Čoahkkin Kommunestyret i Radøy 28.04.2015

Vedtak

Meldingar og referatsaker vert tekne til orientering

Behandling

Samarbeid mellom vekstbedrifter: Ordføraren orienterte om regionrådet sitt dialogmøte med NAV-leiar i Hordaland, Anne Kverneland, der situasjonen for vekstbedriftene var eit sentralt tema. NAV kjøper tenester hjå desse bedriftene, t.d. Aufera, og stiller krav som mindre bedrifter ikkje maktar å innfri. Vekstbedriftene i Nordhordland har ein struktur som gjer det vanskeleg å henga med i konkurransen om oppdragfrå NAV. NAV-leiaren i Hordalandoppmodar om samarbeid og samanslåing mellom vekstbedriftene i regionen.
I kommunestyret orienterte Morgan Taule (A), som er styreleiar i Nordhordland Industriservice, kort om situasjonen, og informerte om at Nordhordland Industriservice på Olsvollstranda og MAKS i Meland har hatt drøftingar om tett samarbeid om levering av anbod. Men det var ikkje nok for å tilfredsstilla NAV sine krav. Styreleiaren i Nordhordland Industriservice kjem til å kalla inn leiarar og styreleiarar i vekstbedrifter i Nordhordland for å drøfta kva som må til for at bedriftene skal framstå som eitt selskap. Det meiner han er nødvendig for å nå fram i konkurransen.

Vedtak

For å innfri krav om kjønnsmessig samansetjing vert Anne Berit Bø Palmesen oppnemnd som fast medlem i valstyret. Finn Frantzen vert varamedlem. For andre medlemmer og varamedlemmer i valstyret gjeld som i formannskapet.

Behandling

Kommunestyret vedtok samrøystes formannskapet si tilråding.

Vedtak

Radøy kommune vil støtta opp om Friluftslivets år 2015, og arbeida for måla om å gje friluftsliv auka merksemd og varige resultat i form av auka deltaking i friluftsliv i alle delar av befolkninga.

Kommunen vil:

- Støtta opp om aktivitetar og arrangement i Friluftslivets år.

- Vektleggja omsyn til friluftsliv i kommunen sitt planarbeid.

- Stimulera barnehagar og skular i kommunen til å bruka naturen til leik og læring.

- Satsa på stien som aktivitetsanlegg.

- Bruka friluftsliv som eit positivt verkemiddel i folkehelsearbeidet i kommunen.

- Arrangera Ordføraren sin tur; ein open tur med ordføraren som turleiar, og "Min tur" med formannskapsmedlemane som turvert.

- Stilla opp til bålsamtale eller anna møte med friluftsorganisasjonane i kommunen.

- Stimulera born og unge til å bruka naturen også på fritida.

- Kopla friluftsaktivitetar og kulturminne

Behandling

Kommunestyret vedtok samrøystes formannskapet si tilråding.

Vedtak

Trafikksikringsplan for Radøy kommune 2014 – 2020 vert godkjent.
Grunngjeving av vedtaket er at planen er i tråd med overordna føringar.
Vedtaket har heimel i plan- og bygningslova § 11-15.

Behandling

Arealplanleggar Kjersti Flatråker orienterte om Trafikksikringsplanen. I planarbeidet er det lagt stor vekt på å få ein open og brei prosess, og planframlegget vart sendt til mange partar, både lokale og regionale høyringsinstansar. Det er kome mange innspel og merknader til planen, særleg knytt til tilhøve rundt skular, barnehagar og budstadområde. Trafikksikringsplanen har vore til handsaming i eldrerådet, rådet for funksjonshemma med nedsett funksjonsevne, og i ungdomsrådet.
Målet med trafikksikringsplanen er å oppretthalda og på nokre område styrka kommunen sin innsats innan trafikksikringsarbeid, særleg på førebyggjande tiltak og haldningsskapande arbeid. Flatråker peika på at menneskeleg svikt og manglande ferdigheiter som førar er viktigaste årsakene til trafikkulukker. Det er i planen sett ekstra fokus på skulevegar, og det er utarbeidd ei liste over tiltak kommunen ser som mest naudsynte for å sikra trygge skulevegar og gode trafikktilhøve.

I kommunestyret kom Frode Hervik (V) med følgjande innspel til administrasjonen i oppfølginga av trafikksikringsplanen:
-Få fortgang i arbeidet til skuleskyssgruppa slik at ein er klar med vedtak før nytt skuleår byrjar. 
- Gang- og sykkelvei Hordabø skule - Idrettsbana er nemnd både under fylkesvegar og kommunevegar
- I vurderinga av veglys Manger sentrum vert administrasjonen oppmoda til å vurdere behov for betre lys ved Radøyhallan/ungdomsskulen. 
- Administrasjonen vert oppmoda til å følgja med på støtteordningar, som t.d. Statens vegvesen si ekstraordinære ordning for gang- og sykkelvegar med søknadsfrist i august. 

