Møte i Formannskapet den 22.11.2018

Vedtak

• Møteinnkallinga og saklista vert godkjent.

• Delegerte vedtak/referatsaker vert tekne til orientering.

Behandling

Gildskap i sak 058/18
Inge Aasgaard (Krf) tok opp spørsmål om sin gildskap i sak 058/18, då han er tilsett som undervisningsinspektør ved Samnanger barneskule. Han har også vore fungerande rektor i periodar.

Aasgaard trer ifrå medan formannskapet vurderer gildskapen hans.

Formannskapet røysta over gildskapen til Inge Aasgard (Krf) i sak 058/18. Resultatet vart som følgjer:

Inge Aasgard (Krf) vart funnen ugild i sak 058/18- Budsjett 2019 og økonomiplan 2019-2022 med 3 mot 2 røyster.

Presentasjon - "Gjennomgang av kommunale virksomheter - Samnanger"
Fjordnes Holding AS v/Erik Fjordnes presenterte resultatet etter gjennomgangen av organisasjonen Samnanger kommune og dei enkelte einingane. Rapporten ligg som vedlegg til denne protokollen.

I forkant av presentasjonen, fortalte rådmannen om kvifor denne gjennomgangen vart bestilt og korleis prosessen har vore. Ho fortalte også om korleis dei enkelte einingane/ avdelingane skal bruke denne rapporten i det vidare arbeidet med å få på plass ein meir effektiv organisasjon.

Representanten Inge Aasgaard (Krf) lurte på korleis politikarane skal forhalde seg til rapporten og om det vert høve til å diskutere dette politisk. Rådmannen fortel at dette skal vera eit hjelpemiddel som administrasjonen skal bruka når ein skal sjå på kostnadane, og på kor i organisasjonen ein kan innføra eventuelle sparetiltak.

Mulighetsstudie fleirbrukshall
Som vedlegg til møteinnkallinga ligg rapporten "Mulighetsstudie flerbrukshall" frå Fortunen Arkitektur (datert 31.10.2018). Odd Arne Haga (Frp)understreker at det er mykje som gjenstår før kommunestyret kan ta stilling til ei eventuell sak. Det har til dømes ikkje komme fram informasjon om finansiering eller ein tidsplan for gjennomføring av prosjektet.

Veg til Hagabotnane
Planleggjar Roald Aandahl orienterte om dei ulike alternativa ein kan nytte når det gjeld vegbredda på ein ny vegtrase til Hagabotnane og reglane rundt dette. Han viser til Statens vegvesen si handbok N100. Reguleringsplansarbeidet vil truleg starte til sommaren.

Ekstrasaker til handsaming
Administrasjonen hadde eit ønskje om at saka "Krav om dekking av juridisk bistand til innsyn i dokumenter flv §36 vedk. vassledning i Krekavegen" og saka "Privatrettsleg erstatningskrav - dekking av sakskostnader vedk. vassledning i Krekavegen" skulle handsamast i dette formannskapesmøte.

Formannskapet røysta over om desse to sakene skulle handsamast i møte. Det vart samrøystes vedteke at begge sakene skulle handsamast i dette formannskapsmøte 22.11.2018. Begge sakene vert handsama før Budsjett 219 og Økonomiplan 2019-2022.

Utvalet sitt kvarter:

Arkivering
Odd Arne Haga (Frp) stilte spørsmål om kvifor ikkje politikarane hadde fått informasjon om avvik frå Arkivverket.
Rådmannen fortalte at det ikkje har vore tilsyn frå Arkivverket, men at kommunen har tett dialog med etaten. Samnanger kommune har starta arbeidet med å få ein arkivplan på plass.

Skottebakken
Odd Arne Haga (Frp) sette fram følgjande spørsmål:
"Ifølge nabo på Skottebakken er bygget tegnet inn på et gammelt kart som ikke er korrekt. På det riktige kartet bygget plassert over bekken som vi har fått dispensjon til å bygge 1 meter fra. Hvis dette er riktig må vi da søke dispensasjon på å flytte bekken?"
Ass.rådmann informerte om at kommunen er i dialog med naboen, og at ein prøver å komma til ein einigheit.

