Møte i Kommunestyret den 05.03.2020

Behandling

Godkjenning av møteinnkalling og sakliste
Det var ingen merknader til møteinkallinga.

Ordførar Knut Harald Frøland (Bl) orienterte om at rådmannen hadde bedt om å få opp ei ekstrasak i møtet, med tittelen "Godkjenning av sluttavtale". Ordføraren foreslo at denne saka vart teken inn på saklista, og at den vart handsama etter KS Folkevaldprogram. Kommunestyret slutta seg til dette. Det var ingen andre merknader til saklista.

KS Folkevaldopplæring
Etter opninga av møtet var det KS Folkevaldprogram (folkevaldopplæring) v/Erik Haga kl. 08.45 - 11.30 . Dette var andre dag av KS Folkevaldprogram for kommunestyret i 2020.


Orienteringssaker:

Gode historiar
Ordførar Knut Harald Frøland (Bl) orienterte om introduksjonsprogrammet for flyktningar, som har har vore svært vellukka i Samnanger.

Status for arbeidet med rapport frå barneverngransking
Rådmann Charlotte Hageberg orienterte om status for arbeidet med rapporten. Ho har fått informasjon frå Barneadvokatene om at rapporten vil vera klar før påske.


Grunngjevne spørsmål:

Grunngjeve spørsmål frå Kristeleg Folkeparti om visning av innslag i NRK Supernytt
Gunn Totland Moss (KrF) las opp spørsmålet. Rådmann Charlotte Hageberg las opp svaret frå fungerande rektor ved barneskulen. Svaret ligg som vedlegg til møteprotokollen.


Utvalet sitt kvarter:

Koronavirus
Monica Tjønna (Sp) spurde om kommunen sin beredskap knytt til koronaviruset. Ho foreslo òg at det vert utplassert spritdispensarar på offentlege plassar i kommunen.

Rådmann Charlotte Hageberg orienterte om korleis kommunen arbeider med denne saka, kva tiltak som er sette i verk og kva ulike scenario det vert planlagt for.

Oppseiingstid på omsorgsbustader
Monica Tjønna (Sp) tok opp at kommunen si ordning med tre månaders oppseiingstid på omsorgsbustader fører til at eldre gjerne må betala dobbel husleige i samband med overgang frå omsorgsbustad til sjukeheimsplass. Dette temaet vart seinare i møtet handsama som eiga sak (interpellasjon frå Bygdalista).

Sjukefråvær
Arild Røen (H) viste til at sjukefråværet i kommunen var høgare i 2019 enn i 2018, og spurde om kva som kan vera årsaker til dette. Rådmann Charlotte Hageberg orienterte nærmare om sjukefråværet i 2019, mellom anna om moglege årsaker til at det samla sjukefråværet gjekk opp i 2019.

Referatsaker i kommunestyret
Arild Røen (H) viste til at det var mange informasjonssaker i innkallinga til formannskapet sitt siste møte, og at det berre var to informasjonssaker i innkallinga til kommunestyret 05.03.2020. Han peika på at det kan vera nyttig at kommunestyret òg får den same informasjonen som formannskapet. Ordførar Knut Harald Frøland (Bl) orienterte om at dette kan ordnast.

Oppfølging av grunngjeve spørsmål frå Kristeleg Folkeparti
Odd Arne Haga (Frp) hadde ein kommentar knytt til det grunngjevne spørsmålet frå Kristeleg Folkeparti.

Behov for avklaring om kommunestyret sitt ansvar for å organisera arbeidet
Odd Arne Haga (Frp) viste til folkevaldopplæringa tidlegare på dagen, og spurde om kva som ligg i kommunestyret sitt ansvar for å organisera arbeidet. Administrasjonen vil koma tilbake til dette spørsmålet.

Vedtak

Det vert med verknad frå mars 2020 starta opp ordning med gratis skulemat (lunsj) to dagar i veka for elevane ved Samnanger ungdomsskule. Ordninga skal evaluerast innan utgangen av inneverande skuleår (2019/2020). Det vert løyvd inntil 80 000 kroner til ordninga i 2020, finansiert av disposisjonsfondet. Frå og med 2021 må midlar til ordninga leggjast inn i ungdomsskulen sitt budsjett, med inntil 100 000 kroner.

