Møte i Råd for menneske med nedsett funksjonsevne den 18.05.2017

Vedtak

Innkalling og saksliste vert godkjend.

Behandling

Råd for menneske med nedsett funksjonsevne godkjende innkalling og saksliste.

Vedtak

Møtebok vert godkjend

Behandling

Hovudutvalet godkjende møtebok.

Vedtak

Meldingar og referatsaker vert tekne til orientering.

Råd for menneske med nedsett funksjonsevne gjer framlegg om leiar i RMNF, Jannicke Helland som medlem i referansegruppa i velferdsteknologi-prosjektet for Radøy, Meland og Lindås.

Behandling

Rullering av kommunedelplan for idrett, friluftsliv og nærmiljø
Rådgjevar kultur, Bente K. Hervik, orienterte om rullering av handlingsprogram i kommunedelplan for idrett, friluftsliv og nærmiljø 2016-2017. Radøy kommune skal kvart år rullera handlingsprogrammet i kommunedelplanen.
Frist for å koma med innspel til rulleringa er 15. juni. Er det nye anlegg som bør inn i planen? Kva for anlegg bør prioriterast høgast? Er det andre tiltak, utanom utbygging av anlegg, som kommunen bør gjennomføra innan idrett, friluftsliv og nærmiljø?
Kommuneplanen for idrett, friluftsliv og nærmiljø legg føringar for kommunen sine satsingar innan idrett, friluftsliv og nærmiljø, og er i tillegg styrande for korleis kommunen skal prioritera innkomne søknader om spelemidlar.

Velferdsteknogi
Kommunalsjef for helse og omsorg, Mette Fauskanger, orienterte om det vidare arbeidet med å leggja til rette for velferdsteknologi.
Radøy er med på to fellesprosjekt knytt til utvikling av velferdsteknologi. Det eine prosjektet er saman med Lindås og Meland, og tek sikte på å utvikla mest mogleg like tenester framover. Kommunane har fått 800.000 kroner i tilskot frå fylkesmannen til dette arbeidet. Det tre kommunane har også sett av midlar til dette på årets budsjett.

Det vert sett ned ei prosjektgruppe, ei arbeidsgruppe og ei referansegruppe knytt til velferdsteknologi-prosjektet. Det blir "kick off"-konferanse for prosjektet på Nordhordland folkehøgskule 7. november, der eldreråd og råd for menneske med nedsett funksjonsevne vil bli invitert til å vera med.

Parallelt med dette prosjektet er Radøy også med i eit fellesprosjekt for heile Nordhordland.

Kommunalsjefen peika på utfordringa med å få eldre til å forstå kor viktig det er å få fibertilknyting i heimen, for å kunna gjera seg nytte av dei ulike hjelpemidlane som velferdsteknologien medfører. Dette er tenester som vil skapa større tryggleik og gjer at eldre kan bu lenger heime.

Det vart frå medlemmar i råda peika på at det er ein viss skepsis til velferdsteknologi mellom eldre. Det vart understreka kor viktig det er å nå ut med informasjon om at dette handlar om enkle tiltak som gjer det tryggare å bu heime og at velferdsteknologi ikkje skal vera erstatning for varme hender.
Det vart gitt uttrykk for at kommunen gjennom ulike kanalar må formidla verdien av å få fiber installert heime. Råda drøfta også ei mogleg støtteordning for eldre som vil knytta seg til fiberutbygginga i neste omgang.

Råd for menneske med nedsett funksjonsevne sette fram følgjande framlegg:
Råd for menneske med nedsett funksjonsevne gjer framlegg om leiar i RMNF, Jannicke Helland som medlem i referansegruppa i velferdsteknologi-prosjektet for Radøy, Meland og Lindås.

Råd for menneske med nedsett funksjonsevne tok meldingar og referatsaker til orientering, med tillegg som vart sett fram i møtet.

Vedtak

Lokal forskrift for langtidsopphald i sjukeheim og tilsvarande bustad, vert godkjend med følgjande tillegg:
Rutinar for internkontroll i inntaksnemnda må oppgraderast i samband med handsaming av lokal forskrift for langtidsopphald i sjukeheim mm. «Alder» må ikkje stå som eit sjølvstendig kriterium for inntaks-vurdering, men det er naturleg at «alder» er eitt av fleire kriterium som blir vurdert i samanheng.

Behandling

Kommuneoverlege Grethe Fosse og kommunalsjef helse og omsorg, Mette Fauskanger, orienterte om forslag til forskrift og svara på spørsmål.

Forskrifta skal sikra kriterier for tildeling av langtidsopphald i sjukeheim eller tilsvarande bustad, særskild tilrettelagt for heildøgns helse- og omsorgstenester.
Forsikrifta skal også sikra korleis Radøy kommune skal følgja opp og ivareta pasient og brukar som står på venteliste til langtidsopphald i sjukeheim eller tilsvarande bustad.

