Møte i Formannskapet den 02.10.2018

Vedtak

Møteinnkallinga og saklista vert godkjent.

Delegerte vedtak/referatsaker vert tekne til orientering.

Behandling

Godkjenning av innkalling og sakliste:
Olaug Øystese (A) viste til at klokkeslettet for dette ekstramøtet (kl. 09.00) kan gjera at det er vanskeleg for nokre medlemmer å stilla, og at formannskapet kanskje bør drøfta når på dagen eventuelle ekstramøte primært bør haldast. Arild Røen (H) viste til at det er ei grei ordning at det er mogleg å vera med på møtet via telefon.

Det var ingen andre merknader til innkallinga eller saklista.


Eventuelle merknader til protokoll frå førre møte:
Ingen merknader.

Orienteringssaker:

Sal av prestebustaden på Haga
Ordførar Knut Harald Frøland (Bl) orienterte om at prestebustaden på Haga no er seld. Salssumen er 3,8 millionar kroner.

Utvalet sitt kvarter:
Arild Røen (H) spurde om status for arbeidet med nytt rekkverk på Liavegen, som kommunestyret har løyvd midlar til i 2018. Einingsleiar Nils Jonny Skar orienterte om at arbeidet startar no i oktober.

Samrøystes vedtak.

Vedtak

Ledige budsjettmidlar avsett til prosjekt - rekkverk på Liavegen vert omfordelt til sikring av Liavegen og utgjer om lag 70.000 kroner. I tillegg vert stipulerte utgifter på yttelegare om lag 230.000 kroner i samband med raset den 12. og 26. september dekka med unytta lånemidlar.

Vedtaket vert gjort med heimel i hasteparagrafen i kommunelova § 13, jf. punkt 6.3 i delegeringsreglementet.

Behandling

Under handsaminga svara einingsleiar Nils Jonny Skar på spørsmål frå medlemmene i formannskapet. Han orienterte mellom anna om at kommunen enno ikkje har motteke endeleg geolograpport etter raset 26.09.2018.

Formannskapet vedtok først samrøystes rådmannen sitt framlegg til vedtak. Før handsaminga av neste sak (sak 042/2018) spurde ordførar Knut Harald Frøland (Bl) om det i vedtaksteksten i sak 041/2018 burde takast inn at vedtaket er gjort etter hasteparagrafen i kommunelova (§ 13), på same måte som i rådmannen sitt framlegg til vedtak i sak 042/2018. Formannskapet slutta seg til at følgjande setning vert lagt inn i vedtaksteksten:

• "Vedtaket vert gjort med heimel i hasteparagrafen i kommunelova § 13, jf. punkt 6.3 i delegeringsreglementet."

Samrøystes vedtak.

Vedtak

Ut frå samfunnsnytten ski-anlegget har for innbyggarane og andre brukarar løyver kommunen inntil kroner 660.000 eks moms til å utbetre vegen på privat parsell på Totrævegen. Ski-gruppa held fram med å ha vedlikehaldsansvaret for den private delen av Totrævegen. Samnanger kommune inngår brøyteavtale med SIL v/ski-gruppa.

Vedtaket vert gjort med heimel i hasteparagrafen i kommunelova § 13. jf punkt 6.3 i delegeringsreglementet.

Behandling

Innleiingsvis orienterte assisterande rådmann Hilde-Lill Våge kort om saka.

Inge Aasgaard (Krf) spurde om det ligg føre ein avtale om bruk av den private vegparsellen i øvste del av Totrævegen. Hilde-Lill Våge orienterte om at kommunen sin kontaktperson i idrettslaget har meddelt at dei har ein avtale med grunneigarane. Arild Røen (H) stadfesta at idrettslaget inngjekk avtale med grunneigarane i samband med at vegen opp mot skianlegget i Totræna vart forlenga.

Rådmannen sitt framlegg til vedtak vart samrøystes vedteke.

(Presisering: I denne saka er omgrepet "ski-gruppa" brukt. I og med at det er fleire skigrupper i Samnanger Idrettslag, vert det presisert at i denne saka er det langrennsgruppa som er omtalt som «ski-gruppa». Det er Samnanger Idrettslag som er juridisk eining.)