Møte i Formannskapet den 27.04.2017

Vedtak

Møteinnkallinga og saklista vert godkjent
Delegerte vedtak/referatsaker vert tekne til orientering

Behandling

Orienteringar og meldingar:

Rekruttering av ny rådmann
Knut Harald Frøland (Bl) orienterte om status i saka. Avtalevilkår for rådmann vart kort diskutert.

Datasenter i Børdalen
Firmaet Regn Datacenters AS har inngått intensjonsavtale med grunneigarar i Børdalen. Kommunen opprettheld likevel bestillinga av rapport frå Argon Consult, jf. vedtak i formannskapet 23.02.2107 i sak 002/2017.

Næringsutvikling
Knut Harald Frøland (Bl) orienterte om møte han har hatt med Vinmonopolet, der han tok opp spørsmål om moglegheit for polutsal på Bjørkheim. Han orienterte vidare om møte han har hatt med Ditt Apotek.

Nasjonal turistveg
Knut Harald Frøland (Bl) orienterte om kontakt han har hatt med Statens Vegvesen, om kvifor FV7 gjennom Samnanger ikkje er definert som Nasjonal turistveg, ref. attraksjonar som Notaholmen, Mørkhølen og Fossenbratte.

Applikasjon for Samnanger kommune
Nokre kommunar tilbyr ein eigen applikasjon med informasjon om kommunen. Knut Harald Frøland (Bl) bad om å få opp sak om dette i neste møterunde i formannskapet og kommunestyret. Det vil vera økonomiske kostnader knytt til etablering og drift av ein slik applikasjon.

Frivilligsentral
Knut Harald Frøland (Bl) har vore i kontakt med KS og fått orientering om økonomiske støtteordningar m.m. for kommunale frivilligsentralar. Han bad om å få opp sak i kommunestyret 11.05.2017 om eventuell etablering av kommunal frivilligsentral.

Sal av prestebustad
Eining for teknisk forvaltning er i dialog med soknepresten om eventuelt sal av prestebustaden på Haga. Spørsmål om salssum vart diskutert.

Opningsdato for nytt bibliotek
Opninga blir ca. i midten av august. Det vart stilt spørsmål om kommunestyremøtet i juni kan haldast i det nye biblioteket. Dette vil truleg vera mogleg å få til.

Opning av paviljong på Bjørkheim
Opninga blir truleg i juni.

Opning av krøllgrasbanen i Hagabotnane
Opninga blir truleg i løpet av juni.

Ny avkøyrsle/vegstykke mot Totræna vinterpark
Blir truleg ferdig i løpet av mai.

Senter for funksjonshemma
Hilde-Lill Våge orienterte om status for planleggingsarbeidet. Konkurranse kan truleg kunngjerast på Doffin tidleg i haust. Byggjestart blir ikkje før i 2018.

Prosjektering av ny veg Hagabakkane - Hagabotnane
Hilde-Lill Våge orienterte om status for arbeidet. Dette er ein del av arbeidet med arealdelen av kommuneplanen.

Breibandsutbygging i området Saga - Rolvsvåg
Fylkeskommunen har gitt tilsegn om inntil 1 million kroner i tilskot til breibandsutbygging i området Saga - Rolvsvåg. Det skal haldast møte mellom kommunen og næringsdrivande i området 02.05.2017.

Hjartestartarar
Konstituert rådmann Hilde-Lill Våge orienterte om at kommunen har kjøpt inn fire hjartestatarar. Desse vil bli plassert på kommunehuset, i garderobebygget i Hagabotnane, i gymsalen på barneskulen og i biblioteket på Bjørkheim.

Nyheitsbulletin
Det vart stilt spørsmål om administrasjonen og ordføraren kan sjå på moglegheit for utsending av nyheitsbulletinar til dei folkevalde. Bakgrunnen for spørsmålet var mellom anna at det ofte er mange orienteringssaker i formannskapet og kommunestyret, og at det kanskje kan vera meir føremålstenleg å informera om slike saker i ein nyheitsbulletin. Administrasjonen og ordføraren vil sjå på dette.

Utvalet sitt kvarter:

Rasfare på vegen ved Fossenbratte
Monica Tjønna (Sp) orienterte om at grunneigar ved Fossenbratte har meldt frå til ho om stor rasfare på gamlevegen ved fossen.

