Møte i Formannskapet den 03.09.2020

Vedtak

Møteinnkallinga og saklista vert godkjent.

Behandling

Godkjenning av møteinnkalling og sakliste
Ordførar Knut Harald Frøland (Bl) foreslo å endra på rekkefølgja på nokre av sakene på saklista. Han foreslo at saknr. 030, 031 og 032 vart handsama rett etter sak 026. Formannskapet slutta seg til dette.

Ordføraren orienterte òg om at sakene om sals- og skjenkeløyve som det var planlagt å handsama i formannskapsmøtet, likevel ikkje kom opp fordi administrasjonen ventar på uttale frå politiet til søknadane. Dette har også skjedd fleire gongar tidlegare i saker om sals- og skjenkeløyve. Ordføraren sa at han meiner det er behov for å få på plass klare køyrereglar for prosessen med søknader om sals- og skjenkeløyve, for å unngå dette problemet.

Ordføraren ønska òg den nye rådmannen, Ingebjørg Vamråk, velkommen til kommunen.

Det var ingen andre kommentarar eller spørsmål til møteinnkallinga eller saklista.


Orienteringssaker

Orientering frå rådgjevar oppvekst og rektor/einingsleiar ved Samnanger barneskule
Rådgjevar Bodil Helliesen Øpstebø og rektor/einingsleiar Eli Kristin Berge orienterte om mellom anna satsingsområde, målsettingar og utfordringar for barneskulen. Etter orienteringa svarte dei på spørsmål frå formannskapet. Lysarka frå orienteringa følgjer som vedlegg til møteprotokollen.

Status VA og gang- og sykkelveg i Eikedalen
Avdelingsleiar teknisk drift, Nils Jonny Skar, orienterte kort om status i saka. Meir informasjon vil bli gitt i neste formannskapsmøte.

Status Fossen bratte, tunnel Kvamskogen, moglegheitsstudie Bjørkheimsområdet og moglegheitsstudie 1-10 skule/idrettshall
Ordførar Knut Harald Frøland (Bl) bad om at det blir orientert om status i desse sakene i kommunestyret 16.09.2020.


Utvalet sitt kvarter

Økonomistatus
Spørsmål frå Jon Magne Bogevik om status for bruk av ekstramidlar korona m.m. Rådmann Ingebjørg Vamråk orienterte om at administrasjonen ikkje har hatt kapasitet til å utarbeida informasjon om dette til formannskapsmøtet 03.09.2020. Rådgjevar Jan Erik Boge orienterte om at sak om økonomirapportering vil verta lagt fram i kommunestyret 16.09.2020.

Rapport varslingssak Samnanger barneskule
Jon Magne Bogevik etterlyste Deloitte sin rapport frå varslingssaka ved barneskulen. Ordføraren orienterte om at kontrollutvalet vil leggja fram rapporten for kommunestyret 16.09.2020.

Statuttar påkoplingsavgift til kommunalt vassverk
Jon Magne Bogevik (Ap) etterlyste statuttar for maksimumsbetaling for påkopling til kommunalt vassverk. Ordførar Knut Harald Frøland (Bl) orienterte om at maksimumssats på 100 000 koner vart vedteke av kommunestyret i samband med handsaming av ein interpellasjon for ei tid tilbake. Formannskapet etterlyser sak frå administrasjonen med forslag til statuttar/nærmare reglar for dette.

Status sak om Krekavegen
Rådgjevar Pål Strand orienterte kort om status i saka. Det er sett opp mekling i saka i haust. Dersom dette ikkje gir resultat, er det beramma hovudforhandling i saka (rettssak) våren 2021.

Status sak om Nyutløtrævegen
Gunn Totland Moss (KrFI) spurde om status i tvisten om Nyutlætrævegen. Rådgjevar Pål Strand orienterte om at det er beramma dato for hovudforhandling i denne saka.

Vedtak

Dagsturhytta vert plassert ved Kvernesvatnet. Tilkomsten vert gjort tilgjengeleg for elektrisk rullestol, med lys langs turløypa, og det vert sett opp toalettløysing med høg grad av tilgjenge.

