Møte i Kommunestyret den 21.02.2019

Vedtak

Møteinnkallinga og saklista vert godkjent.Delegerte vedtak/referatsaker vert tekne til orientering.

Behandling

Godkjenning av innkalling og sakliste
Ordførar Knut Harald Frøland (Bl) viste til tilleggssak om møtegodtgjersle til varamedlemmer som vart sendt ut på e-post 21.02.2019. Han bad om at denne saka vart teken inn på saklista, og at saka vart handsama etter interpellasjonane i møtet. Kommunestyret slutta seg til ordføraren sitt ønske.

Det var ingen andre merknader til innkallinga eller saklista.


Eventuelle merknader til protokoll frå førre møte
Ingen merknader.

Orienteringssaker

Informasjon om status i organisasjonen
Rådmann Charlotte Hageberg orienterte om status, utfordringar og planlagte endringar i kommuneorganisasjonen.

Utvalet sitt kvarter

Avtalevilkår og kostnader legetenesta
Sture Tveit (H) viste til artikkel i Samningen i januar 2019 med oversikt over nyetablerte verksemder i Samnanger. Der gjekk det mellom anna fram at to legar nyleg har etablert seg med enkeltmannsføretak i kommunen. Sture Tveit ønska ei orientering frå rådmannen om legane sine avtalar/avtalevilkår og økonomiske forhold knytt til dette. Rådmann Charlotte Hageberg orienterte etter dette om legane sine avtalevilkår og om kommunen sine kostnader til drift av legekontoret på Haga.

Fartsdumpar på vegen frå Haga til Tysse
Monica Tjønna (Sp) viste til tidlegare diskusjon i kommunestyret, og spurde om det vert gjort noko for å flata ut fartsdumpane på strekninga Haga - Tysse slik at fartsgrensa kan aukast til 50 kilometer i timen. Assisterande rådmann Hilde-Lill Våge viste til at kommunen sin trafikksikringsplan er vedteken av kommunestyret, og at det i arbeidet med planen ikkje kom inn forslag om å flata ut/fjerna fartsdumpane på strekninga Haga - Tysse. Hilde-Lill Våge orienterte også om kva trafikksikringstiltak som ligg inne i planen og som administrasjonen arbeider med. Ho orienterte til slutt om at det vil vera mogleg å ta dette inn som tiltak når trafikksikringsplanen skal reviderast.

Spørsmål om bruk av brøytepinnar i plast
Øyvind Strømmen (Mdg) viste til at det blir brukt brøytepinnar i plast på fylkesvegen over Kvamskogen, og spurde om kommunen òg brukar brøytepinnar i plast. Administrasjonen kunne ikkje svara på dette spørsmålet i møtet, men vil undersøkja dette. Øyvind Strømmen sa at han vil oppmoda om at kommunen oppmodar Vegvesenet om å ta i bruk brøytepinnar i anna materiale enn plast. Øyvind Strømmen informerte òg om at han kjem til å levera inn eit skriftleg spørsmål om bruk av brøytepinnar i plast.

Kvalitet i barnehage
Martin Haugen (Bl) viste til informasjon i Samningen om at nokre representantar på førre møte i formannskapet kom med påstandar om at kvaliteten i barnehagen var blitt dårlegare. Han oppmoda om at dei som kom med desse påstandane kjem med dokumentasjon på at kvaliteten er blitt dårlegare. Rådmann Charlotte Hageberg svara og orienterte om sitt syn på påstandane som vart sett fram i formannskapet.

Økonomirapportering til formannskapet
Brigt Olav Gåsdal (A) viste til at kommunestyret i desember bestemte at på grunn av store innsparingar på ulike kapittel i budsjettet, skulle formannskapet orienterast fortløpande om den økonomiske utviklinga, målt opp mot kvaliteten i tenestenivået. Han spurde om ordføraren er nøgd med den rapporteringa som er gitt til no. Ordførar Knut Harald Frøland (Bl) svara at han er nøgd med rapporteringa.

Interpellasjonar som vart handsama i møtet:

• Interpellasjon frå Odd Arne Haga (Frp) om tannlegetenesta

• Interpellasjon frå Monica Tjønna (Sp) om avviksmeldingar

Samrøystes vedtak.

Vedtak

Det vert gjort følgjande endringar i kommunestyret sin møteplan for 2019:

• Kommunestyremøtet i april vert flytta til torsdag 04.04.2019.

• Kommunestyremøtet i juni vert flytta til måndag 03.06.2019.

