Møte i Formannskapet i Radøy den 04.05.2017

Vedtak

Det vart ikkje gjort vedtak i saka.

Behandling

Planansvarleg Rolf Raknes orienterte om arbeidet med kommunedelplan for Bø. Det er gjort ei analyse av funksjonell strandsone, som er eit tema i planprosessen. Kartlegging av strandsona skal vera grunnlag for arealbruk i strandsona og for byggjegrense mot sjø i kommunedelplanen. Kartlegginga dannar grunnlag for ei kvalitetsvurdering og differensiering av 100 meter-beltet langs sjø og vassdrag.

Raknes presenterte også arbeidet med plankart og plandokument, og han svara på spørsmål.

Plankonsulenten har håp om at kommunedelplanen skal vera ferdig og leggast ut på høyring før sommarferien.

Formannskapet, som er styringsgruppe for kommunedelplan for Bø, gjorde ingen vedtak i saka.

Vedtak

Radøy kommune prioriterer søknader om tilskot til lokale kulturbygg 2017 som følgjer:

1. Samfunnshuset Skogen Sletta

Behandling

Formannskapet vedtok samrøystes rådmannen sitt framlegg til vedtak.

Vedtak

Manger musikklag får kr 10.000 i aktivitets- og prosjektstøtte til deltaking i WMC.

Behandling

Jostein Borlaug (Ap) peika på at MML er gode ambassadørar for kommunen, og at dette handlar om eit uoffisielt VM for brassband. Han meiner difor 5000 kroner er i knappaste laget.

Borlaug sette fram følgjande framlegg:
Manger musikklag får kr 10.000 i aktivitets- og prosjektstøtte til deltaking i WMC.

Formannskapet vedtok samrøystes Jostein Borlaug sitt framlegg.

Vedtak

Radøy kommune sitt budsjetterte tilskot i 2017 på kr 50.000,- til kommunestyregruppene, vert gjeve med kr 1000,- i grunnstøtte til kvar gruppe og kr 1760,- pr. representant i gruppene.

Behandling

Formannskapet vedtok samrøystes rådmannen sitt framlegg til vedtak.

Vedtak

Førebuande fellesnemnd får fullmakt til å gjennomføra ein prosess med å engasjera prosjektleiar.

Behandling

Rådmann Jarle Landås orienterte om saka. Det er ikkje i førebuande fellesnemnd sitt mandat å setja igang prosessen med å engasjera prosjektleiing. Førebuande fellesnemnd må difor få delegert fullmakt til å igang med denne prosessen. Rådmannen understreka at det hastar å få knytt til seg konsulentselskap som skal stå for prosjektleiinga fram mot ny kommune. Det skal i haust også tilsetjast prosjektansvarleg, som vil bli rådmann i den nye kommunen.

Formannskapet vedtok samrøystes rådmannen sitt framlegg til vedtak.

Vedtak

Formannskapet godkjenner at framlegg til «Forskrift om rett til langtidsopphald ved sjukeheim

eller tilsvarande bustad særskilt tilrettelagt for heildøgntenester i Radøy kommune – kriterier og

venteliste» vert lagt ut på høyring.

Høyringsfrist vert sett til 26. mai 2017.

Behandling

Kommuneoverlege Grethe Fosse og kommunalsjef orienterte i saka. Forskrifta inneheld kriterar som Radøy kommune legg til grunn, for tildeling av langtidsopphald i sjukeheim eller tilsvarande bustad, særskild tilrettelagt for heildøgns helse- og omsorgstenester.

Forskrifta seier korleis Radøy kommune skal følgja opp og ivareta pasient og brukar, som står på venteliste til langtidsopphald i sjukeheim, eller tilsvarande bustad.

Det er inntaksnemnda i Radøy som forvaltar forskrifta og sikrar at dei med størst behov får tenester først. Forskrifta skal også sikra tildeling av forsvarlege helse- og omsorgstenester for radværingane når det gjeld langtidsopphald i sjukeheim eller alternativt bu- og tenestetilbod.

Ingen skal få avslag på langtidsplass. Dei som ikkje får plass, blir sett på venteliste. I ventetida på langtidsplass blir det gjort nye vurderingar, slik at det til ei kvar tid er dei med størst behov som får langtidsplass.

Det skal vera tryggleik for at endra behov vert sett og vurdert slik at langtidsplass eller tilsvarande bustad er tilgjengeleg når behov oppstår.

Vedtak

Radøy kommune etablerer ei ny tilskotsordning for inkluderings- og integreringstiltak.

1. Det vert totalt sett av kr 250 000 til tilskotsordninga, og midlane vert henta frå fond for fritids- og avlastningstilbod for ungdommar med særskilde behov. Ramma for årleg tildeling er kr 80 000, fordelt med kr 40 000 pr. halvår, for perioden 2017-2019.

2. Framlegg til retninglinjer:

   1. Lag og organisasjonar kan søkje om midlar til inkluderings- og integreringstiltak i Radøy kommune.

   2. Tilskotsordninga har som føremål å stimulere til deltaking i kultur- og fritidsaktiviteter for menneske med særskilte behov, samt for flyktningar og innvandrarar, som har behov for særskilt tilrettelegging for integrering i lokalsamfunnet.

   3. Tiltak retta mot barn og unge vert prioritert.

   4. Det kan søkjast om midlar til:

1. arrangement som krev særskilt tilrettelegging for deltaking for målgruppene

2. eigne arrangement tilrettelagt for målgruppene

3. andre tiltak i tråd med målsettinga for tilskotet kan vurderast særskilt.

1. e. Det vert ikkje løyvd midlar til å dekke lovpålagte tenester over tilskotsordninga.

