Møte i Kommunestyret den 20.04.2023

Vedtak

Innkalling og sakliste vert godkjent.

Behandling

Rådmannen sitt framlegg vart samrøystes vedteke.

Vedtak

Orienterings-/referatsaker vert tekne til orientering.

Behandling

Eventuelle merknader til protokoll frå førre møte:
Ingen merknader.


Ordføraren orienterer:

• Budsjettseminar torsdag 01.06.2023. Heile kommunestyret vil bli invitert til budsjettseminar torsdag 01.06.2023.

Orientering frå Statnett:
Orientering om prosjekt Sogndal – Sauda v/Kenneth Teigenes og Steinar Parelius. Kopi av presentasjonen dei viste i møtet ligg som vedlegg til møteprotokollen.


Orientering frå World Kinect Energy Services:
Orientering v/Jørgen Ohnstad. Kopi av presentasjonen han viste i møtet ligg som vedlegg til møteprotokollen.


Rådmannen orienterer:

Orientering v/kommunalsjef økonomi og organisasjon, Karl Viken:

• Orientering om økonomi. Kopi av presentasjonen som vart vist i møtet ligg som vedlegg til møteprotokollen.

Orientering v/kommunalsjef helse og omsorg, Edith Oma:

• Kommentarar til innlegg om Samnangerheimen i kommunestyret 09.03.2023. Edith Oma viste til innlegg frå Monica Tjønna (Uavh) i kommunestyret 09.03.2023 (sak 028/2023), og orienterte om reaksjonar frå tilsette, fakta i saka m.m.

• Permisjonssøknad privatpraktiserande fysioterapeut. Den privatpraktiserande fysioterapeuten i kommunen har mista retten til refusjon frå folketrygda i fire år, og har søkt kommunen om permisjon frå praksisen i denne perioden. Edith Oma orienterte om at det no er bestemt at permisjonssøknaden ikkje blir innvilga.

• Utleige av sjukeheimsplassar. Edith Oma viste til spørsmål i tidlegare møte om mynde til å ta avgjerd om utleige av sjukeheimsplassar. Ho orienterte om at administrasjonen ikkje har funne noko eintydig svar på dette.

• Avvikling av interkommunalt Kols-team og Diabetes-team. Bjørnafjorden kommune har meldt frå om at desse to interkommunale teama vil bli nedlagde, truleg frå hausten 2023.

Orientering v/kommunalsjef samfunnsutvikling, Hilde-Lill Våge:

• Status for investeringsprosjekt. Hilde-Lill Våge orienterte om status for følgjande investeringsprosjekt:

• vegutbetring Hagabakkane

• trafikksikring Gjerdsvegen og Nesjavegen

• ny omsorgsbustad (Reistadliane 39)

• gangveg (gangsti) til Hagabotnane

• parkeringsplass Helsetunet og ny leikeplass på Haga

• Revisjon av samarbeidsavtale landbruk. Sak om revisjon av samarbeidsavtalen for Bjørnafjorden landbrukskontor kjem opp i neste møterunde.

Spørsmål:

Spørsmål om bygging av fleirbrukshall på Lauskar
Odd Arne Haga (Frp) hadde sendt inn to skriftlege spørsmål før kommunestyremøtet. Han las opp spørsmåla. Ordførar Knut Harald Frøland (Bl) svara.

Ønske om teleslynge og industri-oppvaskmaskin på biblioteket
Solveig Vassenden (Bl) orienterte om ønske om teleslynge og industri-oppvaksmaskin på biblioteket på Bjørkheim.

Permisjonssøknad privatpraktiserande fysioterapeut
Solveig Vassenden (Bl) viste til orienteringa frå kommunalsjef Edith Oma om avslag på permisjonssøknad frå privatpraktiserande fysioterapeut. Ho stilte spørsmål om kvifor det ikkje var gitt permisjon. Rådmann Ove Sæbø svara.

Uteområde og leikeutstyr barneskulen
Anja Elisabeth Gjerde Markhus (Bl) spurde om det er planlagt oppgradering av uteområde (nytt leikeutstyr) på barneskulen. Kommunalsjef Hilde-Lill Våge svara.

