Møte i Kommunestyret den 22.04.2021

Vedtak

Møteinnkallinga og saklista vert godkjent. Orienteringssaker

Behandling

Godkjenning av innkalling og sakliste:
Ordførar Knut Harald Frøland (Bl) orienterte om følgjande endringar i forhold til saklista:

• Interpellasjonane vert handsama etter sak 022 Faste saker.

• Sak 028/2021 vert flytta opp og handsama som første sak etter interpellasjonane.

• Ettersende saker/ekstrasaker vert handsama på slutten av møtet.

Øyvind Strømmen (MDG), Øyvind Røen (Sp), Lena Tveit (Bl), Martin Haugen (Bl) orienterte om at dei ønska å få vurdert gildskapen sin i interpellasjon frå Odd Arne Haga (Frp) om veg Hagabotnane.

Gunn Østvik Petersen (Ap) orienterte om at ho ønska å få vurdert gildskapen sin i interpellasjon frå Arild Røen (H) om nasjonal transportplan - tilskot til fylkeskommunale vegar.

Det var ingen andre merknader til møteinnkallinga eller saklista.

Eventuelle merknader til protokollen frå førre møte:
Ingen merknader.


Ordføraren orienterer:

• Fartsgrenseplan Kvamskogen. Etter at ordføraren hadde orientert om status spurde Øyvind Strømmen (MDG) om dette burde takast inn som vedtaksak i kommunstyremøtet. Ordførar Knut Harald Frøland (Bl) bad Øyvind Strømmen om å formulera forslag til uttale frå kommunestyret i løpet av møtet.
  

Rådmannen orienterer:

• Einingsleiar for pleie og omsorg, Janne Drevsjø, orienterte på vegner av rådmannen om inntaksordninga på sjukeheimen.

• Sak om søknad om sal av mat frå salsvogn på Bjørkheim. Etter rådmannen si orientering orienterte ordførar Knut Harald Frøland (Bl) om at han før møtet hadde førebudd eit framlegg til vedtak. Ordføraren spurde kommunestyret om dette kunne takast inn som ekstrasak på saklista for kommunestyremøtet. Kommunestyret slutta seg til dette. Informasjon om handsaming og vedtak i saka står som sak 037i møteprotkollen.

Grunngjevne spørsmål:

Grunngjevne spørsmål frå Samnanger Frp om bufellesskapet på Skottabakken
Ordførar Knut Harald Frøland (Bl) orienterte om notat med svar frå rådmannen som hadde vorte sendt ut på e-post til kommunestyrerepresentantane tidlegare på dagen 22.04.2021. Ordføraren foreslo at verken dei grunngjevne spørsmåla eller rådmannen sine svar vart lest opp i møtet, på grunn av det store omfanget. Han foreslo i staden at både Samnanger Frp og rådmannen fekk høve til å gje ein kommentar. Kommunestyret slutta seg til dette forslaget. Rådmannen sitt svar på dei grunngjevne spørsmåla ligg som vedlegg til møteprotokollen.

Utvalet sitt kvarter:

• Monica Tjønna (Sp) stilte spørsmål om sak om ønske om kjøp av tomt på Lønnebakken.

• Solveig Vassenden (Bl) orienterte om saker frå eldrerådsmøte 10.03.2021. Der vart det stilt spørsmål om kvifor rom i 95-bygget på sjukeheimen står tomme. Solveig Vassenden viste også til at Samnanger før jul fekk tildelt pengar øyremerka til digital opplæring av eldre i kommunen, og at desse midlane no er planlagt brukt på dagsenteret. Ho orienterte om at Samnanger Pensjonistlag ønskjer at desse midlane må gå til alle eldre i kommunen.

• Gunn Østvik Petersen (Ap) viste til at mange køyrer for fort på fylkesveg 137 mellom Hisdal og Solbjørg. Ordførar Knut Harald Frøland (Bl) orienterte om at kommunen ved fleire høve har teke opp dette problemet opp i politirådet, og om at det vil bli teke opp igjen.

