Møte i Formannskapet den 23.08.2021

Vedtak

Møteinnkallinga og saklista vert godkjent.

Behandling

Godkjenning av møteinnkalling og sakliste:
Jon Magne Bogevik (Ap) bad om følgjande protokollmerknad:

• "Innkallinga er ikkje i samsvar med lov- og regelverk."

Bogevik påpeika òg at han ikkje hadde motteke møteprotokoll frå førre formannskapsmøte (20.08.2021).


Orienterings-/referatsaker:
Ingen saker.


Utvalet sitt kvarter:

Spørsmål om oppstart av ordning med gratis skulemat
Odd Arne Haga (Frp) spurde om det er bestemt når ordninga med gratis skulemat på ungdomsskulen skal starta opp. Rådmann Ingebjørg Vamråk orienterte om at dette ikkje er bestemt, som følgje av koronasituasjonen.

Vedtak

Samnanger kommune meiner det er uheldig at avtroppande rådmann har høve til å tilsettja konsulent for leiargruppa berre kort tid før ho sluttar, og at dette i verste fall kan ha negativ innverknad på kvaliteten i styringa av kommunen. Det er òg eit viktig moment at dette gjev ny rådmann mindre rom til å byggja opp administrasjonen slik han/ho ønskjer.

Samnanger kommune innfører difor stopp i tilsetjingar i sentraladministrasjonen med verknad frå tidspunktet dette vedtaket er gjort. Denne tilsetjingsstoppen gjeld fram til mellombels rådmann har overteke for noverande rådmann. Mellombels rådmann vurderer om prosessen med tilsetjing av konsulent for leiargruppa skal halda fram.

Sidan den nemnde tilsetjinga av konsulent kan skje innan kort til (søknadsfristen er gått ut) er det formannskapet som gjer dette vedtaket med heimel i Reglement for kommunestyret, formannskapet, naturutvalet og kontrollutvalet i Samnanger kommune

Behandling

Handsaming:
Øyvind Røen (Sp) sette fram framlegg til vedtak.

Rådmann Ingebjørg Vamråk bad om ei presisering av innhaldet i framlegget. Knut Harald Frøland (Bl) foreslo ein pause i møtet.

Etter pausen sette Øyvind Røen fram eit justert framlegg til vedtak. Dette framlegget vart vedteke med 6 mot 3 røyster.

Etter røystinga sette Shirin Kvernes Khadoor (Ap) på vegner av seg sjølv, Jon Magne Bogevik (Ap) og Oskar Røen krav om at saka vert lagt fram for kommunestyret til avgjerd (mindretalsanke), og om at dette kravet vert protokollført.