Møte i Kommunestyret i Radøy den 21.09.2017

Vedtak

Meldingar og referatsaker vert tekne til orientering.

Behandling

Fylkesveg-budsjett: Ordførar Jon Askeland orienterte om eit møte med Statens vegvesen om fylkesveg-utfordringane i Radøy.
Ordføraren presenterte også fylkesadministrasjonen sitt framlegg til investeringsprogram på vegsektoren i Hordaland. Formannskapet skal gje sin uttale til investeringsprogrammet på sitt neste møte. Han konstaterer at det kan bli ein knallhard kamp for små midlar, til t.d. punktutbetringar, skulevegar og møteplassar.

Olav Steinar Namtvedt (SP) oppmoda kommunen til å jobba for å få midlar til tilførselsvegar i samband med ny fylkesveg Marås-Soltveit. Han understreka behovet for å få trafikken utanom idrettsanlegget/samfunnshuset på Sletta.

Normann Sæbø (H) påpeika også større fokus på framdrift i planane for Sambandet Vest.

Formannskapet tok meldingar og referatsaker til orientering.

Vedtak

Radøy kommune sin handlingsplan for idrett-, friluftsliv- og nærmiljøanlegg 2018 – 2021 vert vedteke slik den ligg føre, med følgjande tillegg:
- Under nærmiljø-anlegg i handlingsplanen (uprioritert tiltak) vert det tatt inn eit punkt om anlegg for frisbee-golf på Manger.
- I handlingsplanen - aktivitetar: - vurdera gratis halltid i Radøyhallen/sømjehallen for aktivitetar for barn og unge i regi av lag og organisasjonar.

Behandling

Silje Namtvedt (SP) er opptatt av at barn og unge skal læra seg å symja. Ho meiner det må vurderast meiner det kan vera ein god tanke å gje alle skuleborn eitt gratis klyppekort til bassenget i Radøyhallen.

Olav Steinar Namtvedt (SP) viste til drøftingane i idrettsrådet og sette fram følgjande tilleggsframlegg i punkt 3 i handlingsplanen - aktivitetar:
- vurdera gratis halltid i Radøyhallen/sømjehallen for aktivitetar for barn og unge i regi av lag og organisasjonar.

Kommunestyret vedtok samrøystes formannskapstilrådinga med tilleggsframlegg sett fram i møtet.

Vedtak

I medhald av alkohollova §§ 1-4b, 1-5, 1-6, 1-7a, 1-7b, 1-7c, 3-1, 3-7, 3-9 gjev kommunestyret salsløyve til Austmarka Mat AS, org.nr. 919076739. Vilkår og spesifikasjonar er gjevne her:

1. Salsløyvet gjeld all alkoholhaldig drikk med høgst 4.7 volumprosent alkohol.

2. Skjenkeløyvet gjeld frå 01.07.2017 til 30.06 2020.

3. Løyvet gjeld på utsalstaden Bunnpris Austmarka, Søre Austmarka 9, 5938 Sæbøvågen.

4. Styrar for løyvet er Christian Næss med May Sissel Hopsdal som stadfortredar.

5. Løyvehavar og styrar for løyvet pliktar å sjå til at alkohollova sine føresegner vert følgde.

6. Salstida gitt i Forskrift om sal, skjenking og opningstider for alkoholhaldig drikke vedteken av

kommunestyret i Radøy kommune september 2016, skal følgjast.

7. Verksemda må til ei kvar tid vera godkjent av mattilsynet og branntilsynet.

Behandling

Kommunestyret vedtok samrøystes formannskapstilrådinga.

Vedtak

Kommunestyret gir rådmannen delegert mynde til å gjennomføra kommunal vigsel, og til å delegera vigselsmynde til andre.
Tingstova er ein veleigna stad for vigsler. Rådmannen får fullmakt til å jobba vidare med aktuelle stader og til å peika ut kva lokale som kan brukast.

Behandling

Silje Namtvedt (SP) meiner kommunen også må kunne opna for vigselsseremoni i "Guds frie natur".

Leif Taule (SP) meiner kommunen må legga opp til at det også kan gjennomførast vigsler på høvelege stader utandørs, t.d. i Tjorehagen og tilsvarande lokalitetar.