• Linda Haug Kollbotn (Frp) spurde om kvifor det ikkje er tilbod om korona-hurtigtestar i Samnanger.

• Karl Bård Kollbotn (Frp) spurde om status for bygging av heis på kommunehuset. Rådmann Ingebjørg Vamråk svara.

• Øyvind Røen (Sp) spurde om status for den planlagde ombygginga av kommunehuset. Rådmann Ingebjørg Vamråk svara.

• Øyvind Røen viste til at kommunehuset i ei tid har vore låst for besøkande, for å redusera risiko for koronasmitte. Han spurde om tidsramma for denne lukkinga. Han spurde også om telefonliste på kommunen si heimeside. Rådmann Ingebjørg Vamråk svara.

Vedtak

Økonomirapporteringa vert tatt til orientering og desse budsjettjusteringane vert vedtatt:

Rådmannen får fullmakt til å disponere og fordele ekstra rammetilskot til korona-pandemien.

Det skal i 2021 brukast 7 mnok av ekstraordinær tilføring til premieafond i KLP. Rådmannen får fullmakt til å vurdere om det skal brukast meir av fondet i 2021.

Det blir gjennomført eit ekstramøte i kommunestyret torsdag 06.05.2021 kl. 18.00. Tema for møtet er sak om mogleg barnevernssøksmål. I møtet skal kommunestyret ha lagt fram ein full statusrapport, ei risikovurdering av situasjonen og ei beskriving av kva pengebruken så langt har gått med til. Det blir sett av ei ramme på inntil 50 000 kroner inkl. gjennomføring av møtet der advokat eventuelt er med og orienterer. I tillegg kjem det òg opp eit punkt som går på eigarforhold bibliotek Bjørkheim.

Behandling

Ordførar Knut Harald Frøland (Bl) bad rådmannen om ei orientering om advokatutgiftene til barnevern i tabellen i vedtaksframlegget. Ordføraren bad om at møtet vart lukka under denne orienteringa. Møtet vart lukka medan kommunestyret handsama spørsmålet om lukking av møtet. Møtet vart opna igjen før røystinga om lukking av møtet. Det vart samrøystes vedteke at møtet skulle lukkast under orienteringa. Heimel for lukkinga var kommunelova § 11-5, tredje ledd, bokstav b. Under den lukka delen av møtet vart det også halde gruppemøte. I den lukka delen av møtet sette ordførar Knut Harald Frøland fram framlegg om følgjande tillegg i forhold til rådmannen sitt framlegg:

• "Det blir gjennomført eit ekstramøte i kommunestyret torsdag 06.05.2021 kl. 18.00. Tema for møtet er sak om mogleg barnevernssøksmål. I møtet skal kommunestyret ha lagt fram ein full statusrapport, ei risikovurdering av situasjonen og ei beskriving av kva pengebruken så langt har gått med til. Det blir sett av ei ramme på inntil 50 000 kroner inkl. gjennomføring av møtet der advokat eventuelt er med og orienterer.

• I tillegg kjem det òg opp eit punkt som går på eigarforhold bibliotek Bjørkheim."

Møtet vart opna igjen før røystinga i saka. Det vart gjennomført punktvis røysting.

Det vart først røysta over ordføraren sitt tilleggsframlegg. Framlegget vart vedteke med 20 mot 1 røyst. Øyvind Strømmen (MDG) røysta imot.

Det vart til slutt røysta over rådmannen sitt framlegg, inkludert det vedtekne tilleggsframlegget til ordføraren. Samrøystes vedteke.

Vedtak

Samnanger kommune opprettar frisklivsentral i ein prosjektperiode på inntil 3 år, med forbehald om at fylkeskommunen innvilgar økonomisk støtte til dette kvart år. Prosjektet skal evaluerast årleg. Etter at prosjektperioden er over, skal kommunen ta stilling til om frisklivsentralen skal implementerast fast i drifta.

