Møte i Formannskapet i Radøy den 05.11.2015

Vedtak

Saka vert utsett.

Behandling

Leiar for teknisk forvaltning, Tonje N. Epland, orienterte om utfordringane knytt til områdeplan for Bø, og svara på spørsmål. Ein områdeplan utløyser krav til kulturminneregistrering, eit arbeid som vil kosta kommunen minst 1,3 million kroner. Ved moglege funn kan det bli gjort ytterlegare utgravingar, som vil påføra større kostnader. Arkeologiske registreringar er eit vilkår for å kunna gå vidare med planarbeidet. Ei aktuell løysing er å konvertera områdeplanen på Bø til ein kommunedelplan. Då vil ein kunne gå igang med utbygging i område som alt er utbygd, samtidig som det ikkje er same krav til omfattande kulturminne-registrering.

Formannskapet gjorde ei grundig drøfting av saka. Kenneth Taule Murberg (H) kom med framlegg om å utsetja saka til neste møte.

Utsetjingsframlegget vart samrøystes vedteke.

Vedtak

Samla kostnadsramme på kr 7 500 000 for stabilisering av Manger kyrkje vert godkjent. Beløpet vert løyvd i investeringsbudsjettet for 2016.

Behandling

Ordføraren stilte spørsmål ved om det er rett at kommunen skal ta heile kostnaden med å stabilisera kyrkja. Han meiner det også må vera eit ansvar som påkvilar Riksantikvaren, ettersom Manger kyrkje står på lista over verneverdige bygg.

Kenneth Taule Murberg (H) meiner kommunen må reagera på at kommunen ikkje har i utsikt til å få noko statleg tilskot til dette arbeidet. Ordføraren meiner det er på sin plass å skriva eit brev til Riksantikvaren, noko formannskapet slutta seg til.

Prosjektleiar Tore Rikstad informerte om at kommunen også må ut med minst 100.000 kroner til utgravingar under kyrkjebygget i samband med restaureringsarbeidet. Det vart uttrykt frustrasjon i formannskapet over at Riksantikvaren pålegg kommunen å dekka denne kostnaden.

Formannskapet vedtok samrøystes rådmannen sitt framlegg til vedtak.

Behandling

Rådmannen har i det framlagde budsjettet for 2016 lagt opp til eit netto driftsresultat på ca 3 mill, eller 0,8% av netto driftsinntekter, noko rådmannen som eit minimum, men likevel tilfredsstillande. Drifta i 2016 skal såleis i all hovudsak vera ei vidareføring av drifta hausten 2015.

Rådmannen sitt budsjettframlegg har samla investeringar på 34,8 mill i 2016.Det aller meste må finansierast ved låneopptak. Det vil vera om lag 17 mill. kroner i unytta lånemidlar frå 2015 som kan nyttast i 2016, og låneopptak i 2016 vert difor 15,7 mill. etter rådmannen sitt framlegg.I tillegg kjem lån på 3 millionar til vidare utlån.

Rådmannen oppmoda formannskapet om ikkje å redusera på overskotet i budsjettet. Han framheva behovet for å ha ein buffer til å kunna justera med undervegs. Han ba også om at budsjettposten for mindre investeringar ikkje må reduserast. Det er nødvendig med ein buffer til uføresette tiltak.

Økonomisjefen gav formannskapet ei generell og grundig innføring i budsjett og økonomiplanprosessen, før han gjekk over til konkrete tal i budsjettframlegget.

Formannskapet gjorde ei første drøfting av budsjettet, og rådmannen svara på ulike spørsmål. Budsjettet for 2016 kjem til ny handsaming på neste møte i formannskapet.

Behandling

Forhandlingsutvalet i Radøy er samansett av ordførar, varaordførar og representant for det største opposisjonspartiet. Etter kommunevalet er det dermed Jon Askeland (SP), Jostein Borlaug (AP) og Kenneth Taule Murberg som er med i forhandlingsutvalet.

Formannskapet er styringsgruppe, og i styringsgruppa er også

Radøy kommunestyre vedtok i sak 041/2015 at kommunen trekkjer seg frå forhandlingane i det store Nordhordlands-alternativet, og fortset forhandlingane i 3-kommune-prosjektet mellom Radøy, Lindås og Meland.

Ordførar Jon Askeland orienterte styringsgruppa om at han på den bakgrunn har trekt seg som leiar i forhandlingsutvalet i det store Nordhordlands-løpet, men at han som regionrådsleiar kan vera med som observatør.

I styringsgruppemøtetinformerte ordføraren om at Austrheim kommune har vedteke å trekkja seg frå det store Nordhordlands-alternativet. Samtidig har det kome konkrete signal frå ordføraren i Austrheim om at det no er aktuelt for kommunen å slutta seg til forhandlingane mellom Lindås, Meland og Radøy, og samtidig vurdera eit tilsvarande løp saman med kommunar i nordre del av regionen.

I veke 46 og 47 vert det gjennomført fire krinsvise folkemøte i Radøy om kommunereform, og ordføraren orienterte kort om opplegget for desse møta.
Ordføraren orienterte også kort om den ferske innbyggarundersøkinga som er lagt fram, som viser at 47 prosent av radværingane er positive til å bygga ny kommune, 37 prosent seier nei, medan 16 prosent ikkje har bestemt seg.

Det har ikkje vore nytt møte i forhandlingsutvalet i 3-kommune-prosjektet mellom Radøy, Lindås og Meland etter kommunevalet. Ordføraren legg opp til å få i stand eit nytt forhandlingsmøte i 3-kommune-alternativet før jul.

Vedtak

Meldingar og referatsaker vart tekne til orientering.

Behandling

Ordføraren orienterte kort om status for brannsamarbeid, domstolstruktur og høyringsnotat om endring i personvalreglane ved stortingsval. Medlemar i formannskapet tar med seg saka til sine partigrupper og gir tilbakemelding om høyringa skal handsamast politisk.

Månadsrapportering (melding l): Vert lagt fram som melding i neste møte i formannskapet.

Reiseliv - (melding m): Nordhordland blir no innlemma i Bergen og Omland reiselivslag, og ordføraren orienterte om at det er lagt opp til at kommunane skal betala medlemskontingent. Ordføraren opplyste at Regionrådet forhandlar med Bergen og Omland reiselivslag om at kommunane ikkje får kostnad med medlemskapet i 2016.

Mottak av asylsøkjarar: Ordføraren oppsummerte folkemøte på Bø om planane for mottak av einslege, mindreårige asylsøkjarar, og om ulike innspel som kjem til kommunen knytt til mottak av flyktningar.
Rådmannen orienterte om problemstillinga knytt til planmessige forhold for området ved Hordabøheimen, og viste til at hovudutvalet har gitt rådmannen ryggdekning for å handsama endring av arealformål administrativt.

Formannskapet tok meldingar og referatsaker til orientering.