Møte i Formannskapet den 12.11.2020

Vedtak

Møteinnkallinga og saklista vert godkjent, med følgjande endring:

• Det vert teke inn ei ekstrasak på sakslista, sak 057/2020 Personalsak. Denne saka skal handsamast som første sak etter sak 045/2020.

Delegerte vedtak/referatsaker vert tekne til orientering.

Behandling

Godkjenning av innkalling og sakliste:
Ordførar Knut Harald Frøland (Bl) orienterte om at rådmannen ønskte å få ei ekstra sak (ei personalsak) inn på saklista. Rådmann Ingebjørg Vamråk bad om at møtet vart lukka medan ho orienterte om kvifor ho ønskte å få saka inn på sakslista. Formannskapet vedtok å lukka møtet under rådmannen si orientering. Etter orienteringa vedtok formannskapet samrøystes å ta saka inn på saklista, og at den skulle handsamast som første sak etter sak 045 (Faste saker). Møtet vart etter dette opna igjen.

Det var ingen andre merknader til innkallinga eller saklista.

Eventuelle merknader til protokollen frå førre møte:
Ingen merknader.


Ordføraren orienterer:

Status interkommunalt kols- og diabetesteam
Ordførar Knut Harad Frøland (Bl) viste til informasjonen som vart gitt i kommunestyret 28.10.2020. Han orienterte om at han etter kommunestyremøtet har vore i kontakt med Bjørnafjorden kommune, og fått informasjon om at det ikkje er endeleg vedteke at det interkommunale kols- og diabetesteamet skal leggjast ned. Det er gode erfaringar med dette teamet i Samnanger. Samnanger betalar om lag 200 000 kroner pr. år for denne tenesta.

Status for arbeidet i arbeidsutvalet for etablering av nytt barnevern
Ordførar Knut Harald Frøland (Bl) orienterte om status for arbeidsutvalet sitt arbeid. Framdrifta er god, men det står framleis att noko arbeid før arbeidsutvalet kan leggja fram innstillinga si. Arbeidsutvalet skal ha nytt møte 08.12.2020 (heildagsmøte).

Tvist Krekavegen
Ordførar Knut Harald Frøland (Bl) bad om at møtet vart lukka under denne orienteringa. Møtet vart lukka medan formannskapet drøfta om orienteringa skulle gå for lukka dører. Møtet vart opna igjen før formannskapet røysta. Det vart samrøystes vedteke at orienteringa skulle gå for lukka dører, med heimel i kommunelova § 11-5. I den lukka delen orienterte ordføraren og rådmannen om saka, og formannskapet drøfta saka. Ordførar Knut Harald Frøland sette fram følgjande framlegg:

• Formannskapet ber om at sak om Krekavegen vert fremja som sak til kommunestyret 03.12.2020.

Møtet vart opna igjen før formannskapet røysta over ordføraren sitt framlegg. Framlegget vart samrøystes vedteke.

Kjøp av branntankbil
Ordførar Knut Harald Frøland (Bl) informerte om at kommunen no har kjøpt branntankbil (ref. kommunestyresak 084/2020), og at bilen er på plass i Samnanger.

Avtale om utleige av djupvasskai i Rolvsvåg
Ordførar Knut Harald Frøland (Bl) orienterte om at det er inngått avtale om utleige av kaien til eit privat firma. Odd Arne Haga (Frp) spurde om også andre vil kunne bruka kaien. Verken ordføraren eller rådmannen kunne svara på dette spørsmålet direkte, men rådmannen informerte seinare i møtet om at også andre vil kunne låna kaien når den er ledig.

Rådmannen orienterer:

Reistadliane 39
Rådmann Ingebjørg Vamråk viste til saka om Reistadliane 39 som vart handsama i kommunestyret 28.10.2020 (sak 083/2020). Det vart der mellom anna vedteke at administrasjonen skulle arbeida vidare med kjøp av bustad til brukar, som erstatning for noverande alternativ i Reistadliane 39. Rådmannen orienterte om at det no er klart at Reistadliane 39 framleis kjem til å verta brukt til det same føremålet som i dag, og at det derfor ikkje lenger er aktuelt at teknisk drift skal flytta til Reistadliane 39. Det må derfor finnast eit anna alternativ for teknisk drift.



Utvalet sitt kvarter:
Ingen saker.

Vedtak

Kommunestyret tek saka til etterretning.

Samnanger kommune inngår samarbeidsavtale med Nasjonalforeningen for folkehelsen om «Eit demensvenleg samfunn».

Behandling

Rådmannen sitt framlegg vart samrøystes vedteke.

Vedtak

Varmestuen 2 AS (org.nr: 820 213 122) får med heimel i Alkoholloven §1-6 løyve til skjenking av alkoholhaldig drykk (Gr. 1,2 og 3 jf. alkoholforskriften §1-1) i Eikedalen skisenter AS (org.nr: 931 921 568) sitt lokale «Varmestova» i Kråvegen 108, 5650 Tysse i Samnanger kommune.

Løyve gjeld:

• Skjenking av alkoholhaldig drykk (gr. 1 og 2) frå kl. 12:00 til kl. 02:00.

