Møte i Kommunestyret i Radøy den 09.02.2017

Vedtak

Meldingar og referatsaker vert tekne til orientering

Behandling

Leif Taule (SP) etterlyste meir informative saksdokument til førebuande fellesnemnd, og ser det som viktig å få informasjon ut til innbyggarane og politikarane.
Ordføraren viste til at dette no blir ei god løysing på, med prosjektleiar-ressurs og ressurs på kommunikasjon på plass i løpet av kort tid.

Kommunestyret tok meldingar og referatsaker til orientering

Vedtak

Formannskapet vert valstyre for perioden 2017-2019. Valstyret får fullmakt i saker som omhandlar kommuneval og fylkes- og stortingsval.

Behandling

Kommunestyret vedtok samrøystes formannskapet (valnemnda) si tilråding.

Vedtak

1. Sjappen as (organisasjonsnr. 917656282) får tildelt serveringsløve. Som vilkår vert det sett at verksemda melder i frå til det lokale Mattilsynet og har godkjenning frå Arbeidstilsynet.

2. Skjenkeløyvet gjeld all alkoholhaldig drikk.

3. Skjenkeløyvet gjeld frå 1.10.2016 til 30.06 2020.

4. Skjenkeløyvet gjeld i bygg på gnr. 24 , bnr. 295 for innandørs lokale på omlag 150m2, og for uteservering på terrasse (omlag 85 m2) i tilknyting til nemnde lokale.

5. Som skjenkestyrar vert Jostein Rikstad godkjent med Svein Rikstad som stedfortredar.

6. Løyvehavar og styrar for løyvet pliktar å sjå til at alkohollova sine føresegner vert følgte.

7. Skjenketider gitt i Forskrift om sal, skjenking og opningstider for alkoholhaldig drikke vedteken av kommunestyret i Radøy kommune september 2016, skal følgjast.

8. Tilsette kan ikkje konsumera og/eller vera påverka av rusmidlar i arbeidstida.

9. Nødvendige offentlege godkjenningar for å driva servering- og skjenkestaden skal til ei kvar tid føreliggja.

Behandling

Kommunestyret vedtok samrøystes formannskapet si tilråding.

Vedtak

Radøy kommune set av kroner 50 000 til gjennomføring av nynorskdagar i 2017. Midlane vert henta frå disposisjonsfond merka nynorskmidlar.

I samband med nynorskdagane i Radøy vert det i tillegg sett av kr 10 000,- som lag og organisasjonar søkjer midlar frå til aktuelle tiltak for å fremja nynorsken.
Midlane vert henta frå nynorskfondet.

Løyving til nynorskdagar i 2019 kjem opp som ei eiga sak i budsjettåret 2019.

Behandling

Agnes Hoshovde Bernes (V) helsa nynorskdagane velkomen som eit "kuult" tiltak. Ho oppmoda kommunen til å inkludera ungdomsklubben og ungdomsrådet i dette prosjektet. Ho viste til at ein del ungdomar skiftar frå nynorsk til bokmål når dei kjem på vidaregåande skule.

Leif Taule (SP) ser det som viktig å styrka nynorsk språk i barnehagane, i tillegg til å bevisstgjera elevane i ungdomsskulen. Han viste til den vedtekne målbruksplanen og oppmoda rådmannen om å få større fokus på skriftleg språkbruk mellom leiarane i kommunen. Han ønskjer også å involvera lag og organisasjonar i nynorskdagane.
Taule sette fram følgjande tilleggsframlegg:
I samband med nynorskdagane i Radøy vert det i tillegg sett av kr 10 000,- som lag og organisasjonar søkjer midlar frå til aktuelle tiltak for å fremja nynorsken.
Midlane vert henta frå nynorskfondet.

Kommunestyret vedtok samrøystes formannskapet si tilråding, med tilleggsframlegg frå Leif Taule (SP) sett fram i møtet.