Vedtaket er gjort med heimel i § 32 i kommunelova, jf. Samnanger kommune sitt reglement for kommunestyret m.fl.

Behandling

Rådmannen sitt framlegg vart samrøystes vedteke.

Vedtak

Administrasjonen får i oppgåve å utreda kostnad for å utbetre eksisterande veg til Hagabotnane. Dette er eit alternativ som kan koma fortare i gong då dei andre alternativa er dyre.

Spørsmål om siling av alternativ for val av reguleringsalternativ vert utsett til me har oversikt over framtidig bruk av areal ved Hagabotnane med tanke på plassering av hall og bustadbygging. Skolestrukturen skal og vera ein del av vurderingane.

Behandling

Ordførar Knut Harald Frøland (Bl) orienterte innleiingsvis om at Øyvind Strømmen (Mdg), Lena Tveit (Bl) og Øyvind Røen (Sp) hadde meldt inn spørsmål om gildskapen sin i denne saka. Etter dette orienterte desse tre om kvifor dei ønska å få gildskapen sin vurdert. Alle tre gjekk frå medan kommunestyret handsama gildskapen deira. Under denne handsaminga gjekk følgjande personar inn som varamedlemmer:

• Bente Getz (Mdg) gjekk inn som varamedlem for Øyvind Strømmen

• Svein Tore Drevsjø (Bl) gjekk inn som varamedlem for Lena Tveit

• Hilde Aarvik (Sp) gjekk inn som varamedlem for Øyvind Røen

Brigt Olav Gåsdal (A) vart etter framlegg frå ordførar Knut Harald Frøland vald som setjevaraordførar under handsaminga av gildskapen til Øyvind Strømmen, Lena Tveit og Øyvind Røen.

Både Øyvind Strømmen, Lena Tveit og Øyvind Røen vart funne ugilde og deltok derfor ikkje under handsaminga av saka.

12 representantar røysta for at Øyvind Strømmen var ugild og 8 for at han var gild:

11 representantar røysta for at Lena Tveit var ugild og 9 for at ho var gild:

11 representantar røysta for at Øyvind Røen var ugild og 9 for at han var gild:

Bente Getz, Svein Tore Drevsjø og Hilde Aarvik deltok under den vidare handsaminga av saka, og Brigt Olav Gåsdal heldt fram som setjevaraordførar under den vidare handsaminga av saka.

Vidar Tveiterås (A) bad om at det vart halde gruppemøte før røystinga i saka.

Anja Elisabeth G. Markhus (Bl) sette fram følgjande framlegg til vedtak:
"Administrasjonen får i oppgåve å utreda kostnad for å utbetre eksisterande veg til Hagabotnane. Dette er eit alternativ som kan koma fortare i gong då dei andre alternativa er dyre."

Etter gruppemøtet sette Brigt Olav Gåsdal (A) fram følgjande framlegg til vedtak:
"Som Anja Elisabeth Gjerde Markhus sitt framlegg med slikt tillegg: spm. om siling av alt. for val av reguleringsalternativ vert utsett til me har oversikt over framtidig bruk av areal ved Hagabotnane med tanke på plassering av hall og bustadbygging. Skolestrukturen skal og vera ein del av vurderingane."

Anja Elisabeth G. Markhus sitt framlegg vart etter dette slått saman med Brigt Olav Gåsdal sitt framlegg, slik at dette vart eit samla framlegg.

I røystinga vart naturutvalet sitt framlegg sett opp mot framlegget til Anja Elisabeth G. Markhus og Brigt Olav Gåsdal. Framlegget til naturutvalet fekk 1 røyst og framlegget til Anja Elisabeth G. Markhus og Brigt Olav Gåsdal fekk 19 røyster.

Etter røystinga gjekk Bente Getz, Svein Tore Drevsjø og Hilde Aarvik frå, og Øyvind Strømmen, Lena Tveit og Øyvind Røen gjekk tilbake i møtet. Øyvind Røen gjekk òg tilbake som varaordførar i møtet.

Vedtak

Nitter Nordlinder AS (org.nr: 921 440 413) får med heimel i Alkoholloven §1-6 løyve til skjenking av alkoholhaldig drykk (gruppe 1, 2 og 3 jf. Alkoholforskriften §1-1) i Eikedalen skisenter AS

(org.nr: 931 921 568) sitt lokale «Alpinisten» i Kråvegen 108, 5650 Tysse.

