Møte i Kommunestyret den 31.03.2016

Vedtak

Møteinnkalling og sakliste vert godkjent. Sak 017/16 vert handsama før sak 014/16. Samrøystes vedteke.

Behandling

Endringsframlegg frå ordførar: Sak 017/16 vert handsama før sak 014/16.

Vedtak

Møtebok frå sist møte vert godkjent. Samrøystes vedteke.

Vedtak

Referatsaker vert tekne til orientering. Samrøystes vedteke.

Vedtak

Fedje kommune sluttar seg til den milepelsplan som NHL kommunane legg opp til med folkemøte i april, opinionsundersøking i mai og endeleg saksutgreiing og vedtak i junimøtet i kommunestyret. Vedteke med 9 mot 6 røyster. Høgre og Krf røysta for framlegget.

Behandling

Endringsframlegg frå Kristin Handeland/Ap:

Kommunestyret kan ikkje sjå at den framlagde intensjonsavtalen gir grunnlag for at Fedje kommune skal slå seg saman med dei andre kommunane i Nordhordland. Fedje vil i overskueleg framtid vera eit øysamfunn, utan fastlandssamband og med sine heilt spesielle utfordringar. Kommunestyret ser det slik at eit lokalt sjølvstyre også i framtida vil vera best eigna til å handtera øysamfunnet sine mange utfordringar, framleis i nært samarbeid med dei andre kommunane i regionen og dei andre kommunane i Øysamarbeidet. Fedje fekk kommunalt sjølvstyre i 1947. Ei eventuell samanslåing vil mellom anna innebera at Fedje høgst sannsynleg ikkje vil få ein einaste representant i det nye kommunestyret. Kommunestyret viser til det som er sagt ovanfor og avsluttar med dette vidare arbeid med eventuell kommunesamanslåing.

Endringsframlegg frå Ingmar Stuberg/Krf:

Fedje kommune sluttar seg til den milepelsplan som NHL kommunane legg opp til med folkemøte i april, opinionsundersøking i mai og endeleg saksutgreiing og vedtak i junimøtet i kommunestyret.

Det vart først votert over formannskapet si innstilling. Framlegget falt samrøystes.

Endringsframlegget frå Ap og Krf vart så sett opp mot kvarandre i voteringa.
Ap, Frp, Demokratane røysta for Ap sitt framlegg, Høgre og Krf røysta for Krf sitt framlegg. Krf sitt framlegg vart vedteke med 9 mot 6 røyster.

Vedtak

Mandat for Eldreråd og råd for menneske med nedsett funksjonsevne vert godkjent slik det ligg føre. Samrøystes vedteke.

Vedtak

Skulen får tilført 1.2 årsverk ekstra for å kunne ivareta nye arbeidsoppgåver på ein fullt ut tilfredsstillande måte. Forventa meirkostnad: Inntil kr 500.000 i 2016. Inndekning: Auka integreringstilskot frå staten. Samrøystes vedteke.

Behandling

Tove Nordseth melde seg ugild på basis av kommunelova § 40 punkt 3 b, då ho hadde medverka til tilrettelegginga av saka. Maria Thomassen stilte som vara.

Vedtak

Ingen votering.

Behandling

Inge Waage/Frp:
- spørsmål om tømmeplass for bubil - igjen. Viste til forureiningslova § 26.
Terje Blomvågnes/Ap:
- viste til brev levert kommunen 30.03.16, der dei tok opp Skyss som ikkje køyrde oppsette ruter i påska, slik at ungdom vart sittande fast i Sævrøy. Ordførar sa at saka allereie var teke opp med Skyss, men ønskjer vidare konkrete tilbakemeldingar om slike hendingar vidare.

Ordførar informerte:
- Folkemøte i samband med kommunesamanslåing vert i hallen 13.04.16. Rådmannen + dei tre i forhandlingsutvalet møter frå kommunestyret.
- Det vert framleis arbeidd med tannlegesaka.