David Pletten Aasgard (KrF) meiner det må koma på plass gang- og sykkelveg i tilknyting til alle barneskulane i kommunen.

Anne Berit Bø Palmesen (Sp) framheva satsinga på handlingsskapande trafikkopplæring. Her ser ho store moglegheiter for å få fokus på problemet kjøring i ruspåvirka tilstand, i eit samspel med ungdomsklubben/Ungdommens hus, ungdomskulen, og skular og barnehagar. Ho er også tilfreds med at folkehelse ligg som ein raud tråd gjennom heile planen.

Christel Villanger Håland (H) la også stor vekt på førebyggande arbeid og haldningsskapande haldningar, ikkje minst i både i barne- og ungdomsskule. Ho viste til gode erfaringar med å trekkja næringslivet sterkare med i ulike aksjonar og haldningsskapande arbeid, og ho peika på at mange tiltak ikkje treng kosta så mykje å setja i verk.

Ordføraren konstatererte at verdibaserte haldningar stod sentralt i innlegga i saka om Trafikksikringsplanen, og han oppmoda administrasjonen om å ta med dei ulike innspela i oppfølginga av planen.

Kommunestyret vedtok samrøystes formannskapet si tilråding.

Vedtak

Søknad om kommunal overtaking av driftskostnader for veglys på Ystebørenen vert ikkje innvilga.

Behandling

Kommunestyret vedtok formannskapet si tilråding mot 4 røyster (3 Frp, David Pletten Aasgard, KrF).

Vedtak

Framlegg til reguleringsplan for Snekkevika hyttefelt, plan id. 12602011000500, vert ikkje godkjent. Grunngjeving for vedtaket er at hytteområdet ikkje har tenleg tilkomst. Tilkomstveg ligg i LNF-område og er i strid med arealføremål i overordna plan. Innspel i høyringsrunden viser også at plassering av tilkomstveg kan koma i konflikt med bruken av naustområdet og at det vil vera fare for uønskte hendingar med gjennomgangstrafikk i naustområdet.

Heimel for vedtaket er plan- og bygningslova §12-12.

Behandling

På grunn av vegtilkomsten til hytteområdet åtvara ei rekkje representantar sterkt mot å godkjenna reguleringsplanen for Snekkevika hyttefelt. Vigdis Villanger (Sp) peika på at det planlagde hytteområdet ligg fint til, men at omsynet til trafikktryggleiken gjer det umogleg å seia ja til planen. Christel Villanger Håland (H) konstaterer at trafikken i periodar vil vera stor til hytteområdet, og med det også skapa betydeleg fare for at det kan skje ei ulukke. Vegen til hytteområdet vil etter planframlegget gå forbi badevik, båtoppstillingsplass og naustområde. Frode Hervik (V) meiner eit nei i denne omgang ikkje treng vera eit endeleg nei til hytteplanen, dersom det er mogleg å sjå på alternative vegløysingar inn i området. Det vart i kommunestyret peika på at ein alternativ tilkomstveg til hytteområdet kan gå frå Haugstad. Ein alternativ tilkomst kan finna si løysing ved rullering av overordna plan.

Kommunestyret vedtok samrøystes hovudutvalet si tilråding.

Vedtak

Kommunestyret sender plansaka tilbake til hovudutvalet for vidare handsaming, men dei innspela som kom fram i møtet.

Behandling

Arealplanleggar Kjersti Flatråker gav ei kort orientering for saka. Verksemda ønskjer å leggja til rette for private fritidsbustader, med moglegheit for utleige. Det er i strid med overordna plan, og hovudutvalet sendte difor saka til kommunestyret for ei brei prinsipiell drøfting. I kommunestyret, som i hovudutvalet, vart det uttrykt betydeleg skepsis til ei omregulering til privat hyttefelt. Det vart også argumentert med at eit positivt vedtak kan skapa presedens. På den andre sida vart det peikt på at bedrifta lenge har slite med å få lønsam drift og at kommunen må strekkja seg langt for å finna gode løysingar i dialog med verksemda. Det kan t.d. gjerast ved å godkjenna at ein del av næringsområdet vert omgjort til privat hytteområde, men då med klare krav til utleigeplikt delar av året.

Etter drøftingar sette ordførar Jon Askeland fram følgjande framlegg:
Kommunestyret sender plansaka tilbake til hovudutvalet for vidare handsaming, med dei innspela som kom fram i møtet.

Kommunestyret vedtok samrøystes ordføraren sitt framlegg til vedtak.

Vedtak

Radøy kommune går ikkje inn som medeigar i anlegg for idrett, skyting eller liknande. I den grad det er nødvendig for kommunal drift, kan kommunen inngå leigeavtale med slike anlegg.

Behandling

Leiar i Radøy idrettsråd, Bjørn Ove Myking, fekk ordet i saka og la vekt på at idrettsrådet må få uttala seg i alle saker som vedkjem idretten i Radøy. Alle avtalar mellom kommunen og laga skal i samsvar med samarbeidsavtalen leggjast fram for idrettsrådet.