Behandling

Formannskapet si tilråding vart samrøystes vedteke.

Vedtak

Rådmannen får ansvar for å utarbeida framlegg til revidert delegeringsreglement for Samnanger kommune, jf. reglar i § 5-14 i kommunelova. Formannskapet vert styringsgruppe for arbeidet. Framlegget skal leggjast fram til politisk handsaming i formannskapet og kommunestyret innan 31.12.2020.

Behandling

Formannskapet si tilråding vart samrøystes vedteke.

Vedtak

Det vert med verknad frå 01.08.2020 oppretta ei ny fast 100 % stilling som rådgjevar eller eventuelt førstekonsulent i rådmannen sin stab, for tida med arbeidsstad ved økonomikontoret. Det vert gjeve tilleggsløyving på inntil 400 000 kroner frå disposisjonsfondet til finansiering av lønnsutgiftene til stillinga i 2020. Frå og med 2021 må lønnsmidlar til stillinga leggjast inn i det ordinære budsjettet.

Rådmannen har fullmakt til å ta endeleg avgjerd om stillingstittel og bestemma kva arbeidsoppgåver som skal liggja til stillinga.

Behandling

Formannskapet si tilråding vart samrøystes vedteke.

Vedtak

Det blir løyvd 75 000 kr, med finansiering frå disposisjonsfondet. Og at administrasjonen utarbeider ein plan for uteområdet og tiltak. Det blir lagt fram til formannskapet 28/5 med en finansieringsplan.

Behandling

Håvard Tvedterås (Frp) sette fram følgjande framlegg, på vegner av Frp:

"Kommunestyret løyver 200 000 til nytt leikeområde på Samnanger Barneskule. Beløpet tas ifbm med lån/ investeringsbudsjett for 2020."

Ordførar Knut Harald Frøland (Bl) bad om gruppemøte.

Etter gruppemøtet orienterte Håvard Tvederås om at Frp trekte det første framlegget sitt. I staden sette han fram følgjande fellesframlegg frå Frp, Bl, Sp og KrF:

"Det blir løyvd 75 000 kr, med finansiering frå disposisjonsfondet. Og at administrasjonen utarbeider ein plan for uteområdet og tiltak. Det blir lagt fram til formannskapet 28/5 med en finansieringsplan."

I røystinga vart rådmannen sitt framlegg sett opp mot fellesframlegget frå Frp, Bl, Sp og KrF. Fellesframlegget vart samrøystes vedteke.

Vedtak

Samnanger kommune sine noverande personalvedtekter vert sette ut av kraft frå og med

05.03.2020, med unnatak av kapittel 3 (Generelle personalvedtekter).

Kommunestyret vedtek framlegga til følgjande retningslinjer, prinsipp og reglement, som vert gjort

gjeldande frå og med 05.03.2020:

• Personalpolitiske retningslinjer

• Etiske prinsipp for tilsette

• Permisjonsreglement

• Arbeidstids-/fleksitidsreglement

• Reglement for påskjønning av tilsette

• Telefonreglement

Det vert gjort følgjande endringar i forhold til rådmannen sitt framlegg:

• Punkt 3 b i framlegget til etiske prinsipp for tilsette vert fjerna. Det vil seie at følgjande setning vert fjerna: "I tenestesamanheng setja lojalitet til arbeidsgjevar føre lojalitet til andre."

• I punkt 4.1 i framlegget til reglement for påskjønning av tilsette vert verdien av gåve til tilsette ved markering av 40 års teneste auka frå 25 gongar påskjønningsfaktor (4 125 kroner) til 36 gongar påskjønningsfaktor (5 940 kroner).

• I telefonreglementet skal omgrepet "IKT-koordinator" ikkje brukast. Administrasjonen får i oppgåve å justera teksten i forhold til dette.

Med verknad frå 06.03.2020 vert vedtaksmynde for permisjonsreglementet, arbeidstids-/

fleksitidsreglementet og reglementet for påskjønning av tilsette delegert frå kommunestyret til

administrasjonsutvalet. Denne delegeringa omfattar ikkje fullmakt til å gjera endringar i arbeidstida pr. veke for tilsette i kommunen. Det vert frå same dato gjort følgjande endringar i kommunen sitt delegeringsreglement:

• Punkt 8.1, andre avsnitt vert endra til: «Administrasjonsutvalet gir innstilling til kommunestyret om personalpolitiske retningslinjer, etiske prinsipp for tilsette og del I (overordna del) av lønspolitisk plan for Samnanger kommune.»

