Møte i Formannskapet den 12.04.2018

Vedtak

Møteinnkallinga og saklista vert godkjent.

Delegerte vedtak/referatsaker vert tekne til orientering.

Behandling

Godkjenning av møteinnkalling og sakliste
Ingen merknader.

Godkjenning av protokoll frå førre møte
Ingen merknader.

Orienteringssaker

Pilitprosjekt tannlege
Ordførar Knut Harald Frøland (Bl) orienterte om at han ønskjer at Samnanger skal søkja på dette pilotprosjektet, saman med nokre andre kommunar i Hordaland som han har hatt dialog med. Pilotprosjektet gjeld kommunalt tannlegekontor.

Datasenter Børdalen
Ordførar Knut Harald Frøland (Bl) orienterte om status. Fylkesmannen har framleis ikkje svart/konkludert vedrørande arealplan for området.

Status for prosjekt med senter for funksjonshemma på Skottabakken
Det hadde kome inn grunngjeve spørsmål frå Framstegspartiet til formannskapsmøtet 12.04.2018, om status for prosjektet med nytt senter for funksjonshemma på Skottabakken. Ordførar Knut Harald Frøland (Bl) orienterte om at det ifølgje kommunen sitt reglement berre er høve til å fremma grunngjevne spørsmål til kommunestyret, ikkje formannskapet eller andre utval. Assisterande rådmann Hilde-Lill Våge orienterte likevel i formannskapet 12.04.2018 om status for prosjektet. Prosjektet er kunngjort i Doffin som totalenterprise, med atterhald om finansiering. Det kan truleg liggja an til 3-4 millonar kroner meir i kommunal kostnad enn det som opprinneleg vart stipulert for nokre år sidan.

Reguleringsplan ny veg til Hagabotnane
Assisterande rådmann Hilde-Lill Våge orienterte om status. Det vert i desse dagar sendt ut anbodsførespurnad til tre leverandørar. Det er sett av 500.000 kroner til dette prosjektet.

Leigeavtale fysioterapeut
Rådmann Charlotte Hageberg orienterte om status, mellom anna om møte mellom kommunen og fysioterapeut Geir Næss 09.04.2018. Det er framleis ikkje semje mellom kommunen og Næss om ny leigeavtale. Næss ønskjer avtale der han disponerer tre behandlingsrom ved helsetunet. Ordførar Knut Harald Frøland (Bl) bad om at administrasjonen undersøkjer kva som fagleg sett vil vera Næss sitt behov når det gjeld tal behandlingsrom.

Tvist Rolvsvåg Industrihavn, Krekavegen og Nyutløtræ
Assisterande rådmann Hilde-Lill Våge orienterte om status for desse sakene. Ingen av sakene er avslutta.

"Prosjekt" utvikling av Kvamskogen
Ordførar Knut Harald Frøland (Bl) orienterte om saka, som er eit initiativ frå Kvam herad som dei har invitert Samnanger til å vera med på.

Fossen Bratte-prosjektet
Ordførar Knut Harald Frøland (Bl) orienterte om status for prosjektet. Blir truleg "kick-of" ved Fossen Bratte i mai. Ulike aktørar er interesserte i å vera med i prosjektet.

Rassikring i Tokagjelet
Ordførar Knut Harald Frøland (Bl) orienterte. Statens Vegvesen har starta opp arbeid med ein kommunedelplan. Representantar for Samnanger har delteke på to møte om saka. Ulike alternativ blir diskutert, både tunnel under Kvamskogen (frå Steinsdalen til Frøland), tunnel frå Steinsdalen til Eikedalen og tunnel frå Steinsdalen til Røyrlia på Kvamskogen.

Budsjett for kontroll- og tilsynsarbeid - prosess for avgjerd til kommunestyre
Sjå notatet frå kontrollutvalet som låg ved møteinnkallinga.

"Layout" for skjema for økonomikontroll/prognose
Rådmann Charlotte Hageberg orienterte om planlagt innføring av månadleg økonomirapportering til politisk nivå. Ho viste i møtet planlagt layout/oppsett for den nye økonomirapporten.