Frode Hervik (V) ønskjer ikkje prinsipielt å utelukka kommunalt medeigarskap i idrettsanlegg. Han opprettheld framlegget sitt frå formannskapet:
Radøy kommune vil medverka til realisering av nye idrettsanlegg/oppgradering av eksisterande anlegg. Kommunen kan inngå leigeavtale med idrettslag om anlegg, der tilhøva ligg til rette for det, for å nytta midlar over drifts- eller investeringsbudsjettet til slike anlegg. Det er ikkje ynskjeleg for Radøy kommune å gå inn som eigar eller medeigar av idrettsanlegg, men dersom det vert naudsynt for å kunna realisera anlegg, kan det vurderast.

Kommunestyret vedtok formannskapet si tilråding mot tre røyster (2 V, Henning Haugland, H).

Vedtak

Behandling

John Bauge H) er styreleiar i Sambandet Vest AS og var såleis ugild i handsaminga av søknad om ny aksjelapital i pådrivarselskapet for Tverrsambandet mellom Radøy, Meland og Askøy.
Kommunestyret godkjende at Bauge fekk gje ei orientering om arbeidet i selskapet. Bauge viste skisser for aktuelle trasear og trekte opp fristar og mogleg tidsplan for handsaming av Sambandet vest knytt til Regjonal Transportplan og Nasjonal Transportplan.

Kommunestyret vedtok samrøystes formannskapet si tilråding.

Vedtak

Radøy kommune utnemner forhandlingsutval samansett av ordførar, varaordførar og representant for det største opposisjonspartiet, Høgre. Rådmannen deltek i tillegg.
Utvalet har mynde til å forhandla i alle aktuelle alternativ for samanslåing i regionen.
Formannskapet er styringsgruppe.

Det skal leggast stor vekt på folkemøte og innbyggarmedverknad i prosessen.

Behandling

Rådmann Jarle Landås orienterte om forhandlingar som er igang om kommunestruktur. Radøy er med i to parallelle løp; det store Nordhordlands-alternativet og 3-kommune-alternativet saman med Lindås og Meland. Det er lagt opp til fleire forhandslingsrundar før sommarferien i begge dei to alternativa.

Mai-Liss Sylta Møn (Sp) etterlyste ein plan for å involvera innbyggarane og få høyra deira meining. Ordføraren svara at han meiner det vil vera naturleg å leggja opp til informasjonsrundar og folkemøte seinhaustes og på etterjulsvinteren.
Sylta Møn kom med følgjande tilleggsframlegg:
Det skal leggast stor vekt på folkemøte og innbyggarmedverknad i prosessen.

Kommunestyret vedtok samrøystes rådmannen sitt fram til vedtak, med tilleggsframlegg frå Mai-Liss Sylta Møn (Sp) sett fram i møtet.

Vedtak

Radøy kommune sluttar seg til den justerte Nordhordlandspakken.

Behandling

Ordførar Jon Askeland orienterte om at planen er å få Nordhordlandspakken handsama i kommunane i tide til å få samferdselspakken til handsaming i fylkestinget i junimøtet. Dermed vil det vera mogleg for Vegdirektoratet å gjera si handsaming av Nordhordlandspakken i løpet av 2015.
Representantane Kenneth T. Murberg (H) og Frode Hervik (V) var mellom dei som uttrykte kritikk mot at Nordhordlandspakken kjem opp til handsaming i stadig nye rundar, og at enkelte kommunar kan pressa gjennom sine krav. Murberg meiner det er nødvendig med ei evaluering av prosessen i ettertid.
Vidar Grindheim (Uavhengig) stilte spørsmål ved uavklart utfall av lovlegkontrollen som er kravd knytt til det positive vedtaket som Meland kommunestyre har gjort i sak om den justerte Nordhordlandspakken. Grindheim viste til bekymringsmeldingar både frå næringsliv og ein del innbyggjarar om for tung bompengeinnkreving, og signaliserte at han kom til å stemma mot Nordhordlandspakken.

Kommunestyret vedtok rådmannen sitt framlegg til vedtak mot ei røyst (Vidar Grindheim, uavhengig)

Vedtak

Saka vert trekt.

Behandling

Ordføraren meldte at saka måtte trekkjast frå saklista. Innspel like før høyringsfristen var ute, gjorde det umogleg å sakshandsama saka i tide til kommunestyremøtet.

Vedtak

Manger idrettslag får kommunal garanti for lån inntil 3,2 mill. Garantien vert gitt som sjølskuldnarkausjon. Løpetida for garantien er maksimalt 20 år. Garantien skal nedskrivast kvart år til restsaldo ved årsskiftet. Garantivedtaket skal godkjennast av Fylkesmannen i Hordaland.

Behandling

Kommunestyret vedtok samrøystes formannskapet si tilråding.