Møte i Formannskapet den 30.03.2023

Vedtak

Innkalling og sakliste vert godkjent, med følgjande endring:

• Sak 018/2023 vert trekt frå saklista.

Behandling

Ordførar Knut Harald Frøland (Bl) orienterte om ønske frå rådmannen om å trekka sak 018/2023 frå saklista. Rådmann Ove Sæbø orienterte om bakgrunnen for dette. Formannskapet slutta seg til rådmannen sitt ønske, og saka vart trekt frå saklista.

Det var ingen andre merknader til innkallinga eller saklista.

Vedtak

Orienterings-/referatsaker vert tekne til orientering.

Behandling

Eventuelle merknader til protkollen frå førre møte:
Ingen merknader.


Ordføraren orienterer:

• Budsjettseminar 01.06.2023. Ordførar Knut Harald Frøland (Bl) viste til at det er sett opp dagmøte i formannskapet 01.06.2023. Ordføraren ønska å høyra med formannskapet om første del av dette møtet (fram til lunsj) skal vera budsjettseminar, og om heile kommunestyret i så fall skal inviterast til denne delen. Det var semje i formannskapet om at det blir budsjettseminar på føremiddagen 01.06.2023, og at heile kommunestyret skal inviterast. Etter budsjettseminaret blir det ordinært formannskapsmøte etter lunsj 01.06.2023.

Rådmannen orienterer:

Orientering v/rådmann Ove Sæbø:

• Kommunalsjef oppvekst. Noverande kommunalsjef Bodil H. Øpstebø går av med pensjon 01.04.2023. Irene Ullensvang er tilsett som ny kommunalsjef. Ho startar i stillinga ca. 01.08.2023.

• TikTok og Telegram. Rådmannen orienterte om at det etter initiativ frå IKT Nordhordland er bestemt at det blir forbod mot å ha applikasjonane TikTok og Telegram installert på kommunale tenestetelefonar i Samnanger.

Orientering v/kommunalsjef oppvekst, Edith Oma:

• Utsegn om sjukeheimen i kommunestyret 09.03.2023. Edith Oma orienterte om at tilsette ved sjukeheimen ikkje heilt kjenner seg igjen i ei utsegn frå representanten Monica Tjønna i kommunestyret 09.03.2023. Edith Oma vil koma tilbake til dette i kommunestyret 20.04.2023.

• Informasjon om hukommelsesteam. m.m.. Det er utarbeidd ein brosjyre med informasjon om kommunen sitt hukommelsesteam og tilbod til personar med nedsett hukommelse og deira pårørande. Brosjyren vil koma i postkassen til husstandane i kommunen. Det vil i tillegg bli sendt ut ein sms med informasjon til innbyggjarane.

• FACT-team. Kommunen er med i eit prosjekt for vidareutvikling av FACT-team (Flexible Assertive Community Treatment). Edith Oma orienterte kort om dette.

• Privatpraktiserande fysioterapeut. Kommunen har driftsavtale med ein privatpraktiserande fysioterapeut. Han har nyleg informert kommunen om at han har mista retten til trygderefusjon i fire år frå 21.04.2023. Han har i samband med dette no søkt kommunen om fire års permisjon. Permisjonssøknaden er enno ikkje handsama.

Orientering v/kommunalsjef samfunnsutvikling, Hilde-Lill Våge:

• Rapportering på investeringsprosjekt. Systemet Framsikt vil gjera det enklare å rapportera på investeringsprosjekt.

• Status for investeringsprosjekt. Hilde-Lill Våge orienterte om status for diverse investeringsprosjekt, og om at forslag til budsjettjusteringar vil bli lagt fram i juni 2023. Orienteringa gjaldt følgjande prosjekt:

• carport ved Samnangerheimen

• trafikksikringstiltak barneskulen (Gjerdsvegen og Nesjavegen)

• varmepumpe Samnangerheimen

• VA på Ytre-Tysse og Indre-Tysse

• reservevassforsyning

• branngarasje

• ombygging kommunehuset (sikringstiltak, ombygging av kontor)

• nytt nøkkelsystem kommunehuset

• universell utforming uteområde barneskulen

• ny omsorgsbustad i Reistadliane 41

• opprusting av kommunale bruer og vegar

• utskifting av veglys til LED-lys (på kommunal vegar)

• tilkomst helsetunet

• ventilasjon på kommunehuset

• VA-infrastruktur

• gangsti til Hagabotnane

• fleirbrukshall

Spørsmål:

Agenda Kaupang
Øyvind Strømmen (MDG) spurde kva arbeid Agenda Kaupang for tida gjer knytt til skulane i kommunen. Rådmann Ove Sæbø svara. Agenda Kaupang hjelper kommunen med ei økonomisk kartlegging på skuleområdet. Han orienterte òg om bakgrunnen for dette og korleis arbeidet er organisert.

