Møte i Kommunestyret den 11.06.2020

Vedtak

Møteinnkallinga og saklista vert godkjent. Delegerte vedtak/referatsaker vert tekne til orientering.

Behandling

Godkjenning av møteinnkalling og sakliste
Jon Magne Bogevik (Ap) hadde følgjande merknader til møteinnkallina:

• Han sakna årsmelding frå barnevernet og landbrukskontoret i sak 037/2020 (Årsmelding 2019)

• Han viste til sakspapira i sak 039/2020 og spurde om Advokatfirmaet Elden berre har vurdert spørsmålet om erstatningssøksmål mot tidlegare tilsette, eller om han også har vurdert spørsmålet om erstatningssøksmål mot andre instansar. Ordførar Knut Harald Frøland (Bl) orienterte om at ein ville koma tilbake til dette under handsaminga av saka.

Rådmann Charlotte Hageberg orienterte om at to saker som eigentleg skulle opp til handsaming i kommunestyret 11.06.2020, likevel ikkje kjem opp fordi administrasjonen ikkje har hatt kapasitet til å utgreia sakene. Dette gjaldt sak om heis på kommunehuset og tilstandsrapport kommunehuset og ungdomsskulen.

Det var ingen andre merknader til møteinnkallinga eller saklista.

Eventuelle merknader til protokoll frå førre møte
Ingen merknader.

Orienteringar

Orientering om prosjektet Fylkesveg 49 Tunnel forbi Tokagjelet
Vestland fylkeskommune v/Bente Øyre og Matti Torgersen orienterte om prosjektet Fylkesveg 49 Tunnel forbi Tokagjelet, og svarte på spørsmål frå kommunestyret. Denne presentasjonen vart halden før handsaminga av grunngjevne spørsmål.

Presentasjon av Eikedalsvassdraget
Presentasjon v/Terje Engvik. Han svarte også på spørsmål frå kommunestyret. Denne presentasjonen vart halden etter utvalet sitt kvarter.

Grunngjevne spørsmål

Grunngjevne spørsmål frå Samnanger Frp om diverse tema
Karl Bård Kollbotn (Frp) las opp spørsmåla. Rådmann Charlotte Hageberg las opp administrasjonen sine svar. Administrasjonen sine svar ligg som vedlegg til møteprotokollen.

Grunngjeve spørsmål frå Anja Elisabeth Gjerde Markhus (Bl) om motorsykkelkøyring på kveld/natt
Anja Elisabeth Gjerde Markhus las opp spørsmålet. Ordførar Knut Harald Frøland (Bl) svarte. Han har vore i kontakt med kommunen sin politikontakt om saka. Politiet er merksame på problemet, som finst i heile politidistriktet. Politiet vil truleg gjennomføra kontrollar i Samnanger, men talet på kontrollar vil av kapasitetsmessige årsaker truleg ikkje bli stort.

Grunngjeve spørsmål frå Ove Totland (Bl) om uteområdet på barneskulen
Ove Totland las opp spørsmålet. Rådmann Charlotte Hageberg las opp administrasjonen sitt svar. Administrasjonen sine var ligg som vedlegg til møteprotokollen.


Utvalet sitt kvarter

Ønske om tidsplan for svar frå administrasjonen
Odd Arne Haga bad om å få ein tidsplan for når Samnanger Frp kan forventa å få svar på dei grunngjevne spørsmåla som administrasjonen ikkje hadde svart på i møtet.

Ønske om auka kvotar for felling av hjort
Monica Tjønna viste til at hjortebestanden er svært stor. Ho bad kommunen om å oppmoda hjortevalda i kommunen om å arbeida for auka kvotar for felling av hjort.

Arbeidskle for tilsette
Monica Tjønna stilte spørsmål om ordningane som kommunen har for arbeidstøy til tilsette, mellom anna for vinterkle. Ho sa at tilsette i heimetenesta ikkje har gode nok arbeidskle for vinterforhold. Ho har også fått informasjon om at det ser ut til å vera forskjellsbehandling mellom grupper av tilsette i kommunen, og viste her konkret til forskjellar mellom ordningane for tilsette i heimetenesta og teknisk (samfunnsutvikling). Ho bad om at det enten blir innført ordning der tilsette får ein sum til dekking av utgifter til arbeidskle, eller at det blir innført lik ordning for alle som treng arbeidskle.