Totalkostnad kr 3 025 000
Kommunal eigendel kr 698 000
Forskottering spelemidlarkr 1 298 000

Jamfør KS-vedtak 084/2019 er det sett av kr 100 000 til dagsturhytta som vert finansiert ved bruk av ubundne investeringsfond. Resterande kommunal eigendel på kr 598 000 vert også finansiert med ubundne investeringsfond. Kommunen søkjer om totalt kr 1 298 000 i spelemidlar i 2020 som må forskotterast. Forskottering vert finansiert med ubundne investeringsfond og tilbakeført når spelemidlane vert utbetalt. Me kan forventa utbetaling innan 2023.

Behandling

Innleiingsvis orienterte einingsleiar innbyggarservice, Meline Heimdal Haugland, om saka. Ho svarte òg på spørsmål frå medlemmene i formannskapet.

Jon Magne Bogevik (Ap) viste til at ubundne investeringsfond er foreslått som delfinansiering i saka, og spurde om kvar midlane på fondet/fonda er komne frå og kva midlane opprinneleg var tenkt brukte til. Administrasjonen kunne ikkje svara på dette i møtet. Formannskapet bad administrasjonen om å orientera om dette i kommunestyret 16.09.2020.

Øyvind Røen (Sp) bad om at det til kommunestyret si handsaming 16.09.2020 vert lagt fram meir informasjon om kva konsekvensar ei eventuell dagsturhytte i Kvernesmarka vil få for Prestavegen som kulturminne. Administrasjonen fekk i oppgåve å undersøkja både dette og nøyaktig kva vegdekke som er tenkt brukt.

Odd Arne Haga (Frp) etterlyste informasjon om kva driftskostnader kommunen vil få med ei eventuell dagsturhytte. Formannskapet bad administrasjonen om å orientera om dette i kommunestyret 16.09.2020.

Rådmannen sitt framlegg vart vedteke med 7 mot 2 røyster.

Vedtak

Framlegg til forskrift om økonomisk godtgjersle, dekking av utgifter m.m. for folkevalde i Samnanger vert lagt ut til offentleg høyring på kommunen si heimeside. Høyringa skal òg kunngjerast i Samningen. Høyringsfrist vert 31.10.2020. Endeleg vedtak skal gjerast av kommunestyret 03.12.2020.

Behandling

Rådmannen sitt framlegg vart samrøystes vedteke.

Vedtak

Formannskapet sluttar seg til administrasjonen sitt forslag til prosess-/framdriftsplan for arbeidet med revisjon av delegeringsreglementet.

Behandling

Rådmannen sitt framlegg vart samrøystes vedteke.

Vedtak

Formannskapet ber om at det til kommunestyret sitt møte 16.09.2020 vert lagt fram meir informasjon om bakgrunnen for rådmannen sitt framlegg, eventuelle alternative løysingar og eventuelt alternativt framlegg til vedtak.

Behandling

Innleiingsvis orienterte avdelingsleiar teknisk drift, Nils Jonny Skar, om saka og bakgrunnen for administrasjonen sitt framlegg til vedtak.

Ordførar Knut Harald Frøland (Bl) stilte spørsmål om møtet burde lukkast under den vidare handsaminga av denne saka. Møtet vart lukka medan formannskapet drøfta dette spørsmålet. Møtet vart opna igjen før formannskapet røysta over spørsmålet om lukking av møtet. Det vart samrøystes vedteke å lukka møtet under den vidare handsaminga av saka, med heimel i kommunelova § 11-5, andre ledd.

Knut Harald Frøland sette fram følgjande framlegg til vedtak:
"Formannskapet ber om at det til kommunestyret sitt møte 16.09.2020 vert lagt fram meir informasjon om bakgrunnen for rådmannen sitt framlegg, eventuelle alternative løysingar og eventuelt alternativt framlegg til vedtak."

Knut Harald Frøland sitt framlegg vart samrøystes vedteke.

Vedtak

Bygging av heis på kommunehuset vert ikkje gjennomført i 2020. Heis på kommunehuset skal vurderast opp mot andre nødvendige bygnings-/vedlikehaldsmessige tiltak i budsjettprosessen for 2021.