Behandling

Ordførar Knut Harald Frøland (Bl) bad om å få gildskapen sin vurdert, fordi vedtaket i saka kan få verknad for kona hans sin stillingsprosent i kommunen. Han gjekk frå medan kommunestyret vurderte gildskapen hans. Øyvind Røen (Sp) gjekk inn som setje-ordførar. Dag Nydal (Bl) gjekk inn som varamedlem for Knut Harald Frøland under gildskapsvurderinga. Knut Harald Frøland vart samrøystes funnen ugild. Dag Nydal heldt derfor fram som varamedlem under resten av handsaminga av saka.

Formannskapet si innstilling vart samrøystes vedteke.

Vedtak

Forskrift om jakt på hjort, Samnanger kommune, vert fastsett av Samnanger kommunestyre 22.04.2021, med heimel i lov 29. mai 1981 nr 38 om jakt og fangst av vilt (viltloven) § 16 og forskrift 8 januar 2016 nr 123 om forvaltning av hjortevilt § 5 og § 6.

§ 1. Det er opna for jakt på hjort i Samnanger kommune i Vestland.

§ 2. Minsteareal for godkjenning av vald og fellingsløyve på hjort er sett til 700 dekar for heile kommunen.

§ 3. Denne forskrifta trer i kraft straks og opphever samstundes det som omhandlar Samnanger kommune i forskrift av 13 juni 2001 nr 648 om jakt etter hjortevilt (elg hjort og rådyr), Sveio, Jondal, Ullensvang, Eidfjord, Granvin, Samnanger, Sund, Modalen, Meland, Austrheim og Masfjorden kommunar, Hordaland.

Behandling

Handsaming:
Karl Bård Kollbotn (Frp) sette fram framlegg om at minstearealet for godkjenning av vald og fellingsløyve på hjort i § 2 i forskrifta vert sett 450 dekar for heile kommunen.

Monica Tjønna sette fram framlegg til vedtak.

Det vart gjennomført punktvis røysting i saka.

Det vart først røysta over Monica Tjønna sitt framlegg til § 4 i forskrifta. Framlegget fall med 4 mot 17 røyster.

Det vart så røysta over § 3 i naturutvalet si innstilling. Denne paragrafen vart samrøystes vedteken.

Det vart så røysta over minstearealet i § 2. Monica Tjønna sitt framlegg om minsteareal på 1000 dekar fekk 1 røyst. Karl Bård Kollbotn sitt framlegg om 450 dekar fekk 5 røyster. Naturutvalet si innstilling om 700 dekar fekk 15 røyster og vart vedteken.

Det vart så røysta over § 1 naturutvalet si innstilling. Denne paragrafen vart samrøystes vedteken.

Det vart til slutt røysta samla over innleiinga i naturutvalet si innstilling, inkludert dei vedtekne paragrafane/tilleggspunkta. Samrøystes vedteke.

Vedtak

Samnanger kommune godkjenner Lokal retningsline for tildeling av tilskot til spesielle miljøtiltak i jordbruket (SMIL) for perioden 2021-2024, slik den ligg føre i saka.

Vedtaket er heimla i Forskrift tilskudd til spesielle miljøtiltak i jordbruket, §§1 og 8.

Behandling

Naturutvalet si innstilling vart samrøystes vedteke.

Vedtak

1. Kommunestyret vil peika på ein i større grad burde sjå på løysingar også på forbrukssida, og vil i den samanhang peika på politiske målsetnader for energisparing, både på nasjonalt og på fylkeskommunalt nivå. Energisparing og energieffektivisering har potensial til å frigjera fornybar energi som kan nyttast til framtidsretta industriutvikling, og vil samstundes redusera behovet for ny produksjon og transmisjonsnett.

