Møte i Formannskapet i Radøy den 05.05.2015

Vedtak

Radøy kommune sitt budsjetterte tilskot i 2015 på kr 50.000 til kommunestyregruppene, vert gjeve med kr 1000,- i grunnstøtte til kvar gruppe og kr 1760,- pr. representant i gruppene.

Behandling

Formannskapet vedtok samrøystes rådmannen sitt framlegg til vedtak.

Behandling

Rådmann Jarle Landås viste til politisk ønske om å koma igang med økonomiplan-arbeidet før sommaren, noko også administrasjonen ser behov for.
Økonomisjef Sveinung Kvamme orienterte om status for den økonomiske situasjonen, og konstaterte at kommunen står framover store utfordringar. Radøy får ca 1,7 mill. kroner mindre i inntektsutjamning i 2015 enn pårekna, noko som skuldast ein liten nedgang i folketalet ved årsskiftet. Lågare skatteinngang på landsplan slår også negativt ut for Radøy, og kan utgjera ca 1,5 mill. kroner. Fylkesmannen har kome med pålegg om at desse forholda vert retta opp i revidert budsjett. Fylkesmannen krev også at meirforbruk frå 2014 må vera dekka inn innan utgangen av 2016.
I månadsrapport per mars 2015 går det fram at rente- og avdragskostnaden kan reduserast noko i 2015, ca 720 000 kroner, dersom ein legg til grunn 2 prosent rente. Det er også pårekna om lag 250 000 kroner meir i eigedomsskatt.
Økonomisjefen viste også til at det i månadsrapporten kjem fram at det går mot ei overskriding i drifta. Innan oppvekstsektoren er det pårekna eit meirforbruk på 0,5 mill. kroner. Innanfor helse og omsorg er meirforbruket førebels ikkje talfesta, men fleire tenesteområde melder om store utfordringar.
Endring i forskrift for barnehagar, der det no er gitt reglar for maksimalbetaling, vil føra til reduserte inntekter, med full verknad frå 2016. Utgangspunktet er at ingen skal betala meir enn 6 prosent av inntekta som foreldrebetaling, men økonomisjefen kan på dette tidspunkt ikkje gje noko realistisk anslag over kva summar det er tale for Radøy sitt vedkomande.

Økonomisjefen nemnde potensialet for meirinntekter som ny 420 kV kraftline kan gje Radøy frå 2016, med full effekt i 2018, under føresetnad av at framdrift på anlegget følgjer tidsplanen og at skissert takstgrunnlag står seg.
Han orienterte om at avdragsbetaling i åra som kjem er lagt tett opp til minsteavdrag, og konstaterte at alle signal tyder på låg rente i lang tid.
Økonomisjefen peika på at investeringsdelen i økonomiplanen er vesentleg i forhold til kva ein vil satsa på i åra framover. Investeringane får også konsekvens i form av auka renter og avdrag, men kan også gje innsparing eller meirkostnad.

Formannskapet drøfta mellom anna aktuelle investeringsprosjekt. Bø barnehage, gymsal på Manger skule, sjukeheimsutbygging og barnehagesituasjonen på Manger er oppgåver som vert vurdert i økonomiplanen. Eit tema her er framtidig bruk av det tidlegare DPS-bygget, der kommunen i dag leigar store delar av bygget til barnehage og interkommunalt busenter. Frode Hervik (V) ser for seg at kommunen med å overta dette bygget kan utløysa ein kabal som kan resultera i bygningsmessige omrokkeringar innan helse- og omsorg og barnehage. Hervikmeiner det er viktig å få på plass ein helse- og omsorgsplan og få landa ein strategi for denne sektoren.

Roy Bø (FrP) ønskjer å få bordet eit reknestykke som viser om det er dyrare for kommunen med privat barnehagedrift enn kommunal.
Finn Frantzen (KrF) uttrykte bekymring for lånegjelda, som blir større i år. Han stilte spørsmål ved kva kommunen maktar å handtera.