Utvalet sitt kvarter

Leigeavtale/lokalitetar for fysioterapeut
Olaug Øystese (Ap) las opp ope brev frå Samnanger Arbeiderparti til Samnanger kommune vedrørane sak om leigeavtale for privatpraktiserande fysioterapeut Geir Næss. Ho informerte om at Arbeiderpartiet ikkje har fått svar på brevet. Ho informerte om at Arbeiderpartiet ønskjer å få denne saka opp til politisk handsaming. Ordførar Knut Harald Frøland orienterte om at han har formidla til rådmannen at han ønskjer å få saka opp til politisk handsaming dersom administrasjonen ikkje lukkast med å inngå ny leigeavtale med Geir Næss. Rådmann Charlotte Hageberg beklaga at Arbeiderpartiet ikkje har fått svar på brevet, og at svar vil bli sendt så snart som mogleg.

Ønske om liste over orienteringssaker i møteinnkallingar
Øyvind Strømmen orienterte om at han ønskjer at liste over orienteringssaker blir lagt inn i møteinnkallingar til formannskapet og andre politiske organ. Administrasjonen vil prøva å få til dette.

Kommunal VA i Eikedalen
Odd Arne Haga viste til avtale mellom Kvam herad og Samnanger kommune om VA i Eikedalen, og spurde om når husstandar/hytter nedover i Eikedalen vil kunne kopla seg på anlegget. Assisterande rådmann Hilde-Lill Våge og ordførar Knut Harald Frøland (Bl) orienterte kort om saka. Det vil kunne bli gitt meir utfyllande orientering på eit seinare møte. Intensjonen er at kommunal VA skal byggjast heilt ned mot Fossen Bratte.

Vedtak

Det skal løyvast ein øyremerka fast årleg sum til kyrkja til vedlikehald, eventuelt med årleg indeksjustering. Storleiken på summen må avklarast i formannskapet sitt mai-møte. Det må òg sjåast på om kyrkja sjølv bør ta opp lån for å få gjennomført investeringar som ikkje kan finansierast gjennom det ordinære budsjettet. Kommunen må i så fall garantera for slikt lån.

Kontrollutvalet skal gjennomføra minst ein forvaltningskontroll pr. år. Det skal løyvast ein fast årleg sum til kontroll og tilsyn, eventuelt med årleg indeksjustering. Storleiken på summen må avklarast i formannskapet sitt mai-møte, mellom anna på grunnlag av innspel frå kontrollutvalet.

Kommunen vil gje tilskot til Samnanger idrettslag til kjøp av ny trakkemaskin i Totræna, jamfør brev frå idrettslaget v/Vigleik Tysseland.

Det skal i 2019-budsjettet vera ei avsetjing på 6 millonar kroner til disposisjonsfondet, i tillegg til eit resultatkrav på 2%.

Behandling

Saka vart innleia med orienteringar frå leiar i kontrollutvalet Brigt Olav Gåsdal (Ap) og kyrkjeverje Britt Haukanes.

Brigt Olav Gåsdal peika på at det er viktig å avklara kva rutinar kommunen skal ha for utarbeiding av budsjettforslag for kontroll og tilsyn, spesielt kva som skal vera utgangspunktet for budsjettframlegget (eksempel kan vera gjeldande budsjett for inneverande år, eller rådmannen sitt budsjettframlegg for inneverande år). Han viste også til kommunestyret sitt budsjettvedtak om å auka møtegodtgjersla for folkevalde i 2018, og sa at dette i realiteten har redusert kontrollutvalet sitt økonomiske "handlingsrom" i 2018.

Britt Haukanes delte ut eit dokument ("Trong for vedlikehald og investeringar pr. april 2018"). Dokumentet ligg som vedlegg til møteprotokollen. Ho peika spesielt på at kyrkja ønskjer seg ein fast årleg vedlikehaldspott, slik dei har bedt om i fleire år. Det skal i løpet av april vera eit møte mellom kyrkjekontoret og eining for teknisk drift, for å sjå på moglegheiter for samarbeid om vedlikehald. Ordførar Knut Harald Frøland spurde om kyrkja som eiga juridisk eining har moglegheit til å ta opp lån sjølv, for å få gjennomført større tiltak. Britt Haukanes orienterte om at dette vil vera mogleg på visse vilkår, men at kommunen i så fall må garantera for lånet. Ho viste her til eksempel frå Os. Årsmelding for 2017 for kyrkja vart òg delt ut.

Rådmann Charlotte Hageberg presenterte ei oppsummering frå kvalitetsdialogen 11.04.2018, fordelt på dei ulike sektorane. Oppsummeringa ligg som vedlegg til møteprotokollen.