2. Samnanger kommune stiller seg skeptiske til at elekrifisering av norsk sokkel frå land er eit særleg godt klimatiltak. Ferske analysar frå olje- og energidepartementet (OED), ref. Aftenposten 10.11.20, tyder på at elektrifisering vil verta dyrt og ha usikker klimaeffekt. Det blir fastslått at elektrifisering vil gje dyrare straum til forbrukarane og landbasert industri. Dette er ein uakseptabel konsekvens som ikkje er rettferdig overfor verken vanlege hustandar eller industrien. Skrinlegging av planane om elektrifisering vil føra til mindre behov for eit tredje luftspenn og kan frigjera straum til grøn industri i Nordhordland. Spenningsoppgradering i staden for luftleidning kan då vera eit godt alternativ.

Samnanger kommune vil også syna til at Vestland fylkesting har etterlyst ei konsekvensutgreiing av kva ei elektrifisering av sokkel vil tyda for kraftbalansen i Vestland, og for moglegheitene for elektrifisering og ny næringsetablering i regionen. Samnanger kommunestyre meiner at ei elektrifisering av sokkelen heller bør skje gjennom ei auke i CO2-avgifter på sokkel, kombinert med eit pålegg om at oljenæringa må skaffa straumen sjølv, gjennom oppbygging av fornybar energi til havs.

3. Kommunestyret i Samnanger er skeptisk til å byggja ut ei ny 420kV-line i luft frå Samnanger. KVU`en er tydeleg på ei ny luftline, anten frå Modalen eller Samnanger, vil få «stor negativ» miljøkonsekvens. Spenningsoppgradering vert sett til «middels negativ» konsekvens, mindre tiltak i nett til «liten negativ» og alternativ til nett til «neglisjerbar» miljøkonsekvens.

4. Samnanger kommune vil såleis meina at ei løysing basert på spenningsoppgradering og / eller sjøkabel er å føretrekkja.

5. Samnanger kommunestyre vil understreka at låge verknader for natur og miljø bør vektleggast høgare enn prissette kostnader.

Behandling

Handsaming:
Monica Tjønna (Sp) sette fram framlegg til vedtak.

Øyvind Strømmen (MDG) sette fram framlegg til vedtak.

Etter den innleiande debatten sette Øyvind Strømmen fram eit omforeinga fellesframlegg frå seg sjølv og Monica Tjønna. Dette framlegget erstatta framlegga dei to hadde sett fram tidlegare i saka.

Karl Bård Kollbotn (Frp) sette fram framlegg til vedtak.

Før røystinga informerte ordførar Knut Harald Frøland (Bl) om at kommunen har fått utsett høyringsfristen i saka. Han foreslo derfor at punkt 1 vart teke ut av fellessframlegget til Øyvind Strømmen og Monica Tjønna. Øyvind Strømmen og Monica Tjønna orienterte etter dette om at punkt 1 vart teke ut av fellesframlegget deira.

I røystinga fekk framlegget til Øyvind Strømmen og Monica Tjønna 18 røyster og vart vedteke. Framlegget til Karl Bård Kollbotn fekk 3 røyster.

Vedtak

Samnanger kommune er positiv til at det vert utbygd småkraftverk i Smådalen. Men Samnanger kommune forutset at alle avbøtande tiltak som er nemnde i naturmangfaldrapporten vert gjennomførte, og at utbygginga generelt vert gjort med så lavt avtrykk i naturen som mogleg.

Behandling

Gildskap:Før handsaminga av saka handsama kommunestyret gildskapen til følgjande representantar:

• Karl Bård Kollbotn (Frp)

• Linda Haug Kollbotn (Frp)

Før handsaminga orienterte desse to representanane om bakgrunnen for spørsmålet om gildskapen sin. Begge gjekk frå medan kommunestyret handsama gildskapen deira. Følgjande personar gjekk inn som varamedlemmer under denne handsaminga:

• Håvard Tvedterås (Frp) - vara for Karl Bård Kollbotn

• Morten Røen (Frp) - vara for Linda Haug Kollbotn

Både Karl Bård Kollbotn og Linda Haug Kollbotn vart samrøystes funne ugilde. Håvard Tvedterås og Morten Røen deltok derfor også på resten av kommunestyret si handsaming av saka.