Relativ fattigdom
Gunn Totland Moss (KrF) spurde om status for arbeid knytt til relativ fattigdom. Rådmann Ove Sæbø svara.

Brannstasjon og næringsområde i Raunekleiva
Arild Røen (H) spurde om status i sakene om brannstasjon og næringsområde i Raunekleiva. Rådmann Ove Sæbø og kommunalsjef Hilde-Lill Våge svara.

Informasjon på nettside for Rolvsvåg Industrihavn
Jon Magne Bogevik (Ap) viste til at på nettsida til Rolvsvåg Industrihavn er Samnanger kommune oppført som partnar. Han bad om at kommunen er behjelpeleg med å få sletta denne nettsida.

Konsulentbistand frå Agenda Kaupang
Monica Tjønna (Uavh) bad om informasjon om bruken av konsulenthjelp frå Agenda Kaupang innanfor skuleområdet. Rådmann Ove Sæbø svara.



Samrøystes vedtak.

Vedtak

Kommunestyret ber rådmannen om å gjennomføre ein utgreiingsprosess der samanslåing av dei to kommunale barnehagane skal vurderast.

Utgreiinga skal innebere forslag til føretrekt løysing og leggjast fram for kommunestyret i september 2023.

Denne vurderinga må mellom anna sjå på konsekvensar for trafikktryggleik og for pendlarar med barn i barnehagane. I tillegg må det gjerast vurderingar av korleis dette kan påverka trivsel.

I vurderinga bør det også sjåast i eit lengre tidsperspektiv, kva fylgjer ei eventuell samanslåing vil få ved eventuelle auka barnetal. Det bør også leggjast til rette for at alle som ynskjer å uttale seg, får anledning til dette.

Fagpersonale og pedagogiske leiarar i barnehagane skal ha ei framtredande rolle i planlegginga for å sikre fagleg forsvarlegheit ved ei eventuell endring i høve til dagens barnehagestruktur.

Behandling

Handsaming:
Monica Tjønna (Uavh) sette fram eit tilleggsframlegg.

Det vart røysta over formannskapet si innstilling, inkludert tilleggsframlegget til Monica Tjønna. Samrøystes vedteke.

Vedtak

Samnanger kommune sluttar seg til Samarbeidsavtale for Syns og audiopedagogisk teneste Vestland – kommunalt oppgavefellesskap (SAPT Vestland).

Ordføraren blir Samnanger kommune sin faste medlem i representantskapet i SAPT Vestland. Varaordføraren blir varamedlem.

Behandling

Formannskapet si innstilling vart samrøystes vedteken.

Vedtak

Samnanger kommune tek Energikommisjonen si utgreiing til etterretning og deler den uroa for Noreg sin framtidige kraftbalanse som også kjem fram i rapporten. I dei komande åra vil kraftsituasjonen i Europa endra seg, både fordi europeiske land ikkje ynskjer å gjera seg avhengige av import av gass frå Russland, og fordi det vert satsa stort på utbygging av fornybar energi i ei rekkje land. Dette vil også ha konsekvensar for Noreg og for vår konkurransesituasjon, sjølv om vasskrafta vår i stor grad har den fordelen at ho er regulerbar.

Energikommisjonen legg eit godt grunnlag for den breiare energipolitiske debatten. Samstundes ynskjer me å knyta nokre merknader til utgreiinga:

Samnanger kommune vil understreka at det grunnleggjande målet for energipolitikken må vera å sikra jamn og trygg tilgang på energi til norske forbrukarar, og at denne energien i størst mogeleg grad må koma frå fornybare kjelder.

I Noreg har særleg elektrisk kraft vore eit gode som i prinsippet alle har krav på til relativt låge prisar. Samnanger kommune meiner dette prinsippet også må liggja fast i framtida. I dette ligg det òg at det er viktig å føra vidareden føremonen som norsk næringsliv har hatt gjennom tilgang på billeg elektrisk kraft.

