars og kommunestyret.

Det skal kallast inn til eit ekstra kommunestyre nokre dagar i forkant av fristen 31. mars for handsaming av saka.

Behandling

Ordførar Per Lerøy (Ap) viste til at framlegget frå gruppeleiarane har vore oppe internt i Ap, der det vart sagt at saka måtte utsetjast til dei har hatt medlemsmøte. Lerøy la fram utsetjingsframlegg: Austrheim Arbeidarparti har ikkje fått behandla denne saka i partiet og ber derfor om at saka vert utsett. Me ber om at saka vert lagt fram for formannskapet 23. mars og kommunestyret 13. april.

Helge Dyrkolbotn (KrF) sa at han var i stuss om det var ein god grunn til utsetjing at eitt parti ikkje har fått handsama saka. Elles låg det i vedtaket frå oktober at saka skulle handsamast i dag, og det heng saman med at det skal setjast opp lister til valet. Samstundes er det ei tung sak, og ser at det er grunnar til å diskutera dette grundigare.

Reidar Øksnes (Sp) sa om denne saka skal utsetjast, så må det kallast inn til eit ekstraordinært kommunestyre slik at det er kommunestyret som avgjer. Sp vil legga fram eit grunngjeve framlegg om å ha tre utval. Synest ikkje kommunestyret kan delegera dette til formannskapet.

Ordførar Per Lerøy sa at det ikkje skal vera formannskapet som skal avgjera, men når det er vedteke i formannskapet så er det reelt sett vedteke i kommunestyret også. Og kommunestyret 13/4 er etter at listene er leverte den 31. mars. Har ingen problem med å ta dette i eit ekstraordinært kommunestyre. Må kallast inn til eit ekstra kommunestyre nokre dagar i forkant av fristen 31. mars, dette kjem ein tilbake til.

Handsaming i kommunestyret:
Det vart røysta over utsetjingsframlegget.
Samd for utsetjing, og for at det skal kallast inn til eit ekstra kommunestyre nokre dagar i forkant av fristen 31. mars for handsaming av saka.

Vedtak

Kommunestyret vedtar retningslinjene slik dei ligg føre. Etter at vedtaket er gjort i kommunestyret, skal retningslinjene vera tilgjengelege på kommunen si nettside.

Behandling

Sakshandsamar Ketil Tjore orienterte om saka, jamfør saksutgreiinga.

Det vart orientert om bruken av startlån i 2022:
Startlån gitt i 2022:
(Dette er låna som er utbetalt i 2022, noko var innvilga i 2021. Tilsvarande er lån innvilga i 2022, som blir betalt ut i 2023, ikkje teke med).

1. Refinansieringssak 289 852 kr Behalda bustad2. Oppussing av bustad 94 822 kr Tilpassing for å bu heime lengre (+10 000 kr i tilskot)3. Kjøp av bustad - Familie, ikkje kvalifisert til lån i vanleg bank
4. Kjøp av bustad - Familie, ikkje kvalifisert til lån i vanleg bank
5. Kjøp av bustad - Familie, ikkje kvalifisert til lån i vanleg bank
6. Kjøp av bustad - Familie, ikkje kvalifisert til lån i vanleg bank
7. Kjøp av bustad - Familie, ikkje kvalifisert til lån i vanleg bank
8. Kjøp av bustad - Familie, ikkje kvalifisert til lån i vanleg bank

I alt utlånt

Kjøp av bustad fordeler seg på kjøpesummar frå 1,4 til 2,5 millionar kroner.

Handsaming i kommunestyret:
Kommunedirektøren sitt framlegg vart samrøystes vedteke

Vedtak

Kommunestyret delegerer til Valstyret å oppnemna stemmestyre, og elles dei oppgåver som etter Vallova kan delegerast til Valstyret.

Valstyret i Austrheim får denne samansettinga:

Faste medlemmer:

Leiar: Per Lerøy (Ap)

Nestleiar: Inger Lise Brekke (H)

Medlem: Morten Sognnes (H)

Medlem: Anne Dahle Austrheim (KrF)

Medlem: Bjørn I. H. Dyrkolbotn (Sp)

Varamedlemmer:

For Per Lerøy i denne rekkjefølgja:

1. Ann Kristin Leirvåg (Ap), 2. Rikke Heldal Hope (H), 3. Aslak André Bakke (H), 4. Monika Thorpe (Ap), 5. Hardy Pedersen (Ap), 6. Reidar Ulvøy (Ap).

For Inger Lise Brekke i denne rekkjefølgja:

1. Ann Kristin Leirvåg (Ap), 2. Rikke Heldal Hope (H), 3. Aslak André Bakke (H), 4. Monika Thorpe (Ap), 5. Hardy Pedersen (Ap), 6. Reidar Ulvøy (Ap).

For Morten Sognnes i denne rekkjefølgja:

1. Ann Kristin Leirvåg (Ap), 2. Rikke Heldal Hope (H), 3. Aslak André Bakke (H), 4. Monika Thorpe (Ap), 5. Hardy Pedersen (Ap), 6. Reidar Ulvøy (Ap).

For Anne Dahle Austrheim i denne rekkjefølgja:

1. Helge Dyrkolbotn (KrF), Randi K. Dyrøy (KrF).

For Bjørn Inge Håland Dyrkolbotn i denne rekkjefølgja:

1. Lise Renate Helle (Sp), 2. Reidar Øksnes (Sp), 3. Jan Erik Espelid (BYA)

Behandling

Sakshandsamar Ketil Tjore orienterte om saka, jamfør saksutgreiinga.

Handsaming i kommunestyret:
Kommunedirektøren sitt framlegg vart samrøystes vedteke