Møte i Formannskapet den 15.10.2020

Vedtak

Møteinnkallinga og saklista vert godkjent. Referatsaker vert tekne til orientering.

Behandling

Godkjenning av møteinnkalling og sakliste:
Ordførar Knut Harald Frøland (Bl) foreslo at sak 044 vart handsama som første sak etter Faste saker. Formannskapet slutta seg til dette. Med denne endringa vart saklista samrøystes godkjent.


Eventuelle merknader til protkollen frå førre møte:
Ingen merknader.


Ordføraren orienterer:

Dagsturhytta
Fristen for å koma med innspel til plassering av dagsturhytta er framskunda, slik at saka kan handsamast i kommunestyret 28.10.2020.

Grunngjevne spørsmål, interpellasjonar
Ordføraren viste til at det på førre kommunestyremøte var svært mange grunngjevne spørsmål, og at dette tok mykje tid i møtet. Han spurde om det er behov for å gjera endringar i kommunen sitt reglement, for eksempel om det bør opnast for grunngjevne spørsmål og interpellasjonar også i formannskapet og naturutvalet. Administrasjonen vart bedt om å undersøkja om det vil vera høve til å opna for grunngjevne spørsmål og interpellasjonar i formannskapet og naturutvalet. Dette må gjerast til neste møte i formannskapet.

Formannskapet hadde etter dette ein diskusjon om kva ordningar og reglar kommunen bør ha for spørsmål og interpellasjonar. Det vart mellom anna drøfta om det bør avgrensast kor mykje tid som kan brukast på grunngjevne spørsmål og interpellasjonar i eit møte.

Arbeidet med etablering av nytt barnevern
Arbeidsutvalet har hatt sitt første møte (to-dagarsmøte), og fekk der presentert ein mogleg modell for organisering av barnevernstenesta. Utvalet skal ha nytt møte 21.10.2020. Det vil der verta presentert ein annan mogleg modell for organisering.


Rådmannen orienterer:

System for oppfølging av politiske vedtak
Administrasjonen har eit forbetringspotensiale når det gjeld systematisk oppfølging av politiske vedtak. Dette gjeld spesielt vedtak som må følgjast opp over lang tid. Administrasjonen vil sjå på dette, med sikte på få på plass ei ordning som sikrar god og systematisk oppfølging av politiske vedtak. Det er pr. no ikkje konkludert om korleis dette skal gjerast.


Andre orienteringssaker:

Gjennomgang av notat med førebels utkast til endringar i delegeringsreglementet
Notatet låg ved møteinnkallinga. Ordførar Knut Harald Frøland (Bl) kommenterte følgjande to punkt i notatet:

• Punkt 14.2 Mynde som er delegert til kriseleiinga. Ordføraren argumenterte for at det bør vera ordføraren som har mynde til å ta avgjerd i en krisesituasjon, ikkje rådmannen. I nokre tilfelle må det takast avgjerd raskt, og det vil ikkje vera tid til å innkalla formannskapet eller kommunestyret.

• Punkt 16.1.f Mynde i samband med rettstvistar etc. Ordføraren viste til at han har ufordra administrasjonen på dette punktet. Han argumenterte for at politisk nivå må trekkjast inn i ein tidleg fase i situasjonar der det kan bli ein rettstvist der kommunen er involvert. Rådmann Ingebjørg Vamråk orienterte om at ho i utgangspunktet er samd med ordføraren i dette.

Pasientreiser Helse Bergen
Ordførar Knut Harald Frøland orienterte om saka, som mellom anna gjeld pasientreiser for innbyggjarar i Samnanger. Avtale med drosjenæringa er framleis ikkje på plass. Ordføraren skal delta på møte med fylkeskommunen om saka fredag 16.10.2020.

Tildeling av midlar til breiband 2020
Samnanger kommune har i søknadsrunden for 2020 fått tilsegn om midlar til utbygging i området Hisdal - Trengreidfjord. Det står framleis att nokre område i kommunen der det ikkje er bygt ut høghastigheits breiband. Det vil truleg bli ny søknadsrunde i 2021.


Utvalet sitt kvarter:

Status for revitalisering av Tysse
Odd Arne Haga (Frp) spurde om status for arbeidet med revitalisering av Tysse. Ordførar Knut Harald Frøland (Bl) orienterte om historikken i saka, og om bruken av prosjektmidlane som kommunen fekk for nokre år sidan. Han orienterte òg om at det vert arbeida med å prøva å få starta opp att daglegvarebutikk på Ytre-Tysse.

Løypemelding om økonomi
Jon Magne Bogevik (Ap) etterlyste løypemelding om økonomisk status for kommunen. Rådmann Ingebjørg Vamråk orienterte om bakgrunnen for at økonomirapportering ikkje vart gitt i formannskapet 15.10.2020. Ordførar Knut Harald Frøland (Bl) orienterte om at han ønskjer at det vert gitt informasjon om økonomisk status i alle formannskapsmøte.