Ytringar frå folkevalde på internett
Martin Haugen (Bl) viste til diskusjon i tidlegare møte om korleis dei folkevalde ytrar seg i media. Han viste spesielt til innlegg frå rådmannen i formannskapsmøtet i februar 2020, der rådmannen uttrykte bekymring om korleis me snakkar med og om kvarandre i kommunen. Martin Haugen meinte at det etter førre kommunestyremøte var fleire eksempel i sosiale media der folkevalde kom med ytringar som ikkje er greie. Han viste her spesielt til ytringar i Facebook-gruppa "For Samningar - Ope politisk forum", og nemnde spesifikt behandlinga medlemmer i ungdomsrådet fekk der. Monica Tjønna (Sp), som er administrator for denne Facebook-gruppa, orienterte om at dette er ei privat side som ho har oppretta og som ikkje er i kommunen sin regi. Monica Tjønna orienterte òg om at ingen har rapportert inn til ho at dei føler seg krenka av innlegg/kommentarar som er lagt ut på denne sida. Ho oppmoda om at ho blir kontakta dersom nokon opplever seg krenka.

Vegnummerskilt
Jon Magne Bogevik (Ap) spurde om kvifor det er sett opp ulike typar vegnummerskilt i kommunen - både einsidige (med vegnummer på ei side) og tosidige (med vegnummer på begge sider). Rådmann Charlotte Hageberg kunne ikkje svara på dette i møtet, men sa ho ville undersøkja saka.

Kapasitet i administrasjonen
Gunn Østvik Petersen (Ap) viste til at møteinnkallinga til kommunestyret vart sendt ut seint på kvelden 04.06.2020, og spurde om det er nok kapasitet i administrasjonen. Rådmannn Charlotte Hageberg orienterte om at den store mengda oppgåver gjer at det er høg arbeidsbelastning og ofte lange arbeidsdagar for tilsette i admistrasjonen.

Finanisering av klassetur for 10. klasse
Lena Tveit viste til at 9. klasse ved Samnanger ungdomsskule manglar 60 000 kroner til sin planlagte skuletur til Voss Aktiv. Årsaka til dette er at dei ikkje har hatt moglegheit til å få inn planlagte inntekter (frå kafèdrift på ungdomsskulen) på grunn av koronasituasjonen. Dei har henvendt seg til Lena Tveit og spurt om kommunen kan dekka den summen som manglar for å få gjennomført turen - for eksempel ved bruk av koronamidlar - eller ved å forskottera midlar som klassen må betala tilbake seinare. Ordførar Knut Harald Frøland (Bl) orienterte om at også 6. klasse har mista moglegheit til å få inntekter (frå 17. mai) på grunn av koronasistuasjonen.

Besøksordning ved sjukeheimen under koronapandemien
Arild Røen (H) viste til at det er ulik praksis mellom kommunar når det gjeld besøkstider på sjukeheimar (for eksempel mellom Bergen og Samnanger). Han spurde om det kan gjerast noko for å samordna dette mellom kommunane. Rådmannn Charlotte Hageberg orienterte om situasjonen/ordninga i Samnanger og om bagrunnen for vala som kommunen har gjort. Kommunen sitt hovudfokus er å unngå å få koronasmitte inn på sjukeheimen.

Vedtak

Meddommarar til Bergen tingrett for perioden 01.01.2021 – 31.12.2024 frå Samnanger kommune:

Behandling

Arbeidsutvalet sitt framlegg vart samrøystes vedteke.

Vedtak

Meddommarar frå Samnanger kommune til Gulating lagmannsrett for perioden 01.01.2021 – 31.12.2024:

Behandling

Abeidsutvalet sitt framlegg vart samrøysytes vedteke.

Vedtak

Meddommarar til Nord- og Midhordland jordskifterett for perioden 01.01.2021 – 31.12.2024 frå Samnanger kommune:

Behandling

Arbeidsutvalet sitt framlegg vart samrøystes vedteke.

Vedtak

Samnanger kommune sitt forslag til skjønnsmedlemmer for perioden 01.01.2021 – 31.12.2024:

Behandling

Arbeidsutvalet sitt framlegg vart samrøystes vedteke.

Behandling

Det gjekk fram av saksutgreiinga at forslag til ny medlem i sakkunnig nemnd for eigedomsskatt skulle leggjast fram i møtet. Innleiingsvis under handsaminga orienterte sakshandsamar Marianne Soleng om at arbeidstutvalet framleis ikkje hadde klart eit forslag til ny medlem i denne nemnda. Valet av ny medlem til sakkunnig nemnd for eigedomsskatt vart derfor utsett til neste kommunestyremøte. Med denne endringa vart arbeidsutvalet sitt framlegg til suppleringsval samrøystes vedteke.

Vedtak

Frivilligerklæringa blir godkjent som vedlagt.