Fødselspermisjon for ordførar
Ordførar Knut Harald Frøland (Bl) informerte om at han har vorte far. Ordførar har ikkje dei same sosiale rettane som dei tilsette i Samnanger kommune har. Med bakgrunn i dette og sette ordførar fram følgjande framlegg til vedtak: "Ordførar Knut Harald Frøland får innvilga omsorgspermisjon inkl. godtgjersle i perioden 23.11.2018 til 06.12.2018. I denne perioden er Øyvind Røen ordførar og Øyvind Strømmen er varaordførar."

Framlegget frå ordføraren vart samrøystes vedteke.

Vedtak

Samnanger kommune melder seg inn i Stiftinga Kystsogevekene. Kontingenten på kr 10 000 vert dekka av midlar som i budsjettet for 2019 er sett av til marknadsføring knt 11402.1400.3251.

Behandling

Rådmannen sitt framlegg vart samrøystes vedteke.

Vedtak

Møtegodtgjersle for ungdomsrådet sine medlemmar vert sett til kr. 400,- pr. møte.

Behandling

Lena Tveit (Bl) sette fram følgjande framlegg til vedtak:
Møtegodtgjersle for ungdomsrådet sine medlemmar vert sett til kr. 400,- pr. møte.

Framlegget frå Lena TVeit (Bl) vart samrøystes vedteke.

Vedtak

1. Samnanger kommune vedtek at BIR Privat AS delegerast mynde til fakturering og innkrevjing av avfallsgebyr på vegne av Samnanger kommune, jmfr § 12 i forskrift om handtering av avfall frå hushaldning. Avfallsgebyret tilhøyrer Samnanger kommune.
2. Prisen på renovasjonstenesten for 2019 setjast ned med 0,5 %, med unntak av eigenandelene for levering til gjenvinningsstasjonane og einskilde tenester utanfor standard renovasjon. Desse vert holdt uendra.

Behandling

Rådmannen sitt framlegg til vedtak varrt samrøystes vedteke.

Vedtak

Rådmannen får fullmakt til å kreva inn årleg tillsynsavgift jf. forskrift om registrering og tilsyn med tobakksvarer § 24.
Sats: 4500,- pr år for faste salsplassar og 1200,- pr. år for mellombelse salsplassar.

Behandling

Rådmannen sitt framlegg til vedtak vart samrøystes vedteke.

Vedtak

Rådmannen sitt framlegg til budsjett 2019 og økonomiplan 2019 - 2022 vert vedteke slik det ligg føre med vedlegg budsjettskjema 1A, 2A, hovudoversikt drift, hovudoversikt investering, netto driftsutgifter og detaljar investering.

Det vert tatt opp eit lån på kr 22 millionar i 2019 til finansieringa av Skottabakken. Lånet skal betalast ned over 50 år og ha to avdragsfrie år. Me vil i tillegg ta opp eit byggelån på 10.486.000 kroner som vil bli tilbakebetalt så snart Husbanken betalar ut sitt tilskot.

Kommunen betaler i dag meir i avdrag på lån enn det som det er krav om. Utrekning viser at betaling av avdrag kan reduserast med 700 000 kroner kroner i 2019. Dette er lagt til grunn i økonomiplanframlegget og kommunen må søkja Kommunalbanken om forlenga løpetid på lån i samsvar med dette.

I medhald av eigedomsskattelova §§ 2 og 3 skal fylgjande utskrivingsalternativ nyttast for skatteåret 2019:

Den generelle skattesatsen som skal gjelda for dei skattepliktige eigedomane vert sett til 7 promille. I medhald av eigedomsskattelova §12 bokstav a vert satsane differensiert ved at den satsen som skal gjelda for bustader og fritidseigedomar vert sett til 2,4 promille.

