Møte i Administrasjonsutval den 05.12.2019

Vedtak

Innkalling og saksliste er godkjent.

Behandling

Ingen merknader, samrøystes.

Vedtak

Møteprotokollen er godkjent.

Behandling

Ingen merknader, samrøystes.

Vedtak

«Administrasjonsutvalet godkjenner Arbeidsgjevarstrategien slik dokumentet ligg føre i saka»

Administrasjonsutvalet vil

• utarbeide ein strategi for heiltidskultur

• ha fokus på sjukefråveret (jamnlege rapporter)

Behandling

Orientering ved personalrådgjevar Kathrine S.Brakstad

Framlegg om tillegg til rådmannen sitt framlegg frå AP, H og SP ved Ø.Oddekalv-AP:

Administrasjonsutvalet vil

• utarbeide ein strategi for heiltidskultur

• ha fokus på sjukefråveret (jamnlege rapporter)

Framlegget med tillegg vart samrøystes vedteke.

Vedtak

Økonomiplan 2020-2023 er teke til orientering.

Behandling

Orientering ved økonomisjef Janne Sund

Uttale frå utdanningsforbundet og uttale SFO frå HTV'ane vert lagt ved saka.

UTTALE TIL BUDSJETT OG ØKONOMIPLAN FRÅ UTDANNINGSFORBUNDET ALVER

Utdanningsforbundet Alver er særs nøgd med at alle dei politiske partia i sine valprogram for dei neste fire åra har uttalt at dei vil prioritere born og unge sine oppvekstvilkår. Dei fleste har òg sagt noko om at barna skal ha gode barnehagar og skular. For å få dette til, treng vi ikkje berre gode barnehage- og skulebygg, men òg eit godt innhald. Den beste garantien for godt innhald er det å ha tilstrekkeleg med godt kvalifiserte tilsette. Når rådmannen sitt framlegg til budsjett og økonomiplan inneheld nedskjeringar på talet på tilsette både innan barnehage, skule og PPT, så harmonerer det dårleg med at vi skal ha barnehagar og skular med god kvalitet. Utdanningsforbundet Alver er kritisk til at rådmannen sitt framlegg i liten grad gjev eit dekkande bilete på konsekvensane av kuttforslaga, og har difor følgjande uttale:

Barnehage:

For barnehage er det foreslått å fjerne 2,7 årsverk som barnehagane i Radøy fekk tilført i 2016 for å sikre bemanninga på avdelingane når pedagogane har si avtalefesta planleggingstid. I tillegg foreslår rådmannen å redusere med 0,7 årsverk til styrkingstiltak. Rådmannen har grunngjeve begge desse kutta med «harmonisering», og ikkje skrive noko om konsekvensane med desse kutta.

Ressursnivået i årevis vore veldig lågt i barnehagane våre. Staten har minstesatsar for kor mykje kommunen er nøydd til å bruke på barnehagane dersom kommunen berre har private barnehagar. Både i Meland og Lindås vert barnehagane drive med 10-13% lågare ressursnivå enn Staten sine satsar (ut frå Staten sine satsar for 2020 og kva desse to kommunane har rekna ut at dei skal gje i overføringar per barn i dei private barnehagane for 2020). For barnehagane i Radøy har vi blitt fortalt at ressursnivået er om lag likt Staten sine satsar, utan at vi har fått talfesta dette. Utsegn frå rådmannen om at dei aller fleste kommunar driv billigare enn Staten sine satsar kan gje inntrykk av at dette er ganske udramatisk. Dette er Utdanningsforbundet Alver heilt ueinig i.

I budsjettet legg rådmannen opp til at ressursnivået i barnehagane i Radøy skal senkast til det låge nivået i dei to andre kommunane. Utdanningsforbundet Alver sit på informasjon om til dels dramatiske tilstandar i barnehagane våre. Her kan nemnast:

1. Lang opningstid gjer at bemanninga mesteparten av dagen er langt lågare enn bemanningsnorma og pedagognorma gjev inntrykk av. Vi har fått forteljingar om ungar ned i under eitt-årsalderen som om morgonen sit åleine når den einaste som er på jobb står i døra for å ta imot fleire ungar som blir leverte. Vi høyrer at det ikkje er uvanleg at to til tre vaksne har ansvar for å passe på og følgje opp 40-50 barn når dei skal leike utandørs. Etter planen skulle det gjerne ha vore minst fire vaksne ute, men vanskeleg vikarsituasjon ved sjukdom og anna fråvere er ei stor utfordring, og stadig må èin vaksen inn for å skifte bleie eller plastre eit sår.

