Møte i Radøy eldreråd den 12.11.2018

Vedtak

Innkalling og saksliste vert godkjend.

Behandling

Eldrerådet godkjende innkalling og saksliste.

Vedtak

Møtebok vert godkjend

Behandling

Eldrerådet godkjende møtebok for 10. september.

Vedtak

Meldingar og referatsaker vert tekne til orientering

Behandling

Eldrerådskonferansen: Berit Grindheim og Magnar Klausen deltok på eldrerådskonferansen i Hordaland. Klausen orienterte frå eldrerådskonferansen i regi av Hordaland fylkeskommune. Han fortalde at mat for eldre var eit sentral tema. Mellom vart det presentert kor viktig det er med god og næringsrik mat på institusjonane, og kor viktig mat er for trivselen. Erfaring med tryggheits-sjukepleiar vart også presentert. Ein paneldebatt under konferansen tok for seg temaet om korleis ein kan få fleire over 60 år inn i politikken, med politikarar i panelet. Statens vegvesen presenterte trafikale kurs for eldre sjåførar. Professor Jan Fritjof Bernt orienterte om ny lov om eldreråd.

Velferdsteknologi:Eldrerådet var representert med fire medlemmar på velferdsteknologi-konferansen på Frekhaug. Under orienteringar på fellesmøtet for eldrerådet og råd for menneske med nedsett funksjonsevne orienterte Torill Helland om konferansen. Det vart på konferansen mellom anna framheva at velferdsteknologi skal bidra til meir tryggheit, fridomog livskvalitet både frå brukarar og pårørande. Det vart peika på at velferdsteknologi-tiltak må ha god forankring både administrativt og politisk. Dette handlar ikkje om overvaking, men "å vaka over". Menneske og varme hender skal framleis vera den viktigaste ressursen, men velferdsteknologi skal vera eit supplement til anna omsorg / pleie.

I eldrerådet sitt møte vart det også informert om at ei brosjyre om velferdsteknologi skal ut til husstandane i Radøy med det første.

Eldrerådet tok meldingar og referatsaker til orientering.

Vedtak

Kommuneplan for Radøy - temarevisjon, vert teken til orientering.

Behandling

Arealplanleggar Rolf Raknes orienterte og svara på spørsmål.
Planskildring, plankart og planføresegner er reviderte i kommuneplanen. Det er også gjennomført strandsone-analyse, som er lagt til grunn i temarevisjonen. Det er også lagt inn omsynssone for kulturminne, slik at kulturminne med størst verd får eit vern i kommuneplanen.
Eit viktig grep i kommuneplan-revisjonen er at det no vert opna for tiltak knytt til bustadhus på eigen tomt som no er i LNF (opp til 3da), tilsvarande praksis som i regulerte område.

Det vart sett fram følgjande felles framlegg i møtet:
Eldrerådet tar kommuneplan for Radøy - temarevisjon, til orientering.

Vedtak

Eldrerådet tar budsjett for 2019 og økonomiplan til orientering.

