Møte i Formannskapet i Radøy den 28.05.2015

Vedtak

Presentasjonen av interkommunal nærings- og samfunnsplan for region Nordhordland vert tatt til orientering. Formannskapet oppmodar NUI om å tilpassa denenærings- og samfunnsplanen til den nye næringsplanen for bergensregionen (BrB).

Behandling

Kari Evensen Natland frå Nordhordland Utviklingsselskap IKS gav ein grundig presentasjon av utkast til interkommunal nærings- og samfunnsplanen for Region Nordhordland. Planarbeidet er forankra i regionrådet, og hovudmålet er at Nordhordland skal vera ein region med sterkt næringsliv og attraktivt bumiljø. Natland Evensen peika på behovet for ein plan som kan binda saman kommunane, fylkeskommunen og Business Region Bergen sine planar. Planen skal nyttast av kommunane og Nordhordland Utviklingsselskap IKS i vidare arbeidet med nærings- og samfunnsutvikling. Regionen treng strategiar for å handtera den forventa folketalsveksten og å ta ut det regionale potensialet ved å tilrettelegga for betre og meir målretta samarbeid. Kari Evesen Natland sa at regionstankegangen er ein føresetnad for å nå måla.

Endeleg planframlegg kjem til politisk handsaming i kommunestyret tidleg i neste kommunestyreperiode.

Formannskapet drøfta utkast til interkommunal nærings- og samfunnsplan for region Nordhordland.
Frode Hervik (V) kom med innspel om å få med i tiltaksdelen i planen eit punkt om reiselivssatsing i regionen. Han peika på Nordhordland som destinasjon er viktig som grunnlag for å utvikla reiselivsprodukt lokalt.
Formannskapet drøfta også behovet for ei sterkare samhandling mellom ulike aktørar for at regionen skal stå sterkast mogleg og lukkast i utviklinga av regionen.

Frode Hervik (H) kom med følgjande protokolltilførsel:
Formannskapet oppmodar NUI om å tilpassa interkommunal nærings- og samfunnsplan for region Nordhordland til den nye næringsplanen for bergensregionen (BrB).

Formannskapet tek presentasjonen av interkommunal nærings- og samfunnsplan for region Nordhordland til orientering. Formannskapet oppmodar NUI om å tilpassa den interkommunale nærings- og samfunnsplanen til den nye næringsplanen for bergensregionen (BrB).

Vedtak

Radøy kommune gjev si tilslutning til Strategisk næringsplan for bergensregionen 2015-2020, inklusivt Tiltak 2015-2016. Kommunen vil søkja å innarbeida planelementa i eigne kommunale planar der dette er relevant.

Business Region Bergen vert oppmoda om å laga ein kortversjon av næringsplanen for bergensregionen.

Behandling

Formannskapet drøfta næringsplan for bergensregionen.
Det vart peika på behov for å få utarbeidd ein kortversjon av planen. Frode Hervik (V) kom med protokolltilførsel om å oppmoda BrB til å laga ein kortversjon.

Formannskapet vedtok rådmannen sitt framlegg til vedtak, med protokolltilførsel sett fram i møte.

Vedtak

Saka vert utsett. Rådmannen legg fram eit utgangspunkt til drøfting og politisk uttale til møte i formannskapet 18. juni.

Behandling

Formannskapet drøfta høyringsnotatet om endringar i helgedagslova for å gje løyve til søndagsopne butikkar, som Kulturdepartementet har sendt på høyring. Formannskapet ønskjer å gje uttale til høyringa, men det er ulike syn på kva uttalen skal innehalda.

Av tidsomsyn kom ordføraren med framlegg om å utsetja saka til formannskapet sitt møte 18. juni, og at rådmannen til dette møtet legg fram eit utgangspunkt til drøfting og politisk uttale.

Formannskapet vedtok ordføraren sitt framlegg til vedtak.

Vedtak

Radøy kommune sel tilleggsareal til NGIR til utvikling av gjenbruksstasjonen på Manger. Salssum vert basert på marknadspris.
Formannskapet ber administrasjonen avklara om det er aktuelt med ei "samarbeidsløysing" mellom NGIR og kommunen om nytt bygg.

Behandling

Kenneth Murberg (H) meiner kommunen bør vurdera om NGIR-utbygginga også kan gje plass til kommunal lagerhall.

Formannskapet ber administrasjonen avklara om det er aktuelt med ei "samarbeidsløysing" mellom NGIR og kommunen om nytt bygg.

Vedtak

Rekneskap og årsmelding vert godkjent slik dei ligg føre.

Behandling

Økonomisjef Sveinung Kvamme orienterte om årsmelding og rekneskap for 2014. Han konstaterer at kommunen sine driftsutgifter aukar meir enn inntektene. Vedteke budsjett for 2014 synte negativt driftsresultat kr 426.000, endeleg resultat vart ca 3,4 mill svakare. Det skuldast mellom anna svikt i inntektsutjamninga på ca 1,7 mill. kroner, utvida tilbod i Omsut ca 2 millionar (men innsparing på andre delar av tenesta gav netto meirkostnad ca 1,4 mill.), auka kostnad gjesteelevar ca 0,5 million, og sterk auke i utbetalingar til sosialhjelp.

