Møte i Formannskapet i Radøy den 09.11.2016

Vedtak

Kommunestyret godkjenner intensjonsavtalen om vidareføring av tenester i Buisiness Region Bergen.

Radøy kommune betalar kr 7 pr innbyggjar i 2017 for dei to prosjekta Etablerarsenteret og Invest in Region Bergen. Det vert teke atterhald om at alle medlemskommunane og fylkeskommunen bidreg med same beløp pr innbyggjar.

Det vert utarbeidd ein eigen avtale som regulerer samarbeidet ytterlegare frå 2017.

Behandling

Formannskapet drøfta saka.

Formannskapet vedtok samrøystes rådmannen sitt framlegg til vedtak.

Vedtak

Siv Beate Marøy (H) går inn som nytt medlem for Ane Ottesen i Kontrollutvalet
Karolina Vaktskjold (H) går inn som 3. varamedlem i Kontrollutvalet for Siv Beate Marøy

Behandling

Kenneth Taule Murberg (H) sette fram følgjande framlegg til suppleringsval i Kontrollutvalet:

Siv Beate Marøy (H) går inn som nytt medlem i Kontrollutvalet
Karolina Vaktskjold (H) går inn som 3. varamedlem i Kontrollutvalet etter Siv Beate Marøy.

Ane Ottesen er også 2. varamedlem til kommunestyret - og der blir det opprykk på Høgre si liste over varamedlemer.

Formannskapet som valnemnda vedtok samrøystes suppleringsval til Kontrollutvalet.

Vedtak

Formannskapet i Radøy kommune rår ifrå at matrikkellova vert endra slik det går fram av høyringsframlegget sendt ut 19.08.2016 frå KMD. Høyringsnotat datert 27.10.2016 er kommunen sitt høyringssvar i saka, saman med saksutgreiinga.

Behandling

Rådmann Jarle Landås orienterte og sa at det vil vera eit tap for Radøy kommune å mista denne kompetansen med kommunal landmålar. Han peika på dette er ein kompetanse som blir brukt på fleire måtar innanfor teknisk forvaltning. Det er også ein styrke med lokalkunnskap i denne stillinga.

Formannskapet vedtok samrøystes rådmannen sitt framlegg til vedtak.

Behandling

Rådmann Jarle Landås peika på at kommuneøkonomien framleis er svært stram i Radøy og at det er nødvendig med tett kostnadskontroll for å koma i hamn med 2017-budsjettet. Det positive er at det ikkje er eit budsjett som legg opp til kutt i kommunale tenester.

Økonomisjef Sveinung Kvamme gav ein grundig presentasjon av viktige punkt i budsjettframlegget for neste år. Han konstaterte at netto driftsresultat er svakt, berre 0,32% av samla driftsinntekter. Bruk av fond gjer at mindreforbruket blir 3,5 mill, eller 0,92%. Utan ekstra tilskot knytt til samanslåinga, hadde mindreforbruket vore tilnærma null, og netto driftsresultat hadde vore negativt med ca 2 millionar kroner.

Rammetilskot og skatt aukar ifølgje Finansdepartementet med 1,9% samanlikna med 2016. Pris- og lønsveksten er i statsbudsjettet anslått til 2,5%. Omlegginga av inntektssystemet er fører såleis til reduserte overføringar til Radøy kommune. Dette skuldast i all hovudsak omlegginga av basistilskotet.

Drifta i 2017 skal i utgangspunktet vera ei vidareføring av drifta hausten 2016.

Økonomisjefen peika på at det er lagt inn ein betydeleg vekst i ramma til oppvekstsektoren. Auka kostnader til barnehage, inklusiv ny avdeling ved Prestmarka barnehage er på ca 1,7 mill. og til ny privat familiebarnehage er det sett av 1,1 mill. i budsjettforslaget.

Det er sett av auke i driftskostnader ved alle skular, unnateke Radøy ungdomsskule.

I helse og omsorg er det også den økonomiske ramma auka noko. Mellom anna er det større behov for støtte til livsopphald, det skal tilsetjast ruskoordinator knytt til Psykisk helse, og det blir løyvd 500.000 kroner til utvikling og investering i omsorgsteknologi. Jordmorstillinga blir auka frå 30 til 40 prosent.

Til kulturvern er det gjort framlegg om 100.000 kroner til drift av Bogatunet og Syltastova.

Vedlikehald av kommunale vegar vert føreslege styrka med ca 100.000, og det blir sett av 500.000 kroner til auka driftsomfang i vassverket.