Løyvet gjeld:

• skjenking av alkoholhaldig drykk (gr. 1 og 2) frå kl. 12:00 – kl. 22:00.

• skjenking av alkoholhaldig drykk (gr. 3) frå kl. 13:00 – kl. 22:00 (jf. Al.§4-4 4.ledd).

• eit avgrensa uteområde/ terrassen utanfor lokalet.

Behandling

Monica Tjønna (Sp) sette fram følgjande framlegg til vedtak:
"Det vert ikkje gjeve løyve til servering av alkohol i området til Eikedalen Skisenter. Dette vert grunngjeve med tryggleiken og sikkerheita i skianlegget, samt dei ordensmessige utfordringane politiet vil kunne få, som følgje av overstadig rusa personar. Ein viktig faktor i denne vurdering er den frå politiet, som er synet på området som eit rekreasjonsområdet for barn og unge, og ikkje minst for barnefamiiiar generelt. Politiet si grunngjeving er god nok til å seia nei."

Martin Haugen bad om gruppemøte.

Etter gruppemøtet trekte Monica Tjønna det første framlegget sitt, og sette i staden fram følgjande nye framlegg:
"Søknaden vert ikkje imøtekomme.
Dette vert grunngjeve med tryggleiken og sikkerheita i skianlegget, samt dei ordensmessige utfordringane som kan oppstå, med tanke på beredskap, som følgje av overstadig rusa personar."

I røystinga vart rådmannen sitt framlegg sett opp mot Monica Tjønna sitt framlegg. Rådmannen sitt framlegg fekk 13 røyster og Monica Tjønna sitt framlegg fekk 7 røyster.

Vedtak

Kvamnet AS sin søknad om økonomisk støtte frå Samnanger kommune på 120 000 kroner for å dekka delar (ca. 20%) av uføresette ekstrakostnader til fiberutbygginga i området Rolvsvåg – Saga, vert innvilga. Vedtaket vert finansiert som følgjer:

• 65.000 kroner – resterande/udisponert sum av breibandsmidlane (349.000 kroner) som vart løyvd av kommunestyret i 2017 til utbygging i området Rolvsvåg – Saga.

• 55.000 kroner av breibandsmidlane (100.000 kroner) som er avsett frå næringsfondet i 2019-budsjettet.

Behandling

Formannskapet si tilråding vart samrøystes vedteke.

Vedtak

Rådmannen får fullmakt til å utvida stillingsramma i rådmannen sin stab med 100% stilling i tidsrommet 01.04.2019 – 31.12.2019. Stillinga skal primært vera knytt til HR (løns- og personalkontoret). Det vert gjeve tilleggsløyving frå disposisjonsfondet på inntil 460.000 kroner til finansiering av lønsutgiftene for denne stillinga i 2019.

Frå og med 01.01.2020 vert stillinga delt i to stillingsdelar:

1. Ca. 50% konsulentstilling ved HR (løns- og personalkontoret)

2. Ca. 50% stilling som IKT-koordinator

Lønsmidlar til 50% stilling som IKT-koordinator ligg allereie inne i økonomiplanen frå og med 2020. Lønsmidlar til den resterande 50%-stillingsdelen må leggjast inn i rådmannen sitt budsjettframlegg for 2020.

Behandling

Jon Magne Bogevik (Uavh) viste til omgrepet "HR" som er brukt i saksutgreiinga, og oppmoda om at administrasjonen brukar nynorsk og nynorske omgrep i saksutgreiingar. Ordførar Knut Harald Frøland (Bl) bad administrasjonen om å ta med seg dette.

Formannskapet si tilråding vart samrøystes vedteke.

Vedtak

Olav Haga (f.16.04.1959) får fritak for politisk verv som 7.varamedlem for Arbeidarpartiet i kommunestyret i Samnanger kommune ut kommunestyreperioden 2015-2019

jf. reglar i Valgloven §15.

Opprykk av varamedlem jf. Kommuneloven §16.2.

Behandling

Rådmannen sitt framlegg vart samrøystes vedteke.

Vedtak

Innvilga underskotsgaranti på kr 200 000 vert trekt.

Samnanger Live AS vert gitt kr 10 000 i tilskot til markedsføring av Samningakraft uavhengig av gjennomføring av arrangement. Tilskotet vert gitt med følgjande forbehold:

• Innan 01.04.19 skal det leverast ein plan for gjennomføring til administrasjon som inneheldt punkta: infrastruktur, skilting, sikkerhet, støy, reinhald og hygiene, servering, skjenkebevilling, bruk av frivillige, sponsorar, stadfesting av artistar samt tillatelse frå grunneigarar og politiet og melding til brannvesenet og mattilsynet.