Behandling

Solveig Vassenden (Bl) bad om å få gildskapen sin vurdert, fordi ho er aktiv i frivillig arbeid i kommunen. Det var semje i kommunestyret om at det ikkje var nødvendig å vurdera gildskapen hennar, og om at det ikkje nødvendig å røysta over gildskapen hennar.

Rådmannen sitt framlegg vart samrøystes vedteke.

Vedtak

Finansrapportering for 1.tertial 2020 vert tatt til etterretning.

Behandling

Formannskapet si tilråding vart samrøystes vedteke.

Vedtak

Rådmannen får fullmakt til å disponere og budsjettjustere auka rammetilskot til korona-situasjonen.

Auka stilling på 50 % ved HR knytt til innføring av nytt løn- og økonomi system vert vidareført ut september. Dette vert finansiert med lønsmidlar frå vakant IKT-koordinatorstilling. Kostnad kr 95 000.

Fylgjande budsjettjusteringar vert gjort for å overføre budsjettmidlar frå 2019 til 2020. Dette påverkar ikkje kostnadsramma som er gitt til prosjekta:

Prosjektet Velferdsteknologi starta opp i 2019 og vart vedtatt finansiert i KS sak 28/19. Mesteparten av utgifta kjem i 2020, i tillegg er kostnaden blitt høgare enn først antatt. Eininga treng ei løyving på kr 340 000 for at prosjektet skal vere finansiert. Finansiering vert disposisjonsfondet.

Kommunen sin eigendel i Dagsturhytta i KS-sak 84/19 på kr 100 000 vert finansiert ved bruk av ubunde investeringsfond.

Løyving til kontrollutvalet på kr 200 000 i sak 23/20 vert finansiert med disposisjonsfondet.

Behandling

Formannskapet si tilråding vart samrøystes vedteke.

Vedtak

1. Restfinanisering av straumstyringsanlegg og el-tavle kr. 100 000 til kyrkjene.

Dette vert finansiert med ubunde investeringsfond.

2. Investeringane til kyrkjene blir finansiert med kommunale lånemidlar i 2020 til dette tiltaket:

• Nytt lydanlegg på Ådland kr. 120 000.

Andre tiltak som kyrkja ønskjer vert vurderte i september saman med andre kommunale investeringar.

Behandling

Linda Haug Kollbotn, som er kommunen sin representant i kyrkjestyret, orienterte innleiingsvis om arbeidet kyrkja gjer, samt om vedlikehaldsbehov og kva forventningar kyrkja har til kommunestyret. Ho viste ein presentasjon om kyrkjelydsarbeidet. Presentasjonen ligg som vedlegg til møteprotokollen.

Etter den innleiande debatten bad Linda Haug Kollbotn om gruppemøte.

Etter gruppemøtet sette Linda Haug Kollbotn fram følgjande framlegg til vedtak:

"1. Restfinanisering av straumstyringsanlegg og el-tavle kr. 100 000 til kyrkjene.

Dette vert finansiert med ubunde investeringsfond.

2. Investeringane til kyrkjene blir finansiert med kommunale lånemidlar i 2020 til dette tiltaket:

• Nytt lydanlegg på Ådland kr. 120 000.

Andre tiltak som kyrkja ønskjer vert vurderte i september saman med andre kommunale investeringar."

I røystinga vart formannskapet si tilråding sett opp mot framlegget til Linda Haug Kollbotn. Framlegget til Linda Haug Kollbotn fekk 12 røyster og tilrådinga til formannskapet 9 røyster.

Vedtak

Årsmelding for Samnanger kommune for 2019 vert teken til orientering.

Behandling

Jon Magne Bogevik gjentok innleiingsvis under handsaminga det same som han tok opp under godkjenninga av møteinnkallinga og saklista tidlegare i møtet, om at årsmeldinga ikkje inneheld informasjon om barneverntenesta og landbrukskontoret. Rådmann Charlotte Hageberg orienterte om at informasjon om barneverntenesta og landbrukskontoret vil bli teke med i komande årsmeldingar.

Under formannskapet si handsaming av saka 28.05.2020 spurde Odd Arne Haga (Frp) om korleis arbeidet med førebyggande helsearbeid og styrketrening ligg an i kommunen. Administrasjonen kunne ikkje svara på dette i formannskapsmøtet, men lova å gje svar i kommunestyet 11.06.2020. Rådmann Charlotte Hageberg orienterte derfor i kommunestyret 11.06.2020 om kommunen sitt tilbod på dette området.

Formannskapet si tilråding vart vedteken med 20 mot 1 røyst. Jon Magne Bogevik (Ap) røysta imot.

Vedtak

Rekneskapen for 2019 vert godkjent slik han ligg føre. Mindreforbruket (overskotet) for 2019 på

kr 20 105,04 vert sett av til disposisjonsfond.

