Čoahkkin Plan- og kommunalteknisk utval 26.04.2023

Vedtak

Innkalling og sakliste vert godkjent.

Behandling

Øyvind Litland varsla spørsmål til slutten av møte som gjeld deponi på Hartveit.

Kjellaug Hartveit varsla spørsmål som gjeld kvotefri jakt på hjortekalv 2023.

Alf Terje Mortensen varsla to spørsmål, status på skogsveg Hartveit - Hovden og status på søknad om landsbruksveg på Tyssebotn.

Aksel Mjøs varsla innsendt spørsmål om status på redusert fartsgrense Hosanger.

-------------------------

Det var elles ingen merknader til innkalling og saksliste.

Vedtak

Møteprotokoll frå 15.03.23 vert godkjend.

Behandling

Det var ingen merknader til møteboka.

Vedtak

Melding om delegerte vedtak vert teken til vitande.

Behandling

DS 079/23 - 105/4 - Søknad om konsesjon ved overtaking av fast eigedom.

Spørsmål frå Kjellaug Hartveit, SP: Kvifor er ikkje buplikten nevnt i vedtaket?

Viser til informasjon frå Siren Tømmerbakke, Statsforvaltaren i Vestland, informasjon om buplikt og korleis forvalte det.

Plan- og kommunalteknisk utval oppfordrar til at buplikt vert tatt med i vedtaket i framtidige, liknande saker slik det framkjem av saksutgreiinga i denne saka.

DS 074/23 - 44/6 Vevle - Gjeld bruksendring av del av driftsbygning til barnehage og oppføring av leikehus/lavvo.

Spørsmål frå Kari Mjøs, KRF: Kva er status i saka, fristen er sett til 28.04.23.

Utvalet ynskjer oppdatering om saka i neste møte.

-------------------------

Det var elles ingen merknader til dei delegerte sakene.

Vedtak

Kommunen gjev dispensasjon til 1. mai 2025 frå plan- og bygningslova §§ 11-6 og 11-7 nr. 5 bokstav a til oppføring av lagerbygning for lagring av strøsand og -salt på gnr. 8 bnr. 1, jf. plan- og bygningslova § 19-2.

Grunngjeving: Omsyna bak regelen det er søkt om dispensasjon i frå og omsyna i føremålsreglane i lova vert tilsidesett.Etter ei samla vurdering er fordelen med å gje dispensasjon større enn ulempen.Saka gjeld ein lagerhall som er oppført som ein mellombels bygning med betongdekke, ringmur i betongklosser og med ein «rubb-hall» oppå. Garden har per i dag drift med grovforproduksjon, og melkekvoten er for tida utleigd til eit anna bruk etter at driftsbygningen brann ned for ein del år sidan. Garden har i mange år hatt vintervedlikehald som tilleggsinntekt. Der vert og traktorane som garden disponerer nytta til vinterdrifta. Hallen som saka gjeld vert nytta til innandørs lagring av salt for bruk på vegane på Osterøy. Hallen har vore nytta til saltlager heile tida, og dette var og føremålet ved opprinneleg søknad i si tid.

Det vert vurdert som samfunnsnyttig å gje eit fornya løyve til bygget. Det er trong for eit eigna lokale til å ha saltlagring i kommunen, og arealet denne hallen er oppført på er ikkje i tilknyting til vassdrag med heilårsvassføring. Området er opparbeidd på ein slik måte at dersom trongen for hallen fell vekk vil området enkelt kunne tilbakeførast.

Det vert føyd til at areal som var påpeika omdisponert i uttale, er ikkje omdisponert. Området er under oppattdyrking med drenerande masser, og er under synfaringa i ferd med å verte ferdigstilt for attsåing. 

Behandling

Framlegg til vedtak: Alf Terje Mortensen FRP:
Kommunen gjev dispensasjon til 1. mai 2025 frå plan- og bygningslova §§ 11-6 og 11-7 nr. 5 bokstav a til oppføring av lagerbygning for lagring av strøsand og -salt på gnr. 8 bnr. 1, jf. plan- og bygningslova § 19-2.

Grunngjeving: Omsyna bak regelen det er søkt om dispensasjon i frå og omsyna i føremålsreglane i lova vert tilsidesett.
Etter ei samla vurdering er fordelen med å gje dispensasjon større enn ulempen.
Saka gjeld ein lagerhall som er oppført som ein mellombels bygning med betongdekke, ringmur i betongklosser og med ein «rubb-hall» oppå.

