Čoahkkin Kommunestyret 09.11.2017

Vedtak

Innkalling og sakliste vert godkjent

Behandling

Samrøystes vedteke

Vedtak

Møtebok vert godkjend slik ho ligg føre

Behandling

Samrøystes vedteke

Vedtak

Sakene vert tekne til orientering

Behandling

Kristin Nåmdal stilte spørsmål om ordførar på vegne av kommunestyret kan gje tilbakemelding om dårleg kvalitet på utført asfaltarbeid og manglande asfaltering. Ordførar orienterte kort om kontakten han har med Statens vegvesen, og at dei av økonomiske årsaker prioriterer det som absolutt må utbetrast og ikkje alt som bør asfalterast. Ordførar vil på vegne av kommunestyret sende ei tilbakemelding til Hordaland fylkeskommune, med vedlagte bilete som viser behovet for meir og betre asfaltering.

Kristin Nåmdal stilte spørsmål om eventuelle økonomiske konsekvensar for Modalen dersom dei føreslåtte endringane i Statsbudsjettet om eigedomsskatt for verk og bruk vert vedteke. Ordførar orienterte om at forslaget først og fremst inneber å fjerne eigedomsskatt på produksjonutstyr og ikkje på bygning og tomt. Forslaget omfattar ikkje vannkraft- og vindkraftanlegg, men det er foreslått å fjerne eigedomsskatt på kraftledningar og tilhøyrande nettanlegg. For Modalen vil dette forslaget medføre omlag 600 000 kr i redusert inntekt på eigedomsskatt, med ein overgangsperiode på 5 år

Vedtak

Modalen kommune har eit interkommunalt samarbeid med Lindås og Meland på brann og redning. Modalen kommune ynskjer ikkje å bli medlem i Vest brann- og redningsregion på noverande tidspunkt.

Behandling

Ordførar orienterte om den siste utviklinga i denne saka, med hovudvekt på at Lindås kommunestyre i sitt møte 2. nov gjorde vedtak om å ikkje bli medlem i Vest brann- og redningsregion. Med bakgrunn i dette tilrådde ordføraren at heller ikkje Modalen vert medlem i Vest brann- og redningsregion, då Modalen er ein del av eit interkommunalt samarbeid i Lindås, Meland og Modalen brannvesen.

Ordføraren kom med framlegg om å gjere følgjande vedtak: "Modalen kommune har eit samarbeid med Lindås og Meland på brannvern. Modalen kommune vel å følgje Lindås si avgjerd, og vil ikkje bli medlem i Vest brann- og redningsregion."

Kjetil Eikefet kom med framlegg om å bruke ordlyden i pkt 1 i vedtaket til Lindås kommunestyre:"Modalen kommune ynskjer ikkje å bli medlem i Vest brann- og redningsregion. Kommunestyret ser ikkje at samarbeidet tilfører noko nytt som ikkje allereie er sikra gjennom eksisterande samarbeid."

Kristin Nåmdal kom med framlegg om å gjere følgjande vedtak: "Modalen kommune har eit interkommunalt samarbeid med Lindås og Meland på brann og redning. Modalen kommune ynskjer ikkje å bli medlem i Vest brann- og redningsregion på noverande tidspunkt."

Etter diskusjonen om dei ulike framlegga, vart Kristin Nåmdal sitt framlegg lagt fram til avrøysting, og vart samrøystes vedteke.

Vedtak

Fellesrådet i Mo sokn sitt framlegg om regulering av feste- og gravferdsavgiftene for grav vert godkjent slik det ligg føre

Behandling

Rådmannen orienterte kort om innhaldet og bakgrunnen for regulering av avgiftene

Samrøystes vedteke

Vedtak

Økonomirapport pr 2. tertial vert teken til orientering.

Det vert vedteke slik justering:

Endring i driftsbudsjettet:

Løyving til innkjøp av ny heis, jfr F-sak 030/2017 kr 92 500 finansiert med dekning frå disposisjonsfond.

Behandling

Økonomisjef gjekk gjennom økonomistatus pr 31. aug 2017 og forslag i Statsbudsjettet for 2018 til endringar i eigedomsskatt for verk og bruk.

Rådmannen gjekk gjennom budsjettprosessen og utfordringar knytta til redusert eigedomsskatt i 2018 og åra framover. Rådmannen orienterte om rammer og føresetnader frå statsbudsjettet for budsjettet for 2018 og økonomiplan for 2018 - 2021. Dei frie inntektene for 2018 vil utgjere ca 45,3 mill, noko som er ein auke frå 2017 på 2,3%. Gjennomsnittleg løns- og prisvekst for 2018 er berekna til 2,6 %. Eigedomsskatten vil bli redusert frå 19,4 mill i 2017 til ca 15,8 mill i 2018, noko som gjev ein reduksjon på ca 3,6 mill. Den totale økonomiske ramma kommunen har til disposisjon for 2018 vil såleis vere redusert med ca 3,6 mill i forhold til 2017. Budsjettframlegga frå tenesteleiarane viser ein auke på ca 5 mill i forhold til budsjettet for 2017. Det er såleis eit gap på ca 8,6 mill som må salderast for å kome i hamn med neste års budsjett. Administrasjonen tek dette arbeidet vidare i samarbeid med leiargruppa.

Samrøystes vedteke