Møte i Utval for Areal, plan og miljø - styringsgrupper den 16.09.2020

Vedtak

Styringsgruppa for områdeplan Midtmarka og Rotemyra ber rådmannen leggje fram ei politisk sak med føremål om å avklare vidare prosess for arbeidet med områdeplanen. Saka blir lagt fram for areal, plan og miljø (APM) og kommunestyret i oktober 2020.

Behandling

Rådgjevar Plan og analyse, Marte Eriksrud orienterte om status for planprosessen og innkomne private og offentlege merknader og motsegner, og om dialogmøte med regionale styresmakter.

Utval for areal, plan og miljø vedtok rådmannen sitt framlegg til vedtak.

Vedtak

Utval for areal, plan og miljø vil oppretthalda vedtak som er gjort i Meland kommune om offentleg formål.

Behandling

Rådgjevar plan Merethe Tvedt orienterte i saka, og Tvedt og leiar for arealforvaltning Siril Sylta svara på spørsmål.

Jogeir Romarheim (KRF) ba om gruppemøte.

Utvalet kjem med følgjande styringssignal i det vidare planarbeidet:
Utvalet støttar vedtak som er gjort i tidlegare Meland kommune i saka med omsyn til offentleg formål.

Seks medlemmar røysta for dette framlegget. Leif Taule (SP) vil at området vert lagt som bustadformål med detaljregulering, og støtta rådmannen sitt framlegg.

Vedtak

Saka vert teke til orientering.

Behandling

Rådgjevar Plan og analyse Marte Eriksrud gav ei kort orientering om planarbeidet med E39 Flatøy-Eikefettunnelen. Ho informerte om at alle fire M-strekningar blir tatt med vidare til konsekvensugreiing.

Prosjektleiar Line Thuen Waage orienterte om medverknads-prosessen i kommuneplanen - samfunnsdelen. Medverknadsprosessen skal pågå hausten 2020 og skal danna grunnlag for arbeidet med samfunnsdelen i kommuneplanen og andre sentrale planar.

Rådgjevar Plan og analyse Trude Langedal orienterte om status for områdeplan Ostereidet. Ho informerte om at Statens vegvesen ikkje har trekt motsegna mot ulike element i planframlegget.

Rådgjevar Trude Langedal gav ei kort orientering om innkomne innspel til reguleringsplan for reinseanlegg og robuste bustader i Knarvik, om universell utforma møteplass i Kvassneset i Knarvik, og om Mulegheitsstudie for region-, lokal- og nærsenter i Alver.

Høyring - strandsone-forvaltning:
Utvalet handsama høyring om forslag til reviderte statlege planretningslinjer for differensiert forvaltning av strandsona langs sjø.

Ingrid Fjeldsbø (H) sette fram følgjande framlegg til høyringsuttale:
1. Areal, plan og miljø i Alver Kommune meiner at heile kommunen bør liggje i sone 3. Alver kommune er ein ny kommune som er slått saman av tre kommunar, Lindås, Meland og Radøy. Dei tidlegare kommunane har lange tradisjonar med å ferdast på sjøen og gjere bruk av strand og kystsona. Dette har bygd opp ein kystkultur og næringsaktivitetar der bruk av strandsona har vore nødvendug og ein viktig ressurs. Ei berekraftig forvaltning av strandsona har difor vore og vil fortsatt verta viktig i nye Alver kommune for å sikre både ivaretaking av kystkulturtradisjonar, næringverksamheit, samt sikre ålmeinta sin tilgang til, og bruk av strandsona til fritid og rekreasjon.

2. Det er stor skildnad på arealpresset i Alver og sentrale strok som Bergen, Oslo og Oslofjorden. Også innad i Alver vil det vera store ulikheiter gjeldande press på og bruk av strandsona. I samband med kommuneplanarbeidet må det difor gjerast eit kunnskapsbasert kartleggingsarbeid for å fastsetje greser innad i kommunen. Ein del av kystlinja vil vera utilgjengeleg for bygging grunna typografiske forhold, men vil likavel vera tilgjengeleg for ålmeinta.

3. Som ein ny stor kommune vil Alver kommune inneha kompetanse nok til å ivareta alle naudsynte hensyn det inneber ved at kommunen er i sone 3. I tillegg vil ein ha god kontakt og samarbeid med fylkesmannembetet i denne type saker og planarbeid.

4. Det er positivt at dei nye retningslinjene har fått ein kortare og enklare ytforming, og det er betre systematisert med tydelege overskrifter som gjer det enklare å finna fram og gjere bruk av dokumentet.

Politisk struktur og reglement

Utval for areal tok meldingar og orienteringar til orientering, med tillegg av det som kom fram i møtet.