Møte i Valstyret den 01.12.2020

Behandling

Samrøystes godkjend.

Vedtak

Kommunestyret i Vaksdal kjem med følgjande høyringssvar til utreiinga av NOU 2020:6:

Vaksdal kommune merker seg at vallovutvalet har gjort eit grundig arbeid ved utarbeiding av ny vallov.

Vi støtter fleire av forslaga, og kjem med følgjande merknader, lagt fram knytt til kapitlaeller paragrafar i nytt lovforslag:

§ 2-2 Stemmerett - Vaksdal kommune støttar forslaget om å setja 16 års stemmerett for kommunestyre- og fylkestingsvalet.

§ 2-9 Valkort – Vi viser til Vaksdal kommune sin tidlegare innsendte høyringsuttale med frist 30.09.2020.

§ 3-3 Utelukka frå val - Vaksdal kommune meiner at det er ei fare for at tilliten til det nøytrale embetsverket vert svekka ved å opne for at tilsette i departementet, i diplomatiet og konsulatvesen kan veljast ved eit stortingsval og støttar ikkje vallovutvalet si forslag til endring.

§ 4-5 2) Sentralt stemmestyre - Vaksdal kommune støtter ikkje utvalet sitt forslag om å oppnemne eit sentralt stemmestyre. Det må vere mogleg å sikre uavhengig oppteljing mellom førebels og endeleg oppteljing utan at det vert oppnemnd eit ekstra stemmestyre. Valstyret har ansvar for å vere til stades for å kontrollere at endeleg oppteljing går føre seg på korrekt måte. Teljekorpset kan vere ulike personar, medan ansvaret for å påsjå korrekt oppteljinga sentralt kan ligge til valstyret.

§ 5-2 Antall kandidatar på listeforslaget -Vaksdal kommune støtter ikkje Vallovutvalet sitt forslag til minimumsgrense for dei tre vala og ber departementet vurdere å setje dei noko høgare. Dette med utgangspunkt i fara for at ei liste får fleire mandat enn det er kandidatar oppført på lista.

§ 6-5,2) Stemmegjeving i eigen kommune og ved valting §8-5,3) - Vaksdal kommune ser fordelane med å tilretteleggje for to kryss under kommunestyre- og fylkestingsvalet, men ber departementet om å gjere vurderingar og vekta om denne ekstra kontrollen kan gje nye utfordringar og feilkjelder. Då spesielt knytt til feil ved registrering av kryss, fare for å avgje stemme til same val to gongar, samt om det bør setjast krav til at veljar avgjer stemme til begge vala samtidig.

Kap 9 Elektronisk stemmegjeving – Vaksdal kommune oppmodar departementet om å tilretteleggje for å utvikle teknologiske løysingar for elektronisk stemmegjeving i vallokalet.

§ 9-3 Krav til legitimasjon - Som hovudregel bør alle ha med seg legitimasjon for å sikre korrekt handtering av stemmegjevinga. I dag har dei fleste med seg legitimasjon, men vi veit også at det samtidig er blitt færre alternative ID-kort løysingar. Dersom vi ikkje får på plass eit nasjonalt ID kort til neste val, er det ei viss fare for at fleire møter i vallokalet utan legitimasjon. For stemmemottakarar i små kommunar, der veljarar gjerne reknar med at stemmemottakar kjenner heile namnet, kan dette bli ei unødvendig utfordring. Resultatet kan vere at stemmegjevinga vert registrert på feil person. Derfor bør innhaldet i punkt 2 endrast til på ein slik måte at ein berre unntaksvis skal kunna nytta denne regelen.

§ 9-7 Rett til assistanse – Vi viser til Vaksdal kommune sin tidlegare innsendte høyringsuttale med frist 30.09.2020.

§ 10-4 Prinsipp for oppteljing av stemmesetlar – Vaksdal kommune støttar endringa med at kommunane tel stemmene ved stortingsval og fylkestingsval ein gong, men ber departementet om å vurdere oppteljing av personstemmer i begge oppteljingane.