• Punkt 8.2 bokstav c vert endra til: «Vedtaksmynde for permisjonsreglement, arbeidstids-/ fleksitidsreglement og reglement for påskjønning til tilsette. Denne delegeringa omfattar ikkje fullmakt til å gjera endringar i arbeidstida pr. veke for tilsette i kommunen.»

• Punkt 8.2 bokstav e vert endra til: «Gjera vedtak om nødvendige tolkingar/presiseringar i dei personalpolitiske retningslinjene og etiske prinsippa for tilsette dersom det er behov for dette.»

Med verknad frå 06.03.2020 vert vedtaksmynde for telefonreglementet for tilsette delegert frå

kommunestyret til rådmannen. Det vert frå same dato (06.03.2020) gjort følgjande endring i delegeringsreglementet:

• Punkt 19.2.4 bokstav h vert endra til: «Fullmakt til å vedta telefonreglement for tilsette og gjera vedtak om telefonordning for tilsette».

Kommunestyret gir rådmannen fullmakt til å inngå avtale med dei tillitsvalde om arbeidsreglement, basert på forslaget til arbeidsreglement som er utarbeidd. Fram til det er inngått slik avtale gjeld kapittel 3 i dei noverande personalvedtektene.

Rådmannen har vedtaksmynde for tilsettingsreglement, jf. vedtak i kommunestyret 05.12.2019 i sak 077/2019.

Behandling

Administrasjonsutvalet si tilråding vart samrøystes vedteke.

Vedtak

Samnanger kommune starter snarast opp anbodsprosessen med kommunedelplan for Akvakultur i Samnanger. Planarbeidet vert finansiert med inntil 250.000 frå næringsfondet konto 1400.3251. Planarbeidet bør vera ferdig innan 2020.

Behandling

Formannskapet si tilråding vart vedteken med 19 mot 2 røyster.

Vedtak

Med heimel i plan- og bygningslova § 10-1, andre ledd vert framlegg til kommunal planstrategi for Samnanger kommune 2020-2023 lagt ut til offentleg ettersyn og sendt på høyring til statlege og regionale organ og nabokommunar.

Det vert gjort følgjande endringar i forhold til naturutvalet si tilråding:

• Det bør takast inn i samfunnsdelen ei målsetting om ein befolkningsvekst på 3 %.

• Trafikksikringsplanen må inn som eige punkt i planprogrammet.

• Bustadsosial handlingsplan skal vera ein del av samfunnsdelen i kommuneplanen

• Arbeidet med arealdelen i kommuneplanen skal startast opp parallelt med samfunnsdelen. Fokuset skal då vera spesielt på dei områda som vert arbeidde med i samfunnsdelen.

Behandling

Monica Tjønna (Sp) sette fram følgjande framlegg til tillegg/endring i forhold til naturutvalet si tilråding:

"Kommuneplanens arealdel må inn som prioritert plan med oppstart samtidig som kommuneplanen sin samfunnsdel. Samnanger kommune meiner det er viktig at desse to planane jobbast med parallelt, spesielt med tanke på vurderinga av 1-10 skule i Samnanger kommune, der plassering av skule no er høgaktuelt."

Øyvind Røen (Sp) bad om gruppemøte.

Etter gruppemøtet orienterte Øyvind Røen om at framlegget til Monica Tjønna vart trekt. Han sette i staden fram følgjande fellesframlegg frå Sp, Bl og Frp:

"Som tilrådinga med desse tillegga/endringane:

• Bustadsosial handlingsplan skal vera ein del av samfunnsdelen i kommuneplanen

• Arbeidet med arealdelen i kommuneplanen skal startast opp parallelt med samfunnsdelen. Fokuset skal då vera spesielt på dei områda som vert arbeidde med i samfunnsdelen."

Linda Haug Kollbotn (Frp) sette fram følgjande framlegg til tillegg/endring i forhold til naturutvalet si tilråding:

• "Det bør takast inn i samfunnsdelen ei målsetting om ein befolkningsvekst på 3 %.