For bustaddelen av eigedomen (gjeld og fritidseigedom) vert det gitt eit botnfrådrag på kr 100 000 av takstverdi. Botnfrådraget vert gitt for alle sjølvstendige bustaddelar. Botnfrådrag vert ikkje gitt når eigedomen vert nytta til næringsverksemd.

I medhald av eigedomsskattelova § 7 bokstav a vert det gitt fritak til stiftingar eller institusjonar som har som formål å gagna kommunen, fylke eller staten. Unnateke er kommersielle stiftingar/ institusjonar. Fritaket vil gjelda forsamlingshus, bedehus, turisthytter og liknande. Fritak kan og vurderast på grunnlag av søknad.

I medhald av eigedomsskattelova § 7 bokstav b vert det gitt fritak for bygningar som har historisk verdi med 100 prosent. Fritak kan og vurderast på grunnlag av søknad. Det er eit krav at bygget har bevart sin opphavlege arkitektoniske stil og at det ikkje vert brukt til forretningsverksemd.

I medhald av eigedomsskattelova § 7 bokstav c vert det gitt fritak for nybygde bustadeigedomar (gjeld ikkje fritidseigedomar) i 1 år, eller til kommunestyret endrar eller opphevar fritaket. Fritaket gjeld bygg der det vert starta bygging i 2018 eller seinare. Formannskapet får fullmakt til å avgjera einskildsaker om skattefritak.

Kommunestyret har vedtatt å bruka formuesgrunnlag frå skatteetaten for utskriving av eigedomsskatt på bustadhus. Bustadhus og hytter utan formuesgrunnlag vert takserte. Det same gjeld næringsverksemd, tomtar mm. Ved taksering og utskriving av eigedomsskatt nyttar kommunen dei til ei kvar tid gjeldande skattevedtekter.

Eigedomsskatten skal betalast i 4. terminar.

Bustadområde

Administrasjonen tek initiativ til dialog  med utbyggarar om moglegheit for utbygging på Ericajordet.

Administrasjonen tek og initiativ til dialog med grunneigar og utbyggarar om potensielle utbyggingsområde for bustadbygging og næringsområde i arealplanen.

Kvalitetsdialog om modell for bærekraftige drifts- og vedlikehaldsutgifter

Samnanger kommune skal i 2019 gjennomføra kvalitetsdialog om ny vegmodell for Samnanger kommune. Ei målsetting med kvalitetsdialogen skal vera at kommunen har bærekraftige drifts- og vedlikehaldsutgifter og at ein søkjer løysingar med størst mogeleg grad av rettferdighet.

Forslag til ny vegmodell skal sjåast i lys av Fylkeskommunen sin vurdering av om-klassifisering av fylkesvegar (Ref. Handlingsprogram 2018 – 2021).

Til gjennomføring av kvalitetsdialog om ny vegmodell for Samnanger kommune blir det satt ned ei ad-hoc nemnd beståande av følgjande personar:

1. Ordførar

2. Vidar Tveiterås (Ap)

3. Øyvind Røen (Sp)

4. Sture Tveit (H)

5. Odd Arne Haga (frp)

6. Leiar Teknisk drift (sekretær)

Nemnda konstituerer seg sjølv og rapporterer for formannskapet.

Det er ei målsetting at eventuelle anbefalte løysingar skal vera klar vår 2019.

Behandling

Inge Aasgaard (Krf), er tidlegare i møtet, funnen ugild i saka. Han er tilsett som undervisningsinspektør ved Samnanger barneskule og har vore fungerande rektor i periodar. Han deltek difor ikkje i handsaminga av Budsjett 2019 og Økonomiplan 2019-2022.

Monica Tjønna (Sp) møtte kl. 12:45 og deltok difor berre i delar av handsaminga av denne saka. Ho var med å røysta i saka.

Økonomisjefen bemerkar at det er feil årstal i rådmannen sitt framlegg til vedtak i det 9. avsnittet - "Fritaket gjeld bygg der det vert starta bygging i 2018 eller seinare." Dette vert retta opp i av administrasjonen.