Handsaming:

Monica Tjønna (Sp) sette fram utsetjingsframlegg. Framlegget fall med 3 mot 18 røyster.

Ove Totland (Bl) sette fram framlegg til vedtak.

Monica Tjønna bad om gruppemøte.

Etter gruppemøtet sette orienterte Håvard Tvedterås (Bl) om uttalen han hadde lagt inn som framlegg i Møteportalen, men han sette ikkje denne fram som framlegg i møtet.

I røystinga i saka vart naturutvalet si innstilling sett opp mot framlegget til Ove Totland. Ove Totland sitt framlegg fekk 14 røyster og vart vedteke. Naturutvalet si innstilling fekk 7 røyster.

Vedtak

Arbeidsmiljøutvalet si innstilling vert ikkje vedteke.

Behandling

Arbeidsmiljøutvalet si innstilling fall med 7 mot 14 røyster. Dette inneber at det ikkje vert gjort endringar i samansetnaden av arbeidsmiljøutvalet.

Vedtak

Informasjonen blir teken til orientering.

Behandling

Formannskapet si tilråding vart samrøystes vedteke.

Vedtak

Samnanger kommunestyre understrekar at det skal vera ei verdig handsaming av døde menneske og dei pårørande – frå dødsfallet skjer til gravferda/bisetjinga er fullført.

Rådmannen skal difor arbeida vidare med mogelege løysingar for eit livssynsnøytralt bårerom/syniningsrom, anten på Samnangerheimen eller andre stader.

Sak om dette vart lagt fram for kommunestyret innan utgangen av 2021.

Behandling

Handsaming:
Øyvind Røen (Sp) sette fram framlegg til vedtak. Framlegget vart samrøystes vedteke.

Vedtak

Kommunestyret tek saka til orientering.

Behandling

Handsaming:
Øyvind Røen (Sp) sette fram framlegg til vedtak.

Øyvind Strømmen (MDG) sette fram framlegg til vedtak.

Arild Røen (H) sette fram framlegg til vedtak.

I røystinga i saka fekk framlegget til Øyvind Strømmen 12 røyster og vart vedeke. Framlegget til Senterpartiet fekk 5 røyster og framlegget til Arild Røen fekk 4 røyster.

Vedtak

Gunn Østvik Petersen (Ap) vert fast medlem i valstyret 2021-2023, i tillegg til dei noverande faste medlemmene i formannskapet. Linda Haug Kollbotn (Frp) vert varamedlem for Gunn Østvik Petersen. Utanom dette vert varamedlemslista for valstyret den same som for formannskapet.

Behandling

Ordførar Knut Harald Frøland (Bl) orienterte om at det til valstyret kan veljast dei same representantane som til formannskapet, men at det på grunn av reglar om kjønnsbalanse må inn ei kvinne til i valstyret i forhold til i formannskapet.

Shirin Kvernes Khadoor (Ap) sette fram framlegg om at Gunn Østvik Petersen (Ap) vert fast medlem i valstyret, i tillegg til dei noverande faste medlemmene i formannskapet. Forslaget vart samrøystes vedteke.

Det vart også samrøystes vedteke at Linda Haug Kollbotn (Frp) vert varamedlem for Gunn Østvik Petersen i valstyret, og at varamedlemslista utanom dette vert den same som for formannskapet.

Vedtak

Det vert med verknad frå 23.04.2021 gjort følgjande endring i Samnanger kommune sitt delegeringsreglement:

Punkt 13.1 om arbeids- og ansvarsområde for valstyret vert endra til:

• Valstyret er oppretta med heimel i vallova § 4-1. Arbeids- og ansvarsområdet for valstyret går fram av reglane i vallova m/føresegner. Kommunestyret delegerer til valstyret å oppnemna røystestyra.

