Møte i Naturutvalet den 22.03.2022

Vedtak

Innkalling og sakliste vert godkjent.

Behandling

Rådmannen sitt framlegg til vedtak vart samrøystes vedteke.

Vedtak

Orienterings-/referatsaker vert tekne til orientering.

Behandling

Utvalet sitt kvarter:

Avkjørsle til "Kvamshaug" i Eikedalen
Monica Tjønna (Sp) ønskte å få avklart om avkjørsla frå hovudvegen er godkjent av Statens vegvesen. Avkjørsla vart diskutert i samanhang med handsaminga av sak om fritidsbustad på GBNR 34/233 (Saknr. 004/22) i naturutvalsmøtet 08.02.2022.
Rådmannen svarar på dette i neste møte.

Utbetring av vegen til Hagabotnane
Øyvind Steinsland (Bl) stilte spørsmål om status i arbeidet med utbetring av vegen til Hagabotnane.
Rådmannen orienterte.

Falleferdige hus på Ytre-Tysse
Linda Haug Kollbotn (Frp) stilte spørsmål om status i oppfølging av saker gjeldanda sikring av falleferdige hus på Ytre-Tysse. Rådmannen orienterte om at administrasjonen arbeider med sakene og er i dialog med huseigarane.

Vegdekke over Tyssereinane
Linda Haug Kollbotn (Frp) stilte spørsmål om det var plan om å utbetra holer i vegdekke over Tyssereinane. Når vegen om Ytre-Tysse er stengt, vert Tyssereinane nytta som omkjøringsveg for dei lokale.
Rådmannen og leiar teknisk drift forsikra utvalet om at vedlikehald og sikring på Tyssereinane vert gjort etterkvart.

Rådmannen orienterer:

• Møter med leiar i naturutvalet - Rådmannen har innført formøte med leiar i naturuvalet, Karl B. Kollbotn, før kvar møterunde. Det er einigheit om at dette fungerar fint og begge partar ønskjer å fortsetje med denne ordninga.

• Oppfølging av politiske vedtak - administrasjonen prioriterer dette arbeidet framover.

• Kommunal planstrategi - rådmannen har tatt fatt i arbeidet med planstrategi. Skal truleg til politisk handsaming i juni.

• Møte med styringsgruppa i IKTNH.

Orientering frå eining for samfunnsutvikling:

• Høgt fråvær i eininga - prosjekt har vorte utsett, men det viktige har vorte gjort.

• Fleirbrukshall - arbeidet er i rute. Har starta med utarbeiding av anbodsgrunnlag for reguleringsprosessen , prosjektering og for sjølve bygginga.

• Revisjon av VA reglement for tilknytningsplikt - sak om dette skal handsamast i kommunestyremøtet i juni.

• Status VA Bygdavegen - dette arbeidet er ikkje starta pr. no.

• Trafikksikringstiltak i Gjerdsvegen, skilting og merking i bustadsfeltet på Steinsland - dette må sjåast på saman med eventuelle utbetringar og asfaltering.

• Oppgradering av vegen i Hagabakkane - i rute. Det er sett av pengar i budsjettet til forprosjekt, dette arbeidet er igangsett. Kommunegeolog har vore på synfaring.

• Status turveg Hagabotnane - i rute. Arbeidet med prosjektering er i gang og kommunegeologen har vore på synfaring.

Rådmannen sitt framlegg til vedtak vart samrøystes vedteke.

Vedtak

Samnanger kommune sin uttale til innspelutkastet av RTP sitt økonomiske handlingsprogram og investeringsprogram for perioden 2022-2033:

Samnanger kommune ber fylkeskommunensjå på bakgrunnen for valet av tiltak for å kome fram til kva som skal prioriterast. Det er viktig at dei tiltaka som det blir brukt mykje resursar på, er framtidsretta og kan nære ein utvikling på regionalt og lokalt nivå. Tiltak som nærer ein utvikling på regionalt nivå, vil skape nye utfordringar for lokalsamfunnet. For Samnanger kommune vil dette vere prosjektet med ein ny tunnel i Tokagjelet. Med ein ny tunnel og jamleg auke av ÅDT på Fv. 49, vil det bli eit større behov for oppgradering av tunnelar, trafikktryggleik, mindre utbetringar av eksisterande veganlegg, gang- og sykkeltiltak og kollektivtiltak.