Vedtak

Formannskapet arbeidar vidare med saka og utarbeidar ei endeleg prioriteringsliste for tiltak på samferdselssektoren på bakgrunn av formannskapet si tilråding og med dei tillegg som vart sett fram i debatten i kommunestyret (KrF, H, SP).
Kommunestyret ber om at denne prioriteringa vert sendt til Nordhordlandspakken AS og til nabokommunane Lindås og Meland.
Kommunestyret gjev ordføraren fullmakt - saman med ordførarane i Meland og Lindås, til å senda søknad om ytterlegare planmidlar i 2017 for vegprosjektet Radøy-Holsnøy frå kommunereform-midlane.

Behandling

Ordføraren orienterte om bakgrunnen for drøftingssaka om aktuelle samferdselsutfordringar og han oppmoda kommunestyret å finna fram til ei mest mogleg samlande løysing som kan sendast over til Nordhordlandspakken AS og til nabokommunane til uttale. Han peika på at det er større sjanse til å få noko til dess større semje det er.

Sivilingeniør Helge Hopen har på oppdrag frå Radøy kommune utarbeidd eit notat om Radøy sine moglege vegval vidare. Han presenterte vurderingane og tilrådingane sine i kommunestyret, og kommunestyret hadde ei lengre drøfting om behov og prioriteringar på samferdselssektoren.

David Pletten Aasgard (KrF) meiner det i samband med ny fylkesvegen Marås-Soltveit er heilt avgjerande å få skikkeleg avkjørske til Sletta frå nye fv. 565 med i planen og i Nordhordlandspakken.
Pletten Aasgard sette fram følgjande tilleggsframlegg:
- Fv 411 frå eksisterande fv 565 til krysset på nye fv 565 må med i Nordhordlandspakken.
- Fv 411 frå krysset på ny fv 565 til Manger/Ishusflaten må med i Nordhordlandspakken.

Kenneth Taule Murberg (H) meiner det er fornuftig å trekkja "bru frå Radøy til Meland med tilførselsvegar" ut av Sambandet Vest og la det bli ein del av Nordhordlandspakken. Han fekk også avklara at han som styremedlem i Sambandet Vest AS har kommunestyret si støtte for å jobba for å trekkja ut "bru mellom Radøy og Meland - med tilførslevegar" ut av Sambandet Vest.

Taule Murberg sette fram følgjande framlegg:
Radøy sin vegstrategi - med dei tillegga som kom fram i møtet (KrF og SP), blir oversendt Nordhordlandspakken AS og eventuelt nabokommunane for vurdering og uttale. Vidare blir det gjort ei konsekvensutgreiing av ein større auke av pakken.
Kvart vegprosjekt må nøye vurderast i eit kost/nytte-perspektiv og prioriterast i eit regionalt perspektiv.
Ordførarane i Radøy, Meland og Lindås får i oppdrag å søkja departementet om ytterlegare planmidlar til "bru mellom Radøy og Meland" frå regjeringa si tilskotsordning for kommunar som slår seg saman.

Taule Murberg sette fram følgjande sekundærframlegg:
Radøy Høgre ønskjer "bru til Bognøy", inklusiv tilførselsvegar, som ei "prioritet 1-sak".

Normann Sæbø (H) sette fram følgjande tilleggsframlegg:
Det må utarbeidast reguleringsplan for Sambandet Vest-prosjektet "bru mellom Radøy og Holsnøy med tilførselsvegar" samtidig med resten av prosjekta i Nordhordlandspakken.

Leif Taule (SP) er tilfreds med hovudlinjene som er trekte opp i notatet frå sivilingeniør Helge Hopen.
Taule sette fram følgjande tilleggsframlegg:
Nytt strekpunkt under "Prioriterte samferdselsprosjekt - Prioritet 1":
- Utbetringstiltak fv 411 Tveiten-Haukås-Mellingen
Nytt strekpunkt under "Prioritet 2":
- Vegutbetring for fv 411 Tveiten-Haukås-Mellingen
Tillegg under "organisering - tilråding": - samt for Tveiten - Haukåsen - Mellingen

Ordførar Jon Askeland sa i si oppsummering at det har vore ein god debatt med realisme om kva som er mogleg å få til. Han peika på at det er viktig å ha planar klare for å få fylkeskommunale midlar til utbetringstiltak på t.d. vegstrekninga Kolstad-Manger-Bø-Soltveit.