Samnanger kommune vil påpeika at klimakrisa må handterast samstundes med at me handterer naturkrisa, altså aukande tap av naturmangfald og bortfall av såkalla økosystemtenester, som følgje av menneskeleg aktivitet. Det inneber at me også ved utbygging av fornybar energi må unngå inngrep i urørt natur og sårbar natur, og at det må takast omsyn til dyrs leveområde. For å redusera behovet for ny kraftutbygging er det difor grunnleggjande viktig med omfattande tiltak for energiøkonomisering og energieffektivisering, inkludert styrkte støtteordningar som gjer at flest mogleg kan gjera slike grep på husstandsnivå, uavhengig av sin personlege økonomi.

Det inneber også tiltak for å redusera transportbehovet, der dette er mogleg, noko også som grip inn i andre samfunnsområde enn det reint energipolitiske. Energikommisjonen peiker på at fokus på transportbehov har konsekvensar for byplanlegging knytt til avstand mellom heim, skule, handelssenter og fritidsaktivitetar, medan ein i spreiddbygde strøk vanskeleg kjem unna individuelle transportløysingar. Samnanger kommune seier seg samde i dette, men vil peika på at transportbehov også må spela ei rolle i planlegging og utvikling utanfor byane. Samnanger kommune vil også peika på at det er viktig med desentraliserte, gode og digitalt tilgjengelege offentlege tenester, og på at det bør leggjast til rette for auka bruk av både heimekontor og satelittkontor for dei som ynskjer og har moglegheit til dette. Det siste vil både kunne bidra til redusera persontransportbehovet og til å styrkja arbeidsmarknaden i mindre kommunar som vår.

Samnanger kommune vil peika på at det også ved utbygging av energiinfrastruktur er vesentleg at det vert teke grunnleggjande omsyn til naturverdiar, og då særleg inngrepsfri natur. Kommunen vil i denne samanheng peika på at det ofte finst moglegheiter i å oppgradera eksisterande linjenett framfor å føra fram linjer i nye traséar.

Samnanger kommune er glad for kommisjonen si understreking av at skatte- og avgiftspolitikken må utformast på ein slik måte at den ikkje hindrar samfunnsøkonomisk lønsame investeringar, og samstundes avspegla at kraftsektoren haustar av våre felles ressursar. Som ein vasskraftkommune vil me understreka kor viktig det er at lokalsamfunnet også haustar av verdiskapinga i sektoren.
Kommunen meiner at det er særleg viktig å leggja til rette for auka produksjon av regulerbar vasskraft gjennom modernisering av eksisterande kraftverk, noko som inneber mindre inngrep enn bygging av nye kraftverk og utviding av eksisterande.

Ein endra kraftsituasjon kan gjera auka bruk av effektkøyring i vasskraftverka aktuelt. Samnanger kommune ser på det som viktig at det vert stilt miljøkrav til effektkøyring av vasskraftverk, og at det bør utformast nasjonale retningsliner for effektkøyring.

Samnanger kommune meiner utbygging av landbasert vindkraft må unngåast i urørt natur. Det er positivt at det vert lagt opp til at vertskommunar får større innverknad i vindkraftsaker. Samstundes vil kommunen peika på at det trengst nasjonalt planverk på området, både for å definera område som ikkje bør vera aktuelle for utbygging av landbasert vind og for å beskytta naturverdiar, friluftsliv og andre interesser. Eit slikt nasjonalt planverk kan føra debattar om fornybar energi inn på eit meir konstruktivt spor, og også bidra til at ny, fornybar energi i større grad vert bygd ut, men då med mindre konfliktar. Kommunen stør ei utgreiing av potensialet for nærvind, t.d. i form av mindre anlegg langs vegar, i industriområde eller i område der utbygging har få og små konsekvensar for natur og miljø. Samnanger kommune vil peika på at eit slikt arbeid må setjast i gang snarast.

Samnanger kommune er positiv til ei satsing på utbygging av havvind. Samnanger kommune er vald som utgangspunkt for elektrifisering frå land, noko som også inneber inntekter for kommunen. Me vil likevel understreka at vidare elektrifisering av norsk sokkel må skje gjennom produksjon av fornybar energi offshore, anten gjennom havvind eller på andre måtar. Elektrifisering av sokkelen frå land inneber knappare tilgang på kraft for industri på Vestlandet, og bidreg til å utfordra kraftbalansen. Ved utbygging av havvind og krav til dette i samband med elektrifisering av sokkelen kan ein oppnå det motsette. Når det gjeld utbygging av havvind, er det samstundes viktig at det vert teke omsyn til natur, fugletrekk, påverknad på marint liv og fiskeriinteresser.

