Møte i Kommunestyret i Radøy den 07.12.2017

Vedtak

Meldingar og referatsaker vert tekne til orientering.

Behandling

Vest brann- og redningsregion:
Ordføraren meldte at denne meldingssaka går ut, og at den i staden blir ført opp som ekstrasak i kommunestyret.

Kommunedelplan for Bø:
Ordføraren orienterte kort frå folkemøte om kommunedelplan på Bø.
Ordføraren sette fram følgjande framlegg:
Høyringsperioden for kommunedelplan Bø får utsett frist til 15. januar 2018.
Kommunestyret vedtok samrøystes ordføraren sitt framlegg.

Innkjøpsavtale Aufera as:
På bakgrunn av KS-vedtak i sak om tertialmelding, legg formannskapet fs-vedtak om innkjøpsavtale med Aufera as fram som meldingssak i kommunestyret. Ordføraren viste til at formannskapet ønskjer å få kommunestyret si avklaring på kva som er det rette nivået for sakshandsaming og politisk behandling av slike avtalar.
Leif Taule (Sp) meiner det er riktig at innkjøpsavtalen med Aufera kjem til politisk behandling og kunnskap. Han ser det som viktig at politisk nivå vert informert om ein del innkjøpsavtalar, og at det kan vera aktuelt med eit avsnitt om dette i årsmeldinga. Samtidig peika Taule på at det er viktig at administrasjonen ikkje får mykje ekstraarbeid med å saksbehandla innkjøpsavtalar for politisk nivå. Han sa at kommunen må ha eit auge til lokalt næringsliv når innkjøpsavtalar skal inngåast.

Ny rådmann/programansvarleg Alver:
Programansvarleg/rådmann i Alver kommune, Ørjan Raknes Forthun, presenterte seg i kommunestyret og orienterte om det omfattande arbeidet knytt til bygging av kommune. Han understreka at den vedtekne intensjonsavtalen er eit levande dokument som vert lagt til grunn i dei ulike prosessar med å rigga ny kommune. Forthun viste til at styringsdokumentet er vedteke, som er ein marsjordre for prosjektet. Han viste til at det vil vera tett opp under 100 hovud- og delprosjekt i samband på vegen fram mot ny kommune frå 1.1.2020.


Kommunestyret tok meldingar og referatsaker til orientering, med dei tillegg som kom fram i møtet.

Vedtak

Radøy kommune støttar Region Nordhordland sitt kandidatur til å bli eit UNESCO Biosfæreområde. Kommunen forpliktar seg, i samarbeid med dei andre kommunane i regionen, å finansiera sin rettmessige del for første fase av biosfæreområdet si verksemd - innanfor den ramma som er sett i budsjettet for perioden 2019 – 2021.

Behandling

Ordførar Jon Askeland understreka at eit Unesco biosfæreområde i Nordhordland er eit "moglegheits-prosjekt" og ikkje eit tvangs- eller verneprosjekt. Han viste til FN sine 17 berekraftsmål og peika på at desse måla inngår i biosfæreprosjektet.

Prosjektleiar Kari Evensen Natland orienterte om prosjektet og svara på spørsmål. Ho sa at Nordhordland no vil bli Norges første kandidat til å bli eit biosfære-område.

Natland presiserte at Unesco ikkje stiller krav til verneområde, og sa at verneområda som blir med i biosfæreområdet Nordhordland er område som alt er verna - ein biosfære-status vil ikkje avgjera kva som blir verna. Ho framheva kva denne statusen kan medføra av aktivitet og arbeidsplassar, og trekte mellom anna fram auka satsing på turisme, "grøn" industri og moglegheitene som vil liggja i forsking.

Kenneth Taule Murberg (H) sa at han ikkje trur på at biosfære-statusen vil gje regionen gode bumiljø, arbeidsplassar og stor auke i turisme. Han meiner prosjektet er for lite konkret. Han meiner eit biosfære-område i Nordhordland vil innebera forsterka vern. Han signalserte at han ville stemma i mot at kommunen skal støtta ein søknad om at Nordhordland skal blir Unesco biosfæreområde.

Silje Namtvedt (Sp) viste til biosfære-område i Sverige som ser ut til å ha gode erfaringar og fått gode resultatet av å vera med.
Morgan Taule (Ap) støttar prosjektet, og sa at han ser moglegheitene, mellom anna til å få utvikla "alternativ" industri".
Arild Tveranger (uavh.) peika også på ei frykt for at eit biosfæreområde kan få negative konsekvensar for grunneigarar og deira rettar.
Sara Sekkingstad Hamre (Sp) sa at det er viktig å ha fokus på ei berekraftig utvikling og trur biosfæreområdet vil vera positivt for turisme i Nordhordland.
Agnes Hoshovde Bernes (V) sa at prosjektet er positivt for Nordhordland, og for dei generasjonane som kjem etter oss.