• Skjenking av alkoholhaldig drykk (gr. 3) frå kl. 13:00 til kl. 02:00 (jf. Al §4-4, 4.ledd)

• Også eit avgrensa uteområde/ terassen utanfor lokalet.

Styrar for løyvet: Silvia Cadegan (f. 08.11.1979)

Stedfortredar for styrar: Kari Nedrebø (f. 05.12.1982)

Løyvet gjeld til om med 30.09.2024.

Behandling

Rådmannen sitt framlegg vart vedteke med 7 mot 2 røyster.

Vedtak

Framlegget til reviderte vedtekter for SFO (skulefritidsordninga) vert vedteke. Dei reviderte vedtektene gjeld med verknad frå 01.01.2021.

Vedtaket er gjort med heimel i punkt 6.2.o i kommunen sitt delegeringsreglement.

Behandling

Rådmannen sitt framlegg vart samrøystes vedteke.

Vedtak

Framlegget til delegeringsreglement vert vedteke. Reglementet trer i kraft 04.12.2020.

Vedtaket er gjort med heimel i kommunelova § 5-14.

Formannsskapet ber om ein ytterlegare gjennomgang av delegering når det gjeld smittevernlova før saka vert handsama i kommunestyret.

Behandling

Det vart røysta over rådmannen sitt framlegg, inkludert tilleggsframlegget til MDG. Samrøystes vedteke.

Vedtak

Kommunestyret vedtek framlegget til forskrift om økonomisk godtgjersle, dekking av utgifter m.m. for folkevalde i Samnanger kommune. Forskrifta trer i kraft 01.01.2021. Frå same dato vert kommunen sitt noverande reglement om godtgjersle til folkevalde oppheva.

Vedtaket er gjort med heimel i kommunelova §§ 8-3, 8-4, 8-6 og 8-10, jf. forvaltningslova kapittel VII m.fl.

Behandling

Rådmannen sitt framlegg vart samrøystes vedteke.

Vedtak

Framlegg til møteplan for 2021 vert vedteke, med følgjande endring:

• Starttidspunktet for ettermiddagsmøta i kommunestyret vert endra frå kl. 16.00 til kl. 15.00.

Vedtaket er gjort med heimel i § 11-2 i kommunelova.

Behandling

Ordførar Knut Harald Frøland (Bl) sette fram følgjande framlegg til endring i forhold til rådmannen sitt framlegg:

• "Starttidspunktet for ettermiddagsmøta i kommunestyret vert endra frå kl. 16.00 til kl. 15.00."

Endringsframlegget til ordføraren vart vedteke med 8 mot 1 røyst. Odd Arne Haga (Frp) røysta imot.

Det vart til slutt røysta over resten av rådmannen sitt framlegg, som vart samrøystes vedteke.

Vedtak

Kommunale avgifter og gebyr for 2021 vert fastsette i samsvar med vedlagte framlegg til betalingsregulativ. Generell auke er 2,7 % når ikkje noko anna går fram av regulativet. Regulativet gjeld frå og med 01.01.2021.

Behandling

Rådmannen sitt framlegg vart samrøystes vedteke.

Vedtak

Gebyrregulativ for 2021 for bygge- og delingssaker, plansaker, saker etter Matrikkellova, Forureiningslova og tiltak i sjø, vert vedteke slik det ligg føre.

Behandling

Rådmannen sitt framlegg vart samrøystes vedteke.

Vedtak

Samnanger kommune vedtek at BIR Privat AS delegeres fullmakt til fakturering og innkrevjing av avfallsgebyr på vegne av Samnanger kommune, jfr § 12 i forskrift om handtering av avfall frå hushaldning. Avfallsgebyret tilhøyrer Samnanger kommune.

Prisen på renovasjonstenesten for 2021 vert auka med 5 %, med unntak av eigenandelen for levering til gjenvinningsstasjonane og einskilde tenester utanfor standard renovasjon. Desse vert holdt uendra.

Samnanger kommune vedtek avfallsgebyr i samsvar med fylgjande vedlegg:

Pristabell renovasjonsgebyr Samnanger kommune 2021

Behandling

Rådmannen sitt framlegg vart samrøystes vedteke.

Vedtak

Budsjett og økonomiplan 2021-2024 blir vedteke slik det ligg føre, med unnatak av følgjande endring:

• Budsjettsummen til nytt bygg til teknisk drift vert auka frå 3,5 mnok til 4 mnok. Auken på 0,5 mnok vert finansiert av unytta lånemidlar.

Lån, minimumsavdrag og eigedomsskatt:

Det vert tatt opp eit lån på 23 mnok i 2021 til varige driftsmidlar i samsvar med Kommunelova § 14-15 første ledd. Lånet skal brukast til investering i vatn, avløp, bygg og veg. Lånet skal betalast ned over 40 år og ha eit avdragsfritt år.

Kommunen betaler i dag meir i avdrag på lån enn det som det er krav om. Utrekning viser at betaling av avdrag kan reduserast med kr 600 000 i 2021.