Inntekter frå konsesjonskraft
Odd Arne Haga (Frp) spurde om kva inntekt det er utsikt til at kommunen får på sal av konsesjonskraft vidare framover. Rådmann Ingebjørg Vamråk orienterte om at inntektene ser ut til å bli vesentleg lågare enn i 2020. Ho viste elles til saka om fullmakt til sal av konsesjonskraft som skulle opp til handsaming seinare i møtet.

Vedtak

Saka vert sendt tilbake til administrasjonen for ny handsaming.

Behandling

Rådmann Ingebjørg Vamråk orienterte innleiingsvis om at ho meinte at saka ikkje var godt nok utgreidd til å leggjast fram for politisk handsaming, men at ho av omsyn til tidsfristar valde å la formannskapet avgjera spørsmålet.

Etter den innleiande debatten sette ordførar Knut Harald Frøland (Bl) fram framlegg om å senda saka tilbake til administrasjonen for ny handsaming.

Før røystinga orienterte rådmann Ingebjørg Vamråk om at administrasjonen vil trenga minst eit halvt år på å omarbeida framlegget til planstrategi og leggja dette fram på nytt.

Knut Harald Frøland sitt framlegg vart samrøystes vedteke.

Vedtak

Samnanger kommune stemmer ja til det tilrådde forslaget til ny hovudtariffavtale.

Vedtaket er gjort av formannskapet med heimel i § 6.1 i Samnanger kommune sitt delegeringsreglement.

Behandling

Rådmannen sitt framlegg vart samrøystes vedteke.

Vedtak

Samnanger kommune sluttar seg til den nye samarbeidsavtalen og at den trer i kraft 1.januar 2021. Videre stadfestar vi at kommunen sin representant med tilhøyrandevararepresentant til årsmøtet skal vera kommunen sin representant og

vararepresentant i representantskapet til Bergen og Omland Friluftsråd KommunaltOppgavefellesskap (BOF).

Utpeika årsmøterepresentant for valperioden med vararepresentant fortset sine verv som kommunane sine representantar til representantskapet.

Behandling

Rådmannen sitt framlegg vart samrøystes vedteke.

Vedtak

Rådmannen får delegert mynde til å inngå avtalar om sikring av pris for sal av konsesjonskraft, innanfor ein middels/låg risikoprofil.

Behandling

Rådmannen sitt framlegg vart samrøystes vedteke.

Vedtak

Samnanger kommune leiger ut areal ved Samnanger ungdomskule Gbnr 43/92 merka med brunt i reguleringsplanen til kroner 300 pr dekar pr år til Nikolai Blom. Avtalen vert gjort på 5 år med høve til forlenging.

Behandling

Rådmannen sitt framlegg vart samrøystes vedteke.

Vedtak

Samnanger kommune suspenderer ikkje foreldingsfristen.

Behandling

Ordførar Knut Harald Frøland (Bl) sette fram følgjande framlegg til vedtak:
"Samnanger kommune suspenderer ikkje fordeldingsfristen."

Framlegget vart samrøystes vedteke.

Vedtak

Samnanger kommune fordeler i alt NOK 518 200 i tilskot frå ekstraordinært næringsfond – Covid 19 til følgjande tiltak:

• Søknad 0011 Bruktbutikk på Bjørkheim - tilskot NOK 149 000

• Søknad 0010 Oppretting av REKOringen i Samnanger - tilskot NOK 4 200

• Søknad 0005 Eco Farm - Grown your own - tilskot NOK 37 500

• Søknad 0012 Etablering av nettavis - Samningen - tilskot NOK 187 500

• Søknad 0007 Produktutvikling - Gjengevoll Mangesysleri: Marknadshage og kjøtforedling - tilskot NOK 140 000

Følgjande søknader må nyanserast før ytterlegare behandling, med hjelp frå administrasjonen i kommunen:

• Søknad 0015 Oppstart lokalmatbutikk og turistkontor på Bjørkheim

• Søknad 0006 Etablering av sentrumsforeining på Bjørkheim

• Søknad 0004 Vidareutvikling av Apex Auto

Følgjande søknader innfrir ikkje kriteriene for tildeling av tilskot:

• Søknad 0013 Brannsikring av overnattingsstad Bjørkheim Kro

• Søknad 0014 Muligheter for fri-kjøling og gjenbruk av overskuddsvarme til annen industri"
  

Det står då att NOK 446 268 på fondet til seinare fordeling i 2020 og 2021.

Behandling

Rådmann Ingebjørg Vamråk orienterte innleiingsvis om at ho meinte at saka ikkje var godt nok utgreidd til å leggjast fram for politisk handsaming, men at ho av omsyn til tidsfristar valde å la formannskapet avgjera spørsmålet.

