Møte i Kommunestyret den 15.06.2023

Vedtak

Innkalling og sakliste vert godkjent.

Behandling

Gunn Østvik Petersen (Ap) foreslo at møtet skulle avsluttast seinast kl. 16.00. Kommunestyret slutta seg til dette.

Ordførar Knut Harald Frøland (Bl) viste til den lange saklista, og foreslo at taletida for kvart innlegg i møtet skulle vera maksimalt tre minuttar. Kommunestyret slutta seg til dette.

Ordførar Knut Harald Frøland foreslo òg ei endring i rekkefølgja for handsaming av nokre av sakene på saklista. Forslaget innebar at saker der det var kalla inn varamedlemm(er) på grunn av sannsynleg ugildsakp hos faste medlemmer, vart flytta fram i møtet. Kommunestyret slutta seg til forslaget til ordføraren.

Med desse presiseringane vart innkallinga og saklista samrøystes vedteken.

(Under handsaminga av agendapunktet Spørsmål i sak 041 Faste saker seinare i møtet, vart det vedteke å ta inn ei ekstrasak på saklista. Dette gjaldt sak om justering av vilkår for salsløyve for Tysse Landhandel AS.)

Vedtak

Orienterings-/referatsaker vert tekne til orientering.

Behandling

Eventuelle merknader til protokoll frå førre møte:
Ingen merknader.

Ordføraren orienterer:

• Godkjenning som Trafikksikker kommune. Samnanger vart denne veka godkjent som såkalla Trafikksikker kommune.

Inspirasjon til marknadsføring av kommunen:
Inge Aasgaard og Fred Morten Ervik orienterte om korleis andre kommunar marknadsfører seg på heimesidene sine, og viste òg eksempel frå nettsidene til andre kommunar (mellom anna Tokke kommune). Dei peika òg på at det på dette området er eit forbetringspotensiale for Samnanger.


Rådmannen orienterer:

Orientering ved rådmann Ove Sæbø:

• Organisering statleg del av NAV. Orientering om eventuell endring i regional organisering av statleg del av NAV.

• Vertskommunesamarbeid NAV. Det har kome innspel om å få gjort ei utgreiing av mogleg vertskommunesamarbeid mellom Austevoll, Bjørnafjorden og Samnanger. Rådmannen ønskte signal (innspel) frå kommunestyret på om det er ønskeleg å få utgreidd dette.

• Møte med Bergen brannvesen 22.06.2023. Tema for møtet vil vera brannvesenet sitt arbeid med risiko- og sårbarheitsanalyse, førebyggande arbeid og beredskapsanalyse. Dette vil vera eit godt grunnlag for det vidare arbeidet med brannstasjon.

• Sak om barnehagestruktur. Rådmannen viste til kommunestyret sitt vedtak (frå 20.04.2023) om utgreiing av barnehagestrukturen i kommunen, og orienterte om at denne saka ikkje blir klar til kommunestyret sitt møte i september 2023. Saka blir tidlegast klar til kommunestyret sitt møte 19.10.2023.

• Oppmoding frå IMDi om mottak av fleire flyktningar i 2023. IMDi har sendt oppmoding til kommunen om å ta imot 30 flyktningar (til saman) i 2023. Sak om dette vil koma opp i kommunestyret i september.

Orientering ved einingsleiar livsmeistring, Laila Grønn-Jensen:

• Laila Grønn-Jensen, som er nytilsett einingsleiar livsmeistring og barnevernsleiar i kommunen, presenterte seg sjølv og orienterte om status for barnevernstenesta. Kopi av presentasjonen ho viste i møtet, følgjer som vedlegg til møteprotokollen.

Orientering ved kommunalsjef helse og omsorg, Edith Oma:

• Disponering av midlar frå arv til Samnangerheimen. Edith Oma viste til spørsmål i formannskapet 01.06.2023 om vilkår for bruk av midlar frå testamentert arv til Samnangerheimen. Edith Oma orienterte om kva som står i testamentet og om kommunestyret sitt vedtak 13.09.2018 (KS-sak 038/2018) om disponering av midlane.