Gåvekort til studendar som melder flytting
Øyvind Strømmen (MDG) viste til at Bergen kommune har innført ordning med gåvekort til studentar som melder flytting dit. Han orienterte vidare om at han har høyrt at Hardangerrådet har vedteke å gå inn for ei ordning med gåvekort med høgare verdi til studentar som beheld adressa i heimkommunen sin. Øyvind Strømmen spurde om det er vurdert noko tilsvarande i Samnanger. Ordførar Knut Harald Frøland (Bl) orienterte om at han ikkje har tenkt å ta initiativ til ei tilsvarande ordning i Samnanger. Det var etter dette ei kort drøfting i formannskapet, mellom anna om kommunestyret eventuelt kan gje ein uttale 20.04.2023.

Fleirbrukshall
Odd Arne Haga (Frp) spurde om status for oppstart av bygging av fleirbrukshall på Lauskar. Ordførar Knut Harald Frøland (Bl) svara. Han viste til vedtak i kommunestyret 09.03.2023, og til at det kjem opp sak om fleirbrukshall i kommunestyret 20.04.2023.

Totræna – parkering og møteplassar
Gunn Totland Moss (KrF) viste til at det er utfordringar med parkering i skianlegget i Totræna og med møteplassar på vegen opp mot skianlegget. Ho spurde om å få opp ei utgreiing om dette. Ordførar Knut Harald Frøland (Bl) svara. Han har vore i kontakt med dei ansvarlege for skianlegget i Totræna og ventar på tilbakemelding frå dei. Når han har fått tilbakemelding, vil han snakka med rådmannen om korleis saka kan takast vidare.


Samrøystes vedtak.

Behandling

Saka vart trekt. Sjå sak 016/2023.

Vedtak

Samnanger kommune sluttar seg til Samarbeidsavtale for Syns og audiopedagogisk teneste Vestland – kommunalt oppgavefellesskap (SAPT Vestland).

Ordføraren blir Samnanger kommune sin faste medlem i representantskapet i SAPT Vestland. Varaordføraren blir varamedlem.

Behandling

Rådmannen sitt framlegg vart samrøystes vedteke.

Vedtak

Samnanger kommune tek Energikommisjonen si utgreiing til etterretning, og deler den uroa for Noreg sin framtidige kraftbalanse som også kjem fram i rapporten. I dei komande åra vil kraftsituasjonen i Europa endra seg, både fordi europeiske land ikkje ynskjer å gjera seg avhengige av import av gass frå Russland, og fordi det vert satsa stort på utbygging av fornybar energi i ei rekkje land. Dette vil også ha konsekvensar for Noreg og for vår konkurransesituasjon, sjølv om vasskrafta vår i stor grad har den fordelen at ho er regulerbar.

Energikommisjonen legg eit godt grunnlag for den breiare energipolitiske debatten. Samstundes ynskjer me å knyte nokre merknader til utgreiinga:

- Samnanger kommune vil påpeika at klimakrisa må handterast samstundes med at vi handterer naturkrisa, altså aukande tap av naturmangfald og bortfall av såkalla økosystemtenester, som følge av menneskeleg aktivitet. Det inneber at me også ved utbygging av fornybar energi må unngå inngrep i urørt natur, sårbar natur og at det må takast omsyn til dyrs leveområde. For å redusera behovet for ny kraftutbygging er det difor grunnleggjande viktig med omfattande tiltak for energiøkonomisering og energieffektivisering, inkludert styrka støtteordningar som gjer at flest mogleg kan gjera slike grep på husstandsnivå, uavhengig av sin personlege økonomi.

Det inneber også tiltak for å redusera transportbehovet, der dette er mogleg, noko som grip inn i også andre samfunnsområder enn det reint energipolitiske. Energikommisjonen peiker på at fokus på transportbehov har konsekvensar for byplanlegging knytt til avstand mellom heim, skule, handelssentra og fritidsaktivitetar, medan ein i spreidtbygde strøk vanskeleg kjem unna individuelle transportløysingar. Samnanger kommune seier seg samde i dette, men vil peika på at transportbehov også må spela ei rolle i planlegging og utvikling utanfor byane. Samnanger kommune vil også peika på viktigheita av desentraliserte, gode og digitalt tilgjengelege offentlege tenester, og på at det bør leggjast til rette for auka bruk av både heimekontor og satelittkontor for dei som ynskjer og har moglegheit til dette. Det siste vil både kunne bidra til redusera persontransportbehovet og til å styrka arbeidsmarknaden i mindre kommunar som vår.