Behandling

Odd Arne Haga (Frp) sette fram framlegg om at vedtaket som formannskapet gjorde 28.05.2020 i sak 020/2020 om heis på kommunehuset, vert ståande.

Det vart under handsaminga klargjort av rådmann Ingebjørg Vamråk at lovreglar om universell utforming gjer at det er krav om tilgjenge for alle på kommunehuset. I utgangspunktet inneber dette at det er krav om heis i bygget, men dette vil ikkje vera eit absolutt krav dersom tilgjenge for alle kan løysast på andre måtar (utan heis).

Rådmannen sitt framlegg fekk 5 røyster. Odd Arne Haga sitt framlegg fekk 4 røyster.

Vedtak

Saka vert utsett.

Behandling

Ordførar Knut Harald Frøland (Bl) sette fram framlegg om å utsetja saka. Han bad òg om at administrasjonen til formannskapsmøtet i oktober legg fram ei grundigare saksutgreiing, med vurdering av eit alternativ med kjøp av brukt branntankbil.

Utsetjingsramlegget til Knut Harald Frøland vart samrøystes vedteke.

Vedtak

Det vert fastsett følgjande statuttar for kommunal gåvekonto oppretta av kommunestyret 18.06.2020 i sak 043/20:

Pengegåver som kjem inn til den kommunale gåvekontoen kan brukast til å dekka følgjande utgifter:

1. Utgifter til juridisk bistand til vurdering av grunnlag for erstatningssøksmål mot personar eller instansar som har vore involverte i barnevernssakene som er granska av Barneadvokatene DA i 2019/2020.

2. Utgifter til eventuelt vidare arbeid med førebuing og gjennomføring av erstatningssøksmål mot nokon av partane som er nemnde i punkt 1.

3. Utgifter til etablering av eiga barnevernsteneste i Samnanger kommune.

Rådmannen får fullmakt til å disponera midlane på gåvekontoen slik det går fram ovanfor. Rådmannen skal rapportera til kommunestyret om bruken av midlar frå gåvekontoen.

Behandling

Øyvind Strømmen (MDG) foreslo å ta vekk det nest siste avsnittet i framlegget til rådmannen. Med denne endringa vart rådmannen sitt framlegg til vedtak samrøystes vedteke.

Vedtak

Samnanger kommune tek tilrådingane frå Advokatfirmaet Elden til følgje og saksøkjer ikkje tidlegare barnevernsleiar i Samnanger med krav om regress. Kommunen reiser heller ikkje søksmål mot staten.

Samnanger kommune merkar seg likevel dette avsnittet frå vurderinga til Advokatfirmaet Elden:

• Måten denne saken er fremmet på både med granskning og vurdering av søksmål mot den eller de ansvarlige, er imidlertid prisverdig og antas i seg selv å ha en preventiv effekt for å hindre fremtidig skade av samme karakter. Dette ved at både ledelse og ansatte nå også er klare over sitt mulige erstatningsrettslige ansvar ved grove feil under utførelsen av arbeidet, og at ikke det kan påregnes uten videre dekket av arbeidsgiver.

Samnanger kommune er nøgd med at Advokatfirmaet Elden sluttar til hovudkonklusjonane i sak 2 i granskingsrapporten til Andersland og Totland. Kommunen er samd i det Elden skriv, om at røynslene frå denne barnevernssaka må vera eit grunnlag for arbeidet til Samnanger barnevern i framtida.

Samnanger kommune vil òg understreka det Elden skriv om ansvaret som ligg på den øvste kommuneleiinga til å bruka styringsretten sin til å sikra kvalitet i barnevernet. Dette vil kommunen leggja som ein viktig premiss når eit nytt barnevern vert bygt opp i Samnanger.

Granskingane av barnevernet i Samnanger syner at det trengst gjennomgripande reformer i barnevernet på nasjonalt plan for å sikra kvalitet og rettstryggleik. Samnanger kommune vil oppmoda alle parti på Stortinget til å røysta for den breie granskinga av barnevernet som Senterpartiet har gjort framlegg om. På denne måten kan ein leggja eit godt grunnlag for dei endringane som må skje i barnevernet.