• Forslag til ny legevaktavtale. Kommunen har motteke forslag frå Bjørnafjorden kommune til ny legevaktavtale. Det vil bli lagt fram sak om dette for kommunestyret etter sommarferien.

• Bårerom (syningsrom). Orientering om status for arbeidet med bårerom (syningsrom).

• FACT-team. Orientering om vidareutvikling av FACT-team (FACT står for Flexible Assertive Community Treatment). Dette er eit samarbeid mellom Samnanger, Solli DPS og andre kommunar.

• Bekymringsmeldingar barnevern. Orientering om at det ikkje ser ut til å ha forsvunne nokon bekymringsmeldingar som er sendt til barnevernet i Samnanger kommune. Samnanger brukar det same barneverns-fagsystemet som Bergen kommune (Visma Famila).

Orientering ved kommunalsjef økonomi og organisasjon, Karl Viken:

• Økonomiorientering. Sjå vedlagte kopi av presentasjonen som vart vist i møtet.

Spørsmål:

Status for arbeidet med ny brannstasjon
Gunn Østvik Petersen (Ap) spurde om status for arbeidet med ny brannstasjon. Rådmann Ove Sæbø orienterte kort om dette.

Ny vurdering av salsløyve til Tysse Landhandel AS
Odd Arne Haga (Frp) viste til vedtaket som formannskapet gjorde 01.06.2023 om å gje Tysse Landhandel AS salsløyve for alkoholhaldig drikke i gruppe 1. Det vart i vedtaket sett som vilkår at alkoholsalet skal vera bemanna. Odd Arne Haga bad om at kommunestyret fjerna dette vilkåret, og at sak om justering av salsløyvet vart teken inn som ekstrasak på saklista til kommunestyret 15.06.2023. Det vart samrøystes vedteke at saka skulle takast inn på saklista og handsamast som siste sak i møtet.

Undervisning på eige morsmål for elevar frå Ukraina skuleåret 2023-2024
Linda Haug Kollbotn (Frp) viste til elevar sin rett til undervisning på eige morsmål, og spurde om kva som vil vera status for dette i Samnanger ved skulestart hausten 2023. Administrasjonen kunne ikkje svara på dette i møtet, men rådmann Ove Sæbø orienterte om at notat med informasjon om status vil bli utarbeidd og sendt til kommunestyret.

Spørsmål om bemanning og sjukefråvær m.m. i skulane og barnehagane
Lena Tveit (Bl) las opp spørsmåla ho hadde meldt inn til møtet. Ordførar Knut Harald Frøland (Bl) las opp administrasjonen sitt svar. Det gjekk der fram at administrasjonen vil kunne utarbeida svar til neste kommunestyremøte (14.09.2023). Svaret som ordføraren las opp i møtet, ligg som vedlegg til møteprotokollen.


Interpellasjonar:
Informasjon om handsaminga av interpellasjonane i møtet, går fram av sakspapira for dei ulike interpellasjonane (sak RS 1, RS 2, RS 3, RS 4 og RS 8).

Vedtak

Kommunestyret vedtek Årsmelding for Samnanger kommune 2022.

Behandling

Innstillinga til formannskapet vart samrøystes vedteken.

Vedtak

Med heimel i plan- og bygningslova §§ 4-1, 11-2, 11-12 og 11-13 vert det varsla oppstart av arbeid med kommuneplanen sin samfunnsdel, og planprogram for arbeidet vert lagt ut til offentleg ettersyn i 6 veker. Planprogrammet gjer greie for kva samfunnsplanen skal handla om, føremålet med planarbeidet, planprosess og opplegg for medverknad.

Behandling

Karl Bård Kollbotn (Frp) sette fram framlegg om å trekka konsulentfirmaet ABO Plan & Arkitektur ut av arbeidet med kommuneplanen sin samfunnsdel.

Det vart røysta over framlegget til Karl Bård Kollbotn. Framlegget fall med 5 mot 16 røyster.

Det vart etter dette røysta over innstillinga til formannskapet, som vart samrøystes vedteken.