- Samnanger kommune er glad for kommisjonen si understreking av at skatte- og avgiftspolitikken må utformast på ein slik måte at den ikkje hindrar samfunnsøkonomisk lønsame investeringar, og samstundes avspegla at kraftsektoren haustar av våre felles ressursar. Som ein vasskraftskommune vil vi understreka viktigheita av at lokalsamfunnet også haustar av verdiskapinga i sektoren.

Kommunen meiner at det er særleg viktig å leggja til rette for auka produksjon av regulerbar vasskraft gjennom modernisering av eksisterande kraftverk, noko som inneber mindre inngrep enn bygging av nye kraftverk og utviding av eksisterande.

- Ein endra kraftsituasjon kan gjera auka bruk av effektkjøring i vasskraftverka aktuelt. Samnanger kommune ser på det som viktig at det vert stilt miljøkrav til effektkøyring av vasskraftverk, og at det bør utformast nasjonale retningsliner for effektkjøring.

- Samnanger kommune meiner utbygging av landbasert vindkraft må unngås i urørt natur. Det er positivt at det vert lagt opp til at vertskommunar får større innverknad i vindkraftsaker. Samstundes vil kommunen peika på at det trengs nasjonalt planverk på området, både for å definera område som ikkje bør vera aktuelle for utbygging av landbasert vind og for å beskytta naturverdiar, friluftsliv og andre interesser. Eit slikt nasjonalt planverk kan føra debattar om fornybar energi inn på eit meir konstruktivt spor, og også bidra til at ny, fornybar energi i større grad vert bygd ut, men då med mindre konflikter. Vi stør ei utgreiing av potensialet for nærvind, t.d. i form av mindre anlegg langs vegar, i industriområde eller i område der utbygging har få og små konsekvensar for natur og miljø. Samnanger kommune vil peika på at eit slikt arbeid må setjast i gang snarast.

- Samnanger kommune er positive til ei satsing på utbygging av havvind. Samnanger kommune er vald som utgangspunkt for elektrifisering frå land, noko som også inneber inntekter for kommunen. Me vil likevel understreka at det ved elektrifisering av sokkel bør vera eit klårt mål at ein størst mogleg del av denne blir gjort gjennom produksjon av fornybar energi offshore, anten gjennom havvind eller på andre måtar. Elektrifisering av sokkel frå land inneber knappare tilgang på kraft for industri på Vestlandet, og bidreg til å utfordra kraftbalansen. Ved utbygging av havvind og krav til dette i samband med elektrifisering av sokkel kan ein oppnå det motsette.

Når det gjeld utbygging av havvind er det samstundes viktig at det vert teke omsyn til natur, fugletrekk, påverknad på marint liv og fiskeriinteresser.

- Samnanger kommune vil peika på at energisituasjonen den siste tida har aktualisert ein debatt om kjernekraft. På kort sikt er kjernekraft neppe ei løysing for Noreg, mellom anna grunna utbyggingstid og små fagmiljø. Samstundes har FNs klimapanel peikt på at kjernekraft er ei delløysing, og Samnanger kommune vil understreka at det er viktig at Noreg følgjer og deltek i utviklinga av ny teknologi, til dømes små modulære reaktorar.

Behandling

Handsaming:
Øyvind Stømmen (MDG) sette fram framlegg til vedtak. Han orienterte om at han hadde lagt inn tre ulike framlegg i Møteportalen, og at det var framlegget med tittel "Nytt retta framlegg" som vart sett fram.

Framlegget til Øyvind Strømmen vart vedteke med 8 mot 1 røyst. Odd Arne Haga (Frp) røysta imot.

Vedtak

Samnanger kommune støttar framlegget frå Kommunal- og distriktsdepartementet om endringar i § 10 i inndelingslova. Desse endringane er naudsynte for å sikra eit reelt lokaldemokrati. Dette er særleg viktig for at også mindre lokalsamfunn (grender/bygdelag) innanfor ein kommune skal få høve til verta høyrde.

Behandling

Handsaming:
Øyvind Røen (Sp) sette fram framlegg til vedtak.

