Møte i Kommunestyret den 16.01.2020

Vedtak

Saklista vert godkjent med følgjande endring:

• Handsaming av krav om lovlegkontroll av kommunestyret sitt vedtak 05.12.2019 om skjenkeløyve til Milano Pizzeria Bjørkheim vert teke inn som ekstrasak på saklista.
  

Delegerte vedtak/referatsaker vert tekne til orientering.

Behandling

Godkjenning av innkalling og sakliste
Ordførar Knut Harald Frøland (Bl) foreslo å ta inn ei ekstrasak på saklista. Dette gjaldt sak om handsaming av krav om lovlegkontroll av kommunestyret sitt vedtak 05.12.2019 om skjenkeløyve til Milano Pizzeria Bjørkheim. Kommunestyret slutta seg til å ta denne saka inn på saklista.

Etter spørsmål frå Monica Tjønna (Sp) orienterte Knut Harald Frøland om at tidsplanen/agendaen for møtet var litt endra i forhold til møteinnkallinga. Endringa var at sakene som kommunestyret skal handsama/gjera vedtak i (sak 001, 002 og 003) vart tekne først i møtet, før KS folkevaldprogram/folkevaldopplæring.

Det var ingen andre merknader til innkallinga eller saklista.

Eventuelle merknader til protokoll frå førre møte
Ingen merknader.

Endring av klokkeslett for kommunestyremøta 05.03.2020 og 11.06.2020
Ordførar Knut Harald Frøland (Bl) foreslo følgjande endring i kommunestyret sin møteplan for 2020:

• Starttidspunktet for kommunestyremøta 05.03.2020 og 11.06.2020 vert endra frå kl. 12:00 til kl. 08:30.

Kommunestyret slutta seg til ordføraren sitt forslag.

Orienteringssaker:
Ingen saker.

Grunngjevne spørsmål:

Grunngjeve spørsmål frå Arild Røen (H) om Erikajorda
Arild Røen las opp spørsmålet. Charlotte Hageberg las opp rådmannen sitt svar. Svaret ligg som vedlegg til møteprotokollen.

Utvalet sitt kvarter

Bekymringsmelding om tilsettingsprosessar
Monica Tjønna (Sp) orienterte om at ho har fått bekymringsmeldingar frå tillitsvalde i kommunen om at dei ikkje lenger skal vera med i tilsettingsprosessar. Rådmann Charlotte Hageberg orienterte om at kommunen ikkje lenger har eit partssamansett tilsettingsutval, og viste til vedtak i kommunestyret. Dei tillitsvalde har ikkje lenger formell stemmerett ved tilsettingar, men dei skal likevel framleis i stor grad vera med i tilsettingsprosessane.

Spørsmål om sak om gratis skulemat
Odd Arne Haga (Frp) viste til vedtak i kommunestyret 05.12.2019 om at administrasjonen skal leggja fram ei sak om gratis skulemat i det første ordinære kommunestyremøtet i 2020. Han spurde kvifor saka ikkje stod på saklista til kommunestyremøtet 16.01.2010. Rådmann Charlotte Hageberg orienterte om status for denne saka.

Jordmorsituasjonen
Lena Tveit (Bl) orienterte om at ho har fått bekymringsmeldingar om jordmorsituasjonen i kommunen. Rådmann Charlotte Hageberg orienterte om status, mellom anna om at det no vil bli tilsett ein vikar i jordmorstillinga - i første omgang truleg fram til mai 2020.

Kraftforsyninga i Samnanger
Arild Røen (H) viste til at det er planar om bygging av både datasenter i Børdalen og nye kraftlinjer frå Børdalen til straumforsyning av oljeinstallasjonar i Nordsjøen. Han spurde om det er nok straum/straumkapasitet i Samnanger til desse utbyggingane. Ordførar Knut Harald Frøland (Bl) orienterte om at han har vore i kontakt med BKK, og fått tilbakemelding om at straumsituasjonen/kapasiteten ikkje skal vera noko problem.

Teigavika
Arild Røen (H) viste til planane om etablering av offentleg badeplass i Teigavika ved Bjørkheim. Han bad om at grunnforholda i Teigavika vert undersøkt nøye, då han har erfaring med at det er blaut strandbotn (fare for å siga nedi for badande). Arild Røen tok òg opp at tilstanden på hytta som står i Teigavika er svært dårleg, og at den kan vera farleg for besøkande i vika. Han bad om kommunen arbeider for å gje rivingsløyve/rivingspålegg for hytta. Rådmann Charlotte Hageberg orienterte om at ho vil bringa informasjonen vidare i admistrasjonen.

Leksefri skule
Arild Røen (H) spurde om ordninga med leksefri skule ved Samnanger barneskule er ei prøveordning eller ei fast ordning. Rådmann Charlotte Hageberg orienterte om prosjektet med leksefri skule. Det skal no gjerast ei undervegsvurdering av prosjektet, og det skal gjerast ei ny evaluering til sommaren.

Opprydding av bilvrak
Arild Røen (H) spurde om status for kommunen sitt arbeid med opprydding på stader/tomter med bilvrak. Rådmann Charlotte Hageberg orienterte om status.

Vedtak

Samnanger kommune stemmer ja i uravstemminga om revidert Hovudavtale for perioden 01.01.2020 – 31.12.2021.

Behandling

Rådmannen sitt framlegg vart samrøystes vedteke.

Vedtak

Kommunestyret sitt vedtak gjort 05.12.2019 i sak 079/2019 om å gje skjenkeløyve til Milano Pizzeria Bjørheim vert oppretthalde.

Behandling

Gunn Østvik Petersen (Ap) las opp kravet om lovlegkontroll, som var sett fram av følgjande kommunestyremedlemmer:

• Gunn Østvik Petersen (Ap)

• Brigt Olav Gåsdal (Ap)

• Monica Tjønna (Sp)

• Jon Magne Bogevik (Ap)

Kopi av kravet vart delt ut i møtet. Kopi av kravet følgjer òg som vedlegg til møteprotokollen.

Det vart under handsaminga avklart at kravet om lovlegkontroll var sett fram innanfor tidsfristen på tre veker, jf. reglar i § 27-1 i kommunelova.

Det vart gjennomført røysting over om kommunestyret sitt vedtak frå 05.12.2019 i sak 079/2019 om å gje skjenkeløyve til Milano Pizzeria Bjørkheim skulle oppretthaldast eller ikkje. 11 røysta for at vedtaket skulle oppretthaldast og 10 røysta imot.

Som følgje av at kommunestyret vedtok å oppretthalda vedtaket frå 05.12.2019, skal vedtaket sendast til fylkesmannen for lovlegkontroll, jf. reglar reglar i § 27-7 i kommunelova og kapittel IX i forskrift om delegering av myndighet etter kommunelova m.fl.