Vedtak

Samnanger kommune vedtek prosjektplanhelse- og omsorgsplan Samnanger kommune slik den ligg føre.

Behandling

Innstillinga til formannskapet vart samrøystes vedteken.

Vedtak

Med heimel i plan- og bygningslova § 12-12 første ledd vert detaljreguleringsplan for bustad Haugane, PlanID 4623202201, vedteken av kommunestyret i Samnanger. Reguleringsplanen består av følgjande plandokument:

• Plankart, dagsett 09.03.23

• Reguleringsføresegner, dagsett 09.03.23

• Planskildring, dagsett 09.03.23

Behandling

Innstillinga til naturutvalet vart samrøystes vedteken.

Vedtak

Samnanger kommune etablerer ny teneste kalla familielos. Denne vert lagt til eining for livsmeistring og skal ha følgande føringar:

1. Stillingsstorleik 30 – 50 %.

2. Plan og informasjon for tenesta skal utarbeidast. Oppstart av tenesta skal skje seinast 01.01.24

3. Innsatsområda skal vere:

   • Tett-på-samarbeid med barnehagane, skulane og helseeininga for å drive førebyggande arbeid. Dette skal skje etter oppsett plan og med fast saksliste.

   • Tett-på-arbeid inn mot familiar og einskildpersonar i Samnanger som opplever relativ fattigdom. Føremålet er å kunne bidra med konkret rådgjeving og rettleiing knytt til økonomiske – og øvrige forhold som kan påvirke levekår negativt. Familielosen skal kunne tilby relasjonell støtte, handlingsplan over tid, hjelp i møte med ulike øvrige tenesteområde (koordinering, tilrettelegging og oppfølgingsstøtte).

4. Det vert utarbeidd oversikt over aktuelle tiltak familielosen kan hjelpe med. I tillegg oversikt og funksjon som øvrige tenesteområde kan bidra med inn i arbeidet. Livsmeistring har koordineringsansvar.

5. Tilbodet er frivillig. Familielosen vil ha ei oppsøkande og inviterande tilnærming.

6. Kostnadane for tenesta skal dekkast innanfor budsjettramma til sektor helse og omsorg.

7. Tilbodet skal rapporterast om til kommunestyret saman med den årlege barnevernrapporteringa.

Behandling

Anja Elisabeth Gjerde Markhus (Bl) viste til at ho er tilsett i kommunen si barnevernstenste, og spurde om dette gjorde ho ugild i saka. I samråd med rådmannen avklarte ordføraren at dette ikkje gjorde ho ugild i saka. Det vart ikkje gjennomført røysting om gildskapen til Anja Elisabeth Gjerde Markhus.

Innstillinga til formannskapet vart samrøystes vedteken.

Vedtak

Søknad om driftsmidlar til auke lønsmidlar kyrkjeverje vert ikkje innvilga.

Rådmannen gjer framlegg i rekneskapssaka for 2022 å gje midlar til delar av gravplass- prosjektet – 150 000 kr – som er del av omsøkt beløp.

Behandling

Innstillinga til formannskapet vart samrøystes vedteken.

Vedtak

Underskotet på 145 326 kr på investeringsbudsjettet for Samnanger kyrkjestyre vert dekka gjennom ei ekstraløyving frå Samnanger kommune til kyrkjestyret. Finansieringa kjem gjennom bruk av disposisjonsfondet. Ekstraløyvinga vert sett på som eit eingongstiltak frå kommunen si side.

Behandling

Innstillinga til formannskapet vart samrøystes vedteken.

Vedtak

Samnanger kommune løyver kr. 489 021,- i straumstøtte med fylgjande fordeling:

1. Eikedalen Skisenter AS kr. 176 644,-

2. K Knutsen AS kr. 200 000,-

3. Bjørkheim senter AS kr. 112 377,-

Finansiering frå disposisjonsfondet.

Behandling

Innstillinga til formannskapet vart samrøystes vedteken.