Rådmannen legg opp til samla investeringar på 80,9 mill i 2017. I tillegg kjem kjøp av andelar i KLP 1,2 mill. Investeringane må finansierast ved låneopptak. Det vil stå att om lag 9 mill. kroner i unytta lånemidlar pr 1.1.2017. Låneopptak i 2017 vert difor 63,7 mill. etter rådmannen sitt framlegg.

Den største investeringa er ny barnehage på Bø, der rådmannen har sett av 30 millionar i budsjettframlegget. Det er vidare lagt opp til vass- og avløpsprosjekt 29,7 millionar kroner (som er sjølvfinansierande).

Andre større prosjekt det er funne plass til i budsjettet er nærmiljøtiltak Bø 3 mill, kommunale bustader 2,5 mill, oppgradering garderobe Manger skule 2,5 mill, turveg/lysløype Manger 2 mill, asfaltering kommunale vegar 2 mill.

Rentenivået til lån med flytande rente er rekna til 1,85% i 2017. Lån med fast rente går i samsvar med renteplan 2,49% i Kommunalbanken og 2,1% i Husbanken. Samla rentekostnad er 6,58 mill i 2017, avdrag er utrekna til 8,62 millionar, som er tett opptil minimumsavdrag etter Kommunelova.

Rådmannen og økonomisjefen svara på spørsmål.

Kenneth Taule Murberg (H) stilte spørsmål om det er gjort vurderingar om å binda renta på ein større del av kommunen si lånegjeld. Økonomisjefen svara at det er mogleg å sjå på rentevurderingar i samband med revidering av Finansreglementet, t.d. ut på nyåret.

Rådmannen fekk gode tilbakemeldingar på framlegget til budsjett, ikkje minst at budsjettet har fanga opp politiske signal. Ordførar Jon Askeland oppsummerte budsjettdrøftinga i formannskapet og kom med klar oppmoding om at netto driftsresultat ikkje må svekkast i den vidare prosessen. Han rådde til at framlegg om nye tiltak må salderast i budsjettet.

Det vart ikkje gjort realitetshandsaming av budsjett og økonomiplan i dette møtet.

Vedtak

Radøy kommune garanterer med sjølvskuldnargaranti for lån i Kommunalbanken som Aufera AS tek opp til refinansiering.

Garantien gjeld for hovudstolen på lånet, maksimalt NOK 2.000.000, med tillegg på 10% av til ei kvar tid gjeldande hovudstol, til dekking av mogelege påkomne renter og kostnader. Kommunen sitt maksimale garantiansvar kan ikkje overstiga NOK 2.200.000.

Garantiansvaret vert redusert i takt med nedbetalinga av lånet, og opphøyrer etter 20 år, med tillegg av inntil 2 år, jf garantiforskrifta §3.

Garantivedtaket skal godkjennast av Fylkesmannen i Hordaland.

Behandling

Som medlem i styret i Aufera AS sa Vidar Grindheim (H) seg inhabil i denne saka. Formannskapet kjende Grindheim inhabil og han deltok ikkje i handsaminga av saka.

Formannskapet vedtok samrøystes rådmannen sitt framlegg til vedtak.

Vedtak

Meldingar og referatsaker vert tekne til orientering.

Behandling

GLØDE - Olsvollstranda: Ordføraren informerte om at administrasjonsleiinga i arbeidsinkluderings-bedrifta Gløde Arbeids- og Kompetansesenter finn det nødvendig å avvikla aktivitetane på Olsvollstranda (tidl. Nordhordland Industriservice AS. Verksemda har gått med underskot i fleire år og har tapt viktige oppdrag hjå NAV og mista større kundar i bedriftsmarknaden.

Sjukefråvær: Rådmannen orienterte om at sjukefråveret i kommunen viser ein god trend gjennom heile 2016. I tredje kvartal er sjukefråveret på 6,6 prosent, som er ein fin nedgang samanlikna med same kvartal i fjor. Også i dei to første kvartala i 2016 var det positiv utvikling i sjukefråveret.

Formannskapet tok meldingar og referatsaker til orientering.

Vedtak

Radøy kommune sluttar seg til regionalt innspel til Utgreiing Ringveg øst og E39 nord i Åsane, med følgjande tillegg:
- Den nye vegen må få overgang til tofelt heilt nord ved Nordhordlandsbrua, uansett kva alternativ som vert vald.
- Den nye vegen må ha god flyt, med få påkøyringspunkt, slik at ein unngår situasjonar som på Eikås i dag.
- .