Oppgradering av Helsehuset er ein betydeleg post i gjeldane økonomiplan. Ann Chrstin Hoen (Ap) stilte spørsmål ved om Helsehuset vil bli eit godt og tenleg nok hus for kommunen, eller at ein no berre driv brannslokking. Rådmannen informerte om at behov for oppgradering er kartlagt i ein tilstandsrapport, og han konstaterte at det vil ta lang tid å nå over alt som skal gjerast.

Kenneth Murberg (H) ønskjer ei vurdering av periodisering av investeringar i økonomiplanperioden, og samtidig få kartlagt kva investeringar som kan samlast i ein større pott.
Ordførar Jon Askeland ba rådmannen koma tilbake med ei fagleg vurdering knytt til periodisering på investeringssektoren. Ordføraren peika på at dess fleire investeringar ein kan venta med til seint i økonomiplanperioden, dess lettare er det å rydda opp og dekka inn underskot i 2014 og 2015.

Økonomisjefen orienterte om betydelege tiltak som må gjerast for å få drifta på plussida i år som kjem. Det er lagt opp til å dekka 4,7 mill. kroner i 2016 til å dekka underskot i 2014, og ein million kroner i kvart av åra 2017 o0g 2018. I 2016 vil ein koma i hamn med å bruka fondsmidlar.

Vedtak

Styringsgruppa drøfta saka.

Behandling

Det vart orientert om forhandlingane i dei to kommunesamanslåings-alternativa.
Ordførar Jon Askeland informerte om at forhandlingsutvalet tar sikte på å levera innstilling i januar/februar 2016, som grunnlag for handsaming i dei respektive kommunestyra.

Det var semje i formannskapet om å invitera hovudtillitsvalde i Fagforbundet og Utdanningsforbundet til drøftingane i styringsgruppa.

Det vart uttrykt stor interesse for å få Austrheim kommune med i 3-kommune-alternativet som omfattar Lindås, Radøy og Meland. Styringsgruppa drøfta spørsmålet om å invitera Austrheim med i forhandlingane.
Silje Namtvedt (Sp) trur folk i Austebygd-krinsen vil vurdera å knyta seg sterkare mot nordre del av regionen, dersom Austrheim kommune ikkje vert ein del av ei mogleg samanslåing mellom Lindås, Meland og Radøy.
Kommunestyret har gjort vedtak om at folkemøte og innbyggarmedverknad skal ha ein sentral plass i prosessen. Ordføraren legg opp til at involvering av innbyggarane og utstrekt informasjonsarbeid vert lagt til seinhaustes eller tidleg på vinteren.

Før neste møte i formannskapet er det halde nytt forhandlingsmøte i begge samanslåings-alternativa.

Vedtak

Meldingar og referatsaker vert tekne til orientering

Behandling

Teoriprøve - førarkort: Ordføraren orienterte om Statens vegvesen si avgjerd om å leggja ned tilbodet om å ta teoriprøve ved Trafikkstasjonen i Knarvik. Denne tilbodet skal sentraliserast til Bergen sentrum. Formannskapet gir ordføraren fullmakt til å ta saka opp med dei andre ordførarane i regionen for eit mogleg felles utspel overfor Statens vegvesen.

Areal- og transportplan: Ordføraren orienterte om arbeidet med areal- og transportplan i bergensregionen. Han slo fast at det er jobba godt med planen og det vert ein god plan.

Kystsogevekene: Ann Christin Hoen (A) orienterte frå årsmøtet i Stiftinga Kystsogevekene.

Regionalt helsehus: Ordføraren orienterte om arbeidet planarbeidet for regionalt helsehus. Tomta gir høve til å reisa eit bygg på 12 000 kvm, og representantskapet og styret i Region Nordhordland Helsehus IKS meiner difor det vil vera feil å stoppa på 8000 kvm. Kommunane får tilsendt sak om utviding av areal og lån til politisk handsaming.

Nettbrett: Roy Bø (Frp) stilte spørsmål knytt til nettbrett til politikarane. Rådmannen svara at nettbrett-bruken har hatt varierande suksess rundt om i kommunane. Han viste til at mange politikarar etter kvart har gått over til å bruka sitt eige utstyr. Rådmannen sa at det vil bli gjort ei utgreiing vedk. nettbrett-satsinga.