Møte i Formannskapet den 28.05.2020

Vedtak

Møteinnkallinga og saklista vert godkjent. Delegerte vedtak/referatsaker vert tekne til orientering.

Behandling

Godkjenning av møteinnkalling og sakliste
Godkjent utan merknader.

Eventuelle merknader til protokoll frå førre møte
Ingen merknader.


Orienteringssaker:

Skyss-/kilometergodtgjersle for folkevalde
Ordførar Knut Harald Frøland (Bl) orienterte om at det har kome inn krav om kilometergodtgjersle frå ein av dei folkevalde i kommunen. Kravet gjeld køyring til/frå møte i kommunestyret/politiske utval. Det var semje i formannskapet om at spørsmålet om skyss-/kostgodtgjersle for folkevalde skal vurderast i samband med arbeidet med fastsetting av forskrift om godtgjersle til folkevalde.

Kontrollutvalet ber om ekstra midlar til oppfølging av varslingssak
Ordførar Knut Harald Frøland (Bl) orienterte om at det har kome oppmoding frå kontrollutvalet om 130 000 kroner ekstra til arbeidet med oppfølging av varslingssak. Ordføraren har bedt rådmannen om å få dette opp som sak i kommunestyret 11.06.2020.

Premiss budsjett 2021
Ordførar Knut Harald Frøland (Bl) informerte om at administrasjonen av kapasitetsmessige årsaker ikkje får lagt fram sak om premiss budsjett 2021 til hansaming i formannskapet 28.05.2020 eller i kommunestyret 11.06.2020. Ordføraren orienterte vidare om at han ønskjer å få saka opp i til handsaming i september.

Sak om vilkår for å seie opp leige av omsorgsbustader
Ordførar Knut Harald Frøland (Bl) viste til vedtak i kommunestyret 05.03.2020 om å få opp ei sak om Samnanger kommune sine vilkår for å seie opp leige av omsorgsbustader. Også denne saka har vorte utsett av kapasitetsmessige årsaker, og vil ikkje koma opp før i september.

Sak om forskrift om godtgjersle for folkevalde
Øyvind Strømmen (MDG) viste til vedtak i formannskapet 20.02.2020 om å leggja fram framlegg til forskrift om godtgjersle m.m. for folkevalde i Samnanger kommune. Rådgjevar Jan Erik Boge orienterte om at framlegget ikkje vil verta lagt fram før i september.


Utvalet sitt kvarter:

Klokkeslett og møteform for kommunestyret 11.06.2020
Lena Tveit (Bl) spurde kva klokkeslett kommunestyremøtet 11.06.2020 skal starta. Ordførar Knut Harald Frøland (Bl) orienterte om at folkevaldopplæringa som var planlagt i første del av dette møtet, er utsett. Ordføraren orienterte vidare om at møtet vil starta kl. 09.00, og at det enno ikkje er bestemt om det blir vanleg møte eller fjernmøte/Teams-møte.

Status i einingane
Shirin Kvernes Khadoor (Ap) spurde om status i einingane, mellom anna med tanke på korona-situasjonen. Ordførar Knut Harald Frøland orienterte kort om status i nokre av einingane. Meir utfyllande informasjon vil om ønskeleg kunne gjevast i kommunestyremøtet 11.06.2020.

Samrøystes vedtak.

Vedtak

Finansrapportering for 1. tertial 2020 vert tatt til etterretning.

Behandling

Rådmannen sitt framlegg vart samrøystes vedteke.

Vedtak

Rådmannen får fullmakt til å disponere og budsjettjustere auka rammetilskot til korona-situasjonen.

Auka stilling på 50 % ved HR knytt til innføring av nytt løn- og økonomi system vert vidareført ut september. Dette vert finansiert med lønsmidlar frå vakant IKT-koordinatorstilling. Kostnad kr 95 000.

Fylgjande budsjettjusteringar vert gjort for å overføre budsjettmidlar frå 2019 til 2020. Dette påverkar ikkje kostnadsramma som er gitt til prosjekta:

Prosjektet Velferdsteknologi starta opp i 2019 og vart vedtatt finansiert i KS sak 28/19. Mesteparten av utgifta kjem i 2020, i tillegg er kostnaden blitt høgare enn først antatt. Eininga treng ei løyving på kr 340 000 for at prosjektet skal vere finansiert. Finansiering vert disposisjonsfondet.

Kommunen sin eigendel i Dagsturhytta i KS-sak 84/19 på kr 100 000 vert finansiert ved bruk av ubunde investeringsfond.

Løyving til kontrollutvalet på kr 200 000 i sak 23/20 vert finansiert med disposisjonsfondet.

Behandling

Rådmannen sitt framlegg vart samrøystes vedteke.