Vedtak

Samnanger kommune løyver følgjande tilskot til Samnanger Jeger- og Fiskerlag i 2023:

• Kr. 60 000 til flaumvurdering i samband med oppgradering av laksetrapp i Jarlandsfossen. Tilskotet blir finansiert med kr. 30 000 frå Vilt- og fiskefondet og kr. 30 000 frå disposisjonsfondet.

Jf. vedtak i naturutvalet 28.05.2019 i sak 014/2019 får Samnanger Jeger- og Fiskerlag også kr. 20 000 i årleg driftstilskot, uavhengig av vedtaket i denne saka. Tilskotet for 2023 vert utbetalt snarleg.

Behandling

Innstillinga til naturutvalet vart samrøystes vedteken.

Vedtak

1. Årsrekneskapen for Samnanger kommune 2022 vert godkjent. Rekneskapen for 2022 gav eit mindreforbruk på 23 688 363 kr. I avslutninga av rekneskapen for 2022 vart fyrst avsetjingar til disposisjonsfond stroke i samsvar med forskrift § 4-3. Resterande mindreforbruket vart avsett til disposisjonsfond og rekneskapen er avlagt i balanse (kr. 0).

2. Framført underskot på sjølvkost kan dekkast inn ved eit eventuelt overskot på eit seinare tidspunkt. Dette gjeld: Vatn, kr 716 282 · Eikedal, vatn kr 129 561 · Avløp, kr 1 508 019 · Slam, kr 68 737

3. Kommunestyret godkjenner følgjande tiltak finansiert av disposisjonsfondet: · Tiltak relativ fattigdom: - Tilskot private - kjøp varmepumpe – 700 000 kr - Tilskot private – fritidskort/ fritidstilskot – 1000000 kr · Kommunalt kulturfond – 1000000 kr · Straumstøtte næringsliv – 489 021 kr · Søknadar kyrkjestyre: - Tilskot prosjekt gravplass kyrkjestyret - 150 000 kr - Inndekning underskot investeringsrekneskapen - 145 326 kr · Vibrafon Kulturskulen – 70 000 kr · Prosjekt motorsportbane - 50 000 kr · Tilskot styrking fond 2023 – Fisk og friluft – 30 000 kr · Utviklingsfondet som vart oppretta i 2022 vert tilført 2,5 mill. kr.

4. 000 til montering av innkjøpte leikeapparat på barneskulen.

Verbalpunkt:
Rådmannen kjem attende i kommunestyret hausten 2023 med forslag til vedtekter for kulturfond, der det mellom anna blir gitt aksept for at kulturhus/ungdomshus kan søkje om støtte til investeringstiltak.
Rådmannen kjem attende i kommunestyret hausten 2023, etter at familielos er tilsett, med forslag til korleis midlar avsett til relativ fattigdom kan nyttast med størst mogeleg måloppnåing.
Rådmannen kjem attende i kommunestyret hausten 2023 med forslag til gjennomføring av totalentreprise for utbetring av resterande veg mellom Haga og Hagabotnane.
Rådmannen kjem attende i kommunestyret hausten 2023 med vurdering av om automatisk målestasjon i symjebassenget kan gje driftsinnsparingar.

Behandling

Handsaming i møtet:
Arild Røen (H) sette fram eit framlegg.

Monica Tjønna (Uavh) bad om gruppemøte.

Etter gruppemøtet sette Knut Harald Frøland (Bl) fram eit fellesframlegg frå Bl, Frp og KrF.

Gunn Totland Moss (KrF) sette fram eit framlegg.

Marijke Strømmen (MDG) sette fram eit framlegg frå MDG.

Røysting:
Det vart først røysta over framlegget til Arild Røen. Framlegget vart samrøystes vedteke.

Det vart så røysta over framlegget til Gunn Totland Moss. Framlegget fall med 1 mot 19 røyster. Gunn Totland Moss røysta for framlegget.

TIl slutt vart framlegget til MDG sett opp mot fellesframlegget til Bl, Frp og KrF. Fellesframlegget fekk 15 røyster og vart vedteke. Framlegget til MDG fekk 5 røyster.