Vedtaket er gjort med heimel i § 5-14 i kommunelova.

Kommunestyret ber om å få opp ei sak med forslag til reglar om delegeringar til leiaren i naturutvalet.

Behandling

Ordførar Knut Harald Frøland (Bl) sette fram framlegg om følgjande tilleggspunkt i forhold til rådmannen sitt framlegg:

"Kommunestyret ber om å få opp ei sak med forslag til reglar om delegeringar til leiaren i naturutvalet."

Med dette tilleggspunktet vart rådmannen sitt framlegg samrøystes vedteke.

Vedtak

Samnanger kommunestyre ønskjer å i størst mogleg grad tilretteleggje for den praktiske kvardagen til småbarnsfamiliar busett i Samnanger. Primært er hovudoppgåva til kommunen å nytte ressursar på og tilby barnehageplassar i eigne kommunale barnehagar. Vi ser likevel at for dei som t.d. bur i utkantane av kommunen og har arbeidsplass e.l. i nabokommunen hamnar i utfordrande situasjonar kva gjeld å få den praktiske kvardagen til å gå rundt.
Samnanger kommunestyre ber difor om at det skal kunne søkast om å få dekka barnehageplass i ein anna kommune, også om denne er i ein offentleg kommunal barnehage. Det skal ved ei slik søknad gjerast ei skjønnsmessig vurdering av familiens behov for å få godkjent plass i kommunal barnehage i annan kommune enn Samnanger. Kriterium som er vesentlege for skjønnsmessig vurdering og godkjenning av søknad kan vera:

- Avstand og reiseveg knytt til arbeidsplass, studieplass eller liknande.
- Spesielle tilhøve knytt til barnets behov, trivnad og helse.

Det er per dato 22.04.2021, eit born busett i Samnanger som har barnehageplass i offentleg barnehage i ein annan kommune. Samnanger kommunestyre ber om at det vert gjort ei skjønnsmessig vurdering og at søknad om å ha behalda plass i barnehagen barnet nyttar i dag vert godkjend dersom ein finn at familiens og barnets behov møter kriteria.

Dei føresette skal leggja fram dokumentasjon om arbeidstid, og om dei har høve til å nytta fleksitid.

Behandling

Handsaming:
Shirin Kvernes Khadoor (Ap) sette fram framlegg til vedtak. Ho orienterte om at det i framlegget ikkje var teke med finansiering. Ho sette derfor fram framlegg om at finansiering i 2021 vart disposisjonsfondet, og at midlar frå og med 2022 må leggjast inn i budsjettet.

Gunn Totland Moss (KrF) sette fram framlegg til tilleggspunkt i forhold til Samnanger Ap sitt framlegg.

Shirin Kvernes Khadoor orienterte om at tilleggspunktet som Gunn Totland Moss (KrF) hadde lagt inn i Møteportalen gjerne kunne takast inn i vedtaket, og at dei to framlegga kunne vera eit fellesframlegg.

I røystinga vart fellessframlegget frå Samnanger Ap og Gunn Totland Moss sett opp mot rådmannen sitt framlegg. Fellesframlegget vart vedteke med 18 mot 2 røyster.

Vedtak

Samnanger kommune ser gjennomføring av  KVU som konstruktivt bidrag for utvikling av tenlege  samferdselsløysingar i Noreg. Tidlegare utførte analysar viser at det gjev stor samfunnsøkonomisk gevinst ved traséval for «arm til Bergen» gjennom Samnanger kommune. Det er  difor ikkje er usannsynleg at resultatet frå KVU vil kunne synleggjera at det er beste løysinga. Samnanger kommune meiner på dette grunnlaget det er viktig at kommunen blir halden godt orientert i KVU-prosessen, og at ordførar i Samnanger kommune blir ein del av politisk samrådingsgruppe og/eller referansegruppe. 

