Møte i Formannskapet i Radøy den 15.01.2015

Vedtak

Formannskapet støttar rådmannen sitt svar på Debattgrunnlag for dialog om Arbeidsgjevarpolitiske utfordringar og Mellomoppgjeret 2015.

Behandling

Rådmannen orienterte om KS sitt debattgrunnlag som førebuing til strategikonferansar, som skal gje innspel til KS sine prioriteringar kring arbeidsgjevarpolitikk og tariffoppgjer i 2015. Rådmannen har gjeve svar på KS sine spørsmål knytt til debattgrunnlaget.
Tariffoppgjeret i år er eit mellomoppgjer der dei sentrale partane i utgangspunktet skal forhandla om lønsreguleringar. Rådmannen er oppteken av mellomoppgjeret skal ha fokus på lokal lønsutvikling. Samtidig ser han ei utfordring i at det krev relativt store ressursar for å gjennomføra forhandlingar om ein relativt liten pott, og at det gjerne vert bygt opp forventningar som ikkje står i forhold til potten det skal forhandlast om. Rådmannen er opptatt av at kostnadane knytt til pensjonsforpliktingane ikkje må bli større.

Formannskapet ønskjer å ha fokus på ein god lokal dialog og lokale prosessar i lønsforhandlingane.

Det vart sett fram følgjande felles framlegg:
Formannskapet støttar rådmannen sitt svar på Debattgrunnlag for dialog om Arbeidsgjevarpolitiske utfordringar og Mellomoppgjeret 2015.

Felles framlegg sett fram i møtet vart samrøystes vedteke.

Vedtak

Politisk reglement for Radøy kommune frå januar 2013 endrast ved at all tekst i § 9 om teieplikt slettast.

Behandling

Rådmannen orienterte om bakgrunnen for framlegg til endring i politisk reglement i Radøy kommune, knytt til teieplikta. Han ser at det kan oppfattast at teiepliktai det politiske reglementet er meir omfattande ved lukka møte enn det lova tilseier. Ved å fjerna alle tekst om teieplikt i paragraf 9, vil rådmannen unngå moglege mistydingar, samtidig som teieplikt er regulert i andre bestemmelsar. Han legg opp til revisjon av heile det politiske reglementet i ny kommunestyreperiode.

Frode Hervik (V) gav rådmannen ros for å reagera raskt då det vart avdekka behov for å gjera endringar i det politiske reglementet.

Formannskapet vedtok samrøystes rådmannen si tilråding.

Vedtak

Saka vert utsett for nærare utgreiing.

Behandling

Rådmannen peika på at kommunen må dekka kostnaden med både mast, mastehytte, veg og grunnkjøp ved å byggja master forutbygging av mobildekninga. Kommunen må også stå for framtidig vedlikehald av dette. Rådmannen konstaterer at ein million kroner i fylkeskommunalt tilskot i alle fall ikkje vil halda til utbygging av to mobilmaster, og at det kan sjå ut som det vil koma på godt over millionen å få opp ei mast.
Ordføraren informerte om at Telenor viser til at det minimum må opp to master på Radøy (Vågenes og Nordanger), men at dette langt frå løyser problema.
Formannskapet er oppteken av å få bygt ut mobilnettet i område som idag har svært dårleg mobildekning, og drøfta mogleg løysing med å nytta fiberutbygginga som infrastruktur for utbygging av basestasjonar for mobildekning.

Kenneth Murberg (H) ba om å få utgreidd i kva omfang ei fiberutbygging kan få for område med svakast mobildekning, og han kom med utsetjingsframlegg.
Ordføraren viste til at det er interessant å få drøfta med fylkeskommunen om dei midlane kommunen vart tildelt i 2010 kan nyttast til fiberutbygging. Frode Hervik (V) ville også få avklart vilkår for ei slik omdisponering, og kor stor del kommunen kan få behalda.

Formannskapet vedtok samrøystes utsetjingsframlegget.

Vedtak

Saka vert utsett.

Behandling

Rådgjevar plan, Kjersti Flatråker, orienterte om Trafikksikringsplan 2014-2020, og ho svara på spørsmål. Under drøftinga i formannskapet kom det ei rekkje innspel til endringar.