Vedtak

Framlegg til økonomireglement for Samnanger kommune vert vedteke slik det ligg føre.

Behandling

Innstillinga til formannskapet vart samrøystes vedteken.

Vedtak

Samnanger kommune vedtek at dei fire premissområda
1. Utvikling av Bjørkheimsområdet

2. Næringsutvikling, arbeidsplassar, klima og miljø

3. Tilflytting
• Eigedomsskatten på hus og hytter skal halverast med nye 50 % med verknad frå 01.01.2024. Resterande eigedomsskatt, ca 1,2 MNOK skal behaldast i lys av arbeid med å få vekk relativ fattigdom.

4. Plan, økonomi og kvalitet i tenester skal liggje til grunn for arbeidet med budsjett 2024 og økonomiplan 2024 – 2027.

Innhald i premissområda er gjort greie for i saksframlegget.

Tilleggspunkt til premissområda:
• Det blir sett av midlar kr. 50000 til utbetring av skrifta på minnensteinen etter 2. verdskrig.• Det blir sett av midlar kr. 100000 til oppstart revisjon bygde-/slektsbok for Samnanger.

Verbalpkt.
• Kommunestyret ber rådmannen legge fram notat til budsetthandsaminga som viser kor mykje eiegdomsskatt belaster lokale bedrifter.
• Kommunestyret ber rådmannen å oppretta dialog med langrennsgruppa i SIL for å få oversikt over kva planar langrennsgruppa har for utbetring av tilførselsvegen til Totræna med fleire møteplassar og ei eventuell utviding av parkeringsplassen i Totræna. Når det føreligg eit kostnadsoverslag på tiltaka som er tenkt gjennomført og ei vurdering av konsekvensar av at kommunen eventuelt overtek ansvaret for vegen, så kan kommunestyret vurdera om og eventuelt kva kommunen kan bidra med. Me ber administrasjonen om at vurdering av tilskot til utbetring av, eventuelt overtaking av, veg og parkering i Totræna vinterpark blir lagt fram som notat til budsjetthandsaminga.
• Dette med å ha ein liten pensjoniststilling for brøyting etc. i Hagabotnane har fungert godt. Det vart mange fleire brukstimar på bana i vinter. Rådmannen ser på ei løysing med vinteropen bane også komande sesong.

Behandling

Handsaming:
Arild Røen (H) sette fram eit fellesframlegg frå H og Ap.

Magni Petersen (MDG) sette fram eit framlegg frå MDG.

Monica Tjønna (Uavh) sette fram eit framlegg om premisspunkt om auka grunnbemanning.

Gunn Østvik Petersen (Ap) sette fram eit framlegg med utdjupning av punkt 8 i fellesframlegget frå H og Ap.

Gunn Totland Moss (KrF) sette fram eit framlegg om fritidskort og eit framlegg om tilskot til Totræna vinterpark.

Ove Totland (Bl) sette fram eit framlegg om veg og parkering Totræna vinterpark.

Anja Elisabeth Gjerde Markhus (Bl) sette fram eit framlegg om vinteropen fotballbane.

Karl Bård Kollbotn (Frp) sette fram eit framlegg frå Frp. Framlegget var identisk med framlegga til vedtak i ni interpellasjonar som Frp hadde meldt inn til kommunestyremøtet. Det vart under handsaminga av saka òg avklart at tittelen på dette framlegget skulle vera "tilleggspunkt", ikkje "interpellasjonar".

Ordførar Knut Harald Frøland (Bl) bad om gruppemøte.

Etter gruppemøtet sette Knut Harald Frøland (Bl) fram eit framlegg frå Bl. Han orienterte òg om at det måtte gjerast to korrigeringar i framlegget han hadde lagt inn i Møteportalen. Den første endringa var at teksten "med følgjande underpunkt" i punkt 1 skal slettast. Den andre endringa var at talet 50 000 kr. i det første kulepunktet i avsnittet "Tilleggspunkt til premissområda" berre skal stå éin gong.

Arild Røen trekte punkt 7 og 8 i fellesframlegget frå H og Ap.