Ordførar Knut Harald Frøland (Bl) bad om å få gildskapen sin vurdert. Bakgrunnen for dette er at den eine søknaden kjem frå Frivilligsentralen, der kona til ordføraren arbeider. Ordføraren orienterte om at han sjølv meiner han ikkje er ugild i saka. Han gjekk frå medan formannskapet vurderte gildskapen hans. Varaordførar Øyvind Røen (Sp) gjekk inn som ordførar under denne handsaminga. Knut Harald Frøland vart samrøystes funnen gild i saka, og deltok derfor i handsaminga av saka.

Knut Harald Frøland sette fram følgjande framlegg:

• "Søknad 0011 Bruktbutikk på Bjørkheim - tilskot NOK 149 000

• Søknad 0010 Oppretting av REKOringen i Samnanger - tilskot NOK 4 200

• Søknad 0005 Eco Farm - Grown your own - tilskot NOK 37 500

• Søknad 0012 Etablering av nettavis - Samningen - tilskot NOK 187 500

• Søknad 0007 Produktutvikling - Gjengevoll Mangesysleri: Marknadshage og kjøtforedling - tilskot NOK 140 000

Følgjande søknader må nyanserast før ytterlegare behandling, med hjelp frå administrasjonen i kommunen:

• Søknad 0015 Oppstart lokalmatbutikk og turistkontor på Bjørkheim

• Søknad 0006 Etablering av sentrumsforeining på Bjørkheim

• Søknad 0004 Vidareutvikling av Apex Auto

Følgjande søknader innfrir ikkje kriteriene for tildeling av tilskot:

• Søknad 0013 Brannsikring av overnattingsstad Bjørkheim Kro

• Søknad 0014 Muligheter for fri-kjøling og gjenbruk av overskuddsvarme til annen industri"

Einingsleiar samfunnsutvikling, Hilde-Lill Våge, og leiar i Samnanger Næringsforum, Knut Martin Bjørnås, svarte på spørsmål frå formannskapet under handsaminga.

Røysting om handsaming:
Det vart samrøystes vedteke at denne saka skal gå til kommunestyret for endeleg handsaming.

Røysting om tilskot:
I røystinga om tilskot vart det først røysta punktvis over framlegget til Knut Harald Frøland:

• Det vart med 8 mot 1 røyst vedteke å gje tilskot på NOK 149 000 til søknad 0011 Bruktbutikk på Bjørkheim. Odd Arne Haga (Frp) røysta imot.

• Det vart med 6 mot 3 røyster vedteke å ikkje gje tilskot til søknad 0015 Oppstart lokalmatbutikk og turistkontor på Bjørkheim. Jon Magne Bogevik (Ap), Gunn Østvik Petersen (Ap) og Odd Arne Haga (Frp) røysta for å gje tilskot.

• Det vart samrøystes vedteke å gje tilskot på NOK 4 200 til søknad 0010 Oppretting av REKOringen i Samnanger.

• Det vart samrøystes vedteke å gje tilskot på NOK 140 000 til søknad 0007 Produktutvikling - Gjengevoll Mangesysleri: Marknadshage og kjøtforedling.

• Det vart med 8 mot 1 røyst vedteke å ikke gje tilskot på NOK 82 500 til søknad 0006 Etablering av sentrumsforeining på Bjørkheim. Jon Magne Bogevik (Ap) røysta for å gje tilskot.

• Det vart samrøystes vedteke å gje tilskot på NOK 37 500 til søknad Eco Farm - Grown your own.

• Det vart med 8 mot 1 røyst vedteke å ikkje gje tilskot til søknad 0004 Vidareutvikling av Apex Auto. Jon Magne Bogevik (Ap) røysta for å gje tilskot.

• Det vart samrøystes vedteke å gje tilskot på NOK 187 500 til søknad 0012 Etablering av nettavis - Samningen.

• Det vart samrøystes vedteke å ikkje gje tilskot til søknad 0013 Brannsikring av overnattingsstad Bjørkheim Kro.

• Det vart samrøystes vedteke å ikkje gje tilskot til søknad 0014 Muligheter for fri-kjøling og gjenbruk av overskuddsvarme til annen industri.

• Det vart samrøystes vedteke at søknad 0015 Oppstart lokalmatbutikk og turistkontor på Bjørkheim må nyanserast før ytterlegare handsaming.

• Det vart med 7 mot 2 røyster vedteke at søknad 0006 Etablering av sentrumsforeining på Bjørkheim må nyanserast før ytterlegare handsaming. Øyvind Røen (Sp) og Odd Arne Haga (Frp) røysta imot.

• Det vart samrøystes vedteke at søknad 0004 Vidareutvikling av Apex Auto må nyanserast meir før ytterlegare handsaming.

Til slutt vart det alternative framlegget til vedtak frå den punktvise røystinga sett opp mot rådmannen sitt framlegg til vedtak. Det alternative framlegget til vedtak vart samrøystes vedteke.