Kommunestyret vedtok rådmannen sitt framlegg med 14 (6 Sp, Ap, KrF, V) mot 10 røyster (H, Frp, 1 Uavh. - Arild Tveranger, 3 Sp - Martin Soltveit, Dag Sætre, Johnny Ystebø).

Vedtak

Radøy kommune er positiv til å underteikna revidert samarbeidsavtale med Radøy idrettsråd. Ordføraren får fullmakt til å underteikna avtalen slik den ligg føre.

Behandling

Leiar i Radøy idrettsråd, Bjørn Ove Myking, sa at samarbeidsavtalen har fungert etter intensjonen, og viste til at det har vore eit godt samarbeid med administrasjonen og politikarane. Han peika på at endringa i samarbeidsavtalen er basert på at idrettsrådet på eit tidleg tidspunkt vil vera med i prosessen med å bygga ny kommune. Mellom anna peika han på arbeidet med å finna fram til felles løysingar for idrettssektoren.

Kommunestyret vedtok samrøystes formannskapstilrådinga.

Vedtak

Radøy kommune prioriterer spelemiddelsøknadene for søknadsrunde 2018 slik:

Ordinære anlegg

Nærmiljøanlegg

Behandling

Kommunestyret vedtok samrøystes formannskapstilrådinga.

Vedtak

Kulturminneplan for Radøy kommune 2017-2027 vert vedtatt slik den ligg føre.

Behandling

Kulturrådgjevar Bente K. Hervik orienterte om kulturminneplanen, og gav kommunestyret eit innblikk i sentrale trekk i Radøy si historie gjennom 10.000 år på ti minuttar.

Leif Taule (Sp) sa at kulturminneplanen er eit flott dokument med veldig mykje god historisk kunnskap. Han oppmioda om at planen blir trykt opp i eit skrift som interesserte kan få tak i på rådhuset.

Ordførar Jon Askeland oppsummerte med å takka for den beste historietimen han har høyrt på lenge. Han overrekte ein blomebukett til kulturrådgjevaren for arbeidet med planen.

Kommunestyret vedtok samrøystes formannskapstilrådinga.

Vedtak

Kommunestyret utnemner Tord Moltumyr som smittevernlege. Oppnemning som smittevernlege gjeld så lenge den aktuelle lege er tilsett i kommunen, eller til kommunestyret har fatta anna vedtak.

Behandling

Ordførar Jon Askeland gjorde merksam på at utnemning av stadfortredar for smittevernlege ikkje er avklart.

Han sette fram følgjande endringsframlegg:
Kommunestyret utnemner Tord Moltumyr som smittevernlege. Oppnemning som smittevernlege gjeld så lenge den aktuelle lege er tilsett i kommunen, eller til kommunestyret har fatta anna vedtak.

Vedtak

Radøy kommunestyre fastset satsane for avgift for utsalsstader for tobakksvarer slik:

1. Årleg tilsynsavgift på kr. 3.000,- for salsstader for tobakksvarer og tobakkssurrogater til forbrukar.

2. Årleg tilsynsavgift på kr. 600,-for mellombels salsstad for tobakksvarer

Behandling

David Pletten Aasgard (KrF) reiste spørsmål om han er ugild i denne saka, ettersom han er i nær familie med nokon som driv utsal.

Kommunestyret erklærte Pletten Aasgard gild i saka.

Kommunestyret vedtok samrøystes rådmannen sitt framlegg til vedtak.

Vedtak

Kommunestyret vedtek at det ikkje vil bli halde ny allmenn taksering etter eigedomsskattelova paragraf 8 A-3 (2) før kommunesamanslåinga 1. januar 2020.

Behandling

Kommunestyret vedtok samrøystes formannskapstilrådinga.

Vedtak

Kommunestyret vedtek formannskapet sitt framlagde budsjett for 2018 og økonomiplan med tilleggspunkt vedteke i møtet.

Verbalpunkt til budsjett 2018:

• Kommunestyret ber rådmannen prioritera ny bakre stolrekkje på tribuna i Radøyhallen, og elles melda tilbake til formannskapet på nødvendige vidare tiltak i og rundt Radøyhallen.

• Kommunestyret ber rådmannen utgreia oppgradering av lokale i helsestasjonen.

