Møte i Kommunestyret den 13.09.2018

Vedtak

• Møteinnkallinga og saklista vert godkjent.

• Delegerte vedtak/referatsaker vert tekne til orientering.

Behandling

Godkjenning av innkalling og sakliste
Det var ingen merknader til innkallinga eller saklista.

Ordførar Knut Harald Frøland (Bl) foreslo at kurset om samfunnsansvar og antikorrupsjon ikkje vart streama på internett. Kommunestyret slutta seg til dette forslaget.

Eventuelle merknader til protokoll frå førre møte
Det var ingen merknader til protokollen frå førre møte.

Kurs i samfunnsansvar og antikorrupsjon
Kurset vart halde av advokat John Hadler-Olsen (Deloitte Advokatfirma AS) kl. 16.20 - 17.35. Lysarka frå kurset følgjer som vedlegg til møteprotokollen.


Orienteringssaker:

Sjukefråværsstatistikk
Rådmann Charlotte Hageberg orienterte om sjukefråværet i kommunen, som er markert lågare enn i 2017. Sjukefråværet i august 2018 var 3,71%.

Status overføring av kommunen si IKT-drift til IKT Nordhordland
Rådmann Charlotte Hageberg orienterte om status i saka om overføring av kommunen sin IKT-drift til IKT Nordhordland. Det ser no ut til det blir ei forskyving med omsyn til når Samnanger kan gå inn i IKTNH. Sak om å ta opp nye medlemskommunar i IKTNH vil truleg koma opp i kommunestyra i IKTNH-kommunane i februar/mars/april 2019. I denne omgangen er det Samnanger, Austevoll og Gulen som er aktuelle som nye medlemskommunar.

Økonomi
Rådmann Charlotte Hageberg orienterte om at budsjettarbeidet til no viser at 2019 blir eit kjempetøft økonomisk år og at kommunen må kutta kostnader. Ho orienterte om at det er leigd inn ein ekstern konsulent for å kartleggja drifta i alle einingane i kommunen (inkludert sentraladministrasjonen). Han skal ha intervju med alle einingane for å kartleggja drifta. Rapport frå kartlegginga vil truleg vera klar til midten av oktober. Nokre av funna/tilrådingane i rapporten kan kanskje takast inn i rådmannen sitt budsjettframlegg.


Utvalet sitt kvarter:

Avvik Totrævegen
Arild Røen (H) viste til informasjon i formannskapet 30.08.2018 om at verneombodet i teknisk drift har meldt inn avvik på vegen opp mot Totræna i forhold til brøyting komande vinter (verneombodet vil ikkje tilltata at kommunalt tilsette brøytar vegen opp til skianlegget i Totræna komande vinter dersom ikkje eit parti på vegen blir utbetra). Arild Røen spurde om det er gjort noko i denne saka. Ordførar Knut Harald Frøland (Bl) orienterte om at han har vore i kontakt med ein representant frå idrettslaget om saka, og rådd dei til å ha dialog med eining for teknisk drift for å avklara kva tiltak som vil vera nødvendige. Ordføraren har også bedt om at politisk nivå får informasjon dersom det er behov for økonomiske midlar.

Sak om tilskot til nærings- og miljøtiltak i skogbruket
Øyvind Strømmen (Mdg) spurde sak om tilskot til nærings- og miljøtiltak i skogbruket kjem opp til politisk handsaming i Samnanger. Sture Tveit (H) orienterte om at naturutvalet allereie har hatt saka oppe til handsaming.

Status for tiltaka i trafikksikringsplanen
Brigt Olav Gåsdal (A) viste til den vedtekne trafikksikringsplanen. Han bad om at kommunestyret, for eksempel på neste møte, får ein løyperapport om framdrifta for tiltaka i planen. Ordførar Knut Harald Frøland (Bl) orienterte om at han i neste veke skal ha eit møte med administrasjonen om trafikksikringsplanen, der iverksetting av tiltaka i planen er tema.