• Administrasjonen må syta for at det er tilbakestillingsgaranti i utleigekontrakten.

Tilskotet vert finansiert frå næringsfondet konto 1.1400.3251

Dersom arrangementet vert gjennomført vert det gitt inntil kr 30 000 i tilskot som skal gå til frivillige lag i kommunen og inntil kr 10 000 til container og lastebil. Arrangøren må på dette tidspunktet ha eit registrert organisasjonsnummer. Tilskotet vert finansiert frå næringsfondet konto 1.1400.3251. dersom arrangementet ikkje har økonomiske midlar til å finansiere dette sjølv. Utbetalinga skjer ved framsyning av sluttrekneskap.

Behandling

Formannskapet si tilråding vart samrøystes vedteke.

Vedtak

I økonomiplanen som vart vedteken av kommunestyret 13.12.2018 er det løyvd 1.380.000 kroner til skifte av økonomi- og lønssystem i 2020.

1.000.000 kroner av denne løyvinga vert no overført til 2019, slik at innføringsprosjekt for nytt økonomi- og lønssystem kan gjennomførast hausten 2019. Løyvinga vert finansiert ved bruk av ubunde investeringsfond.

Rådmannen har fullmakt til å gjera vedtak om val av leverandør av økonomi- og lønssystem.

Behandling

Rådmannen sitt framlegg vart samrøystes vedteke.

Vedtak

Kommunestyret ber om at det vert iverksatt ei ekstern gransking av dei tre barnevernsakene i Samnanger kommune som rådmannen har motteke bekymringsmelding om. Det skal i granskinga sjåast på om kommunen si handtering/framgangsmåte i sakene har vore i samsvar med gjeldande reglar, normer og verdiar. Ein skal sjå på prosessane fram mot vedtak/beslutningar og vurdera metodane som er brukt.

Det må så langt som mogleg konkluderast i kvar av dei tre sakene og seiast noko om det ligg føre nokon grunn til oppreising i sakene. Rapport frå granskinga må liggja føre innan utgangen av oktober 2019. Kommunestyret skal få presentert resultatet av granskinga når rapporten ligg føre.

Rådmannen har ansvar for å førebu og gjennomføra konkurranse om granskingsoppdraget, og for å velja leverandør og inngå kontrakt med dei som skal gjennomføra oppdraget. Det er ein føresetnad at dei som skal gjennomføra oppdraget, må ha nødvendig barnevernfagleg og juridisk kompetanse. Det vert løyvd 600.000 kroner til dette arbeidet, finansiert av disposisjonsfondet. Dersom det vert behov for ytterlegare midlar, må det leggjast fram sak om dette i kommunestyret.

Behandling

Ordførar Knut Harald Frøland (Bl) orienterte innleiingsvis om at rådmannen ønska at saka skulle handsamast for lukka dører. Møtet vart lukka medan kommunestyret drøfta om saka skulle handsamast for lukka dører. Møtet vart opna igjen før røystinga om dette spørsmålet. Kommunestyret vedtok samrøystes at saka skulle handsamast for lukka dører, med heimel i § 31.4 jf. § 31.2 i kommunelova. Møtet vart etter dette lukka igjen.

Inge Aasgaard (Krf) bad om å få gildskapen sin vurdert. Han orienterte også kort om bakgrunnen for dette. Han gjekk frå medan kommunestyret handsama gildskapen hans. Inge Aasgaard vart samrøystes funnen gild, og deltok derfor i den vidare handsaminga av saka.

Rådmann Charlotte Hageberg gav ei kort orientering om dei tre barnevernsakene som saka gjeld. Etter dette svara ho på spørsmål under debatten i kommunestyret.

Undervegs i debatten kom Inge Aasgaard med ny informasjon knytt til spørsmålet om gildskapen sin. Han informerte om at han hadde møtt som vitne frå kommunen i fylkesnemnda i ei av barnevernssakene som saka gjeld. Gunn Totland Moss (Krf) informerte om at også ho møtte som vitne i den same saka, i eigenskap av at ho var helsesøster i kommunen. Det vart etter dette gjennomført ny debatt i kommunestyret om gildskapen til Inge Aasgaard, samt om gildskapen til Gunn Totland Moss. Begge to gjekk frå under denne debatten.