Forslag til ny lovendring: §10-11 Oversending av materiell – Ved oversending av materiell til fylkeskommunane ved tidlegare val, får kommunane melding frå fylkeskommunen om å sjå bort frå regel om å sortere i retta og uretta setlar. Vaksdal kommune ber departementet om å korrigere lovparagrafen i tråd med gjeldande praksis.

Kapittel 18. Bruk av IKT – Vaksdal kommune støttar forslaget, men er uroa for at sikkerheitskrava sett til IKT utstyret er for kostbare for kommunar med økonomiske begrensingar. Krava må vere nøysame og målt ut frå fleire faktorar enn berre siste versjon av programvare og maskinutstyr. Alternativet at det vert gjeve ei økonomisk tildeling til kommunane/fylkeskommunane for å imøtekoma ei evt. høg standard for IKT sikkerheit.

Vedteken tilleggsforslag frå Valstyret:

§ 5 – 3 Stemmetillegg.
Vaksdal kommune ønskjer å behalde dagens ordning. Det er viktig at partia har stor innflytelse over kven som vert valt inn på vegne av partia.

§ 9 – 4 Endringar stemmesetel
(Sjå § 5 – 3)

§11-1 Valdistrikt ved stortingsval og §11-3 Tal stortingsmandat ved kvart distrikt
Vaksdal kommune ønskjer at det fortsatt skal veljast 169 stortingsrepresentantar og behalde St Sainte-Lagües metode for fordeling av distriktsmandata

§11-8 2. ledd - Fordeling av utjamningsmandat mellom partia ved stortingsval
Vaksdal kommune ber om at sperregrensa vert halde på 4 % utan krav til å stille liste i heile landet. Dette mogleggjer folkeleg engasjement og at særskilte distriktssaker kan få nasjonal merksemd. (Td Aune – lista, Kystpartiet og Steinar Bastesen mfl.)

Behandling

Kjartan Haugsnes, SV, la fram følgjande tilleggsforslag:

Partiet SV støttar innstillinga frå rådmann med følgjande tillegg:

§ 5 – 3 Stemmetillegg.
Vaksdal kommune ønskjer å behalde dagens ordning. Det er viktig at partia har stor innflytelse over kven som vert valt inn på vegne av partia.

§ 9 – 4 Endringar stemmesetel
(Sjå § 5 – 3)

§11-1 Valdistrikt ved stortingsval og §11-3 Tal stortingsmandat ved kvart distrikt
Vaksdal kommune ønskjer at det fortsatt skal veljast 169 stortingsrepresentantar og behalde St Sainte-Lagües metode for fordeling av distriktsmandata

§11-8 2. ledd - Fordeling av utjamningsmandat mellom partia ved stortingsval
Vaksdal kommune ber om at sperregrensa vert halde på 4 % utan krav til å stille liste i heile landet. Dette mogleggjer folkeleg engasjement og at særskilte distriktssaker kan få nasjonal merksemd. (Td Aune – lista, Kystpartiet og Steinar Bastesen mfl.)

Erlend Hesjedal- Johannessen, H, la fram følgjande endringsframlegg:

Høgre støttar innstillinga frå rådmann med følgjande endring:

§2-2 Stemmerett - Vaksdal kommune støttar ikkje forslaget om å setja 16 års stemmerett for kommunestyre- og fylkestingsvalet.

Røysting:

Rådmannen sitt framlegg til vedtak, vart sett opp mot rådmannen sitt framlegg til vedtak, inkludert Høgre sitt endringsframlegg.

Rådmannens sitt framlegg til vedtak fekk 4 stemmer (Hege Eide Vik, Sp, Kjartan Haugsnes, SV, Thor Andersen, Ap og Ståle Hesjedal, Ap) og vart vedteke.

Høgre sitt endringsframlegg fekk 3 stemmer, Erlend Hesjedal-Johannessen, H, Trond Olav Magnussen, H og Boris Groth, Frp) og falt.

Tilleggsforslaget frå SV vart samrøystes vedteke.