Behandling

Ordføraren sitt framlegg til vedtak vart samrøystes vedteke.

Vedtak

Sal av mat frå salsvogn på Bjørkheim Samnanger kommune gjev løyve til sal av mat frå matvogn på Bjørkheim. Administrasjonen får i oppgåve å omgåande setja opp vilkår for løyvet, der mellom anna følgjande punkt er relevante å ta stilling til:

• Kvar løyvet gjeld og kva periode løyvet gjeld for.

• At salet berre kan føregå på tilvist stad.

• At salsstaden må organiserast slik at den ikkje er til hinder for trygg trafikkavvikling, under dette også gåande, syklande, rørslehemma og så vidare.

• At løyvet er personleg og kan ikkje overdragast til andre.

• At eventuelt andre løyve må innhentast uavhengig av dette løyvet.

• At seljar har dagleg ansvar for å halde orden og plukke opp eventuelt boss på salsstaden som kan knyttast til salsverksemd.

• At det ikkje skal drivast oppsøkjande sal eller marknadsføring mellom bilar som står oppstilt på parkeringsplassane.

• At det ikkje vert gjeve løyve til å setja opp reklame andre stader enn på salsvogna.

• At dei som skal stå for salet må vera over 16 år gamle.

• At søkjar er sjølv ansvarleg for å treffe tiltak for nødvendig HMS og trafikktryggleik.

• At løyvet ikkje gjeld einerett til sal på staden. Dersom fleire får tilsvarande løyve, må alle som har løyve tilpassa seg kvarandre.

• At Samnanger kommune kan endre eller oppheve dette løyvet ved brot på vilkåra dersom aktiviteten fører til problem for trafikkavvikling eller på annan måte er i strid med Samnanger kommune sine retningslinjer. Dersom Samnanger kommune ser behov for å trekke tilbake løyvet, står ikkje Samnanger kommune ansvarleg for eventuelle tap dette medfører.

Behandling

Handsaming:
Ordførar Knut Harald Frøland sette fram framlegg til vedtak. Framlegget vart samrøystes vedteke.

Vedtak

Kommunestyret i Samnanger viser til brev frå Vestland fylkeskommune til Statens Vegvesen, dagsett 4. mars 2021, og knytt til endring av fartsgrense på Fv49.

I brevet ber fylkeskommunen om at det vert gjennomført høyring rundt framlegg om endra fartsgrense på vegen, med:

- særskild fartsgrense 60 km/t frå Fv49 S9D1 m2877 til Fv49 S10D1 m650
- særskild fartsgrense 70 km/t frå Fv49 S10D1 m650 til Fv49 S10D1 m4065  

Dette vil innebera at fartsgrensa i Eikedalen vert sett til 70 km/t.

Samnanger kommunestyre meiner at fartsgrensa i Eikedalen bør setjast til 60 km/t og syner i den samanhang til at det i Eikedalen er rundt 30 fastbuande, og at lågare fartsgrense vil bidra til betre trafikktryggleik og eit betre lokalmiljø for desse.

Kommunestyret meiner det vil vera underleg dersom ein i eit område med fastbuande skal ha høgare fartsgrense enn ein vil få på Kvamskogen.  

Samnanger kommunestyre syner elles til at Kvam herad i 2019 sendte eit høyringsinnspel med ynskje om fleksible fartsgrenser på Kvamskogen. Dersom ein skulle landa på ei slik ordning, meiner Samnanger kommunestyre likevel at fartsgrensa i Eikedalen bør setjast ned til 60 km/t.

Behandling

Handsaming:
Øyvind Strømmen (MDG) sette fram framlegg til vedtak. Framlegget vart vedteke med 19 mot 1 røyst. Karl Bård Kollbotn (Frp) røysta imot.