Monica Tjønna sette fram eit revidert framlegg om auka grunnbemanning, på vegner av Ap, H, MDG og seg sjølv. Ho trekte samstundes det første framlegget sitt.

Arild Røen trekte punkt 6 i fellesframlegget frå H og Ap.

Gunn Østvik Petersen trekte framlegget sitt.

Karl Bård Kollbotn trekte punktet om to pedagoger pr. klasse i framlegget til Frp.

Ove Totland trekte framlegget sitt.

Anja Elisabeth Gjerde Markhus trekte framlegget sitt.

Gunn Totland Moss trekte framlegget sitt om tilskot til Totræna vinterpark.

Arild Røen trekte heile fellesframlegget frå H og Ap.


Røysting:
Det vart først røysta over framlegget til MDG. Framlegget fall med 8 mot 13 røyster.

Det vart så røysta over framlegget til Gunn Totland Moss om fritidskort. Framlegget fall med 8 mot 13 røyster.

Det vart så røysta over framlegget til Karl Bård Kollbotn (Frp). Framlegget fall med 18 mot 3 røyster.

Det vart så røysta over Monica Tjønna sitt redigerte framlegg. Framlegget fall med 8 mot 13 røyster.

Til slutt vart det gjennomført røysting der framlegget frå Bl vart sett opp mot framlegget til rådmannen. Fellesframlegget fekk 11 røyster og vart vedteke. Framlegget til rådmannen fekk 10 røyster.

Vedtak

Kommunestyret gir kontrollutvalet fullmakt til å gjennomføra ny konkurranse om val av revisor for Samnanger kommune. Tidsramma må leggjast slik at den som vert vald ut frå konkurransen, er revisor f.o.m. 01.07.2024.

Fullmakta omfatter gjennomføring av helie prosessen, herunder:

•Utarbeiding og godkjenning av tilbodsdokument

•Knytte til seg naudsynt hjelp.

•Vurdere mottekne tilbod og innstilla overfor kommunestyret på val av revisor.

Behandling

Innstillinga til kontrollutvalet vart samrøystes vedteken.

Vedtak

Samnanger kommune godkjenner opsjonsavtale for Erikajorda d. 24.05.2023.

Behandling

Karl Bård Kollbotn (Frp), Odd Arne Haga (Frp) og Linda Haug Kollbotn (Frp) bad om å få gildskapen sin vurdert. Bakgrunnen for dette var at Karl Bård Kollbotn og Odd Arne Haga er interessentar som ønskjer å kjøpa eigedomen, og at Linda Haug Kollbotn er gift med Karl Bård Kollbotn.
Ove Totland (Bl) bad òg om å få gildskapen sin vurdert. Bakgrunnen for dette var at han har ein bror som er eigar av ein naboeigedom til Erikajorda.

Alle fire som bad om å få gildskapen sin vurdert, gjekk frå medan kommunestyret vurderte gildskapen deira. Håvard Tvedterås (Frp) gjekk inn som varamedlem for Karl Bård Kollbotn og Svein Verner Røseth (Frp) gjekk inn som varamedlem for Linda Haug Kollbotn under gildskapsvurderingane.
Karl Bård Kollbotn, Odd Arne Haga og Linda Haug Kollbotn vart samrøystes funne ugilde, med heimel i forvaltningslova § 6, jf. kommunelova § 11-10. Håvard Tvedterås og Svein Verner Røseth deltok som følgje av dette òg i resten av handsaminga av saka.
Ove Totland vart samrøystes funnen gild og tok plass att i møtet.

Framlegget til rådmannen vart samrøystes vedteke.

Vedtak

Samnanger kommune vedtek å utgreia ein enkel sportshall for fotball og handball i Hagabotnane, og at rådmannen kjem tilbake med tilråding om dette kan innarbeidast i økonomiplan og langsiktig investeringsplan.

Behandling

Handsaming:
Karl Bård Kollbotn (Frp) sette fram eit framlegg.

Øyvind Røen (Sp) sette fram eit framlegg.

