Møte i Formannskapet den 27.05.2021

Vedtak

Møteinnkallinga og saklista vert godkjent. Orienteringssaker

Behandling

Godkjenning av innkalling og sakliste:
Ordførar Knut Harald Frøland (Bl) foreslo å ta ei ekstra sak inn på saklista for møtet, som første sak etter utvalet sitt kvarter. Forslaget gjaldt sak om premiss budsjett og økonomiplan 2022-2025. Formannskapet slutta seg til at denne saka vart teken inn på saklista. Ordføraren orienterte også om at einingsleiar for pleie og omsorg ville vera til stades på to saker i møtet (sak 032 og 033), og at for å unngå unødvendig ventetid for einingsleiar ville desse to sakene truleg verta handsama (framskunda) når ho kom til møtet. Eventuelle merknader til protokoll frå førre møte:
Ingen merknader.


Orienteringssaker/referatsaker:
Ingen orienteringssaker vart tekne opp under den ordinære handsaminga av sak 021/2021.

Etter at det vart gjort vedtak i den siste saka i møtet (sak 031), svara rådmann Ingebjørg Vamråk på spørsmål som vart tekne opp i kommunestyret 06.05.2021 og som ikkje vart svara på der. Dette gjaldt følgjande spørsmål:

• Status for arbeidet med tilstandsrapport/vedlikehaldsplan kommunale bygg

• Status for arbeidet med bygging av heis på kommunehuset

• Flomlys i idrettsanlegget i Hagabotnane

Etter at rådmannen hadde svara på spørsmåla ovanfor, bad ordførar Knut Harald Frøland om ei orientering frå rådmannen om to saker (barnevern og Krekavegen). Knut Harald Frøland bad om at møtet vart lukka under desse orienteringane, med heimel i kommunelova § 11-5. Møtet vart lukka medan formannskapet handsama spørsmålet om lukking. Møtet vart opna igjen før røystinga om lukking. Det vart samrøystes vedteke at møtet skulle vera lukka under orienteringane. Det vart utanom dette ikkje gjort noko vedtak knytt til dei to orienteringssakene.

Etter orienteringane om barnevern og Krekavegen var det ei orientering/informasjon med omsyn til arbeidsgjevaransvar. Rådmannen og møtesekretæren vart dimittert frå møtet før denne orienteringa/informasjonen.

• Odd Arne Haga (Frp) - spørsmål om kalkulert rentesats for gebyr vatn og avløp. Økonomisjef Nina Erdal svara.

• Lena Tveit (Bl) - spørsmål om moglegheit for sommarjobb for ungdom 16-18 år. Rådmann Ingebjørg Vamråk svara.

Vedtak

Rekneskapen for 2020 vert godkjent slik han ligg føre. Rekneskapen for 2020 har eit underskot på kr 1 339 397,65 som er dekka inn ved å redusere budsjettert avsetting til disposisjonsfond i samband med rekneskapsavslutninga for 2020, jf. kommunelova § 4-2.

Framført underskot på sjølvkost kan dekkast inn ved eit evt. overskot på eit seinare tidspunkt. Dette gjeld:

Behandling

Rådmannen sitt framlegg vart samrøystes vedteke.

Vedtak

Årsmelding 2020 for Samnanger kommune vert teken til orientering.

Behandling

Rådmannen sitt framlegg vart samrøystes vedteke.

Vedtak

Samnanger kommune tilbyr alle barn i kommunen barnehageplass i barnehagane i kommunen som ein hovudregel.

I særsikilde høve kan foreldre/føresette søkje om plass i kommunal barnehage i nabokommune ut frå følgjande kriterier:

• Avstand og reiseveg knytt til arbeidsstad, studiestad eller liknande

• Spesielle tilhøve knytt til familien sine behov

• Spesielle tilhøve knytt til barnet sitt behov, trivnad og helse

• Avgjerslene skal vera til barnets beste (Barnevernkonvensjonen artikkel 3)

Det skal ved slike søknader gjerast ei skjønnsmessig vurdering av familien sitt behov for å få godkjent plass i kommunal barnehage i annan kommune enn Samnanger.

Ved søknader grunna avstand og reiseveg knytt til arbeidsstad må dei føresette leggja fram dokumentasjon frå arbeidsgjevar om arbeidstid, og om dei har høve til å nytta fleksitid.