Vedtak

Det vert løyvd kr 100 000 til å fullfinansiera kostnad med straumstyringsanlegg og el-tavle/ sikringsskap for begge kyrkjene. Dette vert finansiert med ubunde investeringsfond.

Dei andre prosjekta som er meldt inn vil bli vurdert i samband med budsjett for 2021.

Behandling

Rådmannen sitt framlegg vart samrøystes vedteke.

Vedtak

Årsmelding for Samnanger kommune for 2019 vert teken til orientering.

Behandling

Odd Arne Haga (Frp) etterlyste informasjon om førebyggande helsearbeid og styrketrening m.m. i årsmeldinga for helse og heimetenester. Han spurde om korleis arbeidet med dette ligg an i kommunen. Administrasjonen kunne ikkje svara på dette i møtet, men vil svara i kommunestyret 11.06.2020.

Rådmannen sitt framlegg vart samrøystes vedteke.

Vedtak

Rekneskapen for 2019 vert godkjent slik han ligg føre. Mindreforbruket (overskotet) for 2019 på

kr 20 105,04 vert sett av til disposisjonsfond.

Framført underskot på sjølvkost kan dekkast inn ved eit evt. overskot i 2020. Dette gjeld:

Behandling

Rådmannen sitt framlegg vart samrøystes vedteke.

Vedtak

Alternativet med plattformheis i eksisterande heissjakt på kommunehuset vert alternativet å arbeida vidare med. Det vert søkt om dispensasjon frå TEK 17, fordi kommunehuset er ein arbeidsstad med meir enn 12 arbeidsplassar, og fordi plattformstorleiken er litt mindre enn kravet. Fordelane er at ein får heis til alle tre etasjane som er i bruk, og at det er det billegaste alternativet, anslått til kr 550 000.

Prosjektet vert finansiert ved bruk av disposisjonsfondet.

Formannskapet ber om at det til kommunestyremøtet 11.06.2020 vert lagt inn ei vudering av TG3-punkta i tilstandsrapporten og ei prioritering av desse.

Behandling

Ordførar Knut Harald Frøland (Bl) sette fram følgjande tilleggsframlegg i forhold til rådmannen sitt framlegg:

"Formannskapet ber om at det til kommunestyremøtet 11.06.2020 vert lagt inn ei vudering av TG3-punkta i tilstandsrapporten og ei prioritering av desse."

Det vart røysta over rådmannen sitt framlegg, inkludert tilleggspunktet frå Knut Harald Frøland. Vedteke med 8 mot 1 røyst. Lena Tveit (Bl) røysta imot.

Vedtak

Prioritering av saker i tilstandsrapporten: Alle funn som er definert under TG3 blir prioritert utbetra.

Behandling

Odd Arne Haga (Frp) sette fram følgjande framlegg til vedtak:

"Forslag til prioritering av saker i tilstandsraporte: Alle funn som er definert under TG3 blir prioritert utbetra".

*Etter spørsmål frå ordførar Knut Harald Frøland (Bl) og Øyvind Strømmen avklarte Odd Arne Haga (Frp) at framlegget er meint som ein premiss til arbeidet med budsjett/økonomiplan, men også at tiltak som er moglege å løysa innanfor gjeldande budsjett bør gjennomførast snarast mogleg.

Før røystinga vart det også avklart at framlegget til Odd Arne Haga inneber at administrasjonen må leggja fram ei vurdering av TG3-punkta og om når administrasjonen ser for seg at desse kan utbetrast.

Framlegget til Odd Arne Haga vart samrøystes vedteke.

Vedtak

Samnanger kommune har motteke notat med vurdering frå Advokatfirmaet Elden DA, med tittel «Juridisk vurdering – Utredning av ansvarsforholdene for barneverntjenestens ansatte i Samnanger kommune med tanke på mulig krav/søksmål». Jf. kommunestyrevedtak i sak 024/20.

Med utgangspunkt i denne vurderinga – og med grunnlag i tilgjengeleg dokumentasjon, særleg granskingsrapport utført av advokatane Thea Totland og Geir Kjell Andersland – skal det til formannskapsmøtet 3. september 2020 førebuast underlag for stemning med krav om erstatning (regress) i sak 2 i granskingsrapporten. Den eventuelle stemninga gjeld tidlegare barnevernsleiar i Samnanger kommune – og fylkesnemnda og tingretten som har handsama sak 2.

Det førebuande arbeidet skal utførast av Advokatfirmaet Elden (Lov om offentlige anskaffelser, § 2, jf. anskaffelsesforskriften (FOR-2016-08-12-974) § 2-4 bokstav d nr 1 og 2).

Det vert gjeve ei økonomisk ramme for arbeidet på inntil 300.000 kroner, med finansiering frå disposisjonsfondet.

