Møte i Formannskapet den 01.09.2022

Vedtak

Innkalling og sakliste vert godkjent.

Behandling

Rådmannen sitt framlegg vart samrøystes vedteke.

Vedtak

Orienterings-/referatsaker vert tekne til orientering.

Behandling

Eventuelle merknader til protokoll frå førre møte:
Ingen merknader.

Ordføraren orienterer:

• Straumprisar. Det har kome innspel frå næringsdrivande i kommunen om utfordringar knytt til dei høge straumprisane.

• Seminar om relativ fattigdom. Det blir planlagt seminar for kommunestyret, administrativ kommuneleiing og hovutillitsvalde tysdag 01.11.2022.

• Køyrereglar for kommunestyret. Ordføraren vil utarbeida framlegg til køyrereglar, og leggja dette fram for politisk handsaming.

• Uttale til planprogram for regionale senter i Vestland. Fylkeskommunen har sendt planprogram ut til uttale. Ordføraren vurderer om sak om uttale skal opp til politisk handsaming i Samnanger.

• KVU Hordalandsdiagonalen. Ordføraren har delteke på fleire statusmøte. Prosjektgruppa kjem til Samnanger 12.10.2022, då det blir møte på biblioteket på Bjørkheim kl. 19.00.

• Læring for næring. Samnanger er med i dette KS-nettverket. Ordføraren orienterte kort om status.

• Interkommunal legevakt i Arna. Orientering om status for prosessen med eventuell interkommunal legevakt. Samnanger og Osterøy ventar på utspel frå den nye helsebyråden i Bergen.

Rådmannen orienterer:

Orientering v/rådmann Ove Sæbø:

• Sjukefråværsrapportering til formannskapet. Rådmannen viste til sjukefråværsstatistikken som låg ved møteinnkallinga. Det var ingen merknader frå formannskapet til denne måten å rapportera om sjukefråværet på.

• Status for rettstvistar. Rådmannen orienterte om status for tre rettstvistar som kommunen er part i.

• Næringsutviklarstilling. Kommunen har no lyst ut ei nyoppretta stilling som næringsutviklar.

• Læring for næring. Rådmannen viste til ordføraren si orientering, og kom med litt utfyllande informasjon.

• Organisering statleg del av NAV. NAV Stat vurderer å løysa opp den noverande statlege NAV-regionen som består av Austevoll, Bjørnafjorden og Samnanger. Det er sendt ut drøftingsnotat til tilsette om dette.

• Kontorlokale for NAV Samnanger. Kontorlokala til NAV Samnanger er ikkje funksjonelle i forhold til behovet/gjeldande krav. Det er sett i gang arbeid med planlegging av nødvendige ombyggingstiltak.

• Trusselsituasjon på kommunehuset 15.08.2022. Rådmannen orienterte om arbeidet med oppfølging/evaluering av hendinga. Evalueringsrapport frå hendinga vil truleg bli lagt fram for formannskapet.

• Landstraumanlegg til NOA / Krafla. Kommunen v/rådmann og planleggjar har månadlege statusmøte med utbyggjar. Rådmannen orienterte om at kommunen i samband med den eventuelle utbygginga kanskje bør forespørja utbyggar om støtte/tilrettelegging også på andre område enn det som ligg i planane pr. no.

• Kommunebarometeret 2022. Kommunebarometeret 2022 er no offentleggjort og vil bli presentert i kommunestyret 15.09.2022.

• Planstrategi. Rådmannen viste til kommunestyret sitt vedtak 16.06.2022 om kommunal planstrategi, og orienterte om planlagt oppstartvedtak for nokre av planane.

Orientering v/kommunalsjef samfunnsutvikling Hilde-Lill Våge:

• Nytilsetjingar i sektor for samfunnsutvikling. To nytilsette starta 01.09.2022 (prosjektleiar og spesialkonsulent).

• Turveg til Hagabotnane. Odland Maskin AS har fått kontrakten. Oppstart av arbeidet blir 15.09.2022 og planlagt ferdigstilling er april 2022.

• Ny kommunal omsorgsbustad i Reistadliane 39. Orientering om status. Planlagt ferdigstilling er våren 2023.

• VA-prosjekt Ytre-Tysse. Prosjektet er no ferdig. Byggerekneskap blir utarbeidd og vil bli lagt fram for politisk handsaming så snart som praktisk mogleg.