Samnanger kommune vil understreka at eit viktig tiltak vil vera ei autorisasjonsordning for barnevernstilsette.

Behandling

Øyvind Røen (Sp) sette fram følgjande framlegg til vedtak:
"Samnanger kommune tek tilrådingane frå Advokatfirmaet Elden til følgje og saksøkjer ikkje tidlegare barnevernsleiar i Samnanger med krav om regress. Kommunen reiser heller ikkje søksmål mot staten.

Samnanger kommune merkar seg likevel dette avsnittet frå vurderinga til Advokatfirmaet Elden:

• Måten denne saken er fremmet på både med granskning og vurdering av søksmål mot den eller de ansvarlige, er imidlertid prisverdig og antas i seg selv å ha en preventiv effekt for å hindre fremtidig skade av samme karakter. Dette ved at både ledelse og ansatte nå også er klare over sitt mulige erstatningsrettslige ansvar ved grove feil under utførelsen av arbeidet, og at ikke det kan påregnes uten videre dekket av arbeidsgiver.

Samnanger kommune er svært nøgd med at Advokatfirmaet Elden sluttar til hovudkonklusjonane i sak 2 i granskingsrapporten til Andersland og Totland. Kommunen er samd i det Elden skriv, om at røynslene frå denne barnevernssaka må vera eit grunnlag for arbeidet til Samnanger barnevern i framtida.

Samnanger kommune vil òg understreka det Elden skriv om ansvaret som ligg på den øvste kommuneleiinga til å bruka styringsretten sin til å sikra kvalitet i barnevernet. Dette vil kommunen leggja som ein viktig premiss når eit nytt barnevern vert bygt opp i Samnanger.

Granskingane av barnevernet i Samnanger syner at det trengst gjennomgripande reformer i barnevernet på nasjonalt plan for å sikra kvalitet og rettstryggleik. Samnanger kommune vil oppmoda alle parti på Stortinget til å røysta for den breie granskinga av barnevernet som Senterpartiet har gjort framlegg om. På denne måten kan ein leggja eit godt grunnlag for dei endringane som må skje i barnevernet."

Øyvind Strømmen (MDG) bad om gruppemøte.

På bakgrunn av innspel frå Øyvind Strømmen under debatten, orienterte Øyvind Røen om at ordet "svært" kunne takast vekk frå det tredje avsnittet i framlegget hans.

Øyvind Strømmen sette fram følgjande framlegg til tilleggspunkt i forhold til Øyvind Røen sitt vedtaksframlegg:
"Samnanger kommune vil understreka at eit viktig tiltak vil vera ei autorisasjonsordning for barnevernstilsette."

Røysting
Etter gruppemøtet vart det røysta punktvis over framlegget til Øyvind Røen og tilleggsframlegget til Øyvind Strømmen:

Røysting over det første avsnittet i framlegget til Øyvind Røen
Samrøystes vedteke.

Røysting over det andre avsnittet i framlegget til Øyvind Røen
Vedteke med 6 mot 3 røyster.

Røysting over det tredje avsnittet i framlegget til Øyvind Røen
Samrøytes vedteke.

Røysting over det fjerde og femte avsnittet i framlegget til Øyvind Røen, og Øyvind Strømmen sitt tilleggsframlegg
Vedteke med 8 mot 1 røyst. Odd Arne Haga (Frp) røysta imot.

Vedtak

På bakgrunn av kommunestyret sitt vedtak 18.06.2020 i sak 042/20 skal det etablerast nytt barnevern/familievern i Samnanger med verknad frå 01.06.2021. Til det førebuande arbeidet vert det sett ned eit arbeidsutval med følgjande medlemmer:

