Møte i Formannskapet den 31.08.2023

Vedtak

Innkalling og sakliste vert godkjent.

Behandling

Øyvind Røen (Sp) orienterte om at han under sak 051/2023 ønskte å stilla nokre spørsmål om notata om bemanning og sjukefråvær som låg ved møteinnkallinga.

Jon Magne Bogevik (Ap) viste til sak 057/2023, og spurde kvifor denne saka stod på saklista. Ordførar Knut Harald Frøland (Bl) orienterte om at han hadde bedt administrasjonen om å få denne saka opp til handsaming.

Innkallinga og saklista vart samrøystes godkjent.

Vedtak

Orienterings-/referatsaker vert tekne til orientering.

Behandling

Eventuelle merknader til protokoll frå førre møte:
Ingen merknader.


Orienterings-/referatsaker:

KVU E134 Arm til BergenFv. 49 Steinsdalen – EikedalenE134 HaukelivegenVidareutdanning for rådmannenStatus for fleirbrukshallprosjektet
Strategisk næringsplan
Næringsutviklar Joachim Mathisen orienterte og bad om innspel frå formannskapet. Kopi av presentasjonen hans følgjer som vedlegg til møteprotokollen.

Rådmannen orienterer:

Orientering ved rådmann Ove Sæbø:

• Skifte av krisestøtteverktøy. Det nye krisestøtteverktøyet RAYVN, som vil vera felles for staten og alle kommunane i landet, blir sett i drift 1. oktober 2023. RAYVN erstattar då det noverande krisestøtteverktøyet CIM.

• Vasslekkasje og vasskade i kommunestyresalen. Vasslekkasjen skjedde 12. og 13.08.2023. Kostnad for reparasjon av golvet i salen er førebels rekna til om lag 175 000 kroner inkl. mva. Blir truleg ikkje dekka av forsikringa på bygget.

• Planprogram for kommuneplanen sin samfunnsdel. Framlegget til planprogram har no vore ute på høyring. Saka vil snart koma til vidare politisk handsaming.

• Skogbrann i Rolvsvåg i juni. Brannvesenet vil truleg gjera ei evaluering i oktober 2023. Rådmannen vil koma tilbake til saka etter dette.

• Brannstasjon. Informasjon om status for arbeidet i arbeidsgruppa.

• Planprogram temaplan landbruk. Planprogrammet vil truleg koma til politisk handsaming i mars 2024.

Orientering ved kommunalsjef oppvekst, Irene Ullensvang:

• Irene Ullensvang, som starta i kommunalsjefstillinga 01.08.2023, presenterte seg sjølv og orienterte om bakgrunnen sin. Ho orienterte òg om kva ho vil vera spesielt oppteken av i kommunalsjefstillinga.

Orientering ved kommunalsjef helse og omsorg, Edith Oma:

• Bemanning pleie og omsorg i Bjørnafjorden kommune. Edith Oma viste til notatet om bemanning og sjukefråvær i pleie og omsorg som låg ved møteinnkallinga, og orienterte om at ho no også hadde fått bemanningstal frå Bjørnafjorden kommune for Luranetunet og Fusa bu- og behandlingssenter.

• Privatpraktiserande fysioterapeut. Orientering om status for prosessen med tildeling av avtaleheimel for ny privatpraktiserande fysioterapeut.

• Ny omsorgsbustad i Reistadliane 41. Bustaden er snart klar for innflytting. Firmaet som skal bemanna bustaden har i sommar kome med ny pris, som er høgare enn det kommunen betalar i dag (om lag 3,6 millionar kroner høgare per år). Kommunen vil få refundert noko av denne kostnadsauken frå staten.

• Aldersgrense SAPT-avtale. Edith Oma viste til saka om SAPT-samarbeidsavtale som kommunestyret handsama 20.04.2023 (kommunestyresak 032/2023). Ho orienterte om at det no er klart at det likevel ikkje vil bli innført aldersgrense på 70 år for dette tilbodet.

Orientering ved kommunalsjef økonomi og organisasjon, Karl Viken:

• Økonomirapportering (økonomisk status). Kort informasjon om økonomisk status på drift og investering så langt i 2023, og om prognose for heile 2023.