Rådmannen presenterte budsjettet 2019 og økonomiplan 2019-2022 for formannskapet. I rådmannen sitt forslag vil driften av kommunen verta redusert med 6 millionar i 2019. Samstundes vert det investert i ny teknologi. Det vert også fokusert på kompetanseheving i einingane.

Formannskapet diskuterte saka, og var einige med administrasjonen i at disposisjonsfondet bør styrkjast slik at kommunen kan handtere ei eventuell renteauke på dei kommunale låna. Dette vert sett på som ei betre løysing enn å låse store delar av låna med fastrenter.

Øyvind Røen (Sp) sette fram ønskje om eit gruppemøte slik at ein kunne diskutere godtgjersla til politikarar i nemnder og ad.hoc grupper. Etter gruppemøtet signaliserte formannskapet at dei ønskjer at godtgjersle til medlemmar i nemnder og ad-hoc grupper vert handsama som eiga sak i eit seinare formannskapsmøte.

Øyvind Røen (Sp) lurte på om avtalen om medlemskap i Norsk bane gjeld til den evt. vert sagt opp. Dette sjekker administrasjonen opp i til handsaminga i kommunestyret.

Arild Røen(H) sette fram følgjande fellesframlegg:
Bustadområde
«Administrasjonen tek initiativ til dialog  med utbyggarar om moglegheit for utbygging på Ericajordet. Administrasjonen tek og initiativ til dialog med grunneigar og utbyggarar om potensielle utbyggingsområde for bustadbygging og næringsområde i arealplanen».

Ordførar Knut Harald Frøland (Bl) sette fram følgjande framlegg:
Kvalitetsdialog om modell for bærekraftige drifts- og vedlikehaldsutgifter
"Samnanger kommune skal i 2019 gjennomføra kvalitetsdialog om ny vegmodell for Samnanger kommune. Ei målsetting med kvalitetsdialogen skal vera at kommunen har bærekraftige drifts- og vedlikehaldsutgifter og at ein søkjer løysingar med størst mogeleg grad av rettferdighet.

Forslag til ny vegmodell skal sjåast i lys av Fylkeskommunen sin vurdering av om-klassifisering av fylkesvegar. (Ref. Handlingsprogram 2018 – 2021)

Til gjennomføring av kvalitetsdialog om ny vegmodell for Samnanger kommune blir det satt ned ei ad-hoc nemnd beståande av følgjande personar:

1. Ordførar
2. Vidar Tveiterås (Ap)
3. Øyvind Røen (Sp)
4. Sture Tveit (H)
5. Odd Arne Haga (frp)
6. Leiar Teknisk drift (sekretær)

Nemnda konstituerer seg sjølv og rapporterer for formannskapet.

Det er ei målsetting at eventuelle anbefalte løysingar skal vera klar vår 2019."

Det vart røysta over dei to framlegga som tillegg til rådmannen sitt framlegg til vedtak.

Rådmannen sitt framlegg til vedtak inkl. framlegget frå Arild Røen og Knut Harald Frøland vart samrøystes vedteke.

Vedtak

Samnanger kommune kan ikkje sjå at det ligg føre grunnlag for påstand om at det er fatta først negativt vedtak og deretter eit endringsvedtak til gunst for Haga/ Trengereid m.h.t innsyn i dokument.

Krav om erstatning i h.h.t. Fvl § 36 vert avvist.

Det klagerett på avslaget, der Fylkesmannen er endeleg klageinstans. Sidan dette er 2. gongs handsaming av Samnanger kommune, vert klagen sendt vidare til Fylkesmannen til endeleg avgjersle.

Behandling

Rådmannen sitt framlegg til vedtak vart samrøystes vedteke.

Vedtak

Samnanger kommune kan ikkje sjå at det ligg føre grunnlag for krav om at kommunen skal erstatte Haga og Trengereid sine kostnadar til juridisk bistand i tvist vedk. eigarskap til vassledning iKrekavegen.

Vedtaket er endeleg og kan ikkje verte påklaga.

Behandling

Rådmannen sitt framlegg til vedtak vart samrøystes vedteke.