Det er Inntaksnemnda i Radøy som forvaltar forsikrifta, og sikrar at dei med størst behov får tenester først og sikrar tildeling av forsvarlege helse- og omsorgstenester når det gjeld langtidsopphald i sjukeheim eller alternativt bu- og tenestetilbod.
Om ein person som har behov, men ikkje ønskjer sjukeheimsplass, har vedkomande rett på tilsvarande hjelp i heimen. Kommuneoverlegen sa at det er sjeldan det skjer overprøving av pasienten sin vilje.

Kommunalsjefen informerte om at det er ulike ordningar som kan takast i bruk for å leggja dei fysiske forholda til rette for at pasienten kan bli buande heime.
Forskrifta legg opp til at dei som søkjer om sjukeheimsplass, får plass etter bestemte kriterier. Dei som ikkje får plass, blir sett på venteliste. Dette er ei venteliste som kontinuerleg blir vurdert ut frå situasjonen og hjelpebehovet den enkelte er i. Medlemmer i råda understreka at det må vera ei forsvarleg oppfølging av dei som står på venteliste.

Grethe Fosse, som er leiar i inntaksnemnda, forsikra at det er gode rutinar for ei grundig oppfølging av dei som står på venteliste, mellom anna gjennom eit godt samarbeid med heimesjukepleia. Inntaksnemnda har fokus på at endra behov vert sett og vurdert, slik at langtidsplass eller tilsvararande bustad er tilgjengeleg når behov oppstår.

Råda drøfta også om pårørande bør bli drege sterkare inn i vurderinga av behovet for sjukeheimsplass. Det vart også peika på behovet for å få ut meir informasjon om aktuelle tilbod i heimen, som gjer at dei eldre kan bu lenger heime. Dette er informasjon som bør rettast inn mot t.d. aldersgruppa frå 75+.

Rådsmedlemmene gav også klart uttrykk for at "alder" ikkje må stå som eit sjølvstendig kriterium i vurderinga av sjukeheimsplass.

Det vart sett fram følgjande endringsframlegg:
Lokal forskrift for langtidsopphald i sjukeheim og tilsvarande bustad, vert godkjend med følgjande tillegg:
Rutinar for internkontroll i inntaksnemnda må oppgraderast i samband med handsaming av lokal forskrift for langtidsopphald i sjukeheim mm. «Alder» må ikkje stå som eit sjølvstendig kriterium for inntaks-vurdering, men det er naturleg at «alder» er eitt av fleire kriterium som blir vurdert i samanheng.

Rådet for menneske med nedsett funksjonsevne og eldrerådet godkjende framlegg sett fram i møtet.

Vedtak

Rådet oppmodar kommunen til å vurdera åbruka pengar på ein sjølvstyrt heis i terapibassenget. Slik det er no, er dei som skal ut i og opp av bassenget avhengige av hjelp frå andre som kan handtera heisen. Det ideelle er at brukarane sjølve kan styra heisen, og på den måten kan fleire klara seg sjølv i terapibassengetog fleire kan dra nytte av den mulegheita som er der.

Behandling

Økonomisjef Sveinung Kvamme orienterte om rekneskap 2016. Resultatet er om lag 10 mill. betre enn budsjett, og korrigert netto driftsresultat er 13,1 mill. kroner, eller 3,24 prosent av samla driftsinntekter. Dette er det beste resultatet Radøy kommune har hatt, i alle fall i "nyare" tid. Økononomisjefen peika på at god budsjettdisiplin og tett oppfølging av økonomien har medverka til det gode resultatet. Skatteinngangen både lokalt og på landsplan vart høgare enn budsjettert, og for Radøy vart den samla verknaden av dette ei meirinntekt på om lag 4,3 mill. kroner i høve til budsjett.

Den ordinære drifta av tenestene i kommunen i 2016 kosta om lag 2,4 mill. kroner mindre enn budsjettert. Det er først og fremst helse og omsorg som har medvirka til dette. Integreringstilskot til flyktningar som kom seint på året, var 2,4 mill. høgare enn det var budsjettert med.

Mindreforbruket for 2016 skal i utgangspunktet nyttast til å styrka kommunen sin finansielle situasjon, og økonomisjefen legg vekt på at det ikkje vert vedteke løyvingar av disposisjonsfondet til føremål som gir permanent auka driftskostnader.

Kommunestyret har vedteke å setja av fire millionar kroner til bruk i omstillinga til ny kommune. Kommunestyret har også sett av 2,4 mill. kroner til integrering av flyktningar, og det er også sett av ein million av mindreforbruket i 2016 til undervisningsmateriell i skulane.

I Rådet for menneske med nedsett funksjonsevne vart det sett fram følgjande framlegg:
Rådet oppmodar kommunen til å vurdera å bruka pengar på ein sjølvstyrt heis i terapibassenget. Slik det er no, er dei som skal ut i og opp av bassenget avhengige av hjelp frå andre som kan handtera heisen. Det ideelle er at brukarane sjølve kan styra heisen, og på den måten kan fleire klara seg sjølv i terapibassenget og fleire kan dra nytte av den mulegheita som er der.

Rådet vedtok endringsframlegg sett fram i møtet.