• Påkoplingar til kommunalt VA-anlegg. Orientering om status/pågåande arbeid.

• Eviny-bygget på Frøland. Det blir møte mellom kommunen og Eviny neste veke.

• Brannstasjon. Orientering om status for arbeidet med planlegging av eventuell ny brannstasjon.

• Trafikksikringsplan. Sak om handlingsprogrammet kjem truleg opp til politisk handsaming i møterunden i oktober.

• Flytesauna på Bjørkheim. Informasjon om at det har kome ønske om flytesauna på Bjørkheim, og at dette kanskje kan realiserast.

• Bubilparkering. Sak om bubilparkering vil koma til politisk handsaming enten i møterunden i oktober eller i økonomiplan-/budsjettsaka i november/desember.

Orientering v/kommunalsjef helse Edith Oma:

• Status og utfordringar i eining for pleie og omsorg. Orientering om mellom anna sommarferieavviklinga, bemanninga i heimehjelpstenesta, innføring av nytt journalsystem, 1995-bygget.

• Status og utfordringar i eining for helse. Orientering om mellom anna legesituasjonen, utlysing av helsesjukepleiarstilling, tilsetjing av ergoterapeut.

• Bemanningssituasjonen i barneverntenesta. Éi av dei faste stillingane er for tida vakant, og det blir leigd inn vikar frå byrå i denne stillinga.

• Legevaktsamarbeidet med Bjørnafjorden. Samnanger ventar på forslag frå Bjørnafjorden til ny legevaktavtale.

Orientering v/kommunalsjef økonomi og organisasjon Karl Viken:

• Økonomirapportering, budsjett 2022 og konsesjonskraft. Orientering om økonomistatus, budsjett 2023 og konsesjonskraft. Det er ønskeleg å ha eit budsjettseminar 20.10.2022, før rådmannen legg fram det endelege budsjett-/økonomiplanframlegget sitt.

• Digihjelpa Samnanger. Kommunen har fått 500 000 kroner i tilskot til dette prosjektet, som startar opp no.

• Straumstøtte til frivillige organisasjonar. Ordninga er vidareført til og med mars 2023, men det er no Lotteritilsynet (ikkje kommunane) som administrerer ordninga.

Orientering v/kommunalsjef oppvekst Bodil H. Øpstebø:

• Status for busetjing og skulegang for flyktningar frå Ukraina. Pr. d.d. har kommunen busett 30 flyktningar frå Ukraina, og 5 til kjem snart til Samnanger. I tillegg har 4 personar kome på familiegjenforeining og ytterlegare 2 er på mottak på vent. 17 vaksne starta på norskopplæring ved Bergen læringssenter no i august.

• SFO og 12 timar gratis opphald for 1. klasse. Utgiftene til denne ordninga i 2022 ser ut til å bli om lag 150 000 kroner høgare enn budsjettert, på grunn av at mange fleire elevar enn tenkt nyttar seg tilbodet.

• Revisjon av SFO-vedtekter. Det vil i haust bli lagt fram sak om revisjon av SFO-vedtektene.

Utvalet sitt kvarter:

Treningstilbod på Bjørkheim i regi av Frisklivsentralen
Lena Tveit (Bl) ønska å rosa treningstilbodet som Frisklivssentralen har på tysdagar på Bjørkheim. Ho informerte også om at det er plass til fleire deltakarar på dette tilbodet.

Rådmannen sitt framlegg vart samrøystes vedteke.

Vedtak

Saka vert oversendt til kommunestyret utan tilråding. Formannskapet ber om at kommunestyret får ei eiga orientering om tiltak 11 i planframlegget.

Behandling

Etter den innleiande diskusjonen i formannskapet, sette Knut Harald Frøland (Bl) fram framlegg om å senda saka over til kommunestyret utan tilråding, og at formannskapet ber om at kommunestyret får ei eiga orientering om tiltak 11 i planframlegget. Framlegget vart vedteke med 8 mot 1 røyst. Martin Haugen (Bl) røysta imot.

Vedtak

Å redusere risiko for mjuke trafikantar på fv. 49 gjennom Samnanger må sidestillast med å redusere risiko for ras for køyretøy på E16.