Framført underskot på sjølvkost kan dekkast inn ved eit evt. overskot i 2020. Dette gjeld:

Behandling

Formannskapet si tilråding vart samrøystes vedteke.

Vedtak

Samnanger kommune har motteke notat med vurdering frå Advokatfirmaet Elden DA, med tittel «Juridisk vurdering – Utredning av ansvarsforholdene for barneverntjenestens ansatte i Samnanger kommune med tanke på mulig krav/søksmål». Jf. kommunestyrevedtak i sak 024/20.

Med utgangspunkt i denne vurderinga – og med grunnlag i tilgjengeleg dokumentasjon, særleg granskingsrapport utført av advokatane Thea Totland og Geir Kjell Andersland – skal det til formannskapsmøtet 3. september 2020 førebuast underlag for stemning med krav om erstatning (regress) i sak 2 i granskingsrapporten. Den eventuelle stemninga gjeld tidlegare barnevernsleiar i Samnanger kommune – og fylkesnemnda og tingretten som har handsama sak 2.

Behandling

Øyvind Strømmen (MDG) sette fram følgjande framlegg til vedtak:

"Granskingsrapporten rundt tre konkrete barnevernssaker i Samnanger har synleggjort ein svikt i barnevernet, og set blant anna søkjelys på: manglande skriftligheit, manglande høyring av born sine synspunkt, manglande hjelpetiltak, manglande vurdering av fosterheim etter omsorgsovertaking, manglande grunngjeving for at sysken har vorte skilt frå kvarandre og manglande kultursensitivitet. I ei sak konkluderer granskarane med at eit born har vorte fråteke barndomen sin gjennom uforstandig offentleg omsorgsovertaking.

Samnanger kommune har på bakgrunn av dette gjeve ei orsaking til og oppreising til fleire born og foreldre.

• Det bør setjast ned eit uavhengig, nasjonalt granskingsutval som får breitt mandat til å føreta ein heilskapleg gjennomgang av barnevernet, og fremma framlegg til forbetringar.

• Det må innførast ei autorisasjonsordning for tilsette i barnevernet, på lik line med helsevesenet, slik det også framgår av regjeringserklæringa til Høgre, Frp, Venstre og KrF av 17. januar 2019 (Granavolden-plattforma).

• Tilsyn av barnevernstenestene bør leggjast til eit uavhengig kontrollorgan som kun har ansvar for dette. Eit slikt tilsyn må sjå til at manglar, avvik og lovbrot vert fulgt opp og retta opp, og må syta for at born har fått uttala seg i saker som vedgår dei, samt for at dette er dokumentert. Organet må også ha sanksjonsmoglegheiter når det vert avdekka feil og manglar.

• Den barnevernsfaglege utdanninga må styrkast i innhald og utvidast frå 3 til 5 år.

• Det bør innførast ei bemanningsnorm i kommunalt barnevern.

Kommunestyret i Samnanger vil understreka at eit godt barnevern er avgjerande viktig, og at feil gjort av barnevernet har dramatiske konsekvensar. Difor meiner kommunestyret også at det bør førast hyppigare og tydelegare kontroll av korleis barnevernstenester utfører sitt arbeid, for slik å syta for at feil og manglar som vert avdekka vert fulgt opp på ein god måte, og på eit tidleg tidspunkt."

Øyvind Strømmen bad om at punkta i framlegget hans vart tekne opp til punktvis votering.

Det vart først røysta over formannskapet si tilråding, som vart vedteken med 13 mot 8 røyster.

Etter dette vart det røysta punktvis over Øyvind Strømmen sitt framlegg:

1. Røysting over dei tre første avsnitta i Øyvind Strømmen sitt framlegg (fram til punktlista)

• Framlegget fall med 9 mot 12 røyster.

2. Røysting over det første kulepunktet i Øyvind Strømmen sitt framlegg:

• Framlegget fall med 10 mot 11 røyster.

3. Røysting over det andre kulepunktet i Øyvind Strømmen sitt framlegg:

• Framlegget fall med 9 mot 12 røyster.

4. Røysting over det tredje kulepunktet i Øyvind Strømmen sitt framlegg:

• Framlegget fall med 9 mot 12 røyster.

5. Røysting over det fjerde kulepunktet i Øyvind Strømmen sitt framlegg:

• Framlegget fall med 9 mot 12 røyster.

6. Røysting over det femte kulepunktet i Øyvind Strømmen sitt framlegg:

• Framlegget fall med 9 mot 12 røyster.

7. Røysting over det siste avsnittet i Øyvind Strømmen sitt framlegg:

• Framlegget fall med 9 mot 12 røyster.