2. Utdanningsforbundet Lindås gjennomførte i mars 2019 ei undersøking om arbeidstid blant pedagogane i dei kommunale barnehagane i Lindås. Det kom då fram at om lag halvparten av pedagogane si planleggingstid fall vekk på grunn av at pedagogane vurderte bemanninga på avdelinga si som så låg at det ikkje var forsvarleg å forlate avdelinga. Mesteparten av denne planleggingstida fekk dei aldri tilbake på eit seinare tidspunkt. Konsekvensar av dette er manglande eller dårleg planlegging av aktivitetar, foreldremøte og foreldresamtalar, dårlegare rettleiing av assistentar og fagarbeidarar, dårlegare tilrettelegging for barn med særskilte behov, og at det ikkje er mogleg å følgje opp Rammeplanen for barnehage samt ulike statlege og kommunale satsingsområde (t.d. knytt til tidleg innsats, trygt og godt barnehagemiljø, inkludering og mobbereduksjon).

3. Barnehagane er blant dei arbeidsplassane med høgast sjukefråvere, og det er dokumentert at ein god del av dette sjukefråveret er arbeidsrelatert. Dei tilsette er, naturleg nok, mykje utsett for smittefare ved influensa og omgangssjuke. I tillegg til dette er kvardagen til dei tilsette prega av stress og kjensle av ikkje å strekke til. Store emosjonelle belastningar fører til langtids sjukefråvere og at tilsette sluttar i jobben. Ytterlegare kutt i bemanninga vil gjere det enno vanskelegare å få ned sjukefråveret. Desse faktorane er årsaka til at barnehagane er eitt at dei særskilte satsingsområda til IA. Det kan nemnast at barnehagar i mellom anna Stavanger og Trondheim no bemannast opp, då forsøk dei siste par åra har vist at dette, i tillegg til auka kvalitet, har bidrege til stor reduksjon i sjukefråveret.

4. Reduksjon i styrkingstiltak i form av reduksjon i vedtak betyr at barn med oppfølgings- og tilretteleggingsbehov må greie seg med dei allereie knappe ressursane som finst innanfor det ordinære. Det gjer det vanskelegare å knyte til seg riktig kompetanse for å ivareta desse barna, vil auke belastninga på dei tilsette ytterlegare, og vil i siste instans gå ut over alle barna.

Tilstrekkeleg bemanning og godt kvalifisert bemanning er særs viktig for tryggleik og kvalitet. Jo lenger opningstida er, og jo mindre det er regulert ei maksimaltid for barna i barnehagen, jo tynnare må ei allereie låg bemanning spreiast ut over arbeidsdagen. Det er no ute på høyring framlegg til vedtekter for dei kommunale barnehagane i Alver. Der er det foreslått at alle barnehagane i utgangspunktet skal ha opningstid frå kl.7.00 til 17.00 kvar dag. Det vil seie at barnehagar som i dag er opne til 16.30 skal auke opningstida. I dag er det ei maksimaltid for barnehagebarna i Lindås og Radøy på 9 timar for dagen. I Meland har dei fjerna maksimaltida. I framlegget til vedtekter er ikkje maksimaltid nemnt, noko som betyr at alle barna i prinsippet kan vere i barnehagane 10 timar kvar einaste dag. Vedtektene sånn som dei ligg føre, harmonerer ikkje med at ein skal kutte i bemanninga.

