Møte i Formannskapet den 22.02.2018

Vedtak

Møteinnkallinga og saklista vert godkjent.

Delegerte vedtak/referatsaker vert tekne til orientering.

Tilleggssak om uttale til konsesjon for ny transformator ved Samnanger transformatorstasjon vert sett på saklista.

Behandling

Godkjenning av innkalling og sakliste:
Ordførar Knut Harald Frøland orienterte om ønske om å ta opp ei tilleggssak om uttale til konsesjon for ny transformator ved Samnanger transformatorstasjon. Kommunen sin uttalefrist i saka er 23.02.2018. Sakspapira for denne saka vart sendt ut rett før møtet, under kommunestyremøtet 22.02.2018.

Olaug Øystese (Ap) bad om gruppemøte.

Etter gruppemøtet orienterte Olaug Øystese om at hennar gruppe ville gå imot at saka vart handsama i formannskapet 22.02.2018. Bakgrunnen for dette var at saka var sendt ut så seint og at det derfor ikkje var mogleg å setja seg inn i saka eller å få diskutert den i partiet.

Etter debatt i møtet bad Nils Aadland (Ap) om nytt gruppemøte.

Etter gruppemøtet foreslo Nils Aadland (Ap) at formannskapet gir administrasjonen fullmakt til å gje uttale i saka.

Etter ny debatt i møtet bad Olaug Øystese om nytt gruppemøte.

Etter gruppemøtet orienterte Inge Aasgaard (Krf) om at gruppa hans ville støtta at saka kjem på saklista, under føresetnad av at vedtaket vert at formannskapet gir administrasjonen fullmakt til å gje uttale i saka. Formannskapet slutta seg samrøystes til at saka kjem på saklista, på det vilkåret som Inge Aasgaard hadde sett fram krav om.

Protokoll frå førre møte:
Det var ingen merknader til protokollen frå førre møte.

Orienteringssaker:

Søknadsfrist for tilskot til tilskipingar
Rådgjevar Jan Erik Boge orienterte om at det på neste møte i formannskapet vil koma opp ei sak om revisjon av kommunen sine retningslinjer for tildeling av kulturmidlar. Han orienterte vidare om søknadsfrist for kulturmidlar for 2018 vart kunngjort i Samningen 22.02.2018, og at det der er sett same søknadsfrist (20.03.2018) for alle typar av kulturmidlar, inkludert tilskot til tilskipingar.

Varsel om søksmål Krekavegen
Ordførar Knut Harald Frøland (Bl) orienterte om at kommunen har fått varsel om søksmål frå bebuarar i Krekavegen. Det vert møte mellom kommunen og partane i 16.03.2018.

Varsel om søksmål frå Rolvsvåg Industrihamn
Ordførar Knut Harald Frøland (Bl) orienterte om at kommunen har fått varsel om søksmål frå Rolvsvåg Industrihavn. Assisterande rådmann Hilde-Lill Våge orienterte om at det til saman er varsla to søksmål frå Rolvsvåg Industrihamn.

Mogleg IKT-samarbeid med IKT Nordhordland
Ordførar Knut Harald Frøland (Bl) orienterte om at rådmannen vil gjennomføra eit forprosjekt om mogleg samarbeid med IKT Nordhordland om IKT-drift, og at saka vil koma til politisk handsaming dersom administrasjonen etter forprosjektet meiner at samarbeid kan vera aktuelt.

Utvalet sitt kvarter:
Ingen saker.

Vedtak

Rådmannen ber KS gje ei vurdering av i kva grad Samnanger kommune har teke på seg juridisk bindande forpliktingar til å utbetra vegen fram til Économuséet Fjordtønna. I denne vurderinga må òg rolla og ansvaret til dei ulike partane i saka vurderast Vurderinga må vera ferdig til 1. april.

Behandling

Inge Aasgaard (Krf) sette fram følgjande framlegg til vedtak:

"Formannskapet ber administrasjonen innhenta juridisk vurdering av Samnanger kommune sitt ansvar og forpliktingar i denne saka. Frist for å få vurderinga gjennomført er sett til 15/4-2018."

Monica Tjønna (Sp) bad om gruppemøte.

Etter gruppemøtet sette Øyvind Røen (Sp) fram følgjande framlegg til vedtak:

"Rådmannen ber KS gje ei vurdering av i kva grad Samnanger kommune har teke på seg juridisk bindande forpliktingar til å utbetra vegen til fram til Économuséet Fjordtønna. I denne vurderinga må òg rolla og ansvaret til tidlegare ordførar Marit A. Aase klargjerast. Vurderinga må vera ferdig til 1. april."

Etter debatt i møtet orienterte Øyvind Røen om at namnet til tidlegare ordførar om ønskeleg kunne takast vekk frå vedtaksframlegget hans.

Olaug Øystese (A) forerslo å senda saka over til kommunestyret. Det vart ikkje røysta over dette forslaget.

Øyvind Røen bad om gruppemøte.

Etter gruppemøtet sette Øyvind Røen fram følgjande reviderte framlegg til vedtak:

"Rådmannen ber KS gje ei vurdering av i kva grad Samnanger kommune har teke på seg juridisk bindande forpliktingar til å utbetra vegen fram til Économuséet Fjordtønna. I denne vurderinga må òg rolla og ansvaret til dei ulike partane i saka vurderast  Vurderinga må vera ferdig til 1. april."

Det vart til slutt røysta over framlegga frå Øyvind Røen og Inge Aasgaard. Framlegget til Øyvind Røen fekk 5 røyster og vart vedteke. Framlegget til Inge Aasgaard fekk 4 røyster.

Vedtak

Saka vert sendt tilbake til administrasjonen. Administrasjonen får fullmakt til å gje uttale i saka.

Behandling

Nils Aadland (A) sette fram forslag om at saka vert sendt tilbake til administrasjonen, og at administrasjonen får fullmakt til å gje uttale i saka. Dette framlegget vart samrøystes vedteke.