• Trafikksikringsplanen må inn som eige punkt i planprogrammet."

Det vart først røysta punktvis over framlegga til tillegg/endringar.

Røysting over det første kulepunktet i framlegget til Linda Haug Kollbotn
Framlegget vart samrøystes vedteke.

Røysting over det andre kulepunktet i framlegget til Linda Haug Kollbotn
Framlegget vart samrøstes vedteke.

Røysting over det første kulepunktet i fellesframlegget frå Sp, Bl og Frp:
Framlegget vart samrøystes vedteke.

Røysting over det andre kulepunktet i fellesframlegget frå Sp, Bl og Frp:
Framlegget vart vedteke med 15 mot 6 røyster.

Til slutt vart det gjennomført røysting der naturutvalet si tilråding inkludert vedtekne tillegg/endringar vart sett opp mot naturutvalet si tilråding. Naturutvalet si tilråding inkludert vedtekne tillegg/endringar vart samrøstes vedteke.

Vedtak

På bakgrunn av forvaltningsrevisjon av Tilpassa opplæring og spesialundervisning i Samnanger kommune ber kommunestyret rådmannen syta for å:

1. Vurdere kva tiltak som bør setjast i verk for å sikra at også elevar med svakare og sterkare læreføresetnader enn gjennomsnittet får ei tilpassa opplæring.

2. Sikre at elevar på 1. til 4. trinn som står i fare for å bli hengande etter i lesing, skriving eller rekning, raskt får eigna intensiv opplæring slik at forventa progresjon blir nådd.

3. Sikre at prosessar knytt til utprøving av tiltak innanfor den ordinære undervisningssituasjonen i minst mogleg grad er personavhengige, til dømes gjennom rettleiande og kompetansehevande tiltak retta mot undervisningspersonalet.

4. Sikre at skulane i kommunen har ein innarbeidd framgangsmåte for korleis lærarane som ein del av undervegsvurderinga systematisk og løpande skal vurdere om elevane har tilfredstillande utbytte av opplæringa, samt vurderer å tydeleggjere dette kravet gjennom felles rutinar.

5. Gjennomgå og justerer rutinar og malar som skal nyttast i sakshandsaminga og i samband med gjennomføring og evaluering av spesialundervisning, slik at desse er i samsvar med regelverket og bidrar til å sikre at krav i regelverket blir etterlevd (jf. revisjonen sine vurderingar i 5.3.2).

6. Sikre at sakshandsaminga i samband med vurdering av behov for spesialundervisning er i samsvar med krav i opplæringslova og forvaltningslova (jf. revisjonen sine vurderingar i kapittel 5.4.2).

7. Sikre at alle elevar får gjennomført den spesialundervisninga dei har vedtak om, og at IOPar alltid byggjer på eit gyldig enkeltvedtak om spesialundervisning for eleven.

8. Sikre korrekt GSI-rapportering.

9. Å lage ein prioritert handlingsplan til kontrollutvalet innan 01.04.2020 som visar kva tiltak som skal setjast i verk for å følgja opp tilrådingane i rapporten, når tiltaka skal setjast i verk og kven som skal ha ansvaret for iverksettinga.

Behandling

Ordførar Knut Harald Frøland (Bl) kommenterte at det står feil årstal i punkt 9 i vedtaksframlegget. Rett årstal skal vera 2020, ikkje 2019.

Leiar i kontrollutvalet Arild Røen (H) orienterte innleiingsvis kort om saka. Han foreslo òg at det vert sett av tid til ein presentasjon av kontrollutvalet i neste møte i kommunestyret.

Line Johansen frå Deloitte orienterte om forvaltningsrevisjonen og rapporten.

Rådmann Charlotte Hageberg orienterte om at administrsjonen allereie er godt i gang med arbeidet med tiltaka som Deloitte foreslår i rapporten.

Kontrollutvalet sitt framlegg vart samrøystes vedteke.

Vedtak

Alternativ 2 - FR som i dag, men med følgjande innsparing:

• Lokal særavtale for vaktgodtgjersla vert reforhandla i løpet av våren 2020.

Behandling

Formannskapet si tilråding vart samrøystes vedteken.