Ordførar Knut Harald Frøland (Bl) sette fram eit framlegg om å leggja vekk denne saka.

Karl Bård Kollbotn trekte framlegget sitt.

I røystinga i saka vart det først røysta over framlegget til Knut Harald Frøland. Framlegget fall med 9 mot 12 røyster.

Det vart til slutt gjennomført røysting der innstillinga til formannskapet vart sett opp mot framlegget til Øyvind Røen. Framlegget til Øyvind Røen fekk 11 røyster og vart vedteke. Innstillinga til formannskapet fekk 10 røyster.

Vedtak

1. Økonomirapportering pr. april 2023 vert tatt til orientering.

1. Følgjande budsjettjusteringar vert gjennomført i driftsbudsjettet pr 1. tertial;

Budsjettendringane drift er gjort greie for i saksutgreiinga.

1. Følgjande budsjettendringar vert gjennomført i investeringsbudsjettet pr 1. tertial

Rådmann vil tilpassa investeringsbudsjettet for 2023 og 2024 etter overskridingane som har vore i 2023.



4. Tilleggspunkt

Kommunestyret vedtok samrøystes følgjande 20. april i sak Status - utbetring av vegen i Hagabakkane:

«Kommunestyret ser alvorleg på kostnadsauken i tiltaket og ber om at rådmann vurderer naudsynte tiltak for å sikre at dette ikkje skjer igjen.»

Oversikta som ligg føre i tertialrapportering for april 2023, viser at investeringsprosjekt på sektor for Samfunnsutvikling har ein reell samla overskridelse på om lag 19 MNOK. Enkeltprosjekt har ein overskridelse på 300 %. Investeringsprosjekta er kraftig underbudsjettert og overskridelsane er ikkje varsla, eller politisk godkjent, før dei er gjennomført. I investeringsprosjektet «Hagabakkane utviding av veg» har det vare betydeleg auke i kostnader sidan kommunestyremøte 20. april. Det er ikkje usannsynleg med ytterligare auke i kostnader i investeringsprosjet for Samfunnsutvikling enn det som er oppgitt i tertilarapport for april 2023.

For investeringsprosjektet Planlegging og etablering av bubilparkering er det satt i gang tiltak som strider mot vedtaket kommunestyret gjorde 8. desember 2022: «Rådmann får i oppgåve å vurdere løysingar for bubilparkering på Bjørkheim, nede ved Grunnavågen. Løysing for bubilparkering skal sjåast i lys av andre tiltak der målsettinga er at område skal vere levande, tilgjengeleg, trygt og attraktivt. Ambisjonen er å få etablert bubilparkering før sumaren 2023. Rådmann leverer sak til første kommunestyremøte i 2023.»

Formannskapet ber rådmann vurdere alvorlighetsgraden i situasjonen med investeringsprosjekt på sektor for Samfunnsutvikling. Formannskapet ber rådmann om eventuelt ny informasjon til kommunestyret 15. juni 2023.

Behandling

Innstillinga til formannskapet vart samrøystes vedteken.

Vedtak

Finansrapportering for 1. tertial 2023 vert tatt til orientering.

Behandling

Framlegget til rådmannen vart samrøystes vedteke.

Vedtak

Rådmannen sitt framlegg til reviderte retningslinjer for ordning med følgjekort i Samnanger kommune blir godkjent.

Behandling

Innstillinga til formannskapet vart samrøystes vedteken.

Vedtak

Saksutgreiinga blir teken til orientering. Kommunestyret ber rådmannen om å arbeida vidare med saka og leggja ho fram til endeleg politisk handsaming i den første møterunden hausten 2023.

Behandling

Innnstillinga til formannskapet vart samrøystes vedteken.

Vedtak

Samnanger kommune vedtek samarbeidsavtalen for Interkommunalt samarbeid mot akutt forureining Bergen region kommunalt oppgåvefellesskap.

Behandling

Innstillinga til formannskapet vart samrøystes vedteken.

Vedtak

Samnanger kommune vedtek samarbeidsavtalen for Vest brann- og redningsregion kommunalt oppgåvefellesskap.