Spørsmål om deling av 1. klasse skuleåret 2017/2018
Lena Tveit (Bl) stilte spørsmål om status. Økonomisjef Nina Erdal orienterte om kor stor sum øyremerka midlar kommunen har fått til "tidleg innsats" i 2017. Det vart også diskutert korleis desse midlane kan og bør brukast. Det vil bli lagt fram sak for formannskapet og kommunestyret i juni, der mellom anna spørsmålet om delingstal vert tema.

Samrøystes vedtak.

Vedtak

Samnanger kommune støtter LVK (Landssamanslutninga av Vasskraftskommunar) sitt skriv til Finansdepartementet datert 2.mars 2017 der LVK ber om at kapitaliseringsrenta med verknad for eigedomsskatteåret 2018 vert redusert på same måte som for andre renter til bruk til kraftskatteformål.

Samnanger kommune er ein liten kommune med 2 488 innbyggjarar. Skatteinngangen som inkluderer naturressursskatten, var i 2016 på 93,4 % av landsgjennomsnittet. Samnanger kommune er ingen rik kraftkommune. Inntekter frå eigedomsskatt på kraftverk er av vesentleg betyding for å kunne tilby innbyggjarane gode tenester. Frå 2016 til 2017 fekk Samnanger kommune eit inntektstap på 23,3 % på eigedomsskatt frå kraftverk. I kroner utgjer inntektsreduksjonen 1,3 millionar kroner. Dette er ein vesentleg inntektsreduksjon for kommunen som totalt sett har budsjettert med 206 millionar kroner i driftsinntekter i 2017. For perioden 2013 – 2017 er inntektsreduksjonen på 4,4 millionar kroner. For same periode er og summen av dei andre inntektene knytt til kraftproduksjon blitt redusert. For 2013 – 2016 (rekneskapstal) var reduksjonen på 1,7 millionar kroner. Låge prisar ved sal av konsesjonskraft er hovudforklaringa.

Eigedomsskatteinntekter frå kraftanlegg vil ha naturlege svingingar knytt til at gjennomsnittsberekninga av dei siste 5 års rullerande kraftprisar endrar seg. Dette er eit naturleg resultat av at prisane endrar seg. Like viktig som pris for å finne den reelle marknadsverdien av vasskraftanlegga er kva kapitaliseringsrente som vert nytta ved berekning av noverdien av anlegga. Finansdepartementet har dei siste 5 år vidareført ei kapitaliseringsrente på 4,5 % til tross for det kraftige fallet i marknadsrenta i same tidsrom og til tross for at samtlege andre renter til bruk til kraftskatteformål er blitt redusert. Dette meiner me er feil og me ber om at kapitaliseringsrenta for 2018 vert justert ned for å unngå at kommunen får eit ytterlegare tap i inntekter. Fastsetting av kapitaliseringsrenta bør som tidlegare forankrast i klare berekningskriteria og fylgje den generelle renteutviklinga.

Eit breitt stortingsfleirtal vedtok som fylgje av skattereforma robuste, prinsipielle eigedomsskattereglar for vasskraftverk, der berekningsmetoden skulle reflektere kraftanlegga sin reelle verdi. For å oppnå dette må kapitaliseringsrenta justerast på same måte som andre renter til bruk til kraftskatteformål.

Me meier og at det er særdeles viktig at dei kommunane som har kraftproduksjon med dei naturinngrepa det har medført, får sin rettmessige del av verdien, i form av konsesjonsbestemte ordningar, skattar og erstatning. Me ber om at regjeringa ikkje fører ein politikk som dreier inntektsgrunnlaget frå desse kommunane over til staten.

Behandling

Rådmannen sitt framlegg til vedtak vart samrøystes vedteke.

Vedtak

Sans og Samning får kr 20 000 i tilskot til investeringar gjort for å etablera ein kafé. Summen vert finanisert med bruk av næringsfondet og utgiftsført på 14700.1400.3251.

Utbetaling av stønaden skal skje med halvparten av summen ved oppstart. Den resterande summen vert utbetalt når det vert framlagt dokumentasjon for utgiftene.