Det var ein diskusjon om måten kvalitetsdialogen 11.04.2018 var lagt opp på. Tilbakemeldingane var i hovudsak positive, men det kom nokre forslag til endringar/justeringar ved eventuelle framtidige kvalitetsdialogar.

Ordførar Knut Harald Frøland (Bl) viste til e-post frå Vigleik Tysseland i Samnanger idrettslag, om behov for kommunalt tilskot (180.000 kroner) til delfinansiering ny trakkemaskin i Totræna. Totalkostnaden for trakkemaskina vil vera ca. 900.000 kroner. Kopi av e-posten frå Vigleik Tysseland ligg som vedlegg til møteprotokollen. Dersom det skal gjevast kommunalt tilskot, må det takast stilling til korleis dette i praksis skal gjerast, for eksempel om det skal gjevast tilskot via kulturbudsjettet.

Etter vidare debatt i møtet vart medlemmene i formannskapet samde om følgjande premissar til budsjettet for 2019:

Det skal løyvast ein øyremerka fast årleg sum til kyrkja til vedlikehald, eventuelt med årleg indeksjustering. Storleiken på summen må avklarast i formannskapet sitt mai-møte. Det må òg sjåast på om kyrkja sjølv bør ta opp lån for å få gjennomført investeringar som ikkje kan finansierast gjennom det ordinære budsjettet. Kommunen må i så fall garantera for slikt lån.

Kontrollutvalet skal gjennomføra minst ein forvaltningskontroll pr. år. Det skal løyvast ein fast årleg sum til kontroll og tilsyn, eventuelt med årleg indeksjustering. Storleiken på summen må avklarast i formannskapet sitt mai-møte, mellom anna på grunnlag av innspel frå kontrollutvalet.

Kommunen vil gje tilskot til Samnanger idrettslag til kjøp av ny trakkemaskin i Totræna, jamfør brev frå idrettslaget v/Vigleik Tysseland.

Det skal i 2019-budsjettet vera ei avsetjing på 6 millonar kroner til disposisjonsfondet, i tillegg til eit resultatkrav på 2%.

Desse premissane vart samrøystes vedtekne.

Vedtak

Saka vert oversendt til kommunestyret utan tilråding. Før kommunestyret si handsaming må administrasjonen sjå på om det vil vera mogleg å streama formannskapsmøta utan at møta må gjennomførast med bruk av talarstol.

Behandling

Øyvind Strømmen (Mdg), Knut Harald Frøland (Bl) og Øyvind Røen (Sp) sette fram følgjande framlegg til vedtak:

"Saka vert oversendt til kommunestyret utan tilråding. Før kommunestyret si handsaming må administrasjonen sjå på om det vil vera mogleg å streama formannskapsmøta utan at møta må gjennomførast med bruk av talarstol. "

Inge Aasgaard sette fram følgjande framlegg til vedtak:

"Møta i formannskapet vert ikkje streama."

Det vart røysta over dei to framlegga. Framlegget til Øyvind Strømmen, Knut Harald Frøland og Øyvind Røen fekk 6 røyster og vart vedteke. Inge Aasgaard sitt framlegg fekk 3 røyster.

Vedtak

Tysse Landhandleri får 50% av inntil 150.000 kroner i tilskot frå det kommunale næringsfondet til etablering av offentleg toalett i lokala til Samnanger Eigedom. Det vert ikkje gjeve årleg driftstilskot til drift av toalettet. Summen vert finanisert med bruk av næringsfondet og utgiftsført på 14700.1400.3251.

Utbetaling av stønaden skal skje med halvparten av summen ved oppstart. Den resterande summen vert utbetalt når det vert framlagt dokumentasjon for utgiftene og toalettet er i drift.

Behandling

Ordførar Knut Harald Frøland (Bl) orienterte om at han har vore i kontakt med Tysse Landhandleri med spørsmål om det vil vera mogleg å få etablert dusj i tillegg til toalett.

Det var semje om å stryka ordet "offentleg" i framlegget til vedtak. Med denne endringa vart rådmannen sitt framlegg samrøystes vedteke.

Etter røystinga bad Inge Aasgaard (Krf) om ny handsaming av saka, fordi han stilte spørsmål om kva konsekvensar det kunne få at ordet "offentleg" var teke vekk i vedtaksteksten. Det vart røysta over om saka skulle handsamast på nytt. 5 medlemmer røysta for at saka skulle handsamast på nytt og 4 for at saka ikkje skulle handsamast på nytt:

Saka vart så teke opp til ny handsaming. Det vart der røysta over rådmannen sitt opprinnelege framlegg, som vart samrøystes vedteke.