I vurderinga om kva tiltak som er viktigast å prioritere, er det viktig å ta med seg at tiltak som skal betre det regionale transportnettet, ikkje går utover det lokale transportnettet. Utbetring av det regionale transportnettet vil krevje lokale tiltak for å hindre at fylkesvegar utviklar seg til ein negativ konsekvens for kommunen.

Samnanger kommune synar til at det er viktigare å prioritere strekningsvise utbetringar av regionale hovudvegar over to større gang- og sykkeltiltak utanom miljøløftet. Samnanger kommune opplever at den aukande trafikken på vegar i funksjonsklasse B, gjer det mindre trygt på desse vegane der dei er utforma etter ein tidlegare standard. Kryssingspunkt og avkøyringar har ikkje blitt oppgradert i takt med den aukande trafikken. Dette er eit etterslepspunkt som Samnanger kommune synest er viktig å prioritere.

Samnanger kommune synest at eigne løyvingar til rekkverk, vegljos og til ei ordning med spleiselag for mindre prosjekt, er ei god tilnærming for å hjelpe kommunar å betre hovudvegar med lågare funksjonsklassar som kommunane sjølv reknar som sentrale for kommunen. Samnanger kommune meiner at det kan vere lurt å sette rammar på kor desse løyvingane går, som til dømes skulevegar.

Samnanger kommune ser på moglegheita til å få utvida det offentlege VA-nettet langs FV. 49 gjennom Eikedalen. Det er ei rekkje fritidsbustader i denne delen av Eikedalen, samt eit område med fastbuande. Særleg blant dei fastbuande har det i mange år blitt bede om betre tilrettelegging for mjuke trafikantar. Mange har også kontakta kommunen med spørsmål om når det kjem offentleg VA til dette området. Referansepunkt for prosjektområde vil vere frå Samnangervegen 665 til avkøyring til Eikedalen skisenter.Dette er eit prosjekt der det kan vere aktuelt for Samnanger kommune å gå inn i eit spleiselag med fylkeskommunen med å bruke trase for VA til trase for gang- og sykkelveg og andre utbetringar av vegen.

Samnanger kommune ber fylkeskommunen om at dei gjer ein ekstra vurdering på kva dei nemnte tiltaka og prosjekta i innspelutkastet gjer for det regionale og lokale transportnettet. Samnanger kommune meiner at fylkeskommunen må sjå på tiltaka og prosjekta at dei reduserer belastninga på det lokale transportnettet. Alle tiltaka og prosjekta som er nemnt, vil føre til en auka trafikktryggleik, men tiltaka og prosjekta bør følgje utviklingsstrategien som er vedteken i kommunen sin samfunnsdel og arealdel. Samnanger kommune synar at det er positivt at det er blitt utarbeida eit fagleg grunnlag, Meir veg for pengane, for kva tiltak og prosjekt som skal prioriterast.

Prosjekta og tiltaka som er knytt til Fv. 49 bør prioriterast. I dag er dette hovudtransport aksen mellom Bergen og Hardangerfjorden, og vidare til Folgefonna Nasjonalpark. FV. 49 er også ein viktig veg for å komme til større hyttefelt som er lokalisert i Eikedalen og Kvamskogen, og det er fleire reisedestinasjonar langs denne vegen. Dagens trafikk på Fv. 49 skaper allereie ein del utfordringar for det lokale transport nettet, og det er behov for utbetringar. Fylkeskommunen har vist til moglegheita å gjere Fv. 49 til ein omkøyringsveg mellom Bergen - Voss når neste utbyggingsetappe for toglinja mellom Bergen – Voss skal byggast.