• Budsjett 2024. Orientering om status for budsjettarbeidet, og om tidsplanen og prosessen vidare.

• Kommunebarometeret 2023. På kriteriet Økonomisk situasjon er Samnanger vurdert som nummer 41 av 365 kommunar, og som nummer 6 av kommunane i Vestland. På kriteriet Kostnadsnivå er Samnanger vurdert som nummer 248 av 356 kommunar.

• Tilskot til lokalt transporttilbod for ungdom. Kommunen har fått tilskot på 90 000 kroner til lokalt transporttilbod for ungdom i 2023.

Spørsmål:

Bemanning i barnehagane, skulane og pleie og omsorgKantslått på kommunale vegar og fasadevask på kommunehusetDet vart ikkje røysta over framlegga som Odd Arne Haga hadde lagt inn i Møteportalen.



Samrøystes vedtak.

Vedtak

Samnanger kommune sluttar seg til utvalet sine vurderingar om at generalistkommunesystemer er under aukande press, stør utvalet si tilråding om å halda på generalistkommunesystemet og deler utvalet si vurdering av at oppgåvedifferensiering mellom kommunane ikkje er tilrådeleg.

I samband med kommunereforma for nokre år sidan vart det gjennomført ei rådgjevande folkerøysting i Samnanger kommune, der eit klårt fleirtal ynskte at Samnanger framleis skal stå som eigen kommune. Samnanger kommune vil difor uttrykkja ei uro over at utvalets fleirtal peiker på større kommunar som det tiltaket som best opprettheld generalistkommunesystemet, og vil peika på at små kommunar på dei fleste område har dei same føresetnadene for å lukkast med å gje god kvalitet i tenestene. Det er eit viktig demokratisk prinsipp at nye kommunesamanslåingar kjem frå folkedjupet, og det er ei overkøyring av lokaldemokratiet om staten også i framtida legg opp til eit straff- og belønningssystem for å tvinga fram større kommunar. Små kommunar har også føremoner i form av liten avstand mellom innbyggjarane og dei folkevalde og tenester nær folk.

Samnanger kommune sluttar seg derimot til utvalet sine tilrådingar når det gjeld endra statleg styring, med redusert detaljstyring og ei meir aktiv tilretteleggjarrolle for at alle kommunar skal kunna vareta lovpålagte oppgåver. Det må blant anna innebera å leggja til rette for gode samarbeid mellom kommunane, statsforvaltar og fylkeskommunar.

Som utvalet peiker på, kan små og spesialiserte tenester — t.d. renovasjon, brannvesen og IKT — som krev eit visst fagmiljø vera utfordrande i mange kommunar. Samnanger kommune deler samstundes utvalet si vurdering av at det ville vera lite treffsikkert å flytta slike oppgåver vekk frå kommunane, då det vil påverka både kommunane sitt breie oppgåveansvar og den folkevalde styringa.

I møte med denne utfordringa vil interkommunale samarbeid ofte vera ei god løysing. Gode samarbeid på tvers av kommunegrenser vil vera naudsynte også frametter, og kan bidra til å løysa mindre kommunar sine utfordringar knytt til kapasitet og rekruttering av rett kompetanse.

Det kan samstundes vera fleire utfordringar knytt til slikt samarbeid, blant anna kan dei gjera det vanskelegare å gjera politiske prioriteringar på tvers av oppgåver og tenester, og det kan gje mindre gjennomsiktigheit og svekkja demokratisk styring og kontroll. Samnanger kommune sluttar seg utvalet si vurdering av at faste, langsiktige samarbeid med faste partnarar kan gjera det enklare og betre å samarbeida, og sluttar seg til utvalet si vurdering av at ein samarbeidsmodell særleg tilpassa slike samarbeid også bør vera lovheimla.

Samnanger kommune vil også understreka viktigheita av tilstrekkelege og føreseielege økonomiske rammer, i form av frie inntekter, for ivaretaking av generalistkommunesystemet. Både eit rettvist inntektssystem tilpassa kommunestorleiken og kompensasjon for naturressursar som vert avsett til storsamfunnet, er viktig for dette.