Det vert vurdert som samfunnsnyttig å gje eit fornya løyve til bygget. Det er trong for eit eigna lokale til å ha saltlagring i kommunen, og arealet denne hallen er oppført på er ikkje i tilknyting til vassdrag med heilårsvassføring. Området er opparbeidd på ein slik måte at dersom trongen for hallen fell vekk vil området enkelt kunne tilbakeførast.

Det vert føyd til at areal som var påpeika omdisponert i uttale, er ikkje omdisponert. Området er under oppattdyrking med drenerande masser, og er under synfaringa i ferd med å verte ferdigstilt for attsåing. 

AVRØYSTING:
Alf Terje Mortensen FRP, sitt framlegg vert samrøystes vedteke.

Vedtak

Saka vert utsett til neste møte 24.05.23 grunna synfaring.

Behandling

Nytt forslag frå Aksel Mjøs, H:

Kommunen gjev dispensasjon frå arealføremålet LNF-område og plankravet i kommuneplanføresegn punkt 1.2, jf. plan- og bygningslova §§ 11-6, 11-7 nr. 5 bokstav a og 11-9 nr. 1, til etablering og bygging av ny barnehage på gnr. 135 bnr. 1, jf. plan- og bygningslova § 19-2.

Grunngjeving:
Det er til fordel for samfunnet at det vert gjeve dispensasjon.

Valestrandsbygda veks grunna tilflytting, fortetting og nye byggefelt, og har i lengre tid hatt behov for ein meir moderne barnehage med større kapasitet enn den kommunen driv i dag.

Rådmannen fekk hausten 2018 i oppdrag av formannskapet å gjera eit utvida tomtesøk i Valestrandsområdet for å finna høvelege lokalitetar til ein ny 4/6 avd. barnehage. Norconsult sin rapport av 12. mars 2019 var ei grundig undersøking av egna tomter mellom Valestrand og Hauge. Formannskapet fatta i møte 20. mars 2019 følgjande vedtak i sak 015/19:
«Alternativ Rundhovde 1 vert vald som tomt for ny barnehage på Valestrand. Rådmannen får i oppdrag å erverva ein tomt som tek høgde for eventuell utviding av anlegget, for eksempel 10 mål. Dersom priskravet for tomten vert urimeleg i høve til marknadspris, kjem rådmannen attende til formannskapet med saka.»

Tomta 135/1 ligg inntil nordre del av Runnhovdefeltet, plan ID 12532015005, og bygging av barnehage her må sjåast på som ei naturleg utvidig av bustadområdet. Det er derfor ikkje nødvendig å måtte handsama denne reguleringsendringa i prosessen med Kommuneplanen sin arealdel som enno vert førebudd av administrasjonen.

I sak 091/22 om «Barnehagebruksplanen 2021-2030» vedtok heradsstyret i møte 19. oktober 2022 mellom anna følgjande kulepunkt:
«- Heradsstyret gjev løyve til bygging og opning av ny, privat barnehage med fire avdelingar på Rundhovde.
- Valestrand barnehage vert lagd ned når ny barnehage står klar på Rundhovde.»

Det er god og trafikksikker veg opp til Runnhovdefeltet med fortau heilt frå sentrum. Det er kort avstand til Eidefeltet og god tilkomst for andre delar av bygda. Plasseringa er både sentral for innbyggjarane og nær naturen for barna. For samfunnet er det derfor til stor nytte at det kjem barnehage på Runnhovde.

-------------------------------------

Øyvind Litland AP, sette slikt framlegg: saka vert utsett for synfaring.

Aksel Mjøs, oppfordring til administrasjonen om å kome med eit alterntivt vedtak. Eit alternativ som tar hensyn til heradsstyret sitt vedtak og innstillinga slik den ligg.

AVRØYSTING utsetting:
Utsettingsframlegget vart samrøystes vedtede.

Vedtak

"Kommunen gjev ikkje dispensasjon frå områderegulering Lonevåg føresegn 1.61, jf. plan- og bygningslova §§ 12-4 og 12-7 nr. 2 til oppføring av bustadblokk på gnr. 14 bnr. 293 i strid med regulert byggjegrense, jf. plan- og bygningslova § 19-2."

Grunngjeving:

Omsyna bak regelen det er søkt om dispensasjon i frå og omsyna i føremålsreglane i lova vert vesentleg tilsidesett.
Etter ei samla vurdering er ulempene med å gje dispensasjon større enn fordelen.
Sjå i tillegg rådmannen si vurdering.

Behandling

AVRØYSTING:
Rådmannen sitt framlegg vert vedteke med 4 røyster mot 1 røyst (FRP)

Vedtak

Kommunen gjev dispensasjon frå områdeplan Lonevåg jf. plan- og bygningslova §§ 12-4 og 12-7 til oppføring av rekkehus med 3 bustadeiningar på gnr. 14 bnr. 353, jf. plan- og bygningslova § 19-2. Reguleringsreglane for konsentrerte småhus skal vere gjeldande for tomta.