Samnanger kommune vil peika på at energisituasjonen den siste tida har aktualisert ein debatt om kjernekraft. På kort sikt er kjernekraft neppe ei løysing for Noreg, mellom anna grunna utbyggingstid og små fagmiljø. Samstundes har FNs klimapanel peikt på at kjernekraft er ei delløysing, og Samnanger kommune vil understreka at det er viktig at Noreg følgjer og deltek i utviklinga av ny teknologi, til dømes små, modulære reaktorar.

Behandling

Handsaming:
Øyvind Strømmen (MDG) sette fram framlegg til vedtak. Han orienterte om at han gjerne ønskte at dette skulle vera eit fellesframlegg frå han og Øyvind Røen (Sp), og viste i samband med dette til framlegget som Øyvind Røen hadde lagt inn i Møteportalen.

Monica Tjønna (Sp) sette fram framlegg til vedtak.

Øyvind Røen orienterte om at det ville vera i orden for han at framlegget som Øyvind Strømmen hadde sett fram, vart eit fellesframlegg frå dei to.

Karl Bård Kollbotn (Frp) sette fram framlegg til vedtak.

Øyvind Røen trekte framlegget sitt.


Røysting:
Det vart først røysta over framlegget til Karl Bård Kollbotn. 3 røysta for og 18 røysta imot dette framlegget, som ikkje vart vedteke.

Det vart så røysta over framlegget til Monica Tjønna. 2 røysta for og 19 røysta imot dette framlegget, som ikkje vart vedteke.

Det vart så røysta over fellesframlegget til Øyvind Strømmen og Øyvind Røen. 20 røysta for og 1 røysta imot dette framlegget, som vart vedteke. Jon Magne Bogevik (Ap) røysta imot.

Det vart til slutt røysta over formannskapet si innstilling. 2 røysta for og 19 røysta imot innstillinga, som ikkje vart vedeken.

Vedtak

Samnanger kommune støttar framlegget frå Kommunal- og distriktsdepartementet om endringar i § 10 i inndelingslova. Desse endringane er naudsynte for å sikra eit reelt lokaldemokrati. Dette er særleg viktig for at også mindre lokalsamfunn (grender/bygdelag) innanfor ein kommune skal få høve til verta høyrde.

Behandling

Formannskapet si innstilling vart vedteken med 20 mot 1 røyst. Jon Magne Bogevik (Ap) røysta imot.

Vedtak

Tiltaket med å utbetre vegen i Hagabakkane, øvre del opp til Hagabotnane, vert i investeringsbudsjettet for 2023 auka til ein kostnad på inntil 10 MNOK inkl. mva.

Rådmannen kjem tilbake til naudsynt budsjettregulering og finansiering i økonomirapporteringa pr. 1. tertial i juni. Det skal gå fram kva konsekvensar finansieringa av Hagabakkane har for dei andre prosjekta som er vedtekne i investeringsbudsjettet for 2023.

Kommunestyret ser alvorleg på kostnadsauken i tiltaket og ber om at rådmann vurderer naudsynte tiltak for å sikre at dette ikkje skjer igjen.

Behandling

Handsaming:
Ordførar Knut Harald Frøland (Bl) sette fram eit tilleggsframlegg.

Det vart røysta over formannskapet si innstilling, inkludert tilleggsframlegget til Knut Harald Frøland. Samrøystes vedteke.

Vedtak

Samnanger kommune tek opp lån i Husbanken på kr 5000 000 for å gje økonomisk hjelp til bustadformål. Lånet skal nyttast til vidareformidling av startlån.

Behandling

Formannskapet si innstilling vart samrøystes vedteken.