• Kommunestyret ber rådmannen om å styrkja og systematisera tilbodet om avlastingstilbodet for heimebuande eldre og andre brukargrupper.
  

• Kommunestyret ber rådmannen oppgradera venterommet på helsehuset, og gjera det «lunare».

• Kommunestyret ber om at samla plan for kommunale bygg i Manger vert aktivt følgt opp i formannskapet i 2018.

• Kommunestyret støttar rådmannen si styrkjing av plankapasiteten, og understrekar at produksjon og ferdigstilling av sentrale planar i planstrategien har høgste forventningsfokus i kommunestyret.

• Kommunestyret ber rådmannen finna midlar i budsjettet for 2018 til kjøp av tilstrekkelege ressursar i samband med gjennomføring av planstrategi, slik at den kan verta handsama seinast i løpet av 2018. Slike ressursar bør vera på plass og i drift i løpet av Q1 2018 - seinast Q2.

• Arbeidet med å planleggja utbygging av Manger skule hastar grunna aukande elevtal. Det bør derfor koma inn eit punkt om dette i kommunedelplanen for Manger.

• I mange ulukkestilhøve veit vi at kvart minutt er svært viktig for om mogleg redda liv og helse. Det er difor svært viktig at vakthavande befal i brannvernet har bil med seg heim, med eit minimum av førstehjelpsutstyr (hjartestartar m.m.), som såleis kan koma raskt på plass, medan ein ventar på brannbil med mannskap.Radøy manglar i dag «first responderbil».
  Kommunestyret ber om at det snarast vert sett på dagens ordning. Formannskapet får fullmakt til å gjera vedtak i saka med inndekking av eventuell investering.

• Belysning gangveg Austmarka og Trævegen (vert å utføra innan TS-tiltaka).

• Kommunestyret føreset at landbrukskontoret vert fullt bemanna snarast råd.

Behandling

Økonomisjef Sveinung Kvamme orienterte om budsjett 2018 og økonomiplan. Han peika på at den samla veksten i budsjettrammene til drifta er på 5 prosent, altså noko meir enn prisvekst, og noko meir enn auken i frie inntekter tilseier. I rådmannen sitt framlegg er det lagt til grunn ei vidareføring av driftsnivået i kommunen hausten 2017. Økonomisjefen peika på at mellom anna som følgje av omdisponering av regionsentertilskot, har formannskapet kunna auka løyvingane på nokre område.

Økonomisjefen sa at oppvekst kan kallast ein budsjettvinnar. Det samla elevtalet i skulane går ned. Løyvingane til oppvekst aukar likevel med 6,52%, altså ein betydeleg realvekst. Den samla ramma for helse og omsorg aukar med om lag 3,35%. NAV sosial har den største auken, 8,4%. Den samla ramma for drift og forvaltning aukar med 10,5%, brannvernet har størst auke, 18,3%. Det har samanheng med utvida interkommunale samarbeid og auka kompetansekrav.

Økonomisjefen viste til at budsjettet legg opp til eit mindreforbruk på 1,96 mill. Av mindreforbruket skriv 6,1 mill seg frå bruk av fond, bundne og ubundne. Korrigerer ein for dette, er drifta i realiteten negativ med 4,1 mill.

Før debatten hadde leiaren i Radøy idrettsråd ordet. Bjørn Ove Myking. sa at han er tilfreds med formannskapet sin auke i løyvingar til idrett og kulturføremål.

Ordførar Jon Askeland peika på at formannskapet denne gongen har lagt fram eit felles framlegg til budsjett og økonomiplan.

Gruppeleiarane i kvart parti fekk inntil fire minuttar taletid til sine hovudinnlegg. Deretter opna ordføraren for innlegg på inntil tre minuttar taletid for øvrige innlegg i budsjettdebatten.

Rekkjefølgje for gruppeleiar-innlegga vart gjort ved loddtrekning; Agnes Hoshovde Bernes (V), Leif Taule (Sp), Arild Tveranger (uavh.), David Pletten Aasgard (KrF), Jostein Borlaug (Ap), Kenneth Taule Murberg (H). Gruppeleiarane gav rådmannen ros for eit godt budsjett, og for å ha følgd opp politiske signal.

Kommunestyret og Frp godkjende at Arild Tveranger (uavh.) held gruppeleiar-innlegget for Frp.

I tillegg hadde følgjande innlegg i budsjettdebatten; Sara Hamre Sekkingstad (SP), Normann Sæbø (H), Morgan Taule (Ap), Kirsti G. Floen (Ap), May Britt V. Gjerde (Sp), Dag Sætre (Sp) Anne Berit Bø Palmesen (Sp).