Med den stadig aukande trafikken på Fv. 49 grunna fritidsinteresser, frakt, tunnelutbygging i Tokagjelet og mogleg omkøyringsveg, er det eit stort behov for utbetring på større delar av veganlegget. Samnanger kommune har ved fleire anledningar prøvd å redusere hastigheita på Fv. 49 for å betre trafikktryggleiken rundt avkøyrslar og kryssingspunkt for mjuke trafikantar, utan å få gjennomslag. Det må skje fleire utbetringar på veganlegget til Fv. 49. Om det ikkje blir prioritert utbetringar langs Fv. 49 i Samnanger kommune, må fylkeskommunen gå med på å redusere hastigheita på vegen på fleire strekningar.

Tunneloppgradering av Fossenbrattetunnelen og skredsikring med Tokagjelet er tiltak som må gjennomførast, grunne ein konstant auking av ÅDT på denne vegen. Auken av ÅDT for bilar og tungtransport, vil føre til fleire vibrasjonar på nærområdet og kan auke sannsyna for steinsprang. For å halde på nullvisjonen, er dette 2 tiltak som bør setjast høgt på prioriteringslista.

Samnanger kommune ynskjer at det blir prioritert gang- og sykkelveg mellom Bjørkheim - Bjelkarvika i staden for Tysse – Haga. Bjørkheim – Bjelkarvika er ei strekning som vil bli veldig sentral for den pågåande sentrums utviklinga som skjer i Samnanger kommune. Me er tidleg i ein fortettings fase av Bjørkheim, og ein må få på plass gang- og sykkelvegar nå mens det framleis er tilgjengeleg areal. Ein gang- og sykkelveg mellom Bjørkheim – Bjelkarvika vil redusere farlege kryssingspunkt langs Fv. 49. Dei fleste planane som er i arbeid i dag i Samnanger kommune omhandlar ein fortetting av Bjørkheim og nærliggjande areal. Om ikkje nemnte gang- og sykkelveg kjem, må kommunen sjå på løysningar som lysregulerte overgangar langs FV.49 for å redusere det aukande faremomentet for mjuke trafikantar. Ein gang- og sykkelveg mellom Bjørkheim – Bjelkarvika vil vere elementær for å auke talet på gåande og syklande i kommunen, da denne vegen vil vere midt i ein fortettingssone.

Samnanger kommune har tidlegare, i uttale til Regional Transportplan hausten 2021, uttalt at det må vera eit høgt prioritert tiltak å gjera fv 579 mellom Hisdal og Os om til forkøyrsveg, og ber om at dette arbeidet blir satt i verk. Vidare vil vi påpeika at same vegstrekning har eit sterkt behov for oppgradering, særleg på enkelte strekningar. Trafikken har auka markant dei siste åra, og det er også stor sjanse at trafikken på denne strekninga aukar i samband med opning av Svegatjørn- Rådal. I tillegg er det omkøyringsveg, samt at Samnanger har legevakt i Os, og må då nytta denne vegstrekninga.

Behandling

Gunn Østvik Petersen (Ap) sette fram eit tilleggspunkt til rådmannen sitt fralegg til vedtak.

Rådmannen sitt framlegg inkludert tlleggspunktet frå Petersen vart samrøystes vedteke.

Vedtak

Med heimel i plan- og bygningslova § 12-8 andre ledd vert planinitiativet for detaljreguleringsplan for datasenter i Børdalen (GBNR 35/3 og 1 m.fl.) stoppa. Mesteparten av planområdet er i kommuneplanens arealdel sett av til LNF-område. Det er viktig at kommunen driv med føreseieleg og langsiktig arealplanlegging, og at ein ikkje opnar for større utbyggingsområde på andre måtar enn gjennom overordna kommuneplanlegging. I Børdalen er det allereie regulert eit område for datasenter, og det er vanskeleg å argumentera for at det er behov for meir areal til dette føremålet på noverande tidspunkt. Vår vurdering er at det ogsåvil vera svært vanskeleg å få ein slik reguleringsplan endeleg godkjent utan motsegn frå overordna styresmakter, på grunn av omfang, arealstatus, arealtype og noverande behov.

Behandling

Rådmannen sitt framlegg til vedtak vart samrøystes vedteke.