Rådmann Jarle Landås peika på at kommunen i utgangspunktet står ganske fritt til å peika ut eigna stader til vigselsseremoni, men at det er nødvendig med ei avgrensing av aktuelle stader.

Kenneth Taule Murberg (H) meiner gjennomføring av vigsler t.d. i Tingstova er god marknadsføring av området.

Ordførar Jon Askeland konkluderte med at rådmannen kjem attende med ein plan for gjennomføring av kommunal vigselsseremoni.

Kommunestyret vedtok samrøystes formannskapstilrådinga.

Vedtak

Budsjettet for 2017 vert regulert i samsvar formannskapstilrådinga - skjema1a og 1b, og med fellesframlegg sett fram i møte med følgjande endring i skjema 2b:
Det vert gjort følgjande endringar i investeringsbudsjettet:
Radøyhallen - vidare oppgradering garderobar,
kjøp av stolar og bord + 1.000.000
Bø barnehage - 1.000.000

Behandling

Økonomisjef Sveinung Kvamme orienterte om budsjetterreguleringa.

Leif Taule (SP) framheva behovet for oppgradering av Radøyhallen. Han peika også på behovet for nye stolar og bord i hallen.

Etter eit gruppeleiarmøte sette Taule fram følgjande fellesframlegg:
Det vert gjort følgjande endringar i investeringsbudsjettet:
Radøyhallen - vidare oppgradering garderobar,
kjøp av stolar og bord + 1.000.000
Bø barnehage - 1.000.000

Rådmann Jarle Landås opplyste at administrasjonen har utarbeidd forslag til prioriteringsliste for vedlikehald for Radøyhallen. Det vart også ei drøfting kring behov for kommunale bustadar, t.d. ved sanering/oppgradering og betre utnytting av dagens bustader og mogleg kjøp av ny bustad.

Henning Haugland (H) meiner administrasjonen må legga fram ei oversikt som viser kva ressursar som har gått med ved omlegging frå områdeplan til kommunedelplan på Bø.
Kenneth Taule Murberg (H) stilte spørsmål om status for kommunedelplanen på Bø, og om det er behov for ytterlegare midlar til reguleringsplan for Bø barnehage.
Rådmann Jarle Landås viste til at utkast til kommunedelplan for Bø kjem til handsaming i neste møte i formannskapet. Han sa at ressursbruk knytt til planarbeidet er eit reknestykke som vil krevja ressursar og som nødvendigvis vil ta tid å utarbeida.

Martin Soltveit (SP) etterlyste status for høgdebasseng i Haukåsen. Rådmannen svara at kommunen for å koma vidare er avhengig av å få på plass ein avtale med grunneigar.

Silje Namtvedt (SP) viste til at brannsjef-stillinga blir auka frå 25 til 50 prosent, og stilte spørsmål ved om dette vil svekka teknisk drift. Rådmannen svara at auke i brannsjef-stillinga vil medføra at teknisk drift vil få frigjort midlar.


Kommunestyret vedtok samrøystes formannskapstilrådinga med endringsframlegg sett fram i møtet.

Vedtak

Radøy kommune kjøper eigedomen gnr 45 bnr 188 (DPS-bygget) frå Helse Bergen for avtalt kjøpesum kr 12,5 mill + dokumentavgift og tinglysingsgebyr, til saman kr 12.813.025,-. Rådmannen får fullmakt til å inngå avtale om kjøp.

Finansiering: Refusjon Hordaland fylkeskommune kr 2.500.000
Bruk av unytta lånemidlar: kr 7.400.000
Redusert løyving til Bø barnehage i 2017: kr 2.913.000

Behandling

Rådmann Jarle Landås informerte om at salet av "Solhall-bygget" (tidl. DPS-bygget) etter nærare dialog med Helse Bergen vert gjennomført frå 1.1. 2018.

Formannskapet vedtok samrøystes formannskapstilrådinga.

Vedtak

Radøy kommune garanterer med sjølvskuldnargaranti for lån i Kommunalbanken som Aufera AS tek opp til kjøp av eigedom på Manger kai, tidlegare Manger fiskemat.