Ein føresetnad for å kunne innvilga søknad om dekking av kommunal barnehageplass i annan kommune, er at det på førehand vert inngått avtale mellom Samnanger kommune og den aktuelle kommunen om betaling/økonomiske vilkår ut frå nasjonale tilskotssatsar for private barnehagar.

For barn med hjelpebehov som krev store tilretteleggingar og kostnader for barnehagen, kan kommunen krevja at barnehagetilbodet skal gjevast i kommunal barnehage i Samnanger.

Rådmannen får fullmakt til å avgjera søknader om dekking av kommunal barnehageplass i annan kommune, og til å inngå avtalar med aktuelle kommunar om betaling/økonomiske vilkår ut frå nasjonale tilskotssatsar for private barnehagar.

Behandling

Øyvind Strømmen (MDG) stilte spørsmål om grunnen til at det i rådmannen sitt vedtaksframlegg i sak 024/2021 er med eit punkt om at avgjerslene skal vera til barnets beste (Barnevernkonvensjonen artikkel 3), men at det ikkje er med eit tilsvarande punkt i vedtaksframlegget i sak 023/2021. Rådmannen orienterte om at punktet har falle ut ved ein inkurie. Knut Harald Frøland (Bl) sette fram framlegg om at dette punktet også vart teke inn i vedtaket i sak 023/2021. Med dette tillegget vart rådmannen sitt framlegg samrøystes vedteke.

Vedtak

Samnanger kommune jobbar i tråd med opplæringslova sine reglar om at alle grunnskuleelevar i utgongspunktet har rett på skuleplass i sitt nærmiljø(adresse i folkeregisteret) og gjer seg nytte av denne plassen.

I særskilde høve kan føresette/foreldre søkja om at eleven får gå på grunnskule i nabokommune ut frå følgjandekriterier:

• Avgjerslene skal vera til barnets beste (Barnekonvensjonen artikkel 3)

• Tilhøyrigheit og kortare reiseveg til skule som ligg i nabokommune

• Spesielle tilhøve knytt til eleven sine behov, trivnad og helse (fysiske utfordringar, funksjonsnedsetting)

• Skjønnsmessige vurderingar ut frå familien sine behov (døme: foreldra bur i kvar sin kommune og eleven bur ei veke hos kvar)

• Flytting midt i eit skuleår og ein vurderer at det vil vera til eleven sitt beste å få sluttføraskuleåret på skulen der ho/han går

• Særskilde omsyn utgreidd av faginnstans – til dømes sakkunnig vurdering

• Saker knytt til Opplæringslova 9A, til dømes tvunge skulebyte etter § 9A-12

Skuleplass i andre kommunar kan i særskilde tilfelle også gjevast med heimel i andre særlover, som Barnevernlova:

• Eleven går på skule i den kommunen der fosterheimen/tilbodet vert gjeve

• Heimstadskommunen gjer vedtak om spesialundervisning ut frå sakkunnig uttale og betaler dette i tillegg til grunnressursen etter fastsette satsar

Søknad om å få gå på grunnskule i annan kommune vert avgjort av rådmannen ut frå kriteria ovanfor (og i tråd med Forskrift om skulebyte i Samnanger kommune når denne forskrifta kjem på plass).

Foreldre kan velja privatskule for sitt barn i ein annan kommune jf. friskolelova § 1-1. Dei må ikkje søkje til kommunen. Får dekka reise til kommunegrensa. Kommunen dekkjer ikkje andre utgifter pr i dag.

Behandling

Etter den innleiande debatten bad Øyvind Strømmen (MDG) om informasjon om kva kommunar Samnanger har gjesteelevar i. Sektorleiar oppvekst Bodil H. Øpstebø bad om at møtet vart lukka dersom ho skulle orientera om dette, av personvernomsyn. Møtet vart lukka medan formannskapet handsama spørsmålet om lukking. Møtet vart opna igjen før røystinga om lukking. Det vart samrøystes vedteke at møtet skulle vera lukka under orienteringa, med heimel i kommunelova § 11-5. Møtet vart opna igjen etter orienteringa.

Rådmannen sitt framlegg vart samrøystes vedteke.