2. f. Ramma for tildeling er kr 80 000 fordelt med kr 40 000 pr halvår. Ufordelte midlar kan overførast til neste tildeling.

3. g. Det er søknadsfrist to gongar i året: 1. mars og 1. oktober.

4. h. Fordeling av tilskot vert gjort administrativt.

1. Framlegg til retningslinjer vert sendt på høyring til lag og organisasjonar, og rådmannen får fullmakt til å gjere mindre justeringer basert på høyringsinnspel. Ved framlegg om større endringar i retningslinjene, vert saka lagt fram til politisk handsaming på ny.

Behandling

Formannskapet vedtok samrøystes rådmannen sitt framlegg til vedtak.

Vedtak

1. Nytt reinseanlegg vert plassert på Manger kai.
   

2. Rådmannen startar prosess, og får løyve til å inngå kjøpsavtale for grunn til anlegget på Manger kai, jf. tilbod frå grunneigar. Kjøpsavtale må ta atterhald om at denne fell bort dersom kommunen ikkje får naudsynte løyver til å byggje reinseanlegg på den aktuelle tomten.

1. Lokalitet ved Skitkaien er 2. prioritet dersom Manger kai fell bort som alternativ, og

dagens lokalitet i Pollen er prioritert som løysing nr 3.

Behandling

Rådmann Jarle Landås orienterte om saka.

Formannskapet vedtok samrøystes rådmannen sitt framlegg til vedtak.

Vedtak

Framlegget til løysing vert godkjend slik det ligg føre.

Behandling

Rådmann Jarle Landås orienterte om framlegg til situasjonsplan og planteikning tilpassa den nye barnehagetomta. Administrasjonen kan ikkje tilrå tilkomst til barnehagen frå sør, både av omsyn til trafikktryggleiken og barna sine oppvekstforhold, og utfrå plassomsyn i det samla oppvekstsenteret.

Rådmannen meiner dagens kommuneveg er ei betre løysing som tilkomst til barnehagen, ein veg som er oppgradert med fortau og lys.

Formannskapet drøfta saka.
Ordførar Jon Askeland ba rådmannen arbeida for å få til betre og større avstigning- og parkeringsplass sørvest for skulen, slik at fleire kan levera og henta barn til barnehagen og skulen der.

Formannskapet vedtok samrøystes rådmannen sitt framlegg til vedtak.

Vedtak

Årsmelding 2016 og rekneskap 2016 vert godkjent slik dei ligg føre.

Behandling

Økonomisjef Sveinung Kvamme orienterte om årsmelding og rekneskap 2016. Resultatet er om lag 10 millionar kroner betre enn budsjett, og korrigert netto driftsresultat for 2016 er 13,1 mill. kroner - tilsvarande 3,24 prosent av sum driftsinntekter. Dette er det beste resultatet Radøy kommune har hatt, i alle fall i "nyare" tid. Økonomisjefen peika på at god budsjettdisiplin og tett oppfølging av økonomien har medverka til det gode resultatet.

Den ordinære drifta av tenestene i kommunen kosta om lag 2,4 mill. mindre enn budsjettert, og det er først og fremst helse og omsorg som har medvirka til dette. Skatteinngangen både lokalt og på landsplan vart høgare enn budsjettert, og for Radøy gav dette ei meirinntekt på 4,3 mill. i høve til budsjett. Radøy fekk også om lag 2,4 mill. meir i integreringstilskot i forhold til budsjettet. Det vart busett fleire flyktningar, medrekna familiegjenforening, og mange av desse kom seint i året, men gav likevel fullt tilskot for 2016.

Else Marie Skartveit Dale (KrF) stilte spørsmål knytt til mindreforbruk og sjukefråver i barnehagane.

Rådmann Jarle Landås peika på det også i år er viktig å halda drifta på eit nøkternt nivå.

Formannskapet vedtok samrøystes rådmannen sitt framlegg til vedtak.

Vedtak

Mindreforbruk frå 2016 kr 13.173.445 vert disponert slik:

Avsett til fond integrering av flyktningar, konto 2.56080.615, kr 2.400.000

Avsett til fond undervisningsmateriell, konto 2.56080.630, kr 626.000

Avsett til fond omstilling til ny kommune, konto 2.56080.700, kr 4.000.000

Avsett til fritt disposisjonsfond konto 2.56080.001, kr 6.147.445

Rådmannen får fullmakt til å disponera konto 2.56080.615, 2.56080.630 og 2.56080.700 i samsvar med føremålet.

Behandling

Ordførar Jon Askeland sette fram følgjande felles endringsframlegg:
Rådmannen sitt framlegg vert vedteke med følgjande endring:
Avsett til fond omstilling til ny kommune, konto 2.56080.700, - kr 4.000.000
Avsett til fritt disposisjonsfond konto 2.56080.001, kr 6.147.445

Rådmannen sitt framlegg til vedtak, med endringsframlegg sett fram i møte, vart samrøystes vedteke.

Vedtak

Meldingar og referatsaker vert tekne til orientering

Behandling

Formannskapet i Radøy - 034/2017
FS - handsaming:

Regionalt helsehus: Ordføraren varsla at det snart vil koma ei sak om utvida låneramme til regionalt helsehus. Han understreka at dette ikkje rokkar ved lønsemda i prosjektet.

Månadsrapport: Økonomisjefen la fram månadsrapport for mars. Rådmannen understreka at det framleis er nødvendig med stram drift.

Fløholmen: Rådmannen orienterte om innspel i plansak for Fløholmen.

Formannskapet tok meldingar og referatsaker til orientering.