Behandling

Knut Harald Frøland (Bl) bad om å få gildskapen sin vurdert. Han gjekk frå medan formannskapet tok stilling til gildskapen hans. Øyvind Røen (Sp) gjekk inn som møteleiar. Knut Harald Frøland vart samrøystes funnen ugild i saka og deltok ikkje i den vidare behandlinga av saka.

Rådmannen sitt framlegg til vedtak vart samrøystes vedteke.

Etter avrøystinga overtok Knut Harald Frøland igjen som møteleiar.

Vedtak

Samnanger kommune løyver inntil kr. 126.851 til prosjekt «Revitalisering av Tysse». Finansiering hentast frå næringsfondet som pr. 18.04.17 er kr. 795 142,05. I tillegg kjem stønad frå Fylkeskommunen på kr. 126.500 slik at total budsjettramme for prosjektet utgjer kr. 253.351.

Samnanger kommune inngår kontrakt med Granli Gård Rådgivning v/ Ove Henning Bjørsvik pålydande kr. 100.000 eks. mva. Kontrakt gjeldt i tidsrommet medio mai 2017 og ut 2017. Granli Gård Rådgivning v/ Ove Henning Bjørsvik rapporterer til ordførar og har ordførar som tett samarbeidspartnar.

Behandling

Ordføraren sitt framlegg til vedtak vart samrøystes vedteke.

Vedtak

Frode Bjørnås får kr 50 000 i tilskot til ny driftsbygning for sau. Summen vert finansiert med bruk av næringsfondet og utgiftsført på 14700.1400.3251.

Utbetaling av stønaden skal skje med halvparten av summen ved oppstart. Den resterande summen vert utbetalt når det vert framlagt dokumentasjon for utgiftene.

Behandling

Arild Røen (H) bad om å få gildskapen sin vurdert. Han gjekk frå medan formannskapet vurderte gildskapen hans. Tre medlemmer røysta for at Arild Røen er ugild i saka (Nils Aadland - Ap, Olaug Øystese - Ap, Jon Magne Bogevik - Uavh.). Fem medlemmer røysta for at Arild Røen er gild i saka (Knut Harald Frøland - Bl, Lena Tveit - Bl, Øyvind Røen - Sp, Monia Tjønna - Sp, Inge Aasgaard - Krf). Arild Røen gjekk etter avrøystinga tilbake i møtet og deltok i den vidare behandlinga av saka.

Rådmannen sitt framlegg til vedtak vart samrøystes vedteke.

Vedtak

Samnanger kommune prioriterer søknader til ordninga Tilskot til lokale kulturhus slik:

1. Samnanger bibliotek – kjøp av lokale.

Behandling

Rådmannen sitt framlegg til vedtak vart samrøystes vedteke.

Vedtak

Yngve Tveiterås får kr 50 000 i tilskot til etablering av bilverkstad. Summen vert finansiert med bruk av næringsfondet og utgiftført på 114700.1400.3251.

Utbetaling av stønaden skal skje med halvparten av summen ved oppstart. Den resterande summen vert utbetalt når det vert framlagt dokumentasjon for utgiftene.

Behandling

Rådmannen sitt framlegg til vedtak vart samrøystes vedteke.

Vedtak

Haukanes Eiendom får kr 20 000 til klargjering av lokale til bilverkstad. Summen vert finansiert med bruk av næringsfondet og utgiftført på 14700.1400.3251.

Utbetalinga av tilskotet skal skje med halvparten av summen ved oppstart. Den resterande summen vert utbetalt når det vert framlagt dokumentasjon for utgiftene.

Behandling

Rådmannen sitt framlegg vart samrøystes vedteke.

Vedtak

Russ Exclusive får kr 10 000 i tilskot til etableringa. Summen vert finanisert med bruk av næringsfondet og utgiftsført på 14700.1400.3251.

Utbetaling av tilskotet skal skje med halvparten av summen ved oppstart. Den resterande summen vert utbetalt når det vert framlagt dokumentasjon for utgiftene.

Behandling

Knut Harald Frøland (Bl) bad om å få gildskapen sin vurdert. Han gjekk frå medan formannskapet tok stilling til gildskapen hans. Øyvind Røen (Sp) gjekk inn som møteleiar. Knut Harald Frøland vart samrøystes funnen ugild i saka og deltok ikkje i den vidare behandlinga av saka.

Rådmannen sitt framlegg til vedtak vart samrøystes vedteke.