Midlar frå Havbruksfondet
Odd Arne Haga (Frp) viste til oppslag i media om at kommunen vil få 2,3 millionar kroner frå Havbruksfondet, og spurde om dette er korrekt. Ordførar Knut Harald Frøland (Bl) stadfesta at kommunen vil få desse midlane.

Pensjonistar som mobbeombod på skulane
Monica Tjønna (Sp) viste til ein skule i Asker som har har eit prosjekt der pensjonistar er inne som mobbeombod på skulane. Ho foreslo at tilsvarande prosjekt blir vurdert også i Samnanger, og at frivilligsentralen blir involvert.


Samrøystes vedtak.

Vedtak

Kommunestyret ber rådmannen syte for å:

1. Oppdatere fullmaktsstrukturen i samsvar gjeldande regelverk, og vurdera justeringar i fullmaktsstrukturen slik at den betre samsvarar med behova i organisasjonen.

2. Vurdera om det er sett av tilstrekkeleg med ressursar til å gjennomføra innkjøp i samsvar med regelverk og eigne rutinar.

3. Vurdera opplæringstiltak for å auke innkjøpskompetansen i organisasjonen.

4. Oppdatera rutinar og retningsliner for innkjøp i samsvar med gjeldande regelverk.

5. Syta for at rutiner og retningsliner for innkjøp er enkelt tilgjengeleg for tilsette og leiarar.

6. Syta for at det vert etablert eit system for elektronisk kommunikasjon for anbodsprosessar, jf. komande krav i regelverket.

7. Gjennomføra innkjøp i samsvar med regelverket, under dette;

1. Konkurranseeksponera anskaffingar i samsvar med regelverket.

2. Dokumentera og sikra føreseielegheit og likebehandling i tilbodevalueringa.

3. Stille krav om løns- og arbeidstidsvilkår i samsvar med regelverket.

4. Gjennomføra korrekt avrop på rammeavtalar.

5. Protokollera innkjøp i samsvar med regelverket.

8. Laga ein prioritert handlingsplan til kontrollutvalet innan 15.11.2018 som viser kva tiltak som skal setjast i verk for å følgja opp tilrådingane i rapporten, når tiltaka skal setjast i verk og kven som skal ha ansvaret for iverksettinga.

Behandling

Frode Løvlie frå Deloitte AS orienterte innleiingsvis om forvaltningsrevisjonen som er gjennomført.

Karl Bård Kollbotn (Frp) sette fram følgjande framlegg til tilleggspunkt (punkt 9) i forhold til kontrollutvalet sitt framlegg til vedtak:

"Rådmannen i Samnanger kommune kallar inn: Assisterande Rådmann, Økonomisjef, rådgjevar på rådmannens kontor og alle Einingsleiarar til informasjonsmøte (ein til ein samtaler) og orienterer om konsekvensen av å bryta dei reglane som KS har vedtatt. Rådmann i Samnanger pålegg dei som saken gjelder for - å forplikte seg til å setje seg inn i alle reglane for innkjøp i Samnanger kommune. Det skal lagast eit signeringsskjema for formålet, der begge partar signerer."

På spørsmål frå Karl Bård Kollbotn stadfesta rådmann Charlotte Hageberg at det vil få konsekvensar for tilsette dersom dei bryt regelverket. Etter dette trekte Karl Bård Kollbotn framlegget sitt.

Kontrollutvalet si tilråding vart samrøystes vedteke.

Vedtak

Finansrapportering for 2.tertial 2018 vert tatt til etteretning.

Behandling

Rådmannen sitt framlegg til vedtak vart samrøystes vedteke.

Vedtak

Kommunestyret vel:

• Sunniva Solemdal (10. trinn)

• Mia Holdhus (10.trinn)

• Knut Erik Frøland (10. trinn)

• Ida Skulstad Haugen - Vara (10. trinn)

• Oskar Kienitz (19 år)

til Ungdomsrådet 2018-2020.