Vedtak

Samnanger kommune startar opp arbeidet med kommunal planstrategi for 2018 – 2021. Formannskapet vert styringsgruppe og leiarforum vert arbeidsgruppe. Planleggjar vert ansvarleg for planarbeidet.

Endeleg planstrategi skal handsamast av kommunestyret i november 2018.

Behandling

Øyvind Strømmen (Mdg) spurde om sak om oppstart av arbeidet med kommunal strategi skal handsamast i kommunestyret. Assisterande rådmann Hilde-Lill Våge orienterte om at administrasjonen ikkje har lagt opp til dette, men at formannskapet sjølvsagt kan velja å leggja saka fram for kommunestyret.

Øyvind Strømmen foreslo at kommunestyret handsamar saka, og at formannskapet gir innstilling til kommunestyret. Formannskapet slutta seg til dette.

Rådmannen sitt framlegg til vedtak vart samrøystes vedteke.

Vedtak

Samnanger kommune prioriterer søknadar til ordninga Tilskot til lokale kulturarenaer slik:

1. Samnanger bibliotek – kjøp av lokale

Behandling

Rådmannen sitt framlegg til vedtak vart samrøystes vedteke.

Vedtak

Kulturmidlane vert fordelt som det går fram av tabellen i saksframlegget.

Behandling

Rådmannen sitt framlegg til vedtak vart samrøystes vedteke.

Vedtak

Formannskapet tek rapporten om breibandsdekning til orientering. Det skal mellom anna på grunnlag av rapporten utarbeidast målsetjingar for breibandstilbodet i kommunen. Dette arbeidet kan gjerast som ein del av arbeidet med samfunnsdelen av kommuneplanen. På grunnlag av målsetjingane som vert vedtekne må det utarbeidast strategi/plan for vidare utbygging av breiband i kommunen.

Samnanger kommune må søkja om tilskotsmidlar til breibandsutbygging i NKOM sin søknadsrunde i 2018. Ved behov kan det leigast inn ekstern konsulent for å få utarbeidd søknadsgrunnlag i område det ikkje vart søkt om tilskot til i 2017. Eventuell innleige av ekstern konsulent vert finansiert med omdisponering av inntil 50.000 kroner av midlane som er avsett til tilskot til breibandsutbygging i området Rolvsvåg – Saga.

Behandling

Rådmannen sitt framlegg til vedtak vart samrøystes vedteke.

Vedtak

Etter ekstern rapport frå advokat hos KS vert det fastslått at Samnanger kommune ikkje har juridisk plikt til å betra vegtilkomsten hos Economuseé Fjordtønna.

Kommunen vil likevel gje ein kompensasjon på kr. 200.000,- til Fjordtønna.

Pengane vert teke frå disposisjonsfondet.

Behandling

Arild Røen (H) sette fram følgjande framlegg til vedtak:

"Samnanger kommune går i dialog med Fjordtønna om kompensasjon for meirutgifter dei er påført som economusee."

Øyvind Røen (Sp) bad om gruppemøte.

Etter gruppemøtet sette Arild Røen fram følgjande tillegg til det første framlegget sitt:

"Kompensasjon kr 500.000.-"

Monica Tjønna (Sp) sette fram følgjande framlegg til vedtak:

"Etter ekstern rapport frå advokat hos KS vert det fastslått at Samnanger kommune ikkje har juridisk plikt til å betra vegtilkomsten hos Economuseé Fjordtønna.

Kommunen vil likevel gje ein kompensasjon på kr. 200.000,- til Fjordtønna.

Pengane vert teke frå disposisjonsfondet."

I røystinga fekk Monica Tjønna sitt framlegg 5 røyster og Arild Røen sitt framlegg 4 røyster.

Vedtak

Formannskapet opprettheld vedtaket sitt av 22.02.2018 i sak 008/2018. Det innkomne kravet om lovlegkontroll vert sendt til fylkesmannen for handsaming.

Behandling

Formannskapet vart samde om følgjande fellesframlegg til vedtak:

"Formannskapet opprettheld vedtaket sitt av 22.02.2018 i sak 008/2018. Det innkomne kravet om lovlegkontroll vert sendt til fylkesmannen for handsaming."

Framlegget vart samrøystes vedteke.