Vedtak

Det vert lagt til følgjande nye underpunkt til «» i Samnanger kommune sitt delegeringsreglement:

1.4.5 Mynde for leiarar av folkevalde organ/andre kommunale organ
Lovbestemt mynde for leiarar av kommunale folkevalde organ/andre kommunale organ som er oppretta etter reglane i kommunelova, går fram av lova. Dette gjeld mellom anna følgjande mynde:

• Bestemma at det skal haldast møte i organet (jf. kommunelova § 11-2 andre ledd bokstav b)

• Leia møta i organet (jf. kommunelova § 11-2 tredje ledd)

• Setja opp sakliste for kvart enkelt møte (jf. kommunelova § 11-3 første ledd), herunder be om at saker vert sett på dagsorden.

• Motsetja seg at det vert fatta vedtak i ei sak som ikkje er oppført på saklista (jf. kommunelova § 11-3 femte ledd).

• Motsetja seg at det vert fatta vedtak i ei sak der saksdokumenta ikkje er sendt ut saman med innkallinga (jf. kommunelova § 11-3 femte ledd).

Behandling

Handsaming:
Knut Harald Frøland (Bl) sette fram framlegg til vedtak.

I røystinga fekk Knut Harald Frøland sitt framlegg 6 røyster og vart vedteke. Rådmannen sitt framlegg fekk 3 røyster.

Vedtak

Saka vert teken til orientering.

Behandling

Øyvind Strømmen (MDG) sette fram følgjande framlegg til vedtak:

"Saka vert teken til orientering."

Framlegget til Øyvind Strømmen vart samrøystes vedteke.

Vedtak

Samnanger kommune vedtek felles kommunalteknisk VA Norm for Samnanger kommune slik den ligg føre i vedlegg datert 3. mars 2021.

Behandling

Rådmannen sitt framlegg vart samrøystes vedteke.

Vedtak

Saka vert vidaresendt til kommunestyret utan tilråding.

Behandling

Etter den innleiande debatten bad Knut Harald Frøland (Bl) om gruppemøte.

Etter gruppemøtet sette Knut Harald Frøland fram følgjande framlegg til vedtak:

"Saka vert vidaresendt til kommunestyret utan tilråding.".

Framlegget til Knut Harald Frøland fekk 6 røyster og vart vedteke. Framlegget til rådmannen fekk 3 røyster.

Vedtak

Finansrapportering for 1.tertial 2021 vert tatt til orientering.

Behandling

Rådmannen sitt framlegg vart samrøystes vedteke.

Vedtak

Økonomirapportering pr april 2021 vert tatt til orientering.

Det vert føretatt fylgjande budsjettjustering knytt til å endra ansvar som vert brukt til å registrera indirekte kostnader på sjølvkostområde:

• Funksjon 120* (administrasjon) ansvar 11* kr + 218000

• Funksjon 120* (administrasjon) ansvar 9004 (fordelte renter mm) kr – 218000

Det vert føretatt fylgjande budsjettjustering knytt til finansiering av nytt straumuttak for matvogn ved torg på Bjørkheim:

• Det vert løvd inntil 30 000 kroner til nytt straumskap med 32 ampere-uttak ved torget på Bjørkheim. Finansiering er næringsfondet.

Behandling

Rådmannen sitt framlegg vart vedteke med 8 mot 1 røyst. Jon Magne Bogevik (Ap) røysta imot.

Vedtak

Samnanger kommune vedtek avfallsforskrift for Samnanger slik den ligg føre. Den er utan endringar og er likelydande som for Bergen kommune.

Behandling

Etter den innleiande debatten bad Knut Harald Frøland (Bl) om gruppemøte.

Etter gruppemøtet vart det røysta over rådmannen sitt framlegg, som vart samrøystes vedteke.

Vedtak

Saka blir tatt til orienteing.

Behandling

Rådmann Ingebjørg Vamråk bad om at møtet vart lukka under handsaminga av saka, med heimel i kommunelova § 11-5. Møtet vart lukka medan formannskapet handsama spørsmålet om lukking. Møtet vart opna igjen før røystinga om lukking. Det vart samrøystes vedteke at møtet ikkje skulle vera lukka under handsaminga av saka.