Eigedomskatt
I medhald av eigedomsskattelova (Esktl) §§ 2 og 3 skal fylgjande utskrivingsalternativ nyttast for skatteåret 2021: Det vert skrive ut eigedomsskatt på faste eigedomar i heile kommunen jf. § 3 bokstav a. Den generelle skattesatsen som skal gjelda for dei skattepliktige eigedomane vert sett til 7 promille. I medhald av esktl § 12 bokstav a vert satsane differensiert ved at den satsen som skal gjelda for bustader og fritidseigedomar vert sett til 2,8 promille.

For bustaddelen av eigedomen (gjeld og fritidseigedom) vert det gitt eit botnfrådrag på kr 30 000 av takstverdi. Botnfrådraget vert gitt for alle sjølvstendige bustaddelar. Botnfrådrag vert ikkje gitt når eigedomen vert nytta til næringsverksemd.

Det vert skrive ut eigedomsskatt på det særskilte skattegrunnlaget som vert redusert med 3/7 delar i 2021 (overgangsregel til §§ 3 og 4 første ledd første pkt.). Skattesatsen på det særskilte skattegrunnlaget skal være 7 promille.

I medhald av esktl. § 7 bokstav a vert det gitt fritak til stiftingar eller institusjonar som har som formål å gagna kommunen, fylket eller staten. Unnateke er kommersielle stiftingar/institusjonar. Fritaket vil gjelda forsamlingshus, bedehus, turisthytter og liknande. Fritak kan og vurderast på grunnlag av søknad.

I medhald av esktl. § 7 bokstav b vert det gitt fritak for bygningar som har historisk verdi med 100 prosent. Fritak kan og vurderast på grunnlag av søknad. Det er eit krav at bygget har bevart sin opphavlege arkitektoniske stil og at det ikkje vert brukt til forretningsverksemd.

I medhald av eigedomsskattelova § 7 bokstav c vert det gitt fritak for nybygde bustadeigedomar (gjeld ikkje fritidseigedomar) i 2 år, eller til kommunestyret endrar eller opphevar fritaket. Formannskapet får fullmakt til å avgjera einskildsaker om skattefritak.

Kommunestyret har vedtatt å bruka formuesgrunnlag frå skatteetaten for utskriving av eigedomsskatt på bustadhus, jf. esktl. § 8C-1. Bustadhus og hytter utan formuesgrunnlag vert takserte. Det same gjeld næringsverksemd, tomtar mm. Ved taksering og utskriving av eigedomsskatt nyttar kommunen dei til ei kvar tid gjeldande skattevedtekter.

Eigedomsskatten skal betalast i 4. terminar.

Behandling

Innleiingsvis orienterte rådmann Ingebjørg Vamråk og økonomisjef Nina Erdal om rådmannen sitt budsjettframlegg. Rådgjevar Bodil H. Øpstebø orienterte om skuleutvikling.

Øyvind Strømmen (MDG) hadde spørsmål til opplysningane om avsetning til disposisjonsfondet i 2021 i rådmannen sitt budsjettframlegg. Han viste til at han ikkje kunne sjå at det er samsvar mellom talet i tabell på side 14 i rådmannen sitt budsjettframlegg og talet i budsjettskjemaet i rådmannen sitt framlegg. Økonomisjef Nina Erdal orienterte om at talet som står i budsjettskjemaet (530 000 kroner) er det korrekte, og at talet som står i tabellen på side 14 i rådmannnen sitt framlegg ved ein feil ikkje var blitt oppdatert.

Ordførar Knut Harald Frøland (Bl) viste til forskjellar mellom barneskulen og ungdomsskulen, og spurde om det er moglegheiter for å kunne bruka ungdomsskulen sitt miljø/ressursar til å støtta barneskulen i ein prosess. Rådgjevar Bodil H. Opstebø bad om at møtet vart lukka dersom ho skulle orientera om dette. Møtet vart lukka medan formannskapet drøfta spørsmålet om lukking. Møtet vart opna igjen før det vart røysta over om møtet skulle lukkast. Det vart samrøystes vedteke at orienteringa skulle gå for lukka dører, med heimel i kommunelova § 11-5. Etter orienteringa og etterfølgjande debatt i formannskapet vart møtet opna igjen.

Øyvind Strømmen (MDG) spurde om kva som ligg i det som står om miljøsertifisering av bygg i rådmannen sitt budsjettframlegg (kva type miljøsertifisering det er snakk om). Administrasjonen kunne ikkje svara på dette i møtet. Formannskapet bad om at administrasjonen informerer om dette i kommunestyret 03.12.2020.

På bakgrunn av ønske frå rådmannen sette ordførar Knut Harald Frøland fram følgjande framlegg til endring i forhold til rådmannen sitt framlegg:

• "Budsjettsummen til nytt bygg til teknisk drift vert auka frå 3,5 mnok til 4 mnok. Auken på 0,5 mnok vert finansiert av unytta lånemidlar."

Det vart først røysta over ordføraren sitt endringsframlegg, som vart samrøystes vedteke.

Det vart til slutt røysta over heile framlegget til rådmannen, inkludert det vedtekne endringsframlegget. Samrøystes vedteke.