Behandling

Regionrådet har kome med følgjande forslag til innspel knytt til Utgreiing om Ringveg øst og E39 nord i Åsane:

Me viser til brev datert 24. august 2016 frå Statens vegvesen Region vest med invitasjon til å gje innspel til «Utgreiing om Ringveg øst og E39 nord i Åsane». Her fylgjer innspel frå Regionrådet i Nordhordland.

Me viser også til eit positivt møte med Bergen kommune og Statens vegvesen i Bergen Rådhus onsdag 2. november. Der var det svært positive signal frå alle aktørane om at ein ønskja å komme i gong med planprosessen så fort som mogleg for å få realisert prosjekta.

Regionrådet i Nordhordland er no svært utålmodige med å få ein betre veg på E39 nord i Åsane. Dette er det viktigaste samferdselsprosjektet for Nordhordland, noko me også har understreka i vår uttale til NTP 2018-2029. Det viktigaste for oss er at det vert vedteke ny trase for E39 nord i Åsane så raskt som mogeleg og at arbeidet på denne kan starta opp. Dette prosjektet vil vera eit av dei beste til å tilfredsstilla dei kriteria som er til samfunnsøkonomisk lønnsemd, samfunnstryggleik og samanhengande standard / utbygging. Prosjektet er i stor grad tenkt å vera bompengefinansiert gjennom Nordhordlandspakken.

Regionrådet registrerer at Nyborgtunellen slik den var vedteke i kommunedelplan (alternativ N5) no ikkje synes å vera så aktuelt på grunn av vektlegginga av konseptvalet for Ringveg øst. I tilrådinga frå Statens vegvesen er det alternativa N1,N 2 og N3 for E39 nord i Åsane som er anbefalt som alternativ og den vurderinga vert også støtta av Bergen kommune. Regionrådet tek dette til etterretning og ser det som viktigast å jobba for at eit av alternativa N1, N2 eller N3 vert valt så raskt som mogeleg og at bygginga av ny trase kjem i gong.

Val av alternativ N1, N2 eller N3 for E39 nord i Åsane

Det viktigaste kriteriumet for val av alternativ er at ein vel det alternativet som kan realiserast raskast.

Det ser ut til at alternativet N1 er det som kan skape mest konflikt og vere vanskeligast å gjennomføre. Me vil difor råde til at alternativa N2 og N3 er det som vert vurdert som mest realistiske. I alternativet N2 skal ein nytte Eikåstunellen. Dersom det kan oppnås ein god samankopling med Eikåstunellen burde dette vere eit godt alternativ.

Val av planprosess med eventuell statleg plan

I møte med Bergen kommune 2. november var haldninga frå Bergen kommune at dei ikkje ønskja ein statleg kommunedelplan. Me har forståing for det standpunktet i og med at heile vegprosjektet skjer i Bergen kommune. Men me vil samstundes peika på at trasen for E39 frå Nordhordlandsbrua til Bergen sør er eit stort samferdselsprosjekt for det overordna riksvegnettet og løysingar involverer og betyr mykje både lokalt, regionalt og nasjonalt. For å vekta dei ulike interessene og samstundes sikre framdrift kan det vere eit argument for at det bør vera ein statleg kommunedelplan.

Uavhengig av kva planprosess som vert valt er det viktigaste at planprosessen startar opp så raskt som mogeleg og at der ein god dialog mellom alle aktørane. Me trur at vilje frå alle aktørane om å få til noko er viktigare enn kva planprosess som vert valt.

Realisering av ny trase for E39 nord i Åsane er det viktigaste samferdselsprosjektet for Nordhordland og me ønskjer framover å ha ein tett dialog med aktørane om framdrifta og val av løysingar.

Det var semje i formannskapet om å leggja Regionrådet sitt forslag til grunn for Radøy kommune sin uttale.

Ordførar Jon Askeland sette fram følgjande fellesframlegg:

Radøy kommune sluttar seg til regionalt innspel til Utgreiing Ringveg øst og E39 nord i Åsane, med følgjande tillegg:
- Den nye vegen må få overgang til tofelt heilt nord ved Nordhordlandsbrua, uansett kva alternativ som vert vald.

- Den nye vegen må ha god flyt, med få påkøyringspunkt, slik at ein unngår situasjonar som på Eikås i dag.

- Det er viktig at planarbeidet har høg gjennomføringstakt, og rask ferdigstilling, for behovet for betre vegløysing er påtrengjande.

Formannskapet vedtok samrøystes framlegg til vedtak sett fram i møte.

Vedtak

Saka vert utsett til neste møte.

Behandling

Det er ønskje om å få orientering i saka. Det vart sett fram utsetjingsframlegg.

Formannskapet vedtok samrøystes utsetjingsframlegget.