Garantien gjeld for hovudstolen på lånet, maksimalt NOK 3.500.000, med tillegg på 10% av til ei kvar tid gjeldande hovudstol, til dekking av mogelege påkomne renter og kostnader. Kommunen sitt maksimale garantiansvar kan ikkje overstiga NOK 3.850.000.

Garantiansvaret vert redusert i takt med nedbetalinga av lånet, og opphøyrer etter 20 år, med tillegg av inntil 2 år, jf garantiforskrifta §3.

Garantivedtaket skal godkjennast av Fylkesmannen i Hordaland.

Behandling

Vidar Grindheim (H) er styremedlem i Aufera, og Else Marie Skartveit Dale (KrF) og Morgan
Taule (AP) er medlemmer i generalforsamlinga i bedrifta. Kommunestyret erklærte dei som ugilde i denne saka, og dei deltok ikkje i handsaminga.

Dagleg leiar i Aufera, Kari Smith, orienterte om attførings- og VTA-bedrifta sine planar. Bedrifta har stort behov for større lokale, både til drift og lager. I dag er drifta for tungvindt.
Kari Smith peika på at lokalitetane på Manger-kaien vil gje bedrifta moglegheiter til å utvida tilbodet. Ho meiner det kan vera aktuelt med t.d. sommarkafe på kaien og mogleg andre fascilitetar for båtfolket.
Lokala som Aufera skal overta på Manger-kaien, vil også vera såpass store at det er aktuelt med utleige, t.d. til kontorlokale og lagerplass.

Kari Smith meiner det er viktig med ei satsing som det no vert lagt opp til, for at bedrifta skal vera liv laga i framtida. Ho meiner bedrifta representerer eit viktig tilbod som VTA-bedrift i denne delen av regionen.

Aufera er eigd av kommunane Radøy, Austrheim og Fedje. Rådmannen sa at Radøy kommune står som garantist, men at det vert inngått ein avtale mellom Radøy og dei to andre eigarkommunane om å ta sin del av det økonomiske ansvaret.

Dei som tok ordet i kommunestyret gav uttrykk for at Aufera er ein svært viktig arbeidsplass for den gruppa arbeidstakarar som er knytt til verksemda.

Kommunestyret vedtok samrøystes formannskapstilrådinga.

Vedtak

Radøy kommune godkjenner Fellesnemnda for Alver kommune sitt framlegg til mandat og reglement for fellesnemnda.

Behandling

Ordførar Jon Askeland peika på at mandat og reglement som no blir vedteke for fellesnemnda, skal fungera i heile prosjektperioden fram til ny kommune i 2020.

Normann Sæbø (H) retta søkjelyset mot prosessen med tilsetjing av prosjektansvarleg/rådmann i Alver kommune. Han undra seg over at det i bygging av ny kommune ikkje blir gjort ekstern utlysing av denne stillinga for å sjå etter tilgjengeleg kompetanse.
Kenneth Taule Murberg (H) fann grunn til å kritisera sider ved handteringa vedkomande intern/ekstern utlysing av rådmann. Han framheva kor viktig det er å diskutera alle sider om ny kommune på ein open måte.

Leif Taule (SP) meiner stillinga som prosjektansvarleg/rådmannen burde vore lyst ut på eit tidlegare tidspunkt. Han oppmodar dei som skal gjera tilsetjinga om å vurdera åremåls-tilsetjing.

Olav Steinar Namtvedt (SP) er oppteken av at fellesnemnda i størst mogleg grad involverer flest mogleg med i sitt arbeid og prosessen fram mot ny kommune. Han stilte også spørsmål ved i kor stor grad dagens kommunestyre blir involvert i fellesnemnda sitt arbeid.

Ordførar Jon Askeland minna om at fellesnemnda i størst mogleg grad skal vera eit konsensus-organ i sitt arbeid med å rigga Alver kommune klar til drift frå 1.1.2020. Fellesnemnda skal rapportera og informera dei tre kommunestyra og innbyggarane, men etter kvart vil det vera sterkare fokus på at det er kommunestyra som skal orientera fellesnemnda.

Kommunestyret vedtok samrøystes rådmannen sitt framlegg til vedtak.