Behandling

Handsaming:
Knut Harald Frøland (Bl) orienterte innleiingsvis om at han trekte framlegget han hadde lagt inn i Møteportalen før møtet.

Etter innleiande diskusjon i formannskapet, foreslo Knut Harald Frøland eit gruppemøte der Øyvind Strømmen og Øyvind Røen utarbeidde eit felles framlegg til vedtak.

Etter gruppemøtet sette Øyvind Strømmen og Øyvind Røen fram eit felles framlegg til vedtak. Dette innebar at framlegga dei hadde lagt inn i Møteportalen før møtet, vart trekte.

Fellesframlegget til Øyvind Strømmen og Øyvind Røen vart samrøystes vedteke.

Vedtak

Samnanger kommune sluttar seg til avtale om administrativt vertskommunesamarbeid mellom Bjørnafjorden kommune og Samnanger kommune om interkommunal legevakt og legevaktsentral.

Vertkommunesamarbeidet er heimla etter vertskommunemodellen i kommunelova (LOV-2018-06-22-83) § 20-1 flg., irekna § 20-2 administrativt vertskommunesamarbeid og § 20-4 samarbeidsavtale.

Med heimel i kommunelova § 20-2 instruerer kommunestyret rådmannen om å delegera lovheimla oppgåver knytt til tenesteyting av legevakt og legevaktsentral til kommunedirektøren i Bjørnafjorden kommune, innanfor ramma av samarbeidsavtalen.

Samnanger kommunestyre ber rådmannen halda fram arbeidet med å etablera eit legevaktsamarbeid i retning Bergen.

Behandling

Handsaming:
Øyvind Strømmen (MDG) sette fram framlegg til eit tilleggspunkt til rådmannen sitt framlegg.

Odd Arne Haga (Frp) sette fram eit tilleggsframlegg.

Det vart gjennomført røysting over rådmannen sitt framlegg, inkludert Øyvind Strømmen sitt framlegg til tilleggspunkt. Samrøystes vedteke.

Det vart ikkje røysta over tilleggsframlegget til Odd Arne Haga. Formannskapet bad om at administrasjonen til kommunestyremøtet 14.09.2023 prøver å undersøkja med Bjørnafjorden kommune vedkomande den endringa som Odd Arne Haga foreslo i framlegget sitt (om at Moberg skal vera primær legevakt for Samnanger kommune). Formannskapet bad òg administrasjonen om å finna statistikk for kor mange av legevaktpasientane som blir sendt vidare til sjukehus.

Vedtak

Søknaden frå Norske Kvinners Sanitetsforening (N.K.S.) om økonomisk støtte til Veiledningssenter Vest blir ikkje innvilga.

Kommunestyret ber rådmannen leggja fram ei sak om retningslinjer for kommunal økonomisk støtte til landsdekkande eller regionale ideelle organisasjonar som tilbyr tenester som kan vera eit supplement til kommunen sitt tenestetilbod.

Behandling

Framlegget til rådmannen vart samrøystes vedteke.

Vedtak

Kommunestyret i Samnanger kommune gir med dette si tilslutning til at kommunane Fedje, Gulen, Masfjorden og Modalen blir nye deltakarar i Bergen og Omland Friluftsråd Kommunale Oppgavefellesskap med verknad frå 01.01.2024. Dei nye deltakarkommunane sitt ansvar og forpliktingar følgjer av samarbeidsavtalen og lov om kommunar og fylkeskommunar (LOV-2018-06-22-83) frå 01.01.2020 «kommuneloven»).

Behandling

Framlegget til rådmannen vart samrøystes vedteke.

Vedtak

Søknaden frå Lønnebakken Grendelag om tilskot på 15 000 kroner til å dekka uføresette utgifter til asfaltering av multibane ved Lønnebakken aktivitetsplass, blir innvilga.

Tilskotet blir finansiert med midlar frå fondet «Lavterskel aktivitet for born og unge».