Oskar Kienitz er medlem i Ungdomsrådet fram til den nye kommuneloven trer i kraft. Ungdomsrådet konstituerer seg i første møte. Dersom det lykkast å finna fleire medlemmar frå aldersgruppa 16-19 år vil formannskapet stå for eit suppleringsval. Etter at den nye kommuneloven trer i kraft vil aldersgruppa vera 16-18 år.

Behandling

Etter spørsmål frå Sture Tveit (H) vart det avklart at eit etternamn er stava feil i rådmannen sitt framlegg til vedtak. Dette gjeld Knut Erik Frøland (som i framlegget står med etternamnet Frøyland). Denne feilen må rettast opp. Med denne endringa vart rådmannen sitt framlegg vart samrøystes vedteke.

Vedtak

Varmestova2 AS (org.nr: 820 213 122) får med heimel i Alkoholloven §1-6 løyve til skjenking av alkoholhaldig drykk (gr. 1, 2 og 3 jf. alkoholforskriften §1-1) i Eikedalen skisenter AS (org.nr: 931 921 568) sitt lokale «Varmestova».

Løyve gjeld:
- skjenking av alkoholhaldig drykk (gr. 1 og 2) frå kl.12:00 til kl.02:00.
- skjenking av alkoholhaldig drykk (gr. 3) frå kl.13:00 til kl.02:00 (jf. Al§ 4-4, 4.ledd).
- også eit avgrensa uteområde/ terassen utanfor lokalet.

Behandling

Rådmannen sitt framlegg til vedtak vart vedteke med 16 mot 5 røyster.

Vedtak

Kyrkja får 2.650.000,- i driftsbudsjett for Samnanger kyrkjestyre og kontrollutvalet får 750.000,- i driftsbudsjett for 2019.

Behandling

Formannskapet si tilråding vart samrøystes vedteke.

Vedtak

Arven som er ei gåve til Samnangerheimen vert disponert ut over ein 8 års periode med 375 000,- kvart år fom 2018. Det kan under spesielle omstendigheiter forskuddterast eit år med max 375 000 kr, evt overførast restbeløp frå eit år til neste dersom midlane ikkje er brukt i inneverande år. Midlane kan kun brukast til investeringar knytta til Samnangerheimen og ikkje i drifta. Formannskapet vil bli orientert kvart år om kva midlane har vorte brukt til.

Behandling

Formannskapet si tilråding vart samrøystes vedteke.

Vedtak

Samnanger kommune vedtek å finansiera bygging av nytt bufellesskap på Skottabakken ved å nytta 6,4 millionar av tidlegare opptatt lån i tillegg til å ta opp eit nytt lån på 22 millionar. Lånet skal betalast ned over 50 år og ha 2 avdragsfrie år. I 2019 skal det takast opp eit byggelån på kr 10 486 000. Lånet vert tatt opp avdragsfritt og vert betalt tilbake når tilskotet frå Husbanken er mottatt.

Administrasjonen og byggekomiteen får i oppdrag å sjå på innsparinger tiltak undervegs i prosjektet. Det vert rapportert til formannskapet og kommunestyret.

Behandling

Ordførar Knut Harald Frøland (Bl) sette fram følgjande framlegg til vedtak:

"Samnanger kommune har ein krevjande økonomisk situasjon med høg gjeldsgrad og kan vanskeleg finansiere kostnadsauken prosjektet medfører. Prosjekt med bygging av nytt bufellesskap på Skottabakken tar på dette grunnlaget ein pause.

Det skal hausten 2018 utførast ei moglegheitsstudie kor ein vurderer reduksjon i bygningsmasse på Skottabakken. Det skal i same moglegheitsstudie vurderast ei alternativ løysing med bygging av nytt bufellesskap på Erikajorda, kor sal av eksisterande bygningsmasse på Skottabakken er ein del av løysinga.