I røystinga vart framlegget til rådmannen sett opp mot framlegget til Øyvind Røen. Framlegget til Øyvind Røen fekk 8 røyster og vart vedteke. Framlegget til rådmannen fekk 1 røyst (Jon Magne Bogevik, Ap).

Vedtak

Det blir gjort følgjande justering i forhold til kommunestyret sitt vedtak 15.09.2022 i sak 050/2022 om lån og tilskot til etablering av bygdebutikk på Tysse:

1. Fristen for oppstart av butikken blir endra frå 01.04.2023 til 01.06.2023.

2. Fristen for å leggja fram plan for kommunestyret for realisering av eventuelt drivstoffanlegg ved Tyssekaien blir endra frå juni til september 2023.

Vedtaket er gjort av formannskapet med heimel i punkt 6.3 i Samnanger kommune sitt delegeringsreglement, jf. kommunelova § 11-8 første ledd.

Behandling

Gildskap:
Knut Harald Frøland (Bl) bad om å få gildskapen sin vurdert. Bakgrunnen for dette var at han er svoger til styreleiaren i Tysse Landhandel AS og at kona hans er styremedlem i selskapet. Knut Harald Frøland gjekk frå medan formannskapet vurderte gildskapen hans. Øyvind Røen (Sp) gjekk inn som møteleiar. Knut Harald Frøland vart samrøystes funnen ugild. Heimel for vedtaket var forvaltningslova § 6 første ledd bokstav b og c, jf. kommunelova § 11-10 første avsnitt.

Handsaming:
Øyvind Strømmen varsla at han ville ha inn ein protokollmerknad.

Rådmannen sitt framlegg vart vedteke med 7 mot 1 røyst. Jon Magne Bogevik røysta imot.

Vedtak

Samnanger kommune tilbyr eigaren av GBNR. 43/36 på Ytre Tysse å kjøpa om lag 50 m2 av den kommunale eigedomen GBNR. 43/149. Arealet ligg rett vest for søkjar sin eigedom, og er i reguleringsplan for Ytre Tysse del av arealet Fe5. Prisen vert sett til 238 kr/m2.

Administrasjonen får mandat til å søkja om dispensasjon frå reguleringsplanen i samband med søknad om frådeling etter plan- og bygningslova.

Behandling

Rådmannen sitt framlegg vart samrøystes vedteke.

Vedtak

Kommunestyret ber rådmannen om å gjennomføre ein utgreiingsprosess kor samanslåing av dei to kommunale barnehagane skal vurderast.

Utgreiinga skal innebere forslag til føretrukken løysing og leggjast fram for kommunestyret i september 2023.

Denne vurderinga må mellom anna sjå på konsekvensar for trafikktryggleik og for pendlarar med barn i barnehagane. I tillegg må det gjerast vurderingar av korleis dette kan påverka trivsel.

I vurderinga bør det også sjåast i eit lengre tidsperspektiv, kva fylgjer ein eventuell samanslåing vil få ved eventuelle auka barnetal. Det bør også leggjast til rette for at alle som ynksjer å uttala seg, får anledning til dette.

Behandling

Handsaming:
Øyvind Strømmen (MDG) sette fram eit tilleggsframlegg.

Gunn Østvik Petersen (Ap) bad om gruppemøte.

Etter gruppemøtet sette Gunn Østvik Petersen fram eit tilleggsframlegg.

Det vart røysta samla over rådmannen sitt framlegg, inkludert tilleggsframlegga til Øyvind Strømmen og Gunn Østvik Petersen. Samrøystes vedteke.

Vedtak

Samnanger kommune tek opp lån i Husbanken på kr 5000 000 for å gje økonomisk hjelp til bustadformål. Lånet skal nyttast til vidareformidling av startlån.

Behandling

Rådmannen sitt framlegg vart samrøystes vedteke.

Vedtak

Tiltaket med å utbetre vegen i Hagabakkane, øvre del opp til Hagabotnane, vert i investeringsbudsjettet for 2023 auka til ein kostnad på inntil 10 MNOK inkl. mva.

Rådmannen kjem tilbake til naudsynt budsjettregulering og finansiering i økonomirapporteringa pr. 1. tertial i juni. Det skal gå fram kva konsekvensar finansieringa av Hagabakkane har for dei andre prosjekta som er vedtekne i investeringsbudsjettet for 2023.

Behandling

Rådmannen sitt framlegg vart vedteke med 8 mot 1 røyst. Odd Arne Haga (Frp) røysta imot.