Utdanningsforbundet sentralt har eit vedtak om å jobbe for at bemanningsnorma og pedagognorma skal vere oppfylt i heile opningstida, inkludert ved sjukefråvere. Vi i Utdanningsforbundet Alver forstår at dette ikkje vil vere mogleg å oppfylle utan at det kjem store øyremerkte ekstramiddel frå Staten. I denne omgang bed vi kommunestyret om å stanse kuttforslaga innan barnehage, og om å auke opp bemanninga i barnehagane i Lindås og Meland tilsvarande det dei har i Radøy som kompensasjon for pedagogane si planleggingstid.

Skule:

Det er for grunnskulane lagt fram frå rådmannen eit forslag om å kutte 12 lærarårsverk. Dette er kutt som skal kome på toppen av kutt som allereie er gjennomførte dei siste åra, og det samstundes som at det er forventa ei elevtalsauke òg dei komande åra. Desse kutta vil i særleg rad gå ut over dei elevane som i størst grad har behov for særskilt tilrettelegging, noko som rådmannen òg har notert som ein konsekvens. Kutta betyr òg at Tidleg innsats-satsinga i stor grad må leggjast til sides.

Stadig aukande krav til dokumentasjon og oppfølging av skulemiljø og læringsmiljø, samt innføring av nye læreplanar/fagplanar og ei skuleeigar sine uttalte ønskje om utstrakt digitalisering i løpet av dei neste få åra, betyr ei stor ekstra arbeidsbelastning på dei tilsette. Om ein samstundes skal redusere med eit tosifra tal lærarårsverk, vil det vere nær umogleg å lukkast med alle dei pålagte satsingane. Skuleeigar har i tillegg til alt dette uttalte mål om betring av elevane sine faglege resultat, auka trivsel og reduksjon av mobbing.

Utdanningsforbundet Alver ønskjer å utfordre skuleeigar til å forklare for kommunestyret korleis det skal vere mogleg for dei tilsette i skulane å nå alle dei oppsette krava og måla med ein såpass stor reduksjon av lærarårsverk. Tidlegare har rådmannen argumentert for kutt av lærarårsverk i Lindås med at Lindås hadde eit høgt ressursnivå i høve til samanliknbare kommunar. Utdanningsforbundet har då påpeikt at ressursnivået har vore knytt til ei ønskt desentralisert skulestruktur, samt at vi i større grad enn mange andre kommunar har kostnadar knytt til språkdeling av klassar (bokmål/nynorsk). Når vi har gått inn i GSI-tala og samanlikna skule for skule med tilsvarande skular (storleik og skuleslag) i andre kommunar, kan vi vise til at vi ikkje ligg høgt i ressursbruk. Truleg ligg ressursbruken då under snittet, ut frå dei samanlikningane som vart gjort for to år sidan.

Det er eit uttalt mål om å redusere andelen av spesialundervisning, og at ein større del av elevane med særskilte behov skal kunne ivaretakast innanfor det ordinære. Dette kan Utdanningsforbundet ha forståing for, ut frå at andelen med spesialundervisning er høg i alle våre tre noverande kommunar, men vi meiner at dette ikkje er mogleg om ein samstundes skal redusere lærarårsverka innan den ordinære undervisninga.

Når det gjeld SFO, så har alle fagorganisasjonane for tilsette innan grunnskule kome med innspel knytt til bemanning. I utgangspunktet var dette innspelet meint å vere eit høyringsinnspel til vedtekter for SFO for Alver kommune, men det er òg relevant å ta med som eit innspel i budsjettprosessen, då det dreier seg om ressursar. Dette vil bli lagt ved som eit eige innspel.

PPT:

Rådmannen legg fram forslag om reduksjon på 1,3 årsverk innan PPT, med skisserte konsekvensar at det vil bli auka ventetid som følgje av redusert kapasitet til testing og sakshandsaming. Utdanningsforbundet vil peike på at rådmannen i samband med kutt i lærarårsverk i grunnskulen nemnar som ein konsekvens at PPT må vere tettare på grunnskulane. I tillegg legg rådmannen opp til å overføre familierettleiinga for foreldra til dei minste barna (knytt til DUÅ-programmet, Dei Utrulege Åra) frå helsestasjonane til PPT.