Frode Hervik (H) kom med følgjande endringsframlegg til Trafikksikringsplanen:

Fylkesvegar - endra tiltak:
Gang og sykkelveg Manger – Bø (må sjåast i samanheng med utbetring av bilvegen).

Nye tiltak - fylkesvegar
Toskavegen – leggja til rette for mjuke trafikantar med grus på vegskulder, og forlenga 50-sona til etter badeplassen.
Fortau Hesthaugen – Manger kyrkje
Opphøga gangfelt Langhøyane.

Kommunale vegar:
Ny løysing for parkering/av- og påstigning, Manger skule
Ny trafikkløysing/veg og parkering Hordabø barnehage.
Frode Hervik (V) kom også med følgjande protokollmerknad:
Det vert vist til ei nedsett gruppe som skal vurdere skuleskyssordninga, og at det er lagt inn ei styrking av budsjettet på dette punktet. Vurdering og vedtak om ytterlegare endringar i skuleskyssordninga vert såleis teken i eiga sak.

Ordførar Jon Askeland kom med framlegg om å ta med rekkverkpå Kvamme og Storheim under «små tiltak fylkesvegar» i planen.

Finn Frantzen (KrF) stilte spørsmål ved behov for 50-sone over Kartveit.

Silje Namtvedt (SP) meiner kommunen må leggja trykk på sentrale styresmakter for å få ned grensa for fri skuleskyss. Frå og med 2. klasse må gangavstanden heim-skule vera 4 km, og Namtvedt meiner det er for langt.Ho ber administrasjonen utarbeida politisk sak om dette.

Etter drøftinga i formannskapet oppsummerte rådgjevar plan framlegg til endringar i plandokumentet:
- Sjekka at alle innspel som skulle med er komme med (t.d. gangveg Toskavegen, fortau Hesthaugen – Manger kyrkje, vurdering av trafikktilhøva rundt Sæbø skule og barnehage, Dale grendahus (barnehage).- Presisera at ei nemnd er sett ned for å sjå problemstillingar knytt til farlege skulevegar/skuleskyss
- Vurdera å få inn haldningsskapande arbeid mot rus og bilkøyring (t.d. i punkt 6)
Større tiltak fylkesvegar:
Punkt 3: Endra «Manger – Ishuset til «Manger – Bø»
Små tiltak fylkesvegar:
- Punkt 1 - endra Urhaug til Langhøyane- Ta ut punkt om istandsetjing av Hallandsbrua då dette er utført
- Sett inn Helland i punkt 3
- Ta inn rekkverk Storheim og Kvamme

Større tiltak kommunevegar:
- Ta inn budsjettvedtak om ny innkjøring og parkeringsløysing for Bø barnehage og tiltak ved Manger skule som 1. og 2. prioritet

Formannskapet som styringsgruppe for kommunale plansaker ber administrasjonen leggja inn endringar i plandokumentet - sett fram i møtet - før Trafikksikringsplanen kjem til ny handsaming i formannskapet.

Det vart sett fram eit felles framlegg om å utsetja saka.
Felles framlegg vart samrøystes vedteke.

Vedtak

Framlegg til plankart for områdeplan for Bø er i tråd med overordna plan for området og områdeplanen (plankart, planskildring og føresegner) kan no ferdigstillast i tråd med dei intensjoane som ligg i plankartet. Styringsgruppa sluttar seg til det arbeidet som er gjort og ber rådmannen halde fram med plandokumenta til områdeplan for Bø etter dei avklaringar som vart gjort i møtet.

Behandling

Rådgjevar plan, Kjersti Flatråker, orienterte om planarbeidet og svara på spørsmål. Det kom fleire innspel under drøftinga i styringsgruppa for plansaker (formannskapet).

Styringsgruppa ber administrasjonen gjera følgjande endringar/tiltak i plankartet:

• Endre parkeringsareal nord for «Hordabøheimen» til arealføremål for konsentrert heilårsbusetnad

• Ta ut rundkjøring ved ny avkjørsle til parkering for barnehagen. Vurdera plassering av p-plassen nærare barnehagen på opparbeidd uteareal langsetter vegen.

• I dialog med grunneigar vurdera arealføremål på tomta for gamle «Hordabøheimen»

Styringsgruppa slutta seg til rådmannen si tilråding.

Vedtak

Formannskapet drøfta vidare arbeid med kommunereform og ny kommunestruktur.

Behandling

Radøy kommunestyre har gjort vedtak om å gå i forhandlingar om samanslåing. Ordførar Jon Askeland peika på utfordringa som ligg i at tre kommunar har sagt ja til forhandlingar, medan andre kommunar har signalisert at dei vil gjera vedtak for å vera med i denne prosessen. Med frist til å gje endeleg svar om kommunesamanslåing i mai 2016, meiner ordføraren det er viktig å koma i gang med prosessen raskast mogleg. Han meiner det er viktig å leggja opp til «stopp-punkt» undervegs i forhandlingane, for å unngå å koma i den situasjonen at det då berre nokre av kommunane som er klar til å gjera endeleg vedtak. Ordføraren har forventningar til at prosessen blir teke eit steg vidare etter at rådmannsutvalet har drøfta saka.

Formannskapet slutta opp om ordføraren sitt syn, og gav rådmannen eit klart mandat - i møte med dei andre rådmennene, om å jobba for å koma i gang med forhandlingar utan å venta for lenge på dei som ikkje har bestemt seg.

Vedtak

Radøy kommune sluttar seg til Fylkestinget sitt vedtak frå 10.12.14 om

bompengesøknad for Nordhordlandspakken.

Behandling

Kenneth Murberg (H) meiner det er i strid med nytteprinsippet å plassera bomstasjon i Isdalstø frå dag 1, så lenge tunnelprosjektet mellom Isdal og Knarvik i første omgang ikkje er med i Nordhordlandspakken. Det er lagt opp til at dette prosjektet først kan koma med i samband med revisjon av pakken. Murberg meiner dette er ei endring av spelereglane som heile tida har vore lagt til grunn.

Murberg kom med følgjande protokolltilførsel:
Høgre kjem tilbake med endeleg standpunkt i saka etter drøftingar i partigruppa.

Formannskapet vedtok rådmannen si tilråding med 6 mot 1 røyst (Roy Bø, FrP).

Vedtak

Målstyringsdokumentet for Radøy kommune vert godkjend.

Behandling

Rådmann Jarle Landås orienterte om arbeidet med målstyring og målstyringsdokumentet. Han understreka at målstyringa skal vera eit langsiktig styringsverktøy, og at det som no er eit førstegenerasjonsdokument skal forbetrast til neste år. Målstyringsdokumentet skal inngå i budsjettdokumentet kvart år, og det skal rapporterast på målstyring i årsmeldinga. Rådmannen legg stor vekt på at målutarbeidinga skal vera forankra i tenestene.Målstyringsdokumentet fekk god mottaking i formannskapet.

Formannskapet vedtok samrøystes rådmannen si tilråding.

Vedtak

Meldingar og referatsamer vart teke til orientering.

Behandling

Det vert lagt fram følgjande meldingar og referatsaker:

a. Selskapsavtale Region Nordhordland Helsehus IKS
b. Region Nordhordland Helsehus IKS - stiftingsmøte protokoll 12. des.
c. Region Nordhordland Helsehus IKS – protokoll representantskapet 12. des.
d. Region Nordhordland Helsehus IKS – innstilling valnemnda
e. Budsjett Region Nordhordland Helsehus IKS
f. Regionrådet Nordhordland – protokoll møte 12. desember
g. Nordhordland Utviklingsselskap IKS – protokoll representantskapet 12. des.
h. Nordhordlandstinget 16. februar
i. Cittaslow – referat frå møte 9. desember
j. Endringar i kommunelova og offentleglova – sanksjon og iverksetjing
k. Orienteringar frå ordførar/rådmann

Oppgradering i Skageneset:
Ordførar Jon Askeland orienterte om planane for oppgradering av bygningar og uteområde i friluftsområdet Skageneset. Kommunen og Bergen og Omland friluftsråd har ein god dialog, og BOF vil i løpet av året søkja direktoratet om løyvingar til arbeidet. Ordføraren har godt håp om at storvøla i Skageneset kan gjennomførast i 2016. Ordføraren og nokre andre eldsjeler, markerte starten på Friluftslivets år på Nøttveitveten natt til 14. januar, dette var etter oppmoding frå klima- og miljøvernministeren til ordførarane i landet.

Nordhordlandsting:Det vert halde Nordhordlandsting 16. februar. Nordhordlandstinget er ei samla av formannskapa i kommunane i regionen. Kommunalminister Jan Tore Sanner kjem på møtet. Nordhordlandstinget er å sjå på som obligatorisk for formannskapsmedlemane, med ordinær møtegodtgjersle.

Cittaslow:Ordføraren informerte om invitasjon til folkemøte om Radøy som cittaslow-kommune. Rådmannen peika på at møtet er eit ledd i prosessen med å finna ut om det er nok interesse til at kommunen skal søkja om medlemskap. Han understreka at eigarskapet til Cittaslow-satsinga må vera hjå ulike aktørar i lokalsamfunnet. Rådmannen skal leggja fram ei sak til politisk behandling om mogleg Cittaslow-medlemskap.

Toppleiarmøte Helse Bergen:Ordføraren orienterte om det årlege toppleiarmøtet mellom kommunane og helseføretaka. Mellom anna blir det bygd opp eit raskt og betre system for flyt av personopplysningar, samtidig som krav til personvern blir ivareteken.

Strategisk næringsplan: Ordføraren orienterte frå eit eigarmøte i Business Region Bergen. Det skal gjerast ein revisjon av strategisk næringsplan, og i forkant skal det gjennomførast ei høyring der ein spør næringslivet om deira forventningar om tilrettelegging for næringslivet.

Oppfølging budsjett: Rådmannen orienterte om oppfølging av budsjettvedtaket. Han legg opp til å ta ein gjennomgang om dette arbeidet i neste formannskapsmøte. Han informerte om at ein god del av investeringane i budsjettet for 2015 vert prosjektorientert.

Ekstremvéret «Nina»:Rådmannen oppsummerte handteringa av ekstremvéret «Nina». Han viste til at det aldri har vore registrert så lang periode med orkan ved Hellisøy fyr, som ein illustrasjon på kor heftig uveret var. Store delar av Radøy vart utan straum, telefon og nettsamband. Også naudtelefonen for brann (110) forsvann, og med same situasjon i Austrheim og Lindås kunne heller ikkje brannvernet i desse kommunane bidra med «back up». I denne situasjonen vart det stasjonert ei minimumsbemanning på brannstasjonen på Manger.Rådmannen konstaterer at evalueringa i ettertid har vist at det ikkje var noko hendingar av akutt art som ikkje vart handtert. Han fekk rapport frå heimetenesta om at situasjonen var under kontroll, og understrekar at utfordringane ikkje var så omfattande at det var nødvendig å setja krisestab. For å styrka beredskapen er rådmannen oppteken av å hausta erfaringar frå ekstremveret. Mellom anna skal han sjå nærare på behovet for aggregat-situasjonen i kommunen, og drivstofflager i tilknytning til det.

Formannskapet tok meldingar og referatsaker til orientering.

Vedtak

Skatteøyret for 2015 for personlege skattytarar vert fastsett etter maksimal sats slik det går fram av Stortinget sitt budsjettvedtak for 2015.

Behandling

Formannskapet vedtok samrøystes rådmannen si tilråding.

Vedtak

Saka vert oversendt den kommunale byggjenemnda for veg, vatn og avløp. Byggjenemnda knyter til seg naudsynt fagkompetanse når det er behov for det.

Behandling

Det kom følgjande felles framlegg:
Andre setning i rådmannen si tilråding vert endra til: "yggjenemnda knyter til seg naudsynt fagkompetanse når det er behov for det."

Formannskapet vedtok samrøystes rådmannen sitt framlegg, med endringsframlegg i møtet.