Merknad: Øyvind Strømmen (MDG) bad før røystinga om lukking om at det i møteprotokollen vert teke med at det under handsaminga av spørsmålet om lukking også vart svart på nokre spørsmål om saka (spørsmål som ikkje gjaldt eventuell lukking av møtet).

Einingsleiar for pleie og omsorg, Janne Drevsjø, orienterte innleiingsvis om saka.

Det vart undervegs i handsaminga halde eit gruppemøte. Etter gruppemøtet sette Knut Harald Frøland (Bl) fram følgjande framlegg til vedtak:

"Saka blir tatt til orientering."

Framlegget til Knut Harald Frøland fekk 6 røyster og vart vedteke. Rådmannen sitt framlegg fekk 3 røyster.

Vedtak

Dei innsende framlegga til premissar vert oversende til kommunestyret.

Behandling

Handsaming:
Knut Harald Frøland (Bl) sette fram framlegg til vedtak.

Odd Arne Haga (Frp) sette fram framlegg til vedtak.

Shirin Kvernes Khadoor (Ap) orienterte om nokre punkt som ho ønska å spela inn i saka. Ho hadde ikkje formulert desse punkta skriftleg, men det vart seinare under handsaminga avklart at ho fekk høve til å senda punkta inn skriftleg etter møtet.

Knut Harald Frøland sette så fram framlegg om at dei innsende forslaga til premissar vert oversende til kommunestyret (inkludert eventuelle innsende forslag frå Shirin Kvernes Khadoor). Han orienterte samstundes om at han ønska å stryka avsnittet "Gjeld" i forslaget sitt til premissar.

Knut Harald Frøland sitt sistnemnde framlegg vart samrøystes vedteke.

(Merknad: Punkta frå Shirin Kvernes Khadoor/Samnanger Ap vart sendt inn skriftleg på kvelden 27.05.2021, og er som følgjer:
Samnanger AP - Innspel til drøfting: premiss for handsaming av budsjett for 2022

SFO - Opning i ferie: Redusere frå mellom 5 og 6 veker stengt, til 4 veker stengt i sommarferie (framlegg til vedtak):
Samnanger kommunestyre ønskjer å få opp eigen sak knytt til å redusere stengjetid i ferieveker på SFO. Kommunestyret ber administrasjonen utarbeide ei kostnadsoversikt og utgreiing kring andre element som vil ha innverknad på budsjetteringa knytt til ei slik omgjering av kommunens SFO-tilbod.

Heile, faste stillingar og sikring av lokal kompetanse
Samnanger AP ønskjer at det i enda større grad skal arbeidast aktivt med at heile, faste stillingar skal vera norma i kommunen. Det er i tillegg eit viktig moment at det aktivt vert arbeidd med å behalda kompetansen me har lokalt. I t.d. tilfelle der tilsette har teke fagbrev, vidareutdanning eller på anna vis har skaffa eller heva sin kompetanse, er det viktig for Samnanger at me gjer oss attraktive og kan tilby fast arbeid.
Me meiner det her hadde vore føremålstenleg å få ei orientering om status på dette er per i dag, samt korleis det vert jobba med dette i kommuneorganisasjonen. Me ønskjer også å høyre frå administrasjon, einingsleiarar og tillitsvalde kva behov som finst kva gjeld bemanning og andre tilhøve knytt til både å levere gode tenester, samt sikra gode arbeidstilhøve.

Fokus på kvalitet i tenester og eit godt arbeidsliv - kommunebarometer, kvalitetsdialog
Samanger AP ønskjer at det i samband arbeid med budsjett vert lagt opp til dialog og samarbeid med einingsleiarar, administrasjon og tillitsvalde, gjerne i form av noko liknande det som har var kalla "kvalitetsdialog" som vart gjennomført i føregåande periode. Det er nyttig for kommunestyrets representantar å få god innsikt i moglegheiter og utfordringar i heile kommuneorganisasjonen, slik at me er betre rusta til å arbeide aktivt opp mot kommunens budsjett og kva prioriteringar som trengs. Både drøfting kring kommunebarometeret og god innsikt, gjennom direkte dialog, i den praktiske kvardagen i einingane kan bidra til at me betre kan arbeide målretta i kommunestyret.)