Samnanger kommune ber om at steinmassar frå nye E16 vert nytta til trafikksikringstiltak på fv. 49, i samsvar med alternativa for optimal bruk av overskotsmassar til trafikksikringstiltak i rapport utforma av Statens vegvesen 19.01.2019.

Samnanger kommune ber om at staten sørgjer for at dei nemnde trafikksikringstiltaka blir finansierte som del av E16-prosjektet.

Samnanger kommune ber om at E16-prosjektet ved oppstart av parsellen Arna-Trengereid nyttar steinmassar til parallell drift av trafikksikringstiltak på fv. 49.

Samnanger kommune vil ta initiativ overfor Vestland fylke med tanke på regulering av areal for trafikksikringstiltak i samsvar med rapport frå Statens vegvesen. Eventuell fordeling av finansiering av reguleringsplan-arbeid vil komme tilbake som eiga sak til kommunestyret.

Behandling

Ordføraren sitt framlegg vart samrøystes vedteke.

Vedtak

Det blir løyvd 300 000 kroner i påskjønning til tilsette i kommunen i samband med koronapandemien. Finansiering er disposisjonsfondet.

Ramme for bruk av midlane skal vera felles velferdsarrangement og/eller motivasjonssamling/fellesopplæring for tilsette.

Midlane skal fordelast mellom sektorane i kommunen etter talet på faste årsverk. Kommunalsjef avgjer i samråd med einings- og avdelingsleiarane, verneombod og plasstillitsvald nærare innhald i arrangement/samlingar. Det er innanfor sektorane rom for å gjera ytterlegare inndelingar på einings- eller avdelingsnivå.

Behandling

Rådmannen sitt framlegg vart samrøystes vedteke.

Vedtak

Ordføraren si godtgjersle blir auka med verknad frå 01.05.2022, med den same prosentsatsen som stortingsrepresentantane si godtgjersle vart auka med 01.05.2022. Dei satsane for godtgjersle for folkevalde i Samnanger som blir rekna ut som ein prosentsats av ordføraren si godtgjersle, blir også auka tilsvarande med verknad frå 01.05.2022.

Som følgje av dette vedtaket, blir det ikkje auke i satsane for godtgjersle for folkevalde i Samnanger 01.01.2023.

Ekstrakostnadene til auke i godtgjersle for folkevalde i perioden 01.05. – 31.12.2022, om lag 100000 kroner inkludert arbeidsgjevaravgift, blir finansierte med midlar frå disposisjonsfondet.

§ 2-2 i Forskrift 12. mars 2020 nr. 3218 om økonomisk godtgjersle, dekking av utgifter m.m. for folkevalde i Samnanger kommune blir med verknad frå 01.10.2022 endra til:

«§ 2-2.Frikjøp og godtgjersle for ordførar

Ordføraren vert frikjøpt i 100 % stilling.

Ordføraren får ei fast årleg godtgjersle på 85 % av stortingsrepresentantane si godtgjersle, runda av oppover til nærmaste heile 100 kroner. Ordførargodtgjersla skal regulerast same dato som stortingsrepresentantane si godtgjersle.

Ordføraren mottek ikkje møtegodtgjersle.»

Vedtaket er gjort med heimel i Lov om kommuner og fylkeskommuner, §§ 8-3 og 8-4.

Behandling

Rådmannen sitt framlegg vart samrøystes vedteke.

Vedtak

Samnanger kommune vedtekå gjennomføra tiltak med budsjettkostnader som vist nedanfor.

Verbalvedtak:

• Carport ved Samnangerheimen kroner 800.000

• Tiltak for Hjartesone og trygg skuleveg rundt Samnanger barneskule og Dråpeslottet barnehage for totalt 3,545 millionar kroner. Tiltaket inkluderer kjeldesortering til 800.000 kroner, der dette vert delfinansiert med tilskot til bl.a. miljøstasjon på kroner 418.000 kroner frå Enova sett av på bunde fond i 2013.

• Utbetring av veg til Hagabotnane, inntil 4,2 millionar kroner

Ekstraløyving:

• Bygdavegen – 2 millionar til asfaltering og utbetring. Mandat til å starte med prosjektering av vegen med fortau og VA-leidningarifrå fylkesvegen til krysset til Heiane / brua ovanfor.