Agnes Hoshovde Bernes (V) sette fram følgjande tilleggsframlegg:Det vert løyvd 500 000 kr til prosjektering av utbygging til permanent Manger skule for økonomiplanen 2018 til 2021.

Hoshovde Bernes trekte seinare tilleggsframlegget.
Ho sette i staden fram følgjande framlegg som verbalpunkt i budsjettet:
Arbeidet med å planleggja utbygging av Manger skule hastar grunna aukande elevtal. Det bør derfor koma inn eit punkt om dette i kommunedelplanen for Manger.

Leif Taule (Sp) sette fram følgjande fellesframlegg frå Sp, Ap og KrF som verbalpunkt i budsjettet:
Kommunestyret støttar rådmannen si styrkjing av plankapasiteten, og understrekar at produksjon og ferdigstilling av sentrale planar i planstrategien har høgste forventningsfokus i kommunestyret.

Leif Taule sette også fram følgjande fellesframlegg frå Sp, Ap og KrF som nytt verbalpunkt:
Kommunestyret føreset at landbrukskontoret vert fullt bemanna snarast råd.

Morgan Taule (Ap) sette fram følgjande fellesframlegg frå Sp, Ap, KrF, H, Frp og V som verbalpunkt i budsjettet:
I mange ulukkestilhøve veit vi at kvart minutt er svært viktig for om mogleg redda liv og helse. Det er difor svært viktig at vakthavande befal i brannvernet har bil med seg heim, med eit minimum av førstehjelpsutstyr (hjartestartar m.m.), som såleis kan koma raskt på plass, medan ein ventar på brannbil med mannskap.Radøy manglar i dag «first responderbil».
Kommunestyret ber om at det snarast vert sett på dagens ordning. Formannskapet får fullmakt til å gjera vedtak i saka med inndekking av eventuell investering.

Normann Sæbø (H) sette fram følgjande framlegg til verbalpunkt:
Radøy Høgre vil fremja forslag om at rådmannen finn midlar i budsjettet for 2018 til kjøp av tilstrekkelege ressursar i samband med gjennomføring av planstrategi, slik at den kan verta handsama seinast i løpet av 2018. Slike ressursar bør vera på plass og i drift i løpet av Q1 2018 - seinast Q2.


Avrøysting
Kommunestyret vedtok samrøystes formannskapet sitt framlagde budsjett for 2018 og økonomiplan 2018-2021, med tilleggspunkt sett fram og vedteke i møtet.

Kommunestyret vedtok samrøystes formannskapet sine verbalpunkt - minus det nest siste punktet om planstrategi.
Formannskapet sitt framlegg til følgjande verbalpunkt; Kommunestyret understrekar viljen til at planstrategien vert følgt aktivt opp, og at prioriterte planar vert ferdigstilte i 2018 og 2019, fekk 0 røyster og fall.

Kommunestyret vedtok samrøystes fellesframlegget frå Sp, Ap og KrF til verbalpunkt om styrking av planarbeidet.

Kommunestyret vedtok samrøystes Normann Sæbø (H) sitt framlegg til verbalpunkt om planarbeid/planstrategi.

Kommunestyret vedtok samrøystes Agnes Hoshovde Bernes (V) sitt framlegg til verbalpunkt om Manger skule.

Kommunestyret vedtok samrøystes fellesframlegget frå Sp, Ap og KrF til verbalpunkt om bemanning av felles landbrukskontor.

Kommunestyret vedtok samrøystes fellesframlegget frå Sp, Ap, KrF, H, Frp og V til verbalpunkt om "first responder-bil" til brannvernet,

Vedtak

Radøy kommune har ikkje høve til å delta i Vest brann- og redning på det noverande tidspunkt.

Kommunestyret ber om at saka blir drøfta i Fellesnemnda med tanke på at nye Alver kommune kan

ha ei tilknyting til brannsamarbeidet også fram til 2020 (t.d. observatørstatus).

Behandling

Ordførar Jon Askeland sette fram følgjande framlegg til vedtak:
Radøy kommune har ikkje høve til å delta i Vest brann- og redning på det noverande tidspunkt.

Kommunestyret ber om at saka blir drøfta i Fellesnemnda med tanke på at nye Alver kommune kan

ha ei tilknyting til brannsamarbeidet også fram til 2020 (t.d. observatørstatus).

Kommunestyret vedtok samrøystes framlegg til vedtak sett fram i møtet.