På investeringssida vart nokre prosjekt delvis eller ikkje gjennomført;
- Heimetenesta utvida lokale - utsett
- Hovudleidning Lifjell – Manger, utsett til 2015
- Renseanlegg Manger, utsett til 2015
- Brannbil, ferdig i 2015
- Terapibasseng er dekka gjennom forsikring, og er difor ikkje belasta investeringsrekneskapen

Utsett igangsetjing på ulike investeringar gjer at investeringskostnadane i 2014 vart lågare enn budsjettert. Unytta lånemidlar vil gå med til budsjetterte prosjekt i 2015.

Formannskapet vedtok samrøystes rådmannen sitt framlegg til vedtak.

Vedtak

Tertialmelding for perioden januar – april 2015 vert vedteken slik den ligg føre.

Behandling

Formannskapet vedtok samrøystes rådmannen sitt framlegg til vedtak.

Vedtak

Driftsbudsjettet for 2015 vert justert i samsvar med oppstillinga i saksutgreiinga knytt til skjema 1A og 1B.

Behandling

Økonomisjef Sveinung Kvamme orienterte i saka. Fylkesmannen i Hordaland har kome med klare føringar for at kommunen må justera ned driftsbudsjettet med 1,7 mill. kroner i 2015. Kommunen har ikkje tilstrekkeleg midlar å driva for, og flyt på unytta lånemidlar. Likviditetet er svak, og det vil røyna på mot slutten av året. Han peika på at det må gjerast strukturelle grep for å få driftskostnadane ned.

Rådmannen viste til at arbeidet med innsparingar i dei ulike sektorane er i gang. Det finst ingen buffer å gå på. Det må gjerast grep for ikkje å gå med underskot i 2015. No handlar det først og fremst om kortsiktige tiltak, men rådmannen er tydeleg på at det er nødvendig å gjera meir djuptpløyande og langiktige tiltak i neste runde. Det må gjerast i samband med budsjettprosessen for 2016.

Frode Hervik (V) ser Robek-spøkelset i horisonten dersom ikkje den økonomiske situasjonen blir retta opp. Han peika på at posten for mindre investeringar er føreslege brukt til anna formål, og etterlyste i den samanheng kjøp av stolar til kinosalen. Hervik viste til intensjonen om at kommunen skulle kjøpa kinostolar når det dukka opp eit godt tilbod i marknaden. Han ba difor om at sak om kinostolar vert lagt fram til politisk drøfting neste gong det moglegheit for å gjera eit godt kjøp dukkar opp.

Ann Christin Hoen (A) etterlyste status for nedtrekk teknisk forvaltning. Rådmannen informerte om tiltak som er gjort, mellom anna ved å tillegga teknisk forvaltning fleire oppgåver også knytt til bruk av leiarressursar.
Finn Frantzen (KrF) meiner det er behov for ei gjennomgang av drifta på legesenteret. Han stilte også spørsmål ved auke i tal tilsette i kommunen dei siste to-tre åra. Rådmannen viste til at nye stillingar i kommunen har samanheng med utvida tenestetilbod, t.d. i Omsut, og ikkje har samanheng med styrka bemanning.

Roy Bø (FrP) uttrykte stor bekymring over det høge sjukefråveret, og han oppmoda administrasjonen om å vurdera tiltak for å få sjukefråveret ned. Rådmannen sa at langtidssjukefråveret er den største utfordringa, og informerte om ulike tiltak vert vurdert for å få ned sjukefråveret.
Kenneth Murberg (H) ser behov for større fokus på budsjettdisiplin, og støttar ein gjennomgang for å sikra optimal drift i den kommunale drifta. Han signaliserte også at han ikkje føler at nye leiarordninga i kommunen ikkje har innfridd forventningane hans. Han ønskjer meir proaktivitet.

Ordføraren oppmoda rådmannen om å utsetja nyoppretta stilling som kommunepsykolog, og også utsetja andre nyoppretta stillingar. Ordføraren gav også uttrykk for at nytilsetjing av plankonsulent også må vurderast på nytt i lys av budsjettvedtak om nedtrekk på avdelinga, og heller vurdera omrokkering av ressursane på avdelinga.

Rådmannen peika på at månadsrapporteringa frå tenestene er eit ledd i å styrka budsjettdisiplin og ansvarleggjering. Han får full oppbakking til å gå vidare med arbeidet for å redusera driftskostnader ut frå saksutgreiing og signala som kom fram i møtet. Rådmannen kjem tilbake med oversikt over konkrete tiltak på neste møte i formannskapet.

Formannskapet vedtok samrøystes rådmannen sitt framlegg til vedtak.

Vedtak

Sak om busetjing av flyktningar lagt fram som drøftingssak i kommunestyret.