Behandling

Innstillinga til formannskapet vart samrøystes vedteken.

Vedtak

Samnanger kommune vedtek vedtekter for Samnanger kommune sitt kraft- og heimfallsfond slik dei ligg føre, med følgjande endring:

• I punkt 3.1 skal ordlyden vera "Formannskapet er fondsstyre".

Behandling

Innstillinga til formannskapet vart samrøystes vedteken.

Vedtak

Kommunestyret tek rapport om vegvedlikehald datert 07.06.2023 til orientering.

Rådmannen vil ved framlegging av budsjett 2024 og økonomiplan 2024- 2027 koma attende med eit framlegg til kva tiltak som vert prioritert i kommande økonomiplanperiode 2024- 2027. Her vil det og framkoma korleis tiltaka er finansiert.

I denne saksutgreiinga er det sett opp tiltak, og tilhøyrande stipulerte kostnadar for desse tiltaka.

Behandling

Framlegget til rådmannen vart samrøystes vedteke.

Vedtak

Kommunestyret tek rapport datert 13.06.2023 om eigedomsforvaltning bygningsmasse og vedlikehald av kommunale bygg til orientering.

Rådmannen vil ved framlegging av budsjett 2024 og økonomiplan 2024–2027 koma attende med eit framlegg til kva tiltak som vert prioritert i komande økonomiplanperiode 2024–2027. Her vil det og framkoma korleis tiltaka er finansiert.

Behandling

Handsaming:
Rådmann Ove Sæbø informerte innleiingsvis om ei presisering til oversikta over kommunale bygningar i vedlegget i saka. Presieringa gjaldt Reistadliane 39, der det er planlagt å gjera ei ny vurdering av vedtak frå 2016 om bruksendring av bygget, noko som også vil kunne påverke (gje avklaringar om) branntryggleik i bygget.

Monica Tjønna (Uavh) sette fram eit tilleggsframlegg.

Det vart først røysta over tilleggsframlegget til Monica Tjønna. Framlegget fall med 10 mot 11 røyster.

Det vart så røsta over rådmannen sitt framlegg, som vart samrøystes vedteke.

Vedtak

Det blir gjort følgjande endring i salsløyvet til Tysse Landhandel AS som formannskapet vedtok 01.06.2023 i formannskapssak 049/2023:

• Setninga om at det er eit vilkår for salsløyvet at alkoholsalet skal vera bemanna, blir stroke.

Behandling

Gildskap:
Ordførar Knut Harald Frøland (Bl) bad om å få vera ugild i saka, på bakgrunn av at både kona hans og svogeren hans er styremedlemmer i Tysse Landhandel AS. Han gjekk frå medan kommunestyret vurderte gildskapen hans. Han vart samrøystes funnen ugild og deltok ikkje i handsaminga av saka. Heimel for vedtaket var forvaltningslova § 6 første ledd bokstav b, jf. kommunelova § 11-10 første ledd.

Evelyn Frøland (Bl) bad om å få gildskapen sin vurdert, på bakgrunn av at ho er søster til Knut Harald Frøland. Ho gjekk frå medan kommunestyret vurderte gildskapen hennar. Ho vart funnen gild med 16 mot 3 røyster.

Handsaming:
Odd Arne Haga (Frp) sette fram følgjande framlegg til vedtak:

"Det blir gjort følgjande endring i salsløyvet til Tysse Landhandel AS som formannskapet vedtok 01.06.2023 i formannskapssak 049/2023:

• Setninga om at det er eit vilkår for salsløyvet at alkoholsalet skal vera bemanna, blir stroke."

Øyvind Røen (Sp) sette fram framlegg om å utsetja saka og be Tysse Landhandel AS om ein formell søknad om endring av salsløyvet, og å gje formannskapet fullmakt til å avgjera søknaden i eit ekstramøte (fjernmøte på Teams).

I røystinga i saka fekk framlegget til Odd Arne Haga 11 røyster og vart vedteke. Framlegget til Øyvind Røen fekk 9 røyster.