Vi er heldige som har fantastisk dyktige tilsette ved PPT, men ut frå at dei skal redusere bemanninga samstundes med at dei får ei auke i oppgåver, er det vanskeleg å sjå at det er mogleg å oppretthalde den gode kvaliteten som tenesta har hatt gjennom mange år.

Utdanningsforbundet Alver oppmodar kommunestyret om å syte for at barnehagane, skulane og PPT har eit ressursnivå som står i stil med alle arbeidsoppgåvene som skal løysast. Om ein meiner noko med at ein skal prioritere barn og unge si læring, trivsel og utvikling, så må det òg sjåast igjen i ressursbruken. All statistikk viser at det er særs kostbart for samfunnet at mange som følgje av mangelfull oppfølging både i heim, barnehage og skule ramlar ut av vidaregåande opplæring og utanfor arbeidslivet seinare i livet.

For Utdanningsforbundet Alver

Jarle Næss, hovudtillitsvald

INNSPEL TIL RETNINGSLINER FOR SFO I ALVER KOMMUNE

Vi har i lang tid sett til dels store utfordringar knytt til SFO-bemanninga i kommunane våre. Vi har fleire døme på at tilhøva har vore så krevjande at det har vore naudsynt å setje inn krisetiltak. Særskilt er utfordringa stor når det gjeld å ta godt vare på barn med særskilte behov. Når det med ein del av desse elevane ikkje følgjer med ekstra ressursar til bemanning, står dei tilsette i ein umogleg situasjon. Om dei følgjer opp barnet med særskilte behov, så får dei ikkje følgt opp resten av barnegruppa, og omvendt. Barna har det ikkje bra nok, og dei tilsette kjenner seg utilstrekkelege. Det er ikkje tilfeldig at SFO-tilsette jamt over ligg i toppen når det gjeld høgt sjukefråvere, og at ein del søkjer seg ned i stillingsprosent.

Stockholms Universitet og NTNU Samfunnsforskning har hatt i oppdrag å gjennomføre ei nasjonal evaluering av skulefritidsordninga i Noreg. I rapporten «Lek, læring og ikkje-pedagogikk for alle» kjem det tydeleg fram at dei utfordringane vi ser lokalt hos oss, òg er utfordringar som gjeld nasjonalt.

Vi bed om at det for SFO i Alver kommune blir laga retningsliner som betre sikrar ei forsvarleg bemanning enn det som er tilfelle i dag. SFO må for dei tilsette vere ein helsefremjande arbeidsplass, og ikkje helseskadeleg, og SFO må vere ein god plass å vere for alle barn, anten dei har særskilte behov eller ikkje. Difor ønskjer vi at følgjande avsnitt blir innarbeidd i ei ny retningsline:

For elevar som får ekstra ressursar i skuletida med bakgrunn i ikkje-skulefaglege utfordringar, t.d. fysiske eller psykiske utfordringar eller utagering, må det òg setjast inn ekstra ressursar i SFO-tida. Dette må gjelde både for dei barna som har tildelt ressursar eller sakkunnig vurdering og vedtak, og for dei barna der skulen sjølv set inn ekstra ressursar i ein overgangsfase i påvente av vedtak.

Når det gjeld grunnbemanninga for SFO, så ser vi at Radøy i dagens retningsliner maksimalt 12 barn pr. tilsett, Lindås 15 barn pr. tilsett, og Meland 16 barn pr. tilsett. Vi ønskjer at talet for Alver kommune ikkje overstig 15 barn pr. tilsett, men heller blir lågare.

Med helsing

Solveig Laumark-Møller, HTV Fagforbundet Alver (Lindås)

Anita Dale, HTV Fagforbundet Alver (Meland)

Rosalind Instebø, HTV Fagforbundet Alver (Radøy)

Jarle Næss, HTV Utdanningsforbundet Alver (Lindås)

Adolf Hovgaard, HTV Utdanningsforbundet Alver (Meland)

Hilde B Hugaas, HTV Skolelederforbundet Meland

Anders Olav Dale, HTV Skolelederforbundet Lindås

Framlegg om at saka vert teke til orientering.

Framlegget vart samrøystes vedteke.