Det vert vidare gjeve dispensasjon frå plan- og bygningslova § 29-4, 1. ledd til oppføring av bustadbygg med maksimum gesimshøgd 9,0 meter, jf. forskrift om tekniske krav til byggverk § 6-2, 1. ledd, jf. plan- og bygningslova § 19-2.

Grunngjeving:
Omsyna bak regelen det er søkt om dispensasjon i frå og omsyna i føremålsreglane i lova vert ikkje vesentleg tilsidesett.
Etter ei samla vurdering er fordelen med å gje dispensasjon klårt større enn ulempene.
Det er i tillegg føremålstenleg å gje dispensasjon til tiltaket.
Sjå i tillegg rådmannen si vurdering.

Behandling

AVRØYSTING:
Samrøystes vedteke

Vedtak

Osterøy kommune vedtek detaljregulering Haus sentrum sør – PlanID 46302020002 med føresegner (dagsett 17.04.23), planskildring (dagsett 20.05.22) og plankart (dagsett 20.05.22) med tilhøyrande vedlegg. Det vert synt til plan- og bygningslova § 12-12.

Behandling

AVRØYSTING:
Samrøystes vedteke.

Vedtak

Saka vert utsett til neste møte 24.05.23 grunna synfaring.

Behandling

Kjellaug Hartveit SP saka vert utsett for synfaring.

AVRØYSTING utsetting:
Utsettingsframlegget vart samrøystes vedteke.

Vedtak

Sak om kvotefri jakt på hjortekalv 2023:
Osterøy Kommune søkjer om kvotefri jakt på hjortekalv 2023 - dispensasjon frå hjorteviltforskriftens § 18 innan fristen 15.05.23

Behandling

Øyvind Litland AP, hadde slikt spørsmål: Plan- og kommunaltenisk utval var på synfaring på eit deponi på Hartveit, eg ser at det er gjort endringar der, kva vart utfallet i saka? Er det gitt noko løyve eller ei ny sak sidan utvalet var på synfaring?

Alf Terje Mortensen hadde slik merknad: sak 46/22, eit delegert løyve om vesentleg terrengingrep.

Utvalsleiar hadde slikt oppfølgingsspørsmål: Er det som skjer der i samsvar med løyve som vart gitt?

Kommunalsjef Arnstein Øvsthus undersøker saka til neste møte.

-------------------------

Øyvind Litland AP, hadde slikt tilleggsspørsmål: Det er ei tilsvarande sak i Solbjørgdalen, har de anledning til å undersøke status i den saka og? Gjeld gbnr 31/5 og gbnr 30/8

Kommunalsjef Arnstein Øvsthus undersøker saka til neste møte.

-------------------------

Kjellaug Hartveit SP, hadde slikt spørsmål: Det er kome eit brev frå Miljødirektoratet om kvotefri jakt på hjortekalv 2023, eg vonar at kommunen har fått brevet, korleis stiller utvalet seg til dette?

Utvalsleiar hadde slik merknad: Forvaltinga av hjortevilt skal utformast i eit seinare møte uavhengig av om ei søkjer eller ikkje. Grunnlaget for årets forvalting bør vera ein rapport frå denne sesongens jakt.

Kommunalsjef Arnstein Øvsthus gav slikt svar: Det er framleis ikkje utarbeidd ein rapport, men eg håpar at den er klart til neste møte.

Utvalsleiaren gjorde slikt framlegg: Osterøy kommune søkjer om kvotefri jakt på hjortekalv 2023 - dispenasjon frå hjorteviltforskriftens § 18 innan fristen 15.05.23.

AVRØYSTING:

Samrøystes vedteke.

-------------------------

Alf Terje Mortensen FRP, hadde slike spørsmål: Kva er status på skogsveg Hartveit - Hovden og kva er status på søknad om landsbruksveg på gbnr 107/2-3 Tyssebotn?

Leiar stab, samfunnsutvikling og kommunalteknikk Tore Johan Erstad undersøker sakene til neste møte.

-------------------------

Aksel Mjøs H, hadde slikt innsendt spørsmål: Kva er status i saka om redusert fartsgrense Hosanger?

Kommunalsjef Arnstein Øvsthus gav slikt svar: Eg har vore i kontak med Vestland fylkeskommune og fått tilbakemelding om at saka er sendt vidare til Statens Vegvesen. Vestlands fylkeskommune har tilrådd at fartsgrensa vert senka frå 80 til 60 på aktuell strekkje.