Inge Aasgaard vart funnen gild med 12 mot 6 røyster:

Gunn Totland Moss vart funnen gild med 14 mot 4 røyster:

Etter dette tok Inge Aasgaard og Gunn Totland Moss plass igjen i møtet og deltok under resten av handsaminga av saka.

Møtet vart opna igjen før kommunestyret si endelege røysting i saka. 10 medlemmer røysta for rådmannen sitt framlegg til vedtak og 10 røysta imot. Rådmannen sitt framlegg vart vedteke med ordføraren si "dobbelstemme" ved stemmelikheit.

Vedtak

"Med verknad frå 01.01.2019 vert punkt 4.1 om møtegodtgjersle i Samnanger kommune sitt reglement for godtgjersle endra til:

a. Høg sats - Møtegodtgjersle på 0,2% av ordførargodtgjersla vert utbetalt til møtande medlemmer og varamedlemmer i kommunestyret, formannskapet, naturutvalet, kontrollutvalet, administrasjonsutvalet, arbeidsmiljøutvalet, eldrerådet, rådet for personar med nedsett funksjonsevne, røystestyra, sakkunnig nemnd for eigedomsskatt og klagenemnda for eigedomsskatt. Varamedlemmer som berre deltek i handsaminga i ei sak i møte der det er fleire saker oppe til handsaming, får halv møtegodtgjersle.

b. Låg sats - Møtegodtgjersle på 0,1% av ordførargodtgjersla vert utbetalt til møtande medlemmer og varamedlemmer i andre råd, styre, utval, komitear og nemnder som er oppretta av kommunestyret med heimel i kommunelova eller særlov. Det vert berre utbetalt møtegodtgjersle til folkevalde, ikkje til medlemmer som representerer andre enn Samnanger kommune. Varamedlemmer som berre deltek i handsaminga i ei sak i møte der det er fleire saker oppe til handsaming, får halv møtegodtgjersle.

c. Kommunestyret kan bestemma at høg sats skal utbetalast òg til andre råd, styre, utval, komitear og nemnder enn dei som er lista opp i punkt a. Dette bør berre gjerast dersom det er grunn til å tru at arbeidsbelastninga for medlemmene vil vera stor. Kommunestyret kan òg bestemma at det skal utbetalast møtegodtgjersle til andre medlemmer enn folkevalde.

d. For ungdomsrådet fastset kommunestyret eigen sats for møtegodtgjersle.”

Behandling

Ordførar Knut Harald Frøland (Bl) sette fram følgjande framlegg til vedtak:

"Med verknad frå 01.01.2019 vert punkt 4.1 om møtegodtgjersle i Samnanger kommune sitt reglement for godtgjersle endra til:

a. Høg sats - Møtegodtgjersle på 0,2% av ordførargodtgjersla vert utbetalt til møtande medlemmer og varamedlemmer i kommunestyret, formannskapet, naturutvalet, kontrollutvalet, administrasjonsutvalet, arbeidsmiljøutvalet, eldrerådet, rådet for personar med nedsett funksjonsevne, røystestyra, sakkunnig nemnd for eigedomsskatt og klagenemnda for eigedomsskatt. Varamedlemmer som berre deltek i handsaminga i ei sak i møte der det er fleire saker oppe til handsaming, får halv møtegodtgjersle.

b. Låg sats - Møtegodtgjersle på 0,1% av ordførargodtgjersla vert utbetalt til møtande medlemmer og varamedlemmer i andre råd, styre, utval, komitear og nemnder som er oppretta av kommunestyret med heimel i kommunelova eller særlov. Det vert berre utbetalt møtegodtgjersle til folkevalde, ikkje til medlemmer som representerer andre enn Samnanger kommune. Varamedlemmer som berre deltek i handsaminga i ei sak i møte der det er fleire saker oppe til handsaming, får halv møtegodtgjersle.

c. Kommunestyret kan bestemma at høg sats skal utbetalast òg til andre råd, styre, utval, komitear og nemnder enn dei som er lista opp i punkt a. Dette bør berre gjerast dersom det er grunn til å tru at arbeidsbelastninga for medlemmene vil vera stor. Kommunestyret kan òg bestemma at det skal utbetalast møtegodtgjersle til andre medlemmer enn folkevalde.

d. For ungdomsrådet fastset kommunestyret eigen sats for møtegodtgjersle.”

Framlegget til Knut Harald Frøland vart samrøystes vedteke.