Møte i Kommunestyret den 01.10.2021

Vedtak

• Møteinnkallinga og saklista vert godkjent.

• Orienterings-/referatsaker

• Det vert utbetalt halv møtegodtgjersle til deltakarane på kommunestyremøtet 01.10.2021.

Behandling

Godkjenning av innkalling og sakliste:
Godkjent utan merknader.


Eventuelle merknader til protokoll frå førre møte:
Ingen merknader.


Møtegodtgjersle for kommunestyremøtet 01.10.2021:
Ordførar Knut Harald Frøland (Bl) spurde om det ville vera i orden for kommunestyret at det vart betalt halv sats for møtegodtgjerlse for dette møtet. Det vart etter ein kort debatt bestemt at det skulle gjennomførast røysting om dette spørsmålet. Det vart med 14 mot 7 røyster vedteke at det skal betalast halv sats for møtegodtgjersle.


Avklaring om innkalling av varamedlemmer til arbeidsutvalet for rekruttering av rådmann:
Ordførar Knut Harald Frøland (Bl) viste til at både han og administrasjonen oppfattar det slik at de skal kallast inn varamedlem dersom nokon av dei faste medlemmene i arbeidsutvalet for rekruttering av rådmann har forfall. Ingen i kommunestyret hadde merknader til at denne praksisen vert følgt.


Ordføraren orienterer:

• Notat om konkurranse om veg til Hagabotnane

• Inngåing av kontrakt med jusprofessor Erling Hjelmeng i samband med søksmål mot kommunen i barnevernssak

Rådmannen orienterer:

• Status for arbeidet med budsjett/økonomiplan

• Justeringar i rådmannen si leiargruppe

• Har fått på plass faste dialogpunkt mellom rådmannen si leiargruppe og ordføraren

Vedtak

Jan Erik Boge vert konstituert som rådmann i Samnanger kommune med verknad frå 01.10.2021 og fram til ny fast rådmann startar i stillinga. Jan Erik Boge får i konstitueringsperioden permisjon frå den faste stillinga si som leiande rådgjevar.

Jan Erik Boge får same årslønn som den tidlegare faste rådmannen hadde før ho slutta i stillinga i september 2021, 1 060 000 kroner inkl. tillegg.

Det vert som følgje av at Jan Erik Boge mellombels går ut av den faste stillinga si i kommunen, løyvd inntil 200 000 kroner i 2021 til lønnsutgifter for vikar i den faste stillingsheimelen hans. Finansiering vert disposisjonsfondet.

Det vert løyvd inntil 30 000 kroner i 2021 til kjøp av ekstern rettleiing/mentorteneste for konstituert rådmann. Finansiering vert disposisjonsfondet.

Konstituert rådmann utpeikar sjølv kven som skal vera stadfortredaren hans i konstitueringsperioden.  

Kontrakten mellom Agenda Kaupang AS og Samnanger kommune om innleige av rådmann i perioden 08.09.2021 – 11.11.2021 vert avslutta, og erstatta med kontrakt om innleige av rådgjevar frå Agenda Kaupang AS fram til 11.11.2021. Dei økonomiske vilkåra vert ikkje endra som følgje av endringa av kontrakt, d.v.s. at den samla honorarramma for perioden 08.09.2021 – 11.11.2021 framleis vil vera ca. 558 000 kroner. Rådmannen får fullmakt til å signera kontrakten med Agenda Kaupang.

Behandling

Handsaming:
Ordførar Knut Harald Frøland (Bl) sette fram framlegg til vedtak.

Arild Røen (H) bad om gruppemøte.

Etter gruppemøtet bad Øyvind Strømmen (MDG) om at Knut Harald Frøland tok vekk den første setninga i det siste avsnittet i vedtaksframlegget sitt. Etter ein kort debatt om dette orienterte Knut Harald Frøland om at han trekte det første framlegget sitt, og han sette i staden fram eit justert framlegg. Det justerte framlegget vart samrøystes vedteke.