Til utarbeiding av moglegheitsstudie blir det satt ned ei nemnd beståande av følgjande personar:

• Rådmann –leiar av nemnd

• Verneombod Skottabakken

• Representant frå brukarane

• Leiar råd for personar med nedsett funksjonsevne

• Representant teknisk drift

• Sektorleiar helse og omsorg 

Nemnda konstituerer seg sjølv og rapporterer til formannskapet. Nemnda skal inngå kontrakt med leverandør av moglegheitsstudie.

Det blir satt av inntil 300.000 kroner for dette arbeidet og finansiering skal takast frå tidlegare opptatt lån."


Monica Tjønna (Sp) sette fram følgjande framlegg til vedtak, på vegner av seg sjølv og Brigt Olav Gåsdal (A):

"Samnanger kommune vedtek å finansiera bygging av nytt bufellesskap på Skottabakken ved å nytta 6,4 millionar av tidlegare opptatt lån i tillegg til å ta opp eit nytt lån på 22 millionar. Lånet skal betalast ned over 50 år og ha 2 avdragsfrie år. I 2019 skal det takast opp eit byggelån på kr 10 486 000. Lånet vert tatt opp avdragsfritt og vert betalt tilbake når tilskotet frå Husbanken er mottatt.

Administrasjonen og byggekomiteen får i oppdrag å sjå på innsparinger tiltak undervegs i prosjektet. Det vert rapportert til formannskapet og kommunestyret."

Brigt Olav Gåsdal (A) bad om at det vart gjennomført prøverøysting før den endelege røystinga i saka.

Martin Haugen (Bl) bad om gruppemøte.

Etter gruppemøtet sette ordførar Knut Harald Frøland (Bl) fram følgjande reviderte framlegg til vedtak:

"Samnanger kommune har ein krevjande økonomiske situasjon med høg gjeldsgrad og kan vanskeleg finansiere kostnadsauken prosjektet medfører. Prosjekt med bygging av nytt bufellesskap på Skottabakken tar på dette grunnlaget ein pause.

Det skal hausten 2018 utførast ei moglegheitsstudie kor ein vurderer reduksjon i bygningsmasse på Skottabakken. Til utarbeiding av moglegheitsstudie blir det satt ned ei nemnd beståande av følgjande personar:

• Rådmann – leiar av nemnd

• Verneombod Skottabakken

• Representant frå brukarane

• Leiar råd for personar med nedsett funksjonsevne

• Representant teknisk drift

• Sektorleiar helse og omsorg

Nemnda konstituerer seg sjølv og rapporterer til formannskapet. Nemnda skal inngå kontrakt med leverandør av moglegheitsstudie.

Det blir satt av inntil 300.000 kroner for dette arbeidet og finansiering skal takast frå tidlegare opptatt lån.

Arbeidet skal vera fullført til 01.12.2018."

Ordførar Knut Harald Frøland bad om at det berre vart røysta over dei to vedtaksframlegga som var sett fram i møtet, ikkje over formannskapet sitt vedtak. Bakgrunnen for dette ønsket var at formannskapet sitt vedtak er utforma slik at det ikkje kan brukast som vedtak i kommunestyret. I tillegg er den delen av formannskapet sitt vedtak som eventuelt kan brukast som vedtak i kommunestyret (første avsnitt i formannskapet sitt vedtak), med i vedtaksframlegget som Monica Tjønna og Brigt Olav Gåsdal sette fram i kommunestyret. Kommunestyret slutta seg til ønsket frå ordføraren.

Det vart først gjennomført prøverøysting. Der fekk framlegget til Knut Harald Frøland 11 røyster og framlegget til Monica Tjønna og Brigt Olav Gåsdal 10 røyster.

Det vart så gjennomført endeleg røysting. Der fekk framlegget til Knut Harald Frøland 10 røyster og framlegget til Monica Tjønna og Brigt Olav Gåsdal 11 røyster.