Behandling

Ordførar Knut Harald Frøland (Bl) sette fram følgjande framlegg, på vegner av seg sjølv, Gunn Totland Moss (KrF), Øyvind Røen (Sp), Odd Arne Haga (Frp) og Lena Tveit (Bl):
"Samnanger kommune har motteke notat med vurdering frå Advokatfirmaet Elden DA, med tittel «Juridisk vurdering – Utredning av ansvarsforholdene for barneverntjenestens ansatte i Samnanger kommune med tanke på mulig krav/søksmål». Jf. kommunestyrevedtak i sak 024/20.

Med utgangspunkt i denne vurderinga – og med grunnlag i tilgjengeleg dokumentasjon, særleg granskingsrapport utført av advokatane Thea Totland og Geir Kjell Andersland – skal det til formannskapsmøtet 3. september 2020 førebuast underlag for stemning med krav om erstatning (regress) i sak 2 i granskingsrapporten. Den eventuelle stemninga gjeld tidlegare barnevernsleiar i Samnanger kommune – og fylkesnemnda og tingretten som har handsama sak 2.

Det førebuande arbeidet skal utførast av Advokatfirmaet Elden (Lov om offentlige anskaffelser, § 2, jf. anskaffelsesforskriften (FOR-2016-08-12-974) § 2-4 bokstav d nr 1 og 2).

Det vert gjeve ei økonomisk ramme for arbeidet på inntil 300.000 kroner, med finansiering frå disposisjonsfondet."


Øyvind Strømmen (MDG) sette fram følgjande framlegg til vedtak/tilleggsvedtak:
"Granskingsrapporten rundt tre konkrete barnevernssaker i Samnanger har synleggjort ein svikt i barnevernet, og set blant anna søkjelys på: manglande skriftligheit, manglande høyring av born sine synspunkt, manglande hjelpetiltak, manglande vurdering av fosterheim etter omsorgsovertaking, manglande grunngjeving for at sysken har vorte skilt frå kvarandre og manglande kultursensitivitet. I ei sak konkluderer granskarane med at eit born har vorte fråteke barndomen sin gjennom uforstandig offentleg omsorgsovertaking.

Samnanger kommune har på bakgrunn av dette gjeve ei orsaking til og oppreising til fleire born og foreldre.

Rapporten synleggjer feil og manglar fleire stader, både i Samnanger kommune og på andre nivå. Fleire av tilhøva som vert peika på er tilhøve som også går att i andre rapportar rundt barnevernet dei siste åra. Samnanger kommune ber ein stor del av ansvaret, men er ikkje åleine om det.

Samnanger kommunestyre vil også visa til at ei rekkje barnevernssaker er teke inn til handsaming i den europeiske menneskerettsdomstol, og at Noreg har blitt felt i sju slike saker.

Kommunestyret meiner på dette grunnlaget at det er viktig og riktig å løfta ein breiare politisk debatt rundt barnevernet og vil koma med følgjande oppmodingar til regjeringa og Stortinget:

• Det bør setjast ned eit uavhengig, nasjonalt granskingsutval som får breitt mandat til å føreta ein heilskapleg gjennomgang av barnevernet, og fremma framlegg til forbetringar.

• Det må innførast ei autorisasjonsordning for tilsette i barnevernet, på lik line med helsevesenet, slik det også framgår av regjeringserklæringa til Høgre, Frp, Venstre og KrF av 17. januar 2019 (Granavolden-plattforma).

• Tilsyn av barnevernstenestene bør leggjast til eit uavhengig kontrollorgan som kun har ansvar for dette. Eit slikt tilsyn må sjå til at manglar, avvik og lovbrot vert fulgt opp og retta opp, og må syta for at born har fått uttala seg i saker som vedgår dei, samt for at dette er dokumentert. Organet må også ha sanksjonsmoglegheiter når det vert avdekka feil og manglar.

• Den barnevernsfaglege utdanninga må styrkast i innhald og utvidast frå 3 til 5 år.

• Det bør innførast ei bemanningsnorm i kommunalt barnevern.

Kommunestyret i Samnanger vil understreka at eit godt barnevern er avgjerande viktig, og at feil gjort av barnevernet har dramatiske konsekvensar. Difor meiner kommunestyret også at det bør førast hyppigare og tydelegare kontroll av korleis barnevernstenester utfører sitt arbeid, for slik å syta for at feil og manglar som vert avdekka vert fulgt opp på ein god måte, og på eit tidleg tidspunkt."

Øyvind Strømmen bad om gruppemøte.

Etter gruppemøtet vart det først røysta over fellesframlegget frå Knut Harald Frøland, Gunn Totland Moss, Øyvind Røen, Odd Arne Haga og Lena Tveit. Framlegget vart vedteke med 5 mot 4 røyster.

Det vart så røysta over framlegget/tilleggsframlegget frå Øyvind Strømmen. 4 røysta for dette framlegget og 5 røysta imot.