Behandling

Knut Harald Frøland (Bl) bad om å få gildskapen sin vurdert. Han er bror til leiaren i Lønnebakken Grendalag, som har søkt kommunen om midlar til asfaltering av multibane. Knut Harald Frøland gjekk frå medan formannskapet vurderte gildskapen hans. Øyvind Røen gjekk inn som ordførar (møteleiar). Knut Harald Frøland vart samrøystes funnen ugild og deltok ikkje i den vidare handsaminga av saka.

Rådmannen sitt framlegg vart samrøystes vedteke.

Vedtak

Samnanger kommune viser til detaljreguleringsplan for Aldalen akvakulturanlegg i Lønningdal, lagt ut til offentleg ettersyn med frist 4. september 2023. Samnanger kommune har følgande merknader til saka:

1. Samnanger kommune vil peika på at Havforskningsinstituttet i ei årrekkje har berekna dødelegheit på smoltutvandring i Samnangerfjorden til høge nivå. Me vil også peika på at Samnangerfjorden er ein terskelfjord, som frå naturen si side har lite utskifting av vassmassar i nedre lag, og dermed er sårbar for høge nitrogennivå. Samnanger kommune er oppteken av at fjordsystemet og naturmangfaldet sine tolegrenser ikkje må overskridast, og av å ivareta både miljøet i sjøen og villfiskstammene. Fjordsystemet vårt er allereie sterkt påverka av dagens akvakulturnæring. Dette taler for stor grad av varsemd, ikkje berre ved auka biomasse, men også ved auka arealbruk.

2. Samnanger kommune registrerer at det vert lagt opp til ei betydeleg utviding av areal for akvakultur, og meiner dette bidreg til uforholdsmessig sterkt arealpress. Reguleringsføremål akvakultur bør ikkje beslaglegga eit større areal enn det som er naudsynt for sjølve anlegget og sikringssona rundt. Ei arealutviding av denne typen burde dessutan, om ho faktisk skal gjerast, gjerast i samband med rullering av kommuneplan; dette for å sikra at heilskaplege vurderingar vert lagt til grunn.

3. Lokaliteten Aldalen ligg plassert i den einaste utvandringsruta for laksesmolt frå tre vassdrag med kjente laksebestandar, Lønningdalselva, Hopselva og Tysseelva. Samnanger kommune peiker på at konsekvensutgreiinga for akvatisk naturmangfald peiker på negative verknader for alle tre, i tillegg til negative verknader for forflytningskorridor for kysttorsk og for anadrom fisk. Samnanger kommune vil uttrykkja sterk uro knytt til dette.

4. I samband med planprogram for kommunedelplan for akvakultur i sjø vedtok Samnanger kommune følgjande målsetting den 25. februar 2021:
«Fjordsystemet og naturmangfaldet sine tålegrenser skal ikkje overskridast og det skal vere eit produksjonsmessig overskot av ville lakse- og sjøørretstammer i dei elver i Samnanger som har dette. Akvakulturplanen skal foreslå tiltak som støttar opp under denne målsettinga.
Samnanger kommune ynskjer å betre ivareta både miljøet i sjøen og våre villfiskstammer i kommunen sin fjord og sjø. Vi vil ha ein nullutsleppsvisjon for forureining av kjemikalier/medisinsk utslepp og skadeleg slam i kommunen sin fjord.»

Samnanger kommune vurderer detaljreguleringsplan for Aldalen akvakulturanlegg i Lønningdal til å ikkje vera i samsvar med vår målsetting for fjordsystemet.

Behandling

Handsaming:
Knut Harald Frøland (Bl) sette fram framlegg til vedtak. Han orienterte om at dette var eit fellesframlegg frå han og Øyvind Strømmen (MDG).

Odd Arne Haga (Frp) sette fram framlegg til vedtak.

Det vart først røysta over framlegget til Odd Arne Haga. 1 røysta for og 8 røysta imot dette framlegget. Odd Arne Haga røysta for framlegget.

Det vart så røysta over framlegget til Knut Harald Frøland og Øyvind Strømmen. 6 røysta for og 3 røysta imot framlegget.

Etter røystinga gav formannskapet administrasjonen fullmakt til å retta skrivefeil før vedtaket blir sendt til Bjørnafjorden kommune.