• Ordførar Knut Harald Frøland - leiar, Bygdalista

• Varaordførar Øyvind Røen - Sp

• Shirin Kvernes Khadoor - Ap

• Øyvind Strømmen - MDG

• Rådmann Ingebjørg Vamråk

• NN Representant organisasjonen Samnanger kommune- rådmannen avgjer

• NN Representant organisasjonen Samnanger kommune- rådmannen avgjer

• NN Tillitsvald organisasjon Samnanger kommune

• Anders Opsahl - politikontakt Samnanger kommune

• Sekretær- rådmannen avgjer

Det vert løyvd inntil 160.000 kroner til arbeidsutvalet sitt arbeid, med finansiering frå disposisjonsfondet.Framlegg til modell for nytt barnevern/ familievern skal politisk handsamast av formannskap og kommunestyre. Framlegg skal leggjast fram i formannskapsmøtet 12.11.2020.Arbeid med rekruttering av tilsette til nytt barnevern/ familievern skal sjåast i lys av framdrift i arbeidsutvalet sitt arbeid.Arbeidsutvalet v/ leiar rapporterer til formannskapet.Nytt barnevern/ familievern skal inngå i rådmannen sitt framlegg til budsjett for 2021. Dette må og omfatta eventuelle kostnader til kontorlokale.

Behandling

Ordførar Knut Harald Frøland (Bl) sette fram følgjande framlegg til vedtak:

"På bakgrunn av kommunestyret sitt vedtak 18.06.2020 i sak 042/20 skal det etablerast nytt barnevern/familievern i Samnanger med verknad frå 01.06.2021. Til det førebuande arbeidet vert det sett ned eit arbeidsutval med følgjande medlemmer:

• Ordførar Knut Harald Frøland - leiar, Bygdalista

• Varaordførar Øyvind Røen - Sp

• Shirin Kvernes Khadoor - Ap

• Øyvind Strømmen - MDG

• Rådmann Ingebjørg Vamråk

• NN Representant organisasjonen Samnanger kommune- rådmannen avgjer

• NN Representant organisasjonen Samnanger kommune- rådmannen avgjer

• NN Tillitsvald organisasjon Samnanger kommune

• Anders Opsahl - politikontakt Samnanger kommune

• Sekretær- rådmannen avgjer

Det vert løyvd inntil 160.000 kroner til arbeidsutvalet sitt arbeid, med finansiering frå disposisjonsfondet.

Framlegg til modell for nytt barnevern/ familievern skal politisk handsamast av formannskap og kommunestyre. Framlegg skal leggjast fram i formannskapsmøtet 12.11.2020.

Arbeid med rekruttering av tilsette til nytt barnevern/ familievern skal sjåast i lys av framdrift i arbeidsutvalet sitt arbeid.

Arbeidsutvalet v/ leiar rapporterer til formannskapet.

Nytt barnevern/ familievern skal inngå i rådmannen sitt framlegg til budsjett for 2021. Dette må og omfatta eventuelle kostnader til kontorlokale."


Knut Harald Frøland sitt framlegg vart samrøystes vedteke.

Vedtak

• Det skal i 2021-budsjettet vera ei avsetjing på 1 million kroner til disposisjonsfondet.

• Korrigerte netto driftsutgifter i % av netto driftsresultat: mål 1,75 % i 2021

• Disposisjonsfondet skal liggja på om lag 15 millionar kroner ved utgangen av økonomiplanperioden.

• Med utgangspunkt i Covid 19 som me er berørte av i 2020 og 2021, legg me opp til eit mellombels auka kostnadsnivå i 2021 i dei mest berørte einingane/avdelingane (Helse, Pleie og omsorg, Reinhald).

• Det må utgreiast ein heilheitleg plan på oppvekstsektoren, der 1-10 skule, sammanslåing av barnehagane og fleirbrukshall/idrettshall skal sjåast på under eitt.

• Nødvendige reduksjonar i bemanninga i kommunen i økonomiplanperioden skal så langt som mogleg løysast med naturleg avgang.

Behandling

Formannskapet bad om at rådmannen gir utfyllande informasjon saka i kommunestyret 16.09.2020.

Det vart røysta punktvis over rådmannen sitt framlegg.

Punkt 1, 2, 4, 5 og 7 i rådmannen sitt framlegg vart samrøystes vedteke.

Punkt 3 i rådmannen sitt framlegg vart ikkje vedteke. 4 medlemmer røysta for og 4 røysta imot dette punktet. Ordføraren si røyst vart då avgjerande.

Punkt 6 i rådmannen sitt framlegg vart vedteke med 5 mot 3 røyster.