Ordføraren sette på bakgrunn av debatten og forslag fram følgjande fellesframlegg til vedtak:
Formannskapet arbeidar vidare med saka og utarbeidar ei endeleg prioriteringsliste for tiltak på samferdselssektoren på bakgrunn av formannskapet si tilråding og med dei tillegg som vart sett fram i debatten i kommunestyret (KrF, H, SP).
Kommunestyret ber om at denne prioriteringa vert sendt til Nordhordlandspakken AS og til nabokommunane Lindås og Meland.Kommunestyret gjev ordføraren fullmakt - saman med ordførarane i Meland og Lindås, til å senda søknad om ytterlegare planmidlar i 2017 for vegprosjektet Radøy-Holsnøy frå kommunereform-midlane.

Dei øvrige framlegga vart trekte.
Ordføraren sitt framlegg på vegne av kommunestyret vart samrøystes vedteke.

Vedtak

Søknaden om framføring av kommunalt vatn til Listveiten gjennom Mykingsvatnet til kum på Listveiten som grunneigarane kan kopla seg til, vert imøtekomen. Det er eit vilkår at fleirtalet av oppsitjarane på Listveiten inngår avtale med kommunen om å knyta seg til det kommunale vassverket. Kommunen ser positivt på at grunneigarane tek på seg kostnadene med grøfta opp frå Mykingsvatnet til kum på Listveiten. Arbeidet vert å starta opp snarast slik at anlegget vert ferdigstilt i 2017. Kostnaden med anlegget vert dekka av løyvde midlar til vassverket i budsjettet for 2017.

Behandling

Kommunestyret vedtok samrøystes formannskapet si tilråding.

Vedtak

Framlegg til reglement for byggenemnd vert godkjend slik det ligg føre, med dei to merknadane som byggenemnda har kome med.

Behandling

Leif Taule (SP) gjorde det klart at Senterpartiet kan slutta seg til dei endringspunkta og merknadane som kjem fram i kommunal byggenemnd sin høyringsuttale.

Ordførar Jon Askeland sette fram følgjande framlegg til vedtak:
Framlegg til reglement for byggenemnd vert godkjend slik det ligg føre, med dei to merknadane som byggenemnda har kome med.

Kommunestyret vedtok samrøystes ordføraren sitt framlegg til vedtak.

Vedtak

Saka vert utsett utsett og kjem opp til ny handsaming i neste møte.

Behandling

Kenneth Taule Murberg (H) meiner sjølvkost-prinsippet ikkje tilstrekkeleg blir lagt til grunn gebyrregulativet til teknisk forvaltning.
Murberg kom med følgjande framlegg til vedtak:
Radøy kommune iverkset tiltak som følgje av inntektsbortfall/lågare arbeidsmengde. Saka blir trekt med bakgrunn i uklar saksutgreiing og blir handsama på nytt i starten av 2018.
Gebyrsatsane blir vidareført uendra i 2017.

Rådmann Jarle Landås viste til at gebyrsatsane ikkje vart justert i fjor. Han oppmoda kommunestyret om å utsetja saka til neste møte, for å få ei utgreiing kring mellom sjølvkost-finansiering og grunnlaget for fastsetjing av gebyrsatsane. Rådmannen opplyste at det blir jobba med ei sak om oppfølging av ulovlege tiltak, som etter planen kjem til politisk handsaming i neste møte i formannskapet.

På bakgrunn av drøftinga i kommunestyret reiste ordførar Jon Askeland følgjande framlegg:
Saka vert utsett og kjem opp til ny handsaming i neste møte.

Kenneth Taule Murberg (H) trekte framlegget sitt.

Kommunestyret vedtok samrøystes ordføraren sitt utsetjingsframlegg.