Behandling

Økonomisjef Sveinung Kvamme orienterte og svara på spørsmål. Han sa at budsjettet for 2019 er det siste som vert vedteke for Radøy kommune, og at dette budsjettet dannar grunnlaget for budsjett for Alver kommune for 2020. Samla rammetimetilskot og skatt aukar frå 292,5 mill. kroner i 2018 til 300,5 mill. i 2019. Den reelle veksten er på 2,74 prosent, i realiteten mindre enn pårekna prisvekst på 2,8 prosent. Rente- og avdragskonstnadene aukar ca 3 mill, både på grunn av auka rentenivå og auka investeringsnivå.
Økonomisjefen viste til at netto driftsbudsjett er negativt med 14,3 mill. Botnlina syner likevel eit mindreforbruk på kr 145.796,- etter bruk av fondsmidlar.
Han peika på at straumkostnadene og pensjonskonstadene aukar meir enn prisvekst. Auka klassetal på Manger skule, auka driftskostnader på SFO, og krava til bemanningsnorm i barnehagane gir auka driftskonstader. Det er også betydelege meirkostnader knytt til heimebaserte tenester. Økonomisjefen sa at det ikkje er funne plass til stilling som ergoterapeut i 2019-budsjettet. Andre meirkostnader er knytt til Nordhordland brann og redning, gratis bruk av Radøyhallen for organiserte aktivitetar for born og unge inntil 19 år, og eingongskostnader knytt til arbeid med ny kommune.
Det er i rådmannen sitt budsjettframlegg lagt opp til investeringar for 139 mill. kroner i 2019. Av dette er 31 mill. investeringar i vatn og avløp. Ny barnehage på Bø står oppført med 47 mill. og oppgradering av Solhall med 25,4 mill, som dei klart største investeringane. Ny garderobe med universell utforming knytt til terapibasseng og ny heis i terapibassenget er lagt inn med 1 mill. kroner i investeringsbudsjett for 2019. Økonomisjefen sa at kommunen er i dialog med BOF om baderampe for rullestolbrukarar ved Nesvatnet. Det vert også arbeidd med betre parkeringstilhøve for funksjonshemma ved legesenteret.
Det må lånast 120,6 mill. i 2019 for å finansiera investeringane.

Eldrerådet gav uttrykk for at dei er tilfreds med budsjettet og opplever at deira innspel har vorte høyrt.

Det vart gjort følgjande felles framlegg i møtet:
Eldrerådet tar budsjett for 2019 og økonomiplan til orientering.

Vedtak

Eldrerådet i Alver skal ha ni medlemmar, tre av desse er valt frå kommunestyret. Dei øvrige seks valt i kommunestyret etter framlegg frå pensjonistlaga i kommunen
Eldrerådet vel leiar og nestleiar.
Ved etableringa av rådet i ny kommune er pensjonistlaga sitt framlegg at to må koma frå Lindås, to frå Meland og to frå Radøy, og med tilsvarande val av personlege varafolk. Dei tre som vert valt frå medlemmane i Alver kommunestyre må óg representera underutvala i kommunen (teknisk/levekår/næring).
Eldrerådet er eit rådgivande organ som skal behandla alle saker som gjeld levekår for eldre i Alver kommune. Eldrerådet må bli tidleg involvert slik at ein kan koma med uttale og anmodning før politiske vedtak skjer i kommunen.
Kommunen må syta for at rådsmedlemmane får opplæring i eldrerådet sin funksjon og rolle, og at rådet si rolle ikkje vert svekka i forbindelse med kommunesamanslåinga.

Behandling

Eldrerådet i Radøy har tidlegare drøfta saka i fellesskap med eldrerådet i Meland og Lindås.

Dei tre eldreråda har sendt inn felles innspel til organisering av eldreråd i Alver kommune:
Eldrerådet i Alver skal ha ni medlemmar, tre av desse er valt frå kommunestyret. Dei øvrige seks valt i kommunestyret etter framlegg frå pensjonistlaga i kommunen
Eldrerådet vel leiar og nestleiar.
Ved etableringa av rådet i ny kommune er pensjonistlaga sitt framlegg at to må koma frå Lindås, to frå Meland og to frå Radøy, og med tilsvarande val av personlege varafolk. Dei tre som vert valt frå medlemmane i Alver kommunestyre må óg representera underutvala i kommunen (teknisk/levekår/næring).
Eldrerådet er eit rådgivande organ som skal behandla alle saker som gjeld levekår for eldre i Alver kommune. Eldrerådet må bli tidleg involvert slik at ein kan koma med uttale og anmodning før politiske vedtak skjer i kommunen.
Kommunen må syta for at rådsmedlemmane får opplæring i eldrerådet sin funksjon og rolle, og at rådet si rolle ikkje vert svekka i forbindelse med kommunesamanslåinga.

Eldrerådet i Radøy vedtek det felles innspelet frå dei tre eldreråda i dei tre Alver-kommunane.