Behandling

Av tidsomsyn gjorde ordføraren framlegg om at sak om busetjing av flyktningar ikkje vert drøfta i formannskapet, men vert lagt fram som drøftingssak direkte i kommunestyret.

Ordføraren sitt framlegg vart samrøystes vedteke.

Vedtak

Saka vert utsett.

Behandling

Av tidsomsyn gjorde ordføraren framlegg om å utsetja saka.

Vedtak

Styringsgruppa slutta seg til administrasjonen sin framlagde status for arbeidet og framdriftsplan for revisjon av kommuneplan.

Behandling

Arealplanleggar Kjersti Flatråker fokuserte på dei tema som er omfatta av kommuneplan-revisjonen. Ho presisterte at det i denne revisjonen ikkje skal leggast inn nye byggeområde i planen. Eit sentralt arbeid i revisjonen er å få på plass LNF spreidd busetnad, slik at folk i dei aktuelle områda skal sleppa å søkja om dispensasjon for det minste tiltak.

Leiar for teknisk forvaltning, Tonje Nepstad Epland, viste til fylkesmannen sine klare føringar for arbeidet med revisjon av kommuneplan. I føresegnene skal det vera gjort ei vurdering av alle område som blir omregulert frå LNF til LNF spreidd og tatt nødvendige omsyn i høve til andre delar av lovverket.

Formannskapet drøfta status og framdrift for kommuneplan-revisjon.
Frode Hervik (V) oppmoda administrasjonen om å leggja til rette for funksjonell strandsone i alle dei fire sentra, slik det no blir gjort i områdeplan for Bø. Det vart frå fleire peikt på at det fort kan oppstå mistydingar i samband med endringar i plan- og bygningslova 1.juli i år, der folk i god tru går igang med mindre prosjekt utan å søkja. Tonje Nepstad Epland understreka at det både frå kommunen si side og frå anna hald vert gått ut med informasjon om kva endringane i regelverket inneber.

Styringsgruppa slutta seg til administrasjonen sin framlagde status og framdriftsplan for revisjon av kommuneplan.

Vedtak

Saka vart drøfta i styringsgruppa.

Behandling

Ordføraren orienterte styringsgruppa om dei siste forhandlingane som har vore i det store Nordhordlands-alternativet og i 3-kommune-alternativet mellom Radøy, Meland og Lindås. Det er god forhandlingsvilje og godt klima i begge samanhengar.

I 3-kommune-forhandlingane er det lagt fram utkast til ein demokrati- og folkevaldmodell, med eit kommunestyre på 43 representantar, som er langt over minimumskravet. Det er lagt opp til ein modell som femner breitt for å sikra god representasjon frå dei respektive kommunane. I tillegg til formannskap (13 medl.) er modellen bygt opp med fire utval; utval for oppvekst og kultur (9 medl.), helse og omsorg (9 medl.), samfunnsutvikling (9 medl.) og administrasjon (7 medl.), i tillegg kontrollutval (der tre medl. skal vera frå kommunestyret).
Det vert lagt opp til gjennomgåande representasjon, som inneber at kommunestyre-representantane også skal vera med i eitt av utvala.

Ordføraren presenterte også om overordna prinsipp for tenesteorganisering/struktur som ein har kome fram til i 3-kommune-alternativet. Det betyr mellom anna at folk skal få tenester der dei bur. Ordføraren slår fast at det ikkje blir noko masseoppseiingar av tilsette uavhengig om det skulle bli storkommune eller 3-kommune-samanslåing. I forhandlingane mellom Radøy, Lindås og Meland vert det også lagt vekt på at "best praksis" i dagens kommunar skal byggast vidare på når den nye kommunen skal byggast. Harmonisering av skattar og avgifter har óg vore eit sentralt punkt i desse forhandlingane. Harmoniseringa går i retning av at det ikkje blir eigedomsskatt på hus og hytte i ein ny kommune.

Styringsgruppa drøfta også behovet for å få ut grundig informasjon til innbyggarane om forhandlingane. Det vert lagt opp til å halda folkemøte til hausten.

Vedtak

Sak om meldingar og referatsaker vert utsett til neste møte.

Behandling

Formannskapet utsette sak om meldingar og referatsaker til neste møte.

Vedtak

Radøy kommune sluttar seg til at arealramma for Region Nordhordland Helsehus vert auka til 12 000 m2. Regionen vil då få eit best mogeleg framtidsretta bygg når det står ferdig i 2018 og vera med å sikra nødvendig areal for framtidsretta tenester for innbyggjarane.

Radøy kommune sluttar seg til at selskapsavtalen §7-4 vert endra og at høgste ramme for selskapet sitt samla låneopptak vert sett til 450 millionar kroner.

Radøy kommune sluttar seg til at selskapsavtalen §5-1 vert endra til «Styret består av 5 medlemmer» og § 5-4 til «Kvart styremedlem har ei røyst. Styret kan ta avgjerder når minst tre av medlemene er til stades».

Behandling

Formannskapet vedtok samrøystes rådmannen sitt framlegg til vedtak.