• Nyutløtrævegen – nødvendig opprusting inntil 800.000 kroner

• Raunekleivvegen – reparasjon av utfallenmur og veg inntil 700.000 kroner.

Med unnatak av tilskot frå Enova vert verbalvedtak og ekstraløyving finansiert med ubrukte midlar i 2022. Investeringar inkludert desse tiltaka vert budsjettjustert i 2. tertialrapport til kommunestyret.

Rådmannen vert til handsaminga i kommunestyret 15.09.2022 beden om å finna kostnad for trafikksikringstiltak i Steinslandsvegen.

Behandling

Innleiingsvis orienterte kommunalsjef Hilde-Lill Våge om at summen rådmannen foreslår til utbetring av veg til Hagabotnane er 4,2 millionar kroner.

Øyvind Røen (Sp) sette fram framlegg om følgjande tilleggspunkt til rådmannen sitt framlegg:

• Rådmannen vert til handsaminga i kommunestyret 15.09.2022 beden om å finna kostnad for trafikksikringstiltak i Steinslandsvegen.

Med dette tilleggspunktet vart rådmannen sitt framlegg samrøystes vedteke.

Vedtak

Samnanger kommune vedtek tilstandsrapporten for grunnskule og barnehage i Samnanger 2022 slik han ligg føre.

Behandling

Rådmannen sitt framlegg vart samrøystes vedteke.

Vedtak

Saka vert oversendt til kommunestyret utan tilråding.

Behandling

Etter den innleiande debatten sette Shirin Kvernes Khadoor (Ap) fram framlegg om å lata saka gå vidare til kommunestyret utan tilråding. Framlegget vart vedteke med 8 mot 1 røyst. Øyvind Steinsland (Bl) røysta imot.

Vedtak

Det blir gjort følgjande justeringar i forhold til kommunestyret sitt vedtak 07.04.2022 om lån på kr. 1 000 000 til støtte for automatisert driftsløysing og innreiing/oppgradering av lokale for ny butikk på Tyssekaien:

1. Fristen for oppstart av butikken blir endra til 01.04.2023.

2. Lånet blir gitt til Tysse Landhandel AS.

3. Inntil 100 prosent av lånet kan om nødvendig utbetalast før butikken opnar. Før utbetaling må det vera inngått låneavtale mellom kommunen og Tysse Landhandel AS, ref. punkt 7 i dette vedtaket.

4. Det er frå kommunen si side ønskeleg at butikken har automatisert driftsløysing, men dette er ikkje eit vilkår for lånet dersom ei slik løysing ikkje er økonomisk realiserbar.

5. Dei første to åra (24 månadene) etter opninga av butikken skal lånet vera avdragsfritt.

6. Lånet skal ha same rentesats som den til ei kvar tid gjeldande månadleg flytande renta i Husbanken.

7. Nedbetalingstida på lånet skal vera maksimalt 20 år, og det skal inngåast ein låneavtale med periodisert nedbetalingsplan som er basert på dette.

Det blir gjort følgjande justering i forhold til vedtaket i kommunestyret 07.04.2022 om framlegging av plan for realisering av eventuelt drivstoffanlegg ved Tyssekaien:

1. Plan for realisering av eventuelt drivstoffanlegg ved Tyssekaien skal leggjast fram i kommunestyret seinast i juni 2023.

2. Det skal i saka vurderast minst to alternativ for etablering og drift av drivstoffanlegg ved Tyssekaien.

Det blir gjort følgjande justeringar i forhold til vedtaket i kommunestyret 25.02.2021 om tilskot på kr. 400 000 til oppretting av bygdebutikken:

1. Tilskotsmottakar blir endra frå Samnanger frivilligsentral til Tysse Landhandel AS.

2. Inntil 60 prosent av tilskotet kan ved behov utbetalast før butikken opnar.

Behandling

Odd Arne Haga (Frp) sette fram framlegg om å auka lånesummen til 1,6 millionar kroner, for at løysing med automatisert driftsløysing skal kunne realiserast.

Martin Haugen (Bl) bad om gruppemøte.

Etter gruppemøtet vart det først røysta over endringsframlegget til Odd Arne Haga. Framlegget fall med 8 mot 1 røyst. Odd Arne Haga røysta for framlegget.

Det vart etter dette røysta over rådmannen sitt framlegg. Framlegget vart vedteke med 6 mot 3 røyster.