Vedtak

Etter anbefaling frå ungdomsrådet, skal kommunen utarbeida og gjennomføra ei spørjeundersøking blant ungdom i kommunen om eit senter for gaming og e-sport er eit tilbod dei ønskjer. Resultatet frå undersøkinga skal takast med i vurderingaav om det er behov for eit slikt tilbod i Samnanger. Etter at undersøkinga er gjennomført, skal saka leggjast fram igjen for kommunestyret. Dette skal gjerast seinast i september 2023.

Det vert bedt om at Samnanger Idrettslag vert førespurt om moglegheit for at det vert oppretta eiga e-sport-gruppe i Samnanger Idrettslag. Dette vil kunna løysa ut økonomi for å tilretteleggja og skaffa utstyr slik at sporten vart ein lågterskelsport der fleire kan delta.

Behandling

Handsaming:
Monica Tjønna (Uavh) sette fram eit tilleggsframlegg.

Det vart røysta over rådmannen si tilråding, inkludert tilleggsframlegget til Monica Tjønna. Samrøystes vedteke.

Vedtak

Samnanger kommune vedtek følgande:

1.
Å leggje Samnanger fleirbrukshall - prosessplan d. 20.04.23 til grunn i det vidare arbeidet med å planlegge og byggje ny fleirbrukshall.

2.
Med utgangspunkt i prosessplanen å gå vidare med lokalisering av fleirbrukshall i følgande prioriteringsrekkefølge:

1. Bjørkheim

2. Haukaneset

For vidare utgreiing kan ein vurdera om det er mogeleg om lokalbussen kan gå om Haukaneset, og om dette er forsvarleg med tanke på mjuke trafikantar. Dette er for å gjere området meir tilgjengeleg.

3.
Rådmannen får løyve til å setje i gang forhandlingar om grunnerverv for dei aktuelle lokaliseringsalternativa (pkt. 2). Kjøpsavtale skal endeleg godkjennast av kommunestyret.

4.
For å sikre framdrift/realisering av planar om etablering av vinmonopol og apotek på Bjørkheim, skal det for gnr/ bnr 18/163, 18/195 og 18/196 ikkje gjerast endringar av gjeldande reguleringsplan i samband med eventuell revisjon av reguleringsplan for Bjørkheimsområdet.

Behandling

Handsaming:
Innleiingsvis orienterte prosjektleiar Ola Klyve Dalland frå ABO Plan & Arkitektur AS om tomtestudiet som er gjennomført i arbeidet med saka.

Ordførar Knut Harald Frøland (Bl) sette fram eit tilleggsframlegg.

Gunn Østvik Petersen (Ap) sette fram eit framlegg til vedtak.

Øyvind Røen (Sp) bad om gruppemøte.

Etter gruppemøtet sette Gunn Østvik Petersen (Ap) fram eit fellesframlegg frå Ap og KrF. Framlegget som Gunn Østvik Petersen hadde sett fram tidlegare under handsaminga av saka, vart samstundes trekt.

Monica Tjønna (Uavh) sette fram eit framlegg til vedtak.

Øyvind Røen sette fram eit fellesframlegg frå Sp og Frp.

Røysting:
Det vart først røysta over framlegget til Monica Tjønna. 1 røysta for og 20 røysta imot dette framlegget, som ikkje vart vedteke. Monica Tjønna røysta for framlegget.

Det vart så røysta over fellesframlegget frå Sp og Frp. 5 røysta for og 16 røysta imot dette framlegget, som ikkje vart vedteke.

Det vart så røysta over fellesframlegget frå Ap og KrF. 16 røysta for og 5 røysta imot dette framlegget, som vart vedteke.

Det vart så røysta over framlegget til rådmannen. Ingen røysta for dette framlegget.

Det vart til slutt røysta over tilleggsframlegget til Knut Harald Frøland. 18 røysta for og 3 røysta imot dette framlegget, som vart vedteke.

Vedtak

Samnanger kommune vedtek å endre gjeldande satsar for kommunale VA-gebyr for sjølvkostområde Eikedalen som vist i tabell, basert på vedtaket KS-022/2023. Satsane vil gjelde frå 01.04.2023.

Behandling

Rådmannen sitt framlegg vart vedteke med 19 mot 2 røyster.