Møte i Formannskapet i Radøy den 01.06.2016

Vedtak

Forskrift om sal, skjenking og opningstider for alkoholhaldig drikke vert vedtekeslik den ligg føre, med følgjande endring:

I punkt 2c vert "jule-" stroken frå opplistinga.

Det er ikkje tillate med sal og utlevering av alkoholhaldige drikkevarer på julafta.

Behandling

Else Marie Skartveit Dale (KrF) meiner det må forplikta å vera barne- og ungdomskommune, og ho ønskjer å gje ei handsrekking til dei unge som slit med alkohol i heimen og som kvir seg til jul.

Skartveit Dale kom med følgjande framlegg:

I punkt 2c vert "jule-" stroken frå opplistinga.

Ho sette fram følgjande tilleggsframlegg som punkt 2e i forskrifta:

Det er ikkje tillate med sal og utlevering av alkoholhaldige drikkevarer på julafta.

Kenneth Murberg (H) retta fokus mot ein mogleg samanheng mellom ruskjøring på dagtid og tidleg opningstid for sal av alkoholhaldige drikkevarer i butikkane. Alkohollova opnar for at det på kvardagane kan seljast alkohol i butikkane mellom kl. 08.00-18.00 på kvardagar. Murberg ønskjer ei vurdering frå lensmannen i Nordhordland om det er nokon med alkoholproblem som kjøper alkohol tidleg, og at desse kan tenkjast å kjøra i ruspåvirka tilstand og skapa utrygge situasjonar for t.d. skuleborn på veg heim. Han reiste spørsmål om det kan vera ein tanke å innskrenka salstida om morgonen til t.d. kl. 09.00.

Formannskapet ba ordføraren følgja opp denne problemstillinga overfor lensmannen i Nordhordland.

Formannskapet vedtok samrøystes rådmannen sitt framlegg til vedtak, med Else Marie Skartveit Dale (KrF) sitt framlegg sett fram i møtet.

Vedtak

Formannskapet legg utkast til retningsliner for kulturmidlar i Radøy kommune ut på høyring med høyringsfrist 15. august.

Behandling

Rådgjevar kultur, Bente K. Hervik, svara på spørsmål om dei nye retningslinene for tildeling av kulturmidlar.

Dei nye retningslinene har større fokus enn før på aktivisertbaserte kriterie for tildeling.

Else Marie Skartveit Dale (KrF) var litt bekymra over at tilskotspotten til "andre lag" kunne verta i minste laget. Ho sette fram eit forslag om å oppretta 20 prosent av tilskotspotten til denne gruppa lag, men trekte framlegget.

På grunn av sommarferien som står for døra, meiner Jostein Borlaug (A) det er fornuftig å gje lenger høyringsfrist.
Han sette fram følgjande endringsframlegg:

Høyringsfristen vert sett til 15. august.

Formannskapet vedtok samrøystes rådmannen sitt framlegg til vedtak, med Jostein Borlaug (A) sitt framlegg sett fram i møtet.

Behandling

Etter oppmoding frå medlemsmøte i Senterpartiet gjorde Anne Berit Bø Palmesen framlegg om å gjennomføra ei ny innbyggarundersøking, der det berre vert stilt eitt spørsmål:

Vil du byggja ny kommune? Og svaralternativa må vera ja, nei, eller veit ikkje.

Representantane frå dei andre partia reagerte negativt på det dei oppfatta som ein omkamp om innbyggarundersøkinga. Vidar Grindheim (H) peika på at kommunestyret har gjort vedtak om å gjennomføra innbyggarundersøking som siste høyring av innbyggarane i spørsmålet om Radøy skal gå inn i ein ny kommune. Det vart konkludert med at styringsgruppa/formannskapet ikkje kan overprøva eit vedtak/standpunkt i KS.

Kritikken mot gjennomføringa av innbyggarundersøkinga vart grundig drøfta i styringsgruppa, mellom anna på bakgrunn av innspel og klage. I styringsgruppa varsla ordførar at det blir gitt eit svar på innsendt klagebrev. Det vert lagt opp til orientering i kommunestyret 15. juni.

Hovudtillitsvald Elisabeth Bygstad i Utdanningsforbundet gav på vegne av seg og hovudtillitsvald Else Soltveit i Fagforbundet uttrykk for at dei ikkje ville bli tatt til inntekt for styringsgruppa si godkjenning av spørsmålstillinga i innbyggarundersøkinga. Bygstad meiner utkastet som vart lagt fram for styringsgruppa ikkje var godt nok gjennomarbeidd. Ho meiner tidspresset vart i største laget.

Kenneth Murberg (H) meiner det ville vera å undervurdera radværingane om ein i innbyggarundersøkinga skulle "påtvinga" folk utelukkande eit ja/nei-svar. Han meiner folk er i stand til å gjera sine vurderingar kring dei spørsmåla som vart gitt.

Det vart også peika på at folk i Lindås og Fedje fekk likelydande spørsmål, og at dei ikkje hadde vanskar med å gjera til kjenne kva dei meiner.

Jostein Borlaug (Ap) peika på at det i denne innbyggarundersøkinga er blitt færre som er usikre kring spørsmålet om å gå inn i ein ny kommune, enn det som var tilfellet i ei undersøking i fjor haust.

Ordføraren presenterte den vidare tidsplanen og framlegg til endringar i intensjonsavtalen mellom kommunane Lindås, Radøy og Meland.

Vedtak

Tertialmelding for perioden januar – april 2016 vert teken til orientering.

Behandling

Rådmannen orienterte om drift og investering etter dei fire første månadane. Han peika mellom anna på at skatteinngangen er kraftig redusert og at det kan gå mot eit mindreinntekt på fleire hundre tusen kroner.

Utgiftssida ser i hovudsak ut til å vera under kontroll i høve til budsjett, men rådmannen er bekymra over auke i sosialutbetalingane - som på grunn av stigande arbeidsløyse er ein generell tendens også i AS Norge for tida. Rådmannen understreka at utviklinga blir følgd nøye, og at rådmannen saman med NAV-leiaren drøftar kva som kan gjerast for å avgrensa kostnadane.

Rådmannen konstaterer at kommunen held stø kurs i høve budsjettet, og ser så langt ut til å halda seg innanfor rammene.

På investeringssida er det i 2016-budsjettet lagt inn eit prosjekt knytt til utviding av sjukeheimsplassar. Rådmannen opplyste om at i dag er overkapasitet på inntil 14 sengeplassar på Velferdssenteret. Han informerte om at kommuneoverlegen er i gang med å kartleggja behovet for sjukeheimsplassar på kort og lengre sikt.

Formannskapet hadde også ei drøfting av bemanningssituasjonen ved Velferdssenteret knytt til nedgangen i tal sengeplassar. Ulike løysingar vart lufta.

Ordførar Jon Askeland viste til det store dugnadsløftet som er gjort i bygdene med oppgradering av turstiar, basert på kommunale midlar til utstyr. I 2016-budsjettet er det lagt inn midlar til turstiar i ein fellespot med turløype på Manger og steinaraldersti-prosjekt ved Fosnstraumen. Ordføraren ba rådmannen koma tilbake med ei orientering om kor mykje av ramma på to mill. er tenkt brukt til turstiar.

Formannskapet vedtok samrøystes rådmannen sitt framlegg til vedtak.

Vedtak

Rekneskapsmessig mindreforbruk frå 2015, kr 3.256.055,07 vert sett av tilfritt disposisjonsfond på balansekonto 2.56080.001.

Behandling

Formannskapet vedtok samrøystes rådmannen sitt framlegg til vedtak.

Vedtak

Radøy kommune sitt budsjetterte tilskot i 2016 på kr 50.000,- til kommunestyregruppene, vert gjeve med kr 1000,- i grunnstøtte til kvar gruppe og kr 1760,- pr. representant i gruppene.

Behandling

Formannskapet vedtok samrøystes rådmannen sitt framlegg til vedtak.

Vedtak

Meldingar og referatsaker vert tekne til orientering.

Behandling

Tariffoppgjeret: Formannskapet slutta seg til det framforhandla tariffoppgjeret 2016 som har vore til uravstemming.

Nynorsk for innvandrarar: Lindås kommune er vertskommune for Lindås læringssenter, som også gir norskopplæring til vaksne flyktningar og innvandrarar. Dette er eit tilbod fleire nabokommunar nyttar seg, mellom anna Radøy. Mållaga i regionen har kome med eit skriv med sterk oppmoding om å nytta nynorsk i opplæringa av desse gruppene.
Rådmann Jarle Landås orienterte om utkast til ein skriftleg avtale med Lindås kommune, der det blir innarbeidd i avtalen at opplæringa fortrinnvis skal skje på nynorsk.

Asylmottak: Rådmannen avventar situasjonen før kommunen riggar noko større apparat i samband med flyktningemottak på Radøytunet. Oppstart av mottaket er 1. juli, men det er førebels uvisst kor mange som vil vera på plass frå starten. Det er forventa ei gradvis opptrapping av drifta. Norsk Folkehjelp, som skal drifta mottaket, skal knytta til seg sju årsverk.

Rådmannen peika på at flyktningemottaket på Radøytunet vil kreva kommunale ressursar, særleg knytt til helsetenester og opplæring. Han meiner kommunen må koma med ei oppmoding om at mottaket har bemanning også på kveld og natt.
Miljøretta helsevern vil gjennomføra tilsyn for å sjå på ulike tilhøve knytt til bygningsmasse og drift, og moglege smittevern-utfordringar.

